1. Re na le lebaka lefe la go thaba?

RURI go a thabiša go bona ka tsela yeo batho ba Jehofa ba oketšegago ka yona! Ngwaga wa go feta, re swere dithuto tša Beibele tše fetago tše 10 000 000. Se se bontšha gabotse gore bahlanka ba Modimo ba dira gore seetša sa bona se bonege bathong! Le gona nagana ka batho ba dimilione bao ba tlilego Segopotšong. Ba ithutile ka lerato leo Jehofa a re bontšhitšego lona ka go re nea topollo.​—1 Joh. 4:9.

2, 3. (a) Ke selo sefe seo se sa re thibelego gore re ‘bonege re le diediši’? (b) Re tlo ithuta ka’ng sehlogong se?

² Lefaseng ka moka, batho ba Jehofa ba bolela maleme a go se swane. Lega go le bjalo, seo ga se re thibele go tumiša Tatago rena Jehofa re le boteeng. (Kut. 7:9) Go sa šetšwe gore re bolela leleme lefe goba re dula kae, re ka bonega ‘re le diediši lefaseng.’​—Bafil. 2:15.

³ Tše dingwe tša dilo tšeo di dirago gore Jehofa a retwe ke go oketšega ga rena, botee bjo re nago le bjona le go leka ka thata gore re dule re phakgame. Sehlogong se, re tlo bona kamoo dilo tše di dirago gore Jehofa a retwe.​—Bala Mateo 5:14-16.

4, 5. (a) Ntle le go bolela ditaba tše dibotse, ke’ng se sengwe gape seo re ka se dirago gore seetša sa rena se bonege? (b) Go bontšha ba bangwe botho go ka ba le mafelelo afe? (Bona seswantšho seo se lego mathomong a sehlogo.)

⁴ Sehlogo seo se rego “Seetša Leswiswing,” seo se gatišitšwego ka go Morokami wa Seisemane wa June 1, 1925 se itše: “Mehleng ye ya bofelo, motho a ka botegela Morena ge feela a ka dira gore seetša sa gagwe se bonege.” Sehlogo seo se hlalositše le gore: “Motho o swanetše go dira se ka go botša batho ditaba tše dibotse, le ka go phela ka go dumelelana le seetša seo.” Go molaleng gore tsela e nngwe ya go dira gore seetša sa rena se bonege ke ka go bolela ditaba tše dibotse le go dira batho barutiwa. (Mat. 28:19, 20) Go oketša moo, re ka tumiša Jehofa ka boitshwaro bja rena. Batho ba bantši ba bona boitshwaro bja rena ge re le bodireding. Go ba lebelela ka go myemyela le go ba dumediša ka lethabo go ba thuša go kwešiša Modimo yo re mo hlankelago le gore re batho ba mohuta mang.

⁵ Jesu o ile a botša barutiwa ba gagwe gore “ge le tsena ka ntlong le dumediše ba ntlo yeo.” (Mat. 10:12) Tikologong yeo Jesu le baapostola ba gagwe ba bego ba bolela ditaba tše dibotse, batho ba be ba tlwaetše go amogela batho bao ba sa ba tsebego ka magaeng a bona. Lehono, batho ba bantši ga ba sa dira bjalo. Gantši ba a tšhoga goba ba a tenega ge ba bona motho yo ba sa mo tsebego a kokota. Eupša ge ba bona re thabile e bile re le botho, ba ka ikwa ba sa boife selo. Ge o dira boboledi ka teroli, na o lemogile gore gantši batho ba ikwa ba lokologile e bile ba tšea dikgatišo tša rena ge ba bona o myemyela e bile o ba dumediša ka lethabo? E bile ba ka ba ba nyaka gore le boledišane ka Beibele.

