1. Go boifa Modimo ke’ng, gona ke ka baka la’ng batho bao ba ratago Modimo ba swanetše go mmoifa?

BAKRISTE ba rata Modimo e bile ba a mmoifa. Sehlogong se re tlo bolela ka gore ke ka baka la’ng go le bohlokwa gore re boife Modimo. Eupša go boifa Modimo go ra go re’ng? Na go bolela go mo tšhaba? Aowa. Batho bao ba boifago Modimo ba mo hlompha ka go tšwa pelong. Ga ba nyake go dira selo seo se ka se kgahlišego Tatago bona ka gobane ba nyaka go dula ba na le segwera se sebotse le yena.—Ps. 111:10; Die. 8:13.

2. Ka go dumelelana le mantšu a Kgoši Dafida ao a lego go Psalme 86:11, re tlo bolela ka dilo dife tše pedi?

² Bala Psalme 86:11. Ge o dutše o nagana ka mantšu ao, o kgona go bona gore Kgoši Dafida yo a botegago, o be a kwešiša gore go bohlokwa gakaakaang go boifa Modimo. Ga bjale re tlo bona kamoo re ka dirišago seo Dafida a se boletšego. Sa pele, re tlo ithuta ka mabaka ao a dirago gore re boife leina la Modimo. Sa bobedi, re tlo ithuta gore re ka bontšha bjang gore re boifa Modimo ka tsela yeo re phelago ka yona.

3. Ke’ng seo Moshe a ilego a se bona seo se ilego sa mo thuša gore a dule a boifa leina la Modimo?

³ Nagana kamoo Moshe a ilego a ikwa ka gona ge a be a le lešobeng la leswika gomme a bona letago la Jehofa le feta. Ye e swanetše go ba e bile tiragalo e makatšago kudu yeo motho le ge e le ofe a ilego a e bona pele Jesu a ka tla mo lefaseng. Moshe o ile a kwa mantšu a latelago ao go bonagalago a be a bolelwa  ke morongwa. Mantšu ao a re: “Jehofa, Jehofa, Modimo yo a gaugelago le yo a šokelago, yo a diegago go galefa, yo a tletšego botho le therešo, yo a bolokelago ba dikete botho bja gagwe, yo a swarelago molato, karogo le sebe.” (Ek. 33:17-23; 34:5-7) Go ka direga gore ge Moshe a be a diriša leina Jehofa o be a gopola ka tiragalo yeo. Ka gona ga go makatše ge ka morago Moshe a ile a laela Baisiraele gore ba ‘boife leina le la letago le leo le boifišago.’—Doit. 28:58.

4. Ke dika dife tšeo ge re ka naganišiša ka tšona di ka re thušago go boifa Jehofa?

⁴ Ge re nagana ka leina Jehofa, re swanetše go naganišiša le ka gore ke Modimo wa mohuta mang. Re swanetše go nagana ka dika tša gagwe tše bjalo ka matla, bohlale, toka le lerato. Go nagana ka dika tšeo go tla dira gore re mmoife.—Ps. 77:11-15.

5-6. (a) Leina la Modimo le ra go re’ng? (b) Go ya ka Ekisodo 3:13, 14 le Jesaya 64:8, ke ka ditsela dife Jehofa a bago seo a nyakago go ba sona?

⁵ Leina la Modimo le ra go re’ng? Diithuti tše dintši tša Beibele di dumelelana ka gore leina Jehofa le ra gore “Yo a Bakago go ba Gona.” Tlhaloso yeo e re thuša go kwešiša gore ga go na selo seo se ka thibelago Jehofa go dira seo a nyakago go se dira, e bile a ka se palelwe ke selo. Seo se kgonega bjang?

⁶ Jehofa o kgona go ba selo le ge e le sefe seo a nyakago go ba sona e le gore a phethagatše morero wa gagwe. (Bala Ekisodo 3:13, 14.) Gantši mokgatlo o re kgothaletša gore re naganišiše ka seo se bolelwago ke leina la Modimo. Le gona, Jehofa a ka dira gore bahlanka ba gagwe bao ba belegwego ba na le sebe, ba be selo le ge e le sefe seo a nyakago ba eba sona e le gore ba mo hlankele le go phetha morero wa gagwe. (Bala Jesaya 64:8.) Ka go dira bjalo, Jehofa o dira gore morero wa gagwe o phethagatšwe. Ga go na selo seo se ka mo thibelago go dira gore morero wa gagwe o phethagatšwe.—Jes. 46:10, 11.

