1. Ke’ng seo Jehofa a se diretšego yo mongwe le yo mongwe wa rena?

JEHOFA o gogetše yo mongwe le yo mongwe wa rena go yena. (Joh. 6:44) O nagana gore se se ra go re’ng? Se ra gore ge Jehofa a dutše a hlahlobišiša pelo ya motho yo mongwe le yo mongwe mo lefaseng, o ile a bona gore o bohlokwa, a ba a bona le gore o ka kgona go mo rata. (1 Dikor. 28:9) Jehofa o a go tseba, o a go kwešiša e bile o a go rata. Ruri seo se a kgothatša!

2. Jesu o re thušitše bjang go kwešiša gore Jehofa o rata yo mongwe le yo mongwe wa rena?

² Jehofa o go rata kudu, e bile o rata le bana beno le dikgaetšedi ka moka ka phuthegong. E le gore re kwešiše taba ye, Jesu o ile a bolela papišo yeo go yona a ilego a swantšha Jehofa le modiši. Ge e ba nku e tee go tše lekgolo e ka timela, modiši o tlo dira’ng? O tlo “[tlogela] tše masomesenyane-senyane dithabeng a ya go nyaka yeo e timetšego.” Ge modiši a hweditše nku yeo a ka se e omanye goba a e kgalema. Go e na le moo o tlo thaba. Re ithuta’ng go se? Re ithuta gore yo mongwe le yo mongwe wa rena o bohlokwa go Jehofa. Jesu o itše: “Tate yo a lego legodimong ga a rate gore gaešita le yo mongwe wa ba banyenyane ba a lobe” goba a se ke a hwetša bophelo bjo bo sa felego.—Mat. 18:12-14.

3. Re tlo ithuta’ng sehlogong se?

³ Le ka mohla ga re nyake go nyamiša le ge e le ofe wa bana babo rena le dikgaetšedi. Re ka dira’ng gore re se ke ra ba nyamiša? Le gona re swanetše go dira’ng ge e ba yo mongwe a re kweša bohloko? Re tlo araba dipotšišo tše sehlogong se. Eupša sa pele re tlo ithuta gore “ba banyenyane ba” bao go bolelwago ka bona go Mateo kgaolo 18 ke bomang.

4. “Ba banyenyane ba” ke bomang?

⁴ “Ba banyenyane ba” ke barutiwa ba Jesu ka moka ba bagolo le ba banyenyane. Le ge ba sa lekane ka mengwaga, ba lebelelwa e le “bana ba banyenyane” ka ge ba ikemišeditše go rutwa ke Jesu. (Mat. 18:3) Batho ba ka moka ga ba swane, ba tšwa dinageng tša go se swane le ditšong tša go se swane. Eupša ba na le tumelo go Kriste gomme yena o ba rata kudu.—Mat. 18:6; Joh. 1:12.

5. Jehofa o ikwa bjang ge a bona motho yo mongwe a kgopiša goba a kweša bohloko yo mongwe wa bahlanka ba gagwe?

⁵ “Ba banyenyane ba” ka moka ba bohlokwa go Jehofa. E le gore re kwešiše kamoo a ka ikwago ka gona, nagana kamoo rena re ikwago ka gona ka bana. Re ba rata kudu. Re nyaka go ba šireletša ka gobane ga ba na matla, bohlale le tsebo yeo batho ba bagolo ba nago le yona. Nnete ke gore ga re nyake go bona motho yo mongwe a tlaišega, eupša re kwa bohloko le go feta ge re bona motho yo mongwe a tlaiša ngwana. Ka mo go swanago, Jehofa o nyaka go re šireletša e bile o kwa bohloko kudu ge motho yo mongwe a kgopiša goba a kweša bohloko yo mongwe wa bahlanka ba gagwe.—Jes. 63:9; Mar. 9:42.

6. Go ya ka Bakorinthe ba Pele 1:26-29, batho ba lefase ba lebelela balatedi ba Jesu bjang?

⁶ Ke ka tsela efe e nngwe yeo balatedi ba Jesu ba swanago le “ba banyenyane”? Batho ba lefase ba lebelela bahumi, batho ba go tuma le ba maemo a godimo mmušong e le bona ba lego bohlokwa. Eupša balatedi ba Jesu ba lebelelwa ba se bohlokwa e bile ba nyatšega. (Bala 1 Bakorinthe 1:26-29.) Jehofa yena ga a ba lebelele ka tsela yeo.

