GO TLOGA kgale, Baisiraele ba be ba tlwaetše go ntšha tšhelete gore ba thekge borapedi bja therešo. Eupša taba ya go ntšha motšhelo e ile ya thoma go ba thata le go ba morwalo go Bajuda ba mehleng ya Jesu.

Bajuda ka moka ba be ba swanetše go ntšha seripa sa shekele (goba diterakema tše pedi) go thekga modiro wo o bego o dirwa taberenakeleng, ke moka ka morago wa tla wa dirwa tempeleng. Mehleng ya Jesu tšhelete yeo e be e ntšhetšwa dihlabelo tšeo di bego di dirwa le go hlokomela tempele yeo Heroda a bego a e agile. Bajuda ba bangwe ba ile ba botšiša Petro gore Jesu o be a reng ka go ntšha tšhelete yeo. Jesu o be a sa ganane le go e ntšha. O ile a ba a laela Petro gore a yo tšea tšhelete ya tšhipi gore a tle a mo ntšhetše.—Mat. 17:24-27.

Batho ba Modimo ba mehleng ya kgale ba be ba ntšha motšhelo e bile ba ntšha karolo ya lesome go tšwa go dilo tšeo ba di bjetšego goba tšeo ba di neilwego. (Lef. 27:30-32; Num. 18:26-28) Baetapele ba bodumedi ba be ba gapeletša batho go ntšha karolo ya lesome ya merogo ka moka yeo ba e bjetšego, go akaretša le “dimela tše di bitšwago minti le dili le kumine.” Jesu o be a se na bothata le molao wo o bego o beilwe wa gore batho ba ntšhe karolo ya lesome, eupša o ile a bolela gore tsela yeo bamangwalo le Bafarisei ba dirišago molao wo ka yona e fošagetše.—Mat. 23:23.

Ka nako yeo, go be go buša Baroma gomme ba be ba nyaka gore setšhaba se patele metšhelo e mentši. O mongwe wa metšhelo yeo o be o patelwa ke batho bao ba bego ba na le mašemo, ba be ba ka patela motšhelo woo ka tšhelete goba ka dilo tšeo ba di bunnego. Ge e ba motho a be a bunne masaka a mane, o be a swanetše go tšea lesaka letee a le nee Baroma e le motšhelo. Le gona go be go na le motšhelo woo Mojuda yo mongwe le yo mongwe a bego a swanetše go o ntšha. Taba ye ke yona yeo Bafarisei ba ilego ba botšiša Jesu ka yona. O ile a bolela kamoo re swanetšego go lebelela taba ye ka gore: “Neang Kesara tša Kesara eupša Modimo le mo nee tša Modimo.”—Mat. 22:15-22.

Ge dithoto di be di etšwa goba di tsena motseng, di be di patelelwa motšhelo. Tšhelete yeo e be e patelwa moo dikepe di bego di ema gona, maporogong, moo ditsela di kopanago gona, kgauswi le ditoropo goba mebarakeng.

Tšhelete ya motšhelo yeo mmušo wa Baroma o bego o laetše batho gore ba e ntšhe e be e ba imela kudu. Radihistori wa Moroma yo a bitšwago Tacitus, o re nakong ya ge Jesu a be a le mo lefaseng gomme go buša Mmuši Tiberio, “batho ba Siria le ba Judæa ba ile ba kgopela gore mmušo o ba fokoletše motšhelo ka gobane o be o šetše o ba imela kudu.”

Tsela yeo batho ba bego ba patedišwa motšhelo ka yona, le yona e ile ya dira gore ba imelwe le go feta. Mošomo wa go patediša batho motšhelo o be o fiwa motho yo a ntšhago tšhelete e ntši ya go patela motšhelo. Motho yoo o be a hira batho ba bangwe gore ba tšame ba patediša batho motšhelo. Batho ba ka moka ba be ba leka go dira tšhelete. Go bonagala Sakeo le yena a be a na le batho bao a bego a ba hirile. (Luka 19:1, 2) Batho ba be ba sa rate go ntšha motšhelo e bile ba hloile le batho bao ba tlago ba ba ntšhiša motšhelo woo.