7. Re ka dira’ng gore re hlomphe Tatago rena wa legodimong kudu?

⁷ Re ka kgona go hlompha Tatago rena wa legodimong ge re ka naganišiša ka dilo tšeo a re  diretšego tšona le tšeo a dirilego gore re kgone go di dira. Ka mohlala, ge re naganišiša ka dilo ka moka tšeo Modimo a di bopilego, seo se dira gore re mmoife le go feta. (Ps. 8:3, 4) Ge re naganišiša ka seo Jehofa a dirilego gore re be sona e le gore re mo hlankele, re mo hlompha kudu. Ruri leina Jehofa le a boifiša! Le akaretša sohle seo Tatago rena a lego sona, sohle seo a se dirilego le sohle seo a tlago go se dira.—Ps. 89:7, 8.

8. Go ya ka Doiteronomio 32:2, 3, Jehofa o nyaka gore bahlanka ba gagwe ba dire’ng ka leina la gagwe?

⁸ Pejana ga ge Baisiraele ba ka tsena Nageng ya Kholofetšo, Jehofa o ile a ruta Moshe koša e itšego. (Doit. 31:19) Moshe le yena o be a swanetše go ruta Baisiraele koša yeo. (Bala Doiteronomio 32:2, 3.) Ge re naganišiša ka temana 2 le 3, re kgona go bona gore Modimo o nyaka gore leina la gagwe le tsebje, le gore le se ke la swarwa e le le lekgethwa go fetiša tekano. O nyaka gore motho yo mongwe le yo mongwe a tsebe leina la gagwe! Baisiraele ba ile ba thaba kudu ge ba be ba ekwa Moshe a ba ruta ka Jehofa le ka leina la gagwe le lekgethwa! Seo Moshe a ilego a ba ruta sona se ile sa ba matlafatša le go ba kgothatša go swana le pula ya mesarasarane ge e nela dimela. Rena re ka dira’ng go kgonthišetša gore re ruta batho ka tsela yeo?

9. Re ka dira’ng go thuša go kgethagatša leina la Jehofa?

⁹ Ge re le tšhemong ka ntlo le ntlo goba mafelong a mangwe, re ka diriša Beibele go bontšha batho leina la Modimo e lego Jehofa. Re ka ba nea dikgatišo tša rena tšeo di theilwego Beibeleng, ra ba bontšha dibidio le dilo tše dingwe tšeo di lego wepesaeteng ya rena tšeo di tlago go ba thuša go hlompha Jehofa. Ge re le mošomong, sekolong goba re le maetong a mangwe, re ka hwetša dibaka tša go botša batho ka Modimo wa rena yo re mo ratago. Ge re botša batho ba bangwe ka seo Modimo a tlago go re direla sona le seo a tlago go se dira mo lefaseng, seo se ka ba thuša go tseba selo se sengwe ka Modimo seo ba bego ba sa se tsebe. Ge re dutše re botša ba bangwe ka Tatago rena yo lerato, re thuša go dira gore leina la Modimo le kgethagatšwe. Re thuša batho bao gore ba bone gore ba be ba dutše ba rutwa maaka ka Jehofa. Le gona dilo tšeo re di rutago batho, di a ba matlafatša le go ba kgothatša.—Jes. 65:13, 14.

10. Ge re swere dithuto tša Beibele, ke ka baka la’ng re sa swanela go no ruta batho feela ka melao ya Modimo?

¹⁰ Ge re ruta batho Beibele re nyaka gore ba tsebe leina la Modimo le go le diriša. Le gona re nyaka gore ba tsebe seo se emelwago ke leina leo. Na re tla kgona go dira seo ge e ba re no ba ruta feela ka melao ya Modimo le seo a nyakago re se dira? Motho yo a ratago go ithuta Beibele a ka ithuta ka melao ya Modimo le go e tšeela godimo. Eupša na motho yoo o tla kwa Modimo ka baka la ge a mo rata? Gopola gore Efa o be a tseba molao wa Modimo, eupša o be a sa rate Modimo. Adama le yena o be a sa rate Modimo. (Gen. 3:1-6) Ka gona ga se ra swanela go no ruta batho melao ya Modimo ya go loka le gore o nyaka re phela bjang.