7. Jehofa o nyaka re ikwa bjang ka bana babo rena le dikgaetšedi?

⁷ Jehofa o rata bahlanka ba gagwe ka moka go sa šetšwe gore ke kgale ba mo hlankela goba ke gona ba thoma go mo hlankela. Bana babo rena le dikgaetšedi ka moka ba bohlokwa go Jehofa, ka gona le rena re swanetše go ba tšea ba le bohlokwa. Re swanetše ‘go rata bana babo rena ka moka’ e sego gore re no rata bana babo rena ba itšego. (1 Pet. 2:17) Le gona re swanetše go dira sohle seo re ka se kgonago gore re ba šireletše le go ba bontšha gore re a ba rata. Ge re ka lemoga gore re kwešitše motho yo mongwe bohloko goba re mo kgopišitše, ga se ra swanela go no bethiša taba yeo ka moya gomme ra ipotša gore o tla re lebalela ke moka bophelo bja tšwela pele. Ke ka baka la’ng batho ba bangwe ba ka kgopišega? Mohlomongwe ba bangwe ba dirwa ke gore tsela yeo ba godišitšwego ka yona e dira gore ba inyatše. Ba bangwe ba sa tšwa go tla ka phuthegong, ka gona ga se ba tšwa ba ithuta gore ba swanetše go lebalela ba bangwe ge ba ba diretše diphošo. Go sa šetšwe gore ke ka baka la eng re kgopišegile goba ba bangwe ba kgopišegile, re swanetše go leka ka thata gore go be le khutšo. Le gona motho yo a tlwaetšego go no kgopišwa ke selo se sengwe le se sengwe, o swanetše go fokotša go kgopišega. Go dira bjalo go tla mo thuša gore a dule a thabile le gore ba bangwe ba dule ba thabile.

8. Batho ba mehleng ya Jesu ba be ba na le kgopolo efe yeo e ilego ya ama barutiwa ba gagwe?

⁸ Ke’ng seo se ilego sa dira gore Jesu a bolele ka “ba banyenyane ba”? Barutiwa ba gagwe ba be ba ile ba mmotšiša gore: “Gabotsebotse ke mang yo mogolo kudu Mmušong wa magodimo?” (Mat. 18:1) Bajuda ba bantši ba mehleng yeo ba be ba nyaka gore batho ba ba lebelele ba le bohlokwa kudu. Seithuti se sengwe se re: “Batho ba bangwe ba be ba nagana gore go hlomphiwa le go tuma go bohlokwa kudu bophelong.”

9. Barutiwa ba Jesu ba be ba swanetše go dira’ng?

⁹ Jesu o be a tseba gore Bajuda ba bantši ba be ba nagana gore go bohlokwa gore ba be kaone go feta batho ba bangwe. Ka baka leo, barutiwa ba gagwe ba be ba swanetše go šoma ka thata gore  ba se ke ba nagana ka tsela yeo. O ile a ba botša gore: “Anke yo a nyakago go ba yo mogolo gare ga lena e be yo monyenyane gomme yo a etelelago pele a be bjalo ka modiredi.” (Luka 22:26) Ge re lebelela ‘ba bangwe ba re feta ka bogolo’ se se bontšha gore re itebelela re le ‘ba banyenyane.’ (Bafil. 2:3) Ge re thoma go itebelela bjalo, ga se gantši re ka kgopišago ba bangwe.

10. Ke keletšo efe ya Paulo yeo re swanetšego go e diriša?

¹⁰ Bana babo rena le dikgaetšedi ka moka ba re feta ka tsela e itšego. Re ka kgona go kwešiša taba ye gabotse ge re dula re lebelela dika tša bona tše dibotse. Le gona re swanetše go diriša keletšo ya Paulo yeo a ilego a e ngwalela Bakorinthe yeo e rego: “Ke mang yo a go dirago gore o fapane le yo mongwe? Ke eng ruri seo o nago le sona seo o sa se fiwago? Bjale ge e ba ruri o se filwe, ke ka baka la’ng o ikgantšha bjalo ka ge eka ga se wa se fiwa?” (1 Bakor. 4:7) Re swanetše go hlokomela gore re se ke ra nyaka gore batho ba bangwe ba re hlomphe, goba ra nyaka go ipona re le kaone go feta batho ba bangwe. Ka baka leo, dikgaetšedi tšeo di nago le bokgoni bja go thoma dithuto tša Beibele goba bana babo rena bao ba kgonago go fa dipolelo tše dibotse, ba swanetše go iša theto go Jehofa.

