RE TLOGA re kgodišegile gore Jehofa ke yena a re hlahlago lehono, le gore o re nea dilo tšeo re di hlokago gore re dule re na le segwera se sebotse le yena “mehleng [ye] ya bofelo.” (2 Tim. 3:1) Re swanetše go dula re ekwa Jehofa. Re swana le Baisiraele ge ba be ba le lešokeng. Ba be ba swanetše go dira se sengwe ge ba be ba ekwa modumo wa phalafala.

Jehofa o ile a laela Moshe gore a dire diphalafala tše pedi tša silifera, e nngwe a e ‘diriše go bokanya setšhaba gomme e nngwe a e diriše ge e le nako ya go hlomolla mešaša.’ (Num. 10:2) Baperisita ba be ba letša diphalafala ka medumo e sa swanego go botša batho seo ba swanetšego go se dira. (Num. 10:3-8) Lehono re hwetša tlhahlo ka mekgwa e sa swanego. Sehlogong se, re tlo kwa ka ditsela tše tharo tšeo re hwetšago tlhahlo ka tšona gomme re tlo di bapetša le kamoo Baisiraele ba bego ba hwetša tlhahlo ka medumo e fapanego ya diphalafala. Ditsela tše tharo tšeo re hwetšago tlhahlo ka tšona ke dife? Ke ge re eya dikopanong, ge bagolo ba eya dikolong le ge re hwetša tlhahlo e kaonefaditšwego goba e mpsha diphuthegong.

Ge Jehofa a be a nyaka gore “setšhaba ka moka” se kopane ka bohlabela bja mojako wa tente ya kopano, baperisita ba be ba letša diphalafala tšeo ka bobedi. (Num. 10:3) Meloko ka moka ya Isiraele yeo e bego e hlomile mešaša ka dikarolo tše nne go dikologa tente ya kopano, e be e ekwa modumo woo. Bao ba bego ba dula kgauswi le tente ya kopano ke bona bao ba bego ba arabela ka pela ge phalafala e be e lla. Ka ge ba bangwe ba be ba dula kgole, go be go se bonolo gore ba fihle ka pela ge ba be ba bitšwa tenteng ya kopano. Jehofa o be a nyaka gore batho ka moka ba holege, go sa šetšwe gore ba be ba dula kgauswi le tente ya kopano goba ba be ba dula kgole le yona.

Lehono ga re bokane tenteng ya kopano, eupša re memiwa go bokana le batho ba Modimo. Re bokana dikopanong tša selete le dipokanong tše dingwe tše di kgethegilego moo re hwetšago tlhahlo e tšwago go Jehofa. Dihlatse tša Jehofa lefaseng ka moka di thabela go ba le dipokano tše di swanago. Batho ka moka bao ba bago gona dipokanong tšeo, ba thaba kudu go ba moo. Ba bangwe ba tšwa kgauswi, mola ba bangwe ba etšwa kgole. Eupša batho bao ka moka ba a tseba gore go bohlokwa kudu go ba dipokanong tšeo.

Go thwe’ng ka bana babo rena le dikgaetšedi bao ba dulago kgole kudukudu le moo dipokano tše dikgolo di swaretšwego gona? Bana babo rena ba diriša thekinolotši gore ba kgone go bogela mananeo ao e le gore ba holege. Ka mohlala, ge moemedi wa ntlongkgolo a be a etetše lekaleng la Benin, bana babo rena ba toropong ya Arlit kua Niger, ba ile ba kgona go bogela lenaneo leo. Toropo yeo e tikologong ya Leganata la Sahara. Batho ba 21 ba ile ba bokana gotee go bogela lenaneo leo. Le ge batho bao ba be ba le kgole kudu, eupša ba be ba ikwa e le karolo ya batho ba 44 131 bao le bona ba bego ba bogetše lenaneo leo. Ngwanabo rena yo mongwe o ile a ngwala gore: “Re leboga ka dipelo tša rena ka moka gore le  ile la dira gore re kgone go bogela lenaneo le. Re kgonne go bona gore le re rata kudu.”

Ge baperisita ba Baisiraele ba be ba letša phalafala gatee feela, “dikgošana tšeo e lego dihlogo tša ba dikete” di be di swanetše go ya tenteng ya kopano. Go be go eya tšona feela. (Num. 10:4) Ge di le moo, Moshe o be a nea dikgošana tšeo tlhahlo e bile a di tlwaetša. Seo se be se di thuša go phetha maikarabelo ao di a neilwego melokong ya tšona. Ge nkabe o be o le kgošana, na o be o ka se dire sohle seo o se kgonago gore o be gona moo gore o holwe ke tlwaetšo yeo?

