Tatago Rehoboama e be e le Solomone. Solomone o bušitše Isiraele ka mengwaga e 40. (1 Dikg. 11:42) Solomone o hwile ka ngwaga wa 997 B.C.E. Ka morago ga moo, Rehoboama o ile a tloga Jerusalema a ya Shikeme gore a yo tlotšwa gore e be kgoši. (2 Dikor. 10:1) Solomone o be a le bohlale kudu, ka gona na o nagana gore Rehoboama o be a ka se nyake go ekiša mohlala wa tatagwe? Rehoboama o be a tla tseba bjang gore e se kgale go be go tla bonagala ge e ba a ka kgona go rarolla mathata?

Ge Rehoboama a thoma go buša a ka ba a ile a lemoga gore dilo ga di sepele gabotse mmušong wa Isiraele. Ge nako e dutše e eya, batho bao ba bego ba bolelela setšhaba ba ile ba mmotša gore: “Tatago o be a thatafišitše joko ya rena; bjale wena dira gore modiro o thata wa tatago le joko e boima yeo a bego a re rwešitše yona di be bohwefo, gomme re tla go hlankela.”​—2 Dikor. 10:3, 4.

Taba yeo e ka ba e ile ya dira gore Rehoboama a gakanege. Ge a be a ka dira seo batho ba se nyakago, gona go ra gore yena, lapa la gagwe le ba bangwe ba ka mošate ba be ba tlo swanelwa ke go fokotša dilo tša manobonobo tša ka mošate le go se kgopele setšhaba dilo tše dintši. Ka lehlakoreng le lengwe, ge a be a ka se theetše batho bao, setšhaba se be se ka mo hlanogela. Bjale o be a tlo dira’ng? O ile a thoma ka go nyaka keletšo go banna ba bagolo bao e kilego ya ba baeletši ba Solomone. Eupša ka morago o ile a ya go nyaka keletšo go dithaka tša gagwe. O ile a tšea keletšo ya dithaka tša gagwe, ke moka a botša setšhaba a re: “Ke tla dira gore joko ya lena e be boima kudu, e bile nna ke tla oketša boima bja yona. Tate yena o be a le itia ka dikgati, eupša nna ke tla le itia ka difepi tše di nago le dintlhana.”​—2 Dikor. 10:6-14.

Re ithuta’ng tabeng ye? Re ithuta gore go bohlokwa gore re theetše batho ba bagolo bao ba godilego moyeng. Ka ge ba na le phihlelo, ba ka kgona go bona kamoo phetho e itšego e ka feleletšago ka gona gomme ba re nea keletšo e botse.​—Jobo 12:12.

Ge setšhaba se be se thoma go hlanoga, Rehoboama o ile a kgoboketša madira a gagwe. Eupša Jehofa o ile a mo thibela. O ile a romela moporofeta Shemaya gore a iše molaetša wa gore: “Le se ke la rotoga la yo lwa le bana babo lena, e lego bana ba Isiraele. Yo mongwe le yo mongwe a a boele gae, gobane selo se se diregile ka baka la ka.”​—1 Dikg. 12:21-24. *

Rehoboama o be a se a swanela go lwa. Nagana feela gore o ile a ikwa bjang ka taba yeo. Batho ba be tlo re’ng ka kgoši yeo e nyakago go itia setšhaba ka “difepi tše di nago le dintlhana” eupša e palelwa ke go lwa le batho ba go e hlanogela? (Bapiša le 2 Dikoronika 13:7.) Eupša Rehoboama le madira a gagwe ba ile “ba kwa lentšu la Jehofa gomme ba boela magaeng a bona ka go dumelelana le lentšu leo la Jehofa.”

Re ithuta’ng go Rehoboama? Go bohlokwa go kwa Modimo, le ge go mo kwa go ka dira gore batho ba re kwere goba ba re nyatše. Ge re ekwa Modimo o tla re amogela a ba a re šegofatša.​—Doit. 28:2.

Go ile gwa direga’ng ka Rehoboama? Ka ge a ile a se ye ntweng, o ile a thoma go swarega ka go aga metse ya tikologong yeo a bego a e buša, e lego tikologo ya Juda le ya Benjamini. O ile a tiiša metse e mentši “ka tekanyo e kgolo kudu.” (2 Dikor. 11:5-12) Sa bohlokwa le go feta ke gore ka nako e itšego o ile a kwa melao ya Jehofa. Ge Baisiraele bale ba meloko e lesome bao ba bego ba bušwa ke Jeroboama ba be ba rapela medimo ya maaka, ba bantši ba bona ba ile ba “thekga Rehoboama” ka go ya Jerusalema go yo hlankela Jehofa. (2 Dikor. 11:16, 17) Ka ge Rehoboama a ile a kwa Jehofa, mmušo wa gagwe o ile wa tia.