11. Jesu o re rutile’ng ka papišo yeo a ilego a e bolela ya kgoši le mohlanka wa gagwe?

¹¹ Ka moragonyana ga gore Jesu a lemoše balatedi ba gagwe gore ba se ke ba kgopiša ba bangwe, o ile a ba botša papišo ka kgoši le mohlanka wa gagwe. Kgoši e ile ya phumola molato o mogolo woo mohlanka yoo a bego a ka se tsoge a kgonne go o patela. Ka morago yena mohlanka yoo o ile a gana go phumola molato o monyenyane kudu wa mohlankagotee le yena. Mafelelong kgoši e ile ya lahlela mohlanka yoo a bego a se na kgaugelo kgolegong. Re ithuta’ng go se? Jesu o ile a re: “Tate wa legodimong le yena o tla le swara bjalo, ge e ba yo mongwe le yo mongwe wa lena a sa lebalele ngwanabo go tšwa pelong.”—Mat. 18:21-35.

12. Ge e ba re sa lebalele bana babo rena, seo se tla kgoma ba bangwe bjang?

¹² Seo mohlanka yoo a se dirilego ga se sa kgoma yena feela eupša se kgomile le ba bangwe. Sa pele, o ile a gana go lebalela mohlankagotee le yena ka go laela gore “a lahlelwe kgolegong go fihla a lefa seo a se kolotago.” Sa bobedi, ka ge bahlanka ba bangwe ba bone seo a se dirilego, seo se ile sa ba kweša bohloko. Ge “bahlankagotee le yena ba bona dilo tšeo di diregilego, [ba ile] ba kwa bohloko kudu.” Ka mo go swanago, dilo tšeo re di dirago di kgoma batho ba bangwe. Go tlo direga’ng ge e ba motho yo mongwe a re direla phošo gomme re gana go mo lebalela? Sa pele, re mo kweša bohloko ge re gana go mo lebalela goba ge re mmethiša ka moya le ge re sa mmontšhe lerato. Sa bobedi, re dira gore ba bangwe ka phuthegong ba se ke ba lokologa ge ba lemoga gore ga re na khutšo le motho yoo.

13. O ithuta’ng mohlaleng wa kgaetšedi yo mongwe wa mmulamadibogo?

¹³ Ge re lebalela bana babo rena le dikgaetšedi re a thaba e bile re dira gore ba bangwe le bona ba thabe. Se ke seo se ilego sa diragalela mmulamadibogo yo mongwe yoo a bitšwago Crystal. * O ile a kwešwa bohloko ke kgaetšedi yo mongwe ka phuthegong. Crystal o re: “Ka dinako tše dingwe o be a ntlhaba ka mantšu. Ge re le tšhemong ke be ke sa nyake le go sepela le yena. Ke ile ka thoma go se sa thabela go ya tšhemong.” Crystal o be a bona eka o na le mabaka a kwagalago ao a dirago gore a kgopišege. Eupša ga se a tšwela pele a kwatetše kgaetšedi yoo goba go dula a kgopišegile. O ile a bontšha boikokobetšo gomme a diriša keletšo ya Beibele yeo a e hweditšego sehlogong seo se rego “Lebalela go tšwa Pelong” ka go Morokami wa October 15, 1999. Ka morago o ile a lebalela kgaetšedi yoo. Crystal o re: “Ga bjale ke a bona gore ka moka ga rena re  leka ka thata gore re kaonefatše tsela yeo re phelago ka yona le gore Jehofa o ikemišeditše go re lebalela ka bolokologi letšatši le lengwe le le lengwe. Ke ikwa ke imologile kudu e bile ke boetše ke thabile.”

14. Go ya ka Mateo 18:21, 22, go bonagala moapostola Petro a be a na le bothata bofe, gona o ithuta’ng tseleng yeo Jesu a ilego a mo araba ka yona?