6. Banyalani ba bangwe ba batšofadi ba ile ba dira’ng gore seetša sa bona se bonege?

⁶ Banyalani ba bangwe ba batšofadi kua Engelane ga ba sa kgona go ya modirong wa ntlo le ntlo ka ge ba babja. Ba kgethile go dira gore seetša sa bona se bonege kgauswi le legae la bona. Ba bea tafola ya dikgatišo nakong ya ge batswadi ba tlo tšea bana ba bona sekolong sa kgauswi le mo ba dulago. Ka ge batswadi bao ba be ba nyaka go tseba gore dikgatišo tšeo ke tša eng, ba ile ba tšea dipuku tša Dipotšišo tša Bafsa le Dikarabo tše Šomago, Bolumo 1 le 2 gaešita le diporoutšha. Kgaetšedi yo mongwe wa mmulamadibogo o ile a thoma go šoma le bona. Batswadi bao ba ile ba lemoga gore kgaetšedi yo o thabela batho le gore banyalani ba ba tloga ba nyaka go thuša batho. Se se ile sa dira gore motswadi yo mongwe a thome go ithuta Beibele le bona.

7. O ka thuša bjang batho bao ba sa tšwago go fihla tikologong ya geno?

⁷ Mengwageng yeo e sa tšwago go feta, batho ba bantši ba ile ba swanelwa ke go tšhabela dinageng tše dingwe go yo dula moo e le bafaladi. O ka dira’ng gore o thuše batho bao gore ba tsebe Jehofa le morero wa gagwe? O ka thoma ka go ithuta go dumediša ka maleme a batho bao ba sa tšwago go fihla tikologong ya mo o dulago. Lenaneo la JW Language le ka go thuša go dira bjalo. Go oketša moo, o ka ithuta le mafokwana ao a ka ba dirago gore ba nyake go boledišana le wena. Ke moka wa ba iša wepesaeteng ya rena ya jw.org gomme wa ba bontšha dibidio tša go fapafapana le dikgatišo tšeo di lego gona ka segagabo bona.​—Doit. 10:19.

8, 9. (a) Seboka sa Bophelo le Bodiredi se re thuša bjang? (b) Batswadi ba ka thuša bana ba bona bjang gore ba tšee karolo dibokeng?

⁸ Ka ge Jehofa a re rata, o dirile gore go be le Seboka sa Bophelo le Bodiredi e le gore re kgone go atlega ge re boledišana le batho tšhemong. Seboka se se re thuša gore re se tšhoge go dira maeto a go boela le go thoma dithuto tša Beibele.

⁹ Batho ba bantši bao ba thomago go kopanela le rena ba lemogile gore bana ba rena ba tšea karolo ge ba le dibokeng. Batswadi, thušang bana ba lena gore seetša sa bona se bonege ka go  ba ruta go araba ka mantšu a bona e sego feela go bala seo se ngwadilwego kgatišong. Dikarabo tša bona tše bonolo le tšeo di tšwago pelong di dirile gore batho ba bangwe bao ba sa tšwago go kopanela ba rate therešo.​—1 Bakor. 14:25.

10. Borapedi bja lapa bo kgatha tema efe tabeng ya go dira gore go be le botee?

¹⁰ Tsela e nngwe ya go dira gore seetša sa gago se bonege ke ka go dira gore ka lapeng la gago le ka phuthegong go be le botee. Batswadi ba ka dira se ka go ba le Borapedi bja Lapa ka mehla. Ba bantši ba bogela Kgašo ya JW nengneng mo kgweding. Ka morago ga go bogela lenaneo le, bolelang kamoo le ka dirišago dintlha tše bohlokwa tšeo le di hweditšego. Ge motswadi a swere borapedi bja lapa, o swanetše go gopola gore tlhahlo yeo ngwana a e hlokago e fapane le yeo mofsa a e hlokago. Ka gona dirang sohle seo le ka se kgonago gore setho se sengwe le se sengwe sa lapa se holwe ke borapedi bja lapa.​—Ps. 148:12, 13.

11-13. Ka moka ga rena re ka dira bjang gore go be le botee ka phuthegong le go thuša ba bangwe gore seetša sa bona se bonege?