11. Ge re ruta batho ka melao ya Modimo, re ka ba thuša bjang gore ba rate le Monei wa melao yeo?

¹¹ Ka mehla melao yeo Modimo a re neilego yona e a re hola. (Ps. 119:97, 111, 112) Batho bao re ba rutago Beibele ba ka no se bone gore melao yeo e na le mohola ge e ba ba sa kwešiše gore Jehofa o re beetše melao yeo ka ge a re rata. O ka botšiša motho yoo o balago le yena gore: “O nagana gore ke ka baka la’ng Modimo a nyaka re dira selo se itšego? Goba o nagana gore ke ka baka la’ng a sa nyake re dira selo se itšego? Seo se re ruta gore ke Modimo wa mohuta mang?” Ge e ba re thuša motho yo  re balago le yena gore a nagane ka Jehofa le go mo rata, seo se tla mo kgoma pelo. O tla rata melao ya Modimo le Monei wa melao yeo. (Ps. 119:68) Motho yoo o tla ba la le tumelo gomme seo se tla mo thuša gore a tle a kgotlelele ge a welwa ke diteko.—1 Bakor. 3:12-15.

12. Dafida o kile a palelwa bjang ke go dula a boifa Modimo ka pelo ka moka, gona mafelelo a seo e bile afe?

¹² Mantšu a bohlokwa ao a lego go Psalme 86:11 a re: ‘Ntire gore ke go boife ka pelo ka moka.’ Modimo o ile a thuša Kgoši Dafida ka moya wa gagwe o mokgethwa gore a ngwale mantšu ao. Dafida o ile a bona gore go bonolo kudu gore motho a se boife Modimo ka pelo ka moka. Nakong e nngwe ge a be a le tlhakeng ya ntlo ya gagwe, o ile a bona mosadi wa monna yo mongwe a hlapa. Na ka nako yeo Dafida o be a boifa Modimo ka pelo ka moka? O be a tseba molao wa Jehofa wo o rego: “O se ke wa duma mosadi wa wa geno.” (Ek. 20:17) O ile a se tloše mahlo go yena. O be a na le dipelo tše pedi. E nngwe e be e kganyoga Batseba, e nngwe e nyaka go kgahliša Modimo. Le ge Dafida a be a na le nako e telele a rata Modimo e bile a mmoifa, o ile a palelwa ke go mo kgahliša lekgeng le. Ka baka leo, Dafida o ile a dira dilo tše mpe kudu. O ile a senya leina la Modimo. Le gona, o ile a kweša bohloko batho bao ba bego ba se na molato go akaretša le ba ntlo ya gagwe.—2 Sam. 11:1-5, 14-17; 12:7-12.

13. Re tseba bjang gore Dafida o ile a boela a boifa Modimo ka pelo ka moka?

¹³ Jehofa o ile a laya Dafida gomme a boela a ba le tswalano e botse le yena. (2 Sam. 12:13; Ps. 51:2-4, 17) Dafida o ile a gopola mathata ao a ilego a a baka ge a be a sa boife Modimo ka pelo ka moka. Na Jehofa o ile a thuša Dafida gore a boele a mmoife ka pelo ka moka? Ee, ka gobane ka morago ge Beibele e bolela ka Dafida e re ‘pelo ya gagwe e be e feletše go Jehofa Modimo wa gagwe.’—1 Dikg. 11:4; 15:3.

14. Re swanetše go ipotšiša’ng, gona ka baka la’ng

¹⁴ Mohlala wa Dafida o a re kgothatša e bile o re thuša gore re itlhahlobe. Taba ya gore o ile a dira sebe se segolo e a re phafoša le rena lehono. Go sa šetšwe gore re sa tšwa go thoma go hlankela Jehofa goba gore re na le nako e telele re mo hlankela, re swanetše go ipotšiša gore: ‘Na ke leka go ganetša Sathane ge a dira gore ke se boife Modimo ka pelo ka moka?’

15. Go boifa Modimo go ka re šireletša bjang ge re bona diswantšho tšeo di ka dirago gore re nagane ka boitshwaro bjo bobe?