Re a tseba gore lehono bagolo ga se “dikgošana” e bile ga ba buše mohlape woo Modimo a ba kgopetšego gore ba o hlokomele. (1 Pet. 5:1-3) Eupša ba dira sohle seo ba se kgonago gore ba diše mohlape woo. Ba dira seo bjang? Ka gore ba be gona ge ba memiwa dikolong tša mokgatlo, tše bjalo ka Sekolo sa Bodiredi sa Mmušo. Ge ba le moo, ba ithuta kamoo ba ka hlokomelago phuthego ka gona. Dikolo tše di thuša gore bagolo le bohle ka phuthegong ba batamele kgauswi kudu le Jehofa. Go ka direga gore ga se wa ka wa ya dikolong tša mokgatlo, eupša o ka holega ka go ithuta dilo tše dintši go tšwa go bao ba ilego ba ya dikolong tšeo.

Ka dinako tše dingwe baperisita ba Baisiraele ba be ba letša phalafala ka medumo ya go se swane. Medumo yeo e be e le ya go tsebiša Baisiraele ka moka gore Jehofa o nyaka ba hlomolla mešaša. (Num. 10:5, 6) Ge Baisiraele ba be ba hlomolla mešaša, go be go nyakega gore ka moka ga bona ba dire seo ka thulaganyo e bile ba šome ka thata. Ka dinako tše dingwe Baisiraele ba bangwe ba be ba dikadika go hudugela lefelong le lengwe. Ka baka la’ng?

Go ka direga gore Baisiraele ba bangwe ba be ba bona eka ba hudugahuduga ka pela le ka nako yeo ba sa e letelago. Beibele e re: “Ka dinako tše dingwe leru le be le dula le le moo go tloga mantšiboa go fihla mesong.” Ka dinako tše dingwe le be le dula “matšatši a mabedi goba kgwedi goba matšatši a mantši.” (Num. 9:21, 22) Baisiraele ba ile ba huduga gakae ge ba be ba le lešokeng? Numeri kgaolo 33 e re botša ka mafelo a 40 ao Baisiraele ba ilego ba hloma mešaša go ona.

Ka dinako tše dingwe, Baisiraele ba be ba hloma mešaša mo go bego go šireletšegile. Baisiraele ba be ba thaba ge ba be ba le lefelong le le šireletšegilego, kudukudu ka ge ba be ba le ‘lešokeng le legolo le leo le boifišago.’ (Doit. 1:19) Go ka direga gore Baisiraele ba bangwe ba be ba tšhoga gore ge ba ka huduga moo, ba be ba tlo ya lefelong le lengwe leo le sa šireletšegago.

Ge Baisiraele ba be ba hlomolla mešaša, Baisiraele ba meloko e mengwe ba be ba swanetše gore ba se ke ba fela pelo ge ba dutše ba letetše nako ya bona ya go hlomolla mešaša. Baisiraele ka moka ba be ba ekwa medumo ya phalafala, eupša go be go sa kgonege gore ka moka ga bona ba hlomolle mešaša ka nako e tee. Ge phalafala ya medumo e sa swanego e be e lla, e be e le go tsebiša meloko yeo e lego ka bohlabela, e lego moloko wa Juda, Isakara le Sebulone gore ke nako ya gore ba hlomolle mešaša. (Num. 2:3-7; 10:5, 6) Ka morago ga gore meloko yeo e sepele, baperisita ba be ba letša phalafala la bobedi go tsebiša meloko e meraro yeo e bego e le ka borwa gore ke nako ya bona ya go hlomolla mešaša. Baperisita ba ile ba tšwela pele ka go letša phalafala go fihlela setšhaba ka moka se feditše go hlomolla mešaša.

Go ka direga gore o kile wa thatafalelwa ke go amogela diphetogo tše itšego tša mokgatlo. Ke ka baka la’ng o ile wa ikwa bjalo? Mohlomongwe o be o nagana gore mokgatlo le wona o dira diphetogo tše dintši kudu. Goba mohlomongwe o be o rata ka tsela yeo dilo di bego di dirwa ka yona, gomme o sa nyake e fetošwa. Go ka direga gore o kile wa thatafalelwa ke go se fele pelo ge o be o dutše o tlwaela phetogo e itšego yeo mokgatlo o e dirilego. Epša ge re ka dira sohle seo re se kgonago gore re amogele diphetogo tša mokgatlo, re tlo kgona go bona gore di hola rena le gore Jehofa o a thaba ge re di amogela.

Mehleng ya Moshe, Jehofa o ile a hlahla banna, basadi le bana ba bantšintši kua lešokeng. Ge nkabe Jehofa a sa ka a ba hlahla le go ba hlokomela, ba be ba tlo no felela lešokeng. Lehono le rena Jehofa o a re hlahla mehleng ye e kotsikotsi ya bofelo. Ka ntle le thušo ya gagwe re be re ka se kgone. Eka ka moka ga rena re ka dira sohle seo re se kgonago gore re ekiše Baisiraele ba botegago ka go arabela gabotse ge re ekwa medumo e fapafapanego ya diphalafala!