¹¹ Bana le bafsa ba ka dira eng gore go be le botee ka phuthegong mola ka lehlakoreng le lengwe ba kgothaletša ba bangwe gore seetša sa bona se bonege? Ge e ba o le mofsa wa Mokriste, go re’ng o sa itirele pakane ya go dira gore batšofadi ka phuthegong ba ikwe ba le bohlokwa? O ka ba kgopela gore ba go anegele diphihlelo tšeo ba bilego le tšona mengwageng yeo ba e feditšego ba hlankela Jehofa. Seo se tlo go aga gomme sa dira gore bobedi bja lena le nape le tšwela pele le dira gore seetša sa therešo se bonege. Le gona ka moka ga rena re ka itirela pakane ya go amogela bao ba tlago dibokeng tša rena Holong ya Mmušo. Go dira bjalo go tla dira gore go be le botee gomme go ka dira gore baeng le bona ba nyake go bonagatša seetša sa bona. Ge ba tlile dibokeng, o ka no thoma ka go ba dumediša ka go myemyela mohlomongwe le ka go ba thuša gore ba hwetše madulo. Leka go ba tsebiša go bana babo rena ba bangwe, ka go dira bjalo, o ba dira gore ba ikwe ba le gae ga mahlaku.

¹² Ge e ba o abetšwe go swara seboka sa go ya tšhemong, o ka dira sohle seo o ka se kgonago go thuša batšofadi gore le bona ba tšee karolo bodireding. O ka ipotšiša gore: ‘Na go na le tšhemo yeo batšofadi ba ka kgonago go e šoma?’ Ka dinako tše dingwe, o ka kgopela bafsa gore ba šome le bona e le gore ba ba thuše ge ba hloka thušo. Batšofadi le bana babo rena le  dikgaetšedi bao ba babjago, gantši ba ka nyamišwa ke gore ga ba sa kgona go šoma nako e telele go swana le mathomong. Eupša ba tla thaba kudu ge ba tseba gore o a ba rata le gore o kwešiša maemo a bona. Ee, go sa šetšwe gore bana babo rena ba ke ba bagolo gakaakang goba ba na le nako e kae ba hlankela Jehofa, ge o ba bontšha botho o dira gore ba tšwele pele ba bolela ditaba tše dibotse ka mafolofolo.​—Lef. 19:32.

¹³ Mopsalme o ile a ikwa a tutueletšega go bolela gore: “Ke mo gobotse le mo go kgahlišago gakaakang ge bana ba motho ba dudišana ka botee!” (Bala Psalme 133:1, 2.) Ge Baisiraele ba be ba eba mmogo, ba be ba holwa kudu ke go bona bana babo bona ba hlankela Jehofa. Seo se be se swana le makhura a mabotse ao a bego a nkga bose. Ke ka baka la’ng o sa lapološe bana beno ka go dira gore ka phuthegong go be le botee? Ge e ba o šetše o dira bjalo, re a go reta. Na o ka tseba bana beno gakaone ka phuthegong?​—2 Bakor. 6:11-13.

14. O ka dira’ng gore seetša sa gago se bonege tikologong ya moo o dulago?

¹⁴ Seetša sa gago se ka bonega go sa šetšwe gore o dula kae. Mantšu a gago a botho le mediro ya gago e mebotse e ka dira gore baagišani ba gago ba nyake go tseba therešo ya Beibele. Ipotšiše gore: ‘Baagišani ba ka ba ntebelela bjang? Na legae la ka le dilo tša ka di dula di hlwekile, gomme seo sa dira gore mo motseng go kgahliše? Na ke thuša baagišani ba ka?’ Ge o swere magang le Bakriste ba bangwe, ba botšiše gore boitshwaro bja bona le botho bjo ba ilego ba bo bontšha ba bangwe di thušitše bjang ba leloko, bao ba šomago le bona goba bao ba tsenago le bona sekolo? Ga go pelaelo gore o tlo kwa diphihlelo tše di kgahlišago.​—Baef. 5:9.

15. Ke ka baka la’ng go le bohlokwa gore re dule re phakgame?

¹⁵ Ge e ba re nyaka gore seetša sa rena se tšwele pele se bonega, re swanetše go dula re gopola gore re phela mehleng ya bofelo. Jesu o ile a botša barutiwa ba gagwe ka makga a mmalwa gore: “Dulang le phakgame.” (Mat. 24:42; 25:13; 26:41) Go molaleng gore ge e ba re ka nagana gore “masetlapelo a magolo” a sa le kgole, ra bolela gore wona a tla fihla eupša e sego mehleng ye ya rena, re ka se bone bohlokwa bja go ruta batho ka Jehofa. (Mat. 24:21) Seo se ka dira gore seetša sa rena se fokotšege goba mohlomongwe sa se sa ba gona.

16, 17. O swanetše go dira’ng gore o dule o phakgame?