Ge mmušo wa Rehoboama o be o šetše o tiile, o ile a dira selo sa go makatša. O ile a se sa kwa Jehofa gomme a thoma go rapela medimo ya maaka. Eupša go re’ng a ile a hlanogela Jehofa? Na go ka direga gore o be a hlohleletšwa ke mmagwe yo e bego e le Moamoni? (1 Dikg. 14:21) Ga re tsebe. Eupša go sa šetšwe gore lebaka e be e le lefe, setšhaba se ile sa mo thekga. Ka baka leo, Jehofa o ile a dumelela Kgoši Shishaka wa Egipita gore a fenye metse e mentši ya Judea. Le ge Rehoboama a be a tiišitše metse yeo, seo ga se sa thuša ka selo.​—1 Dikg. 14:22-24; 2 Dikor. 12:1-4.

Ditaba di ile tša mpefala le go feta ge Kgoši Shishaka a fihla Jerusalema moo Rehoboama a bego a buša gona. Ka nako yeo moporofeta Shemaya o ile a botša Rehoboama le dikgošana tša Juda molaetša wo o tšwago go Jehofa wo o rego: “Lena le ntlogetše gomme le nna ke le tlogetše gore ke le gafele seatleng sa Shishaka.” Rehoboama o ile a arabela bjang? O ile a arabela gabotse kudu! Beibele e re: “Dikgošana tša Isiraele le kgoši ya gona tša ikokobetša tša re: ‘Jehofa o lokile.’” Ka ge ba ile ba ikokobetša, Jehofa o ile a ba šireletša. O ile a ba a se fediše motse wa Jerusalema.​—2 Dikor. 12:5-7, 12.

Rehoboama o ile a tšwela pele a buša mmušo wa ka borwa. Pele a ka hwa, o ile a nea barwa ba gagwe ka moka dimpho, ka ge a be a sa nyake gore ba šale ba tshwenya Abija morwa wa gagwe ka gobane e be e le yena e bego e tlo ba kgoši. (2 Dikor. 11:21-23) Mo nakong ye, Rehoboama o ile a dira dilo ka bohlale go feta nakong e fetilego.

Rehoboama o ile a palelwa ke go dula a botega, ka gona Modimo o ile a se sa mo amogela. Beibele e mo hlalosa ka gore: “O ile a dira tše mpe.” Ka baka la’ng? “Ka gobane o be a se a tsepamiša pelo ya gagwe go tsomeng Jehofa.”​—2 Dikor. 12:14.

Nagana gabotse ka taba ye: Ka dinako tše dingwe Rehoboama o ile a kwa Modimo. Le gona o ile a direla batho ba Jehofa dilo tše dibotse. Eupša bothata ke gore ga se a ka a lwela go dula a kgahliša Jehofa le go ba le tswalano e botse le yena. Ke ka baka leo a ilego a feleletša a dira dilo tše mpe le go rapela medimo ya maaka. O ka ipotšiša gore: ‘Nakong ya ge Rehoboama a be a ekwa tayo ya Jehofa,  na ka nnete o be a nyaka go kgahliša Jehofa goba o be a no nyaka go kgahliša batho?’ (2 Dikor. 11:3, 4; 12:6) Ge nako e dutše e eya o ile a boela a dira dilo tše mpe. Ruri Rehoboama o be a sa swane le rakgolo’agwe Dafida. Ke nnete gore Dafida le yena o ile a dira diphošo, eupša bophelong bja gagwe ka moka o ile a bontšha gore o rata Jehofa ka go rapela yena feela le go itshola go tšwa pelong ge a be a dirile dibe.​—1 Dikg. 14:8; Ps. 51:1, 17; 63:1.

Re ithuta thuto e bohlokwa go Rehoboama. Ke selo se sebotse kudu ge motho a hlokomela lapa la gagwe e bile a leka go fihlelela dilo tše itšego bophelong. Eupša gore Jehofa a re amogele, re swanetše go dula re rapela yena feela.

Ge re ka lwela go rata Jehofa go feta dilo ka moka, re ka kgona go dula re hlankela yena feela. Go no swana le ge mollo o swanetše go bešetšwa gore o dule o tuka, le lerato la rena go Jehofa le swanetše go bešetšwa. Re le bešetša ka go bala Beibele ka mehla, go naganišiša ka seo re se balago le go rapela ka mehla. (Ps. 1:2; Baroma 12:12) Ge re rata Jehofa kudu re tlo kgona go mo kgahliša dilong ka moka tšeo re di dirago. E bile lerato leo le tla dira gore ge re dirile sebe re itshole go tšwa pelong. Go fapana le Rehoboama, re tla dula re botegela Jehofa.​—Juda 20, 21.