¹⁵ Ka mohlala, o dira’ng ge o bona diswantšho tšeo di ka dirago gore o nagane ka boitshwaro bjo bobe ge o bogetše thelebišene  goba o le Inthaneteng? Go ka ba bonolo gore o ipotše gore seswantšho seo o se bonago goba mmubi woo o o bogetšego ga o kgothaletše bootswa. Eupša na seo e ka ba e le selo seo Sathane a se dirišago go go dira gore o se boife Modimo ka pelo ka moka? (2 Bakor. 2:11) Seswantšho seo o se bonego, se ka swantšhwa le selepe seo motho a se dirišago go phapha kota e kgolo. Motho a ka e phapha gatee, ya se arogane. Eupša ge a dutše a e phapha, mafelelong kota yeo e a arogana. Na diswantšho tšeo re di bonago thelebišeneng goba Inthaneteng, tšeo di dirago gore re nagane ka boitshwaro bjo bobe, di ka swantšhwa le selepe seo? Selo seo se ka thomago e le se senyenyane e bile se bonagala se se kotsi, mafelelong se ka dira gore motho a feleletše a dirile sebe gomme a se sa boifa Modimo ka pelo ka moka. Ka gona o se ke wa dumelela selo le ge e le sefe seo se šilafetšego se tsena ka pelong ya gago. Dula o boifa leina la Jehofa ka pelo ka moka!

16. Re swanetše go ipotšiša dipotšišo dife ge re lebane le teko?

¹⁶ Sathane ga a diriše feela diswantšho tšeo di dirago gore re nagane ka boitshwaro bjo bobe, eupša o diriša le dilo tše dingwe tše dintši go re leka. Re dira’ng ge a re leka? Go bonolo go ipotša gore dilo tšeo Sathane a nyakago re di dira, ga di tshwenye gakaalo. Ka mohlala, re ka ipotša gore: ‘Nka se kgaolwe ka baka la go dira selo se. Ka gona ga se gore se a tshwenya.’ Go nagana ka tsela yeo go fošagetše kudu. Go kaone gore re ipotšiše dipotšišo tša go swana le tše: ‘Na Sathane o diriša teko ye gore ke se sa boifa Modimo ka pelo ka moka? Ge nka dira dilo tšeo Sathane a ntekago ka tšona, na ke tla senya leina la Modimo? Na seo se tla matlafatša segwera sa ka le Modimo goba se tla dira gore segwera sa ka le Modimo se senyege?’ Naganišiša ka dipotšišo tše di swanago le tšeo. Rapela Modimo gore a go nee bohlale bja gore o se ke wa iphora ge o di araba. (Jak. 1:5) Go dira seo go tla go šireletša,  e bile go tla go thuša go ganetša Sathane ge a go leka, go swana le ge Jesu a ile a ganetša Sathane ka gore: “Tloga, Sathane!”—Mat. 4:10.

17. Ke ka baka la’ng go se boife Modimo ka pelo ka moka go se na mohola? Nea mohlala.

¹⁷ Go se boife Modimo ka pelo ka moka ga go na mohola. Ka mohlala, nagana ka sehlopha sa babapadi bao ba sa kwanego. Ba bangwe ba nyaka gore go retwe bona, ba bangwe ba nyaka go bapala ka melao ya bona, mola ba bangwe ba sa hlomphe mohlahli. Gantši sehlopha sa mohuta woo, ga se wine. Eupša sehlopha seo e lego ngatana e tee, gantši se a wina. Pelo ya gago e ka swana le sehlopha seo se winago ge e ba o hlankela Modimo ka pelo ka moka. Dula o gopola gore Sathane ga a nyake gore o boife Modimo ka pelo ka moka. O nyaka gore o be le dipelo tše pedi gomme o se ke wa hlankela Modimo ka pelo ka moka. Eupša wena o swanetše go lwela gore o boife Modimo ka pelo ka moka e le gore o tle o kgone go mo hlankela gabotse. (Mat. 22:36-38) O se ke wa dumelela Sathane a dira gore o se boife Modimo ka pelo ka moka!

18. Ka go dumelelana le Mika 4:5, o ikemišeditše go dira’ng?

¹⁸ Rapela Jehofa go swana le kamoo Dafida a ilego a mo rapela ge a be a re: “Ntire gore ke boife leina la gago ka pelo ka moka.” Ikemišetše go phela ka go dumelelana le thapelo yeo. Dira sohle seo o ka se kgonago gore letšatši le lengwe le le lengwe, o bontšhe gore o hlompha leina la Jehofa. Ge o ka dira bjalo, o tla bontšha gore o swanelega go bitšwa ka leina leo. (Die. 27:11) Le gona, ka moka ga rena re tla kgona go bolela mantšu ao moporofeta Mika a ilego a a bolela ge a be a re: “Re tla sepela ka leina la Jehofa Modimo wa rena go iša mehleng ya neng le neng, gaešita le ka mo go sa felego.”—Mika 4:5.