¹⁶ Ge mehla ye re phelago go yona e dutše e eba boima le go feta, ka moka ga rena re swanetše go dula re phakgame. Jehofa o tlo tliša bofelo ka nako ya maleba. Ga go tselapedi. (Mat. 24:42-44) Ge re sa letile bofelo, re swanetše go se fele pelo, re phakgame go feta le ge e le neng pele. Re swanetše go bala Lentšu la Modimo letšatši le letšatši gomme re phakgame ge e le mabapi le dithapelo. (1 Pet. 4:7) Ithute go bana babo rena le dikgaetšedi bao ba hlanketšego Jehofa ka mengwaga e mentši. Ka mohlala, o ka bala sehlogo se se rego: “Nywaga e Masomešupa ya go Itshwarelela ka Morumo wa Seaparo sa Mojuda,” seo se lego ka go Morokami wa April 15, 2012, matlakala 18-21.

¹⁷ Dula o swaregile ka go hlankela Jehofa. Direla batho dilo tše dibotse gomme o fetše nako e ntši o na le bana beno. Seo se tla go tlišetša lethabo le legolo, le gona se tlo dira gore o bone eka nako e a fofa. (Baef. 5:16) Mengwaga e lekgolo e fetilego, bana babo rena ba be ba swaregile kudu gomme ba fihleletše dilo tše dintši. Eupša lehono re fihlelela dilo tše dintši kudu re thušwa ke moya wa Jehofa. Re dira gore seetša sa rena se bonege ka tsela e makatšago kudu!

18, 19. Bagolo ba phuthego ba ka re thuša bjang gore re dule re phakgame le go dula re le mafolofolo? Nea mohlala.

¹⁸ Gaešita le ge re tseba gore go se phethagala,  seo ga se re dire gore re tlogele go hlankela Jehofa. E le gore Jehofa a re thuše, o re neile “dimpho tšeo e lego banna,” e lego bagolo ba ka phuthegong. (Bala Baefeso 4:8, 11, 12.) Ge bagolo ba ka go etela, diriša sebaka seo go ithuta go bohlale bja bona le keletšo yeo ba go neago yona.

¹⁹ Ka mohlala, banyalani ba bangwe ba kua Engelane, bao ba bego ba na le mathata lenyalong la bona ba ile ba kgopela bagolo gore ba tle ba ba thuše. Mosadi o ile a botša bagolo bao gore monna wa gagwe ga a etelele pele dilong tša moya. Monna o ile a dumela gore ga a kgone go ruta e bile o be a sa rulaganye borapedi bja lapa ka mehla. Bagolo bao ba ile ba thuša banyalani bao gore ba nagane ka mohlala wa Jesu. Jesu o be a naganela barutiwa ba gagwe le go ba hlokomela. Ka gona bagolo bao ba ile ba kgothaletša monna yoo gore a ekiše Jesu. Le gona ba ile ba kgothaletša mosadi yoo gore a se felele monna wa gagwe pelo. Ke moka bagolo bao ba ile ba nea banyalani bao ditšhišinyo tša kamoo ba ka šomago mmogo gore ba be le borapedi bja lapa gotee le bana ba bona ba babedi. (Baef. 5:21-29) Ka morago, bagolo ba ile ba reta monna ka maiteko ao a bego a a dira. Ba ile ba mo kgothaletša gore a se fele matla le gore a kgopele moya o mokgethwa e bile a ithekge ka wona gore o mo thuše go ba hlogo e botse ya lapa. Lerato leo ba le bontšhitšego banyalani ba le thekgo ya bona di ile tša thuša lapa leo gore seetša sa lona se bonege.

20. Mafelelo e tla ba afe ge o dutše o dira gore seetša sa gago se bonege?

²⁰ Beibele e re: “Go thaba yo mongwe le yo mongwe yo a boifago Jehofa, yo a sepelago ditseleng tša gagwe.” (Ps. 128:1) Le wena o tlo thaba kudu ge o dira gore seetša sa gago se bonege ka go ruta batho ka Jehofa, go itshwara ka tsela yeo e dirago gore go be le botee le ka go dula o phakgame. Batho ba bangwe ba tla bona mediro ya gago e mebotse, gomme ba bantši ba tla tutueletšega go nea Tatago rena letago.​—Mat. 5:16.