¹⁴ Re a tseba gore re swanetše go lebalela batho ba bangwe, eupša ka dinako tše dingwe ga go bonolo go dira seo. Go ka direga gore moapostola Petro le yena o be a fela a ikwa ka tsela yeo. (Bala Mateo 18:21, 22.) O ka thušwa ke’ng? Sa pele, nagana ka dilo tše dintši tšeo Jehofa a go lebaletšego tšona. (Mat. 18:32, 33) Le ge re le badiradibe Jehofa o re lebalela ka bolokologi. (Ps. 103:8-10) Le gona, ‘re tlamegile go ratana.’ Ka baka leo re ka se kgethe gore re nyaka go lebalela ba bangwe goba ga re nyake. Re tlamegile go lebalela bana babo rena le dikgaetšedi. (1 Joh. 4:11) Sa bobedi, naganišiša ka seo se tlago go direga ge re lebalela ba bangwe. Re tla thuša motho yoo a re kgopišitšego, ra dira gore ka phuthegong go be le botee, ra šireletša segwera sa rena le Jehofa e bile seo se tla dira gore re imologe. (2 Bakor. 2:7; Bakol. 3:14) Sa mafelelo, rapela Modimo gore a go thuše ka ge e le yena a go kgopelago gore o lebalele ba bangwe. O se ke wa dumelela Sathane a senya segwera se sebotse seo o nago le sona le bana beno le dikgaetšedi. (Baef. 4:26, 27) Re hloka Jehofa gore a re thuše e le gore go be le khutšo ka phuthegong.

15. Go ya ka Bakolose 3:13, re swanetše go dira’ng ge e ba re kgopišitšwe ke seo ngwanabo rena goba kgaetšedi a se dirilego?

¹⁵ O swanetše go dira’ng ge e ba Mokristegotee le wena a dirile selo seo se go kgopišago? Dira sohle seo o ka se kgonago gore go be le khutšo. Rapela Jehofa gomme o mmotše kamoo o ikwago ka gona. Mo kgopele gore a thuše motho yo a go kgopišitšego gomme o kgone go bona dika tše dibotse ka motho yoo, e lego dika tšeo Jehofa a di ratago ka yena. (Luka 6:28) Ge e ba o sa kgone go lebala ka seo ngwaneno a go dirilego sona,  nyaka tsela e botse ya go boledišana le yena. O swanetše go dula o gopola gore ngwaneno a ka se go kgopiše ka boomo. (Mat. 5:23, 24; 1 Bakor. 13:7) Ge o bolela le yena, o se ke wa no nagana gore a ka se bolele le wena gabotse. O swanetše go dira’ng ge e ba a sa nyake go dira khutšo? ‘Tšwela pele o mo kgotlelela.’ O se ke wa mo felela pelo. (Bala Bakolose 3:13.) Sa bohlokwa le go feta, o se ke wa dula o kgopišegile ka gobane seo se tla senya segwera sa gago le Jehofa. O se ke wa dumelela selo se go kgopiša. Ge o dira bjalo, o tla be o bontšha gore o rata Jehofa go feta selo le ge e le sefe.—Ps. 119:165.

16. Yo mongwe le yo mongwe wa rena o na le boikarabelo bofe?

¹⁶ Re thabela go hlankela Jehofa ka botee re na le bana babo rena le dikgaetšedi re le bjalo ka “mohlape o tee” woo o nago le “modiši o tee.” (Joh. 10:16) Puku ya Go Rulaganyetšwa go Dira Thato ya Jehofa go letlakala 165 e re: “Ka ge o thabela botee bjoo, o na le boikarabelo bja go thuša gore bo dule bo le gona.” Ka gona re swanetše go “itlwaetša go lebelela bana babo rena le dikgaetšedi ka tsela yeo Jehofa a ba lebelelago ka yona.” Jehofa o re tšea re le bohlokwa ka moka ga rena. Na le wena o tšea bana beno le dikgaetšedi ba le bohlokwa? Jehofa o bona dilo ka moka tšeo o di dirago go thuša bana beno le go ba bontšha gore o a ba rata.—Mat. 10:42.

17. Re ikemišeditše go dira’ng?

¹⁷ Ka ge re rata Bakristegotee le rena, re swanetše go ikemišetša gore re “se bee tšhitišo goba sekgopi pele ga” bona. (Baroma 14:13) Re tšea bana babo rena le dikgaetšedi ba re feta ka bogolo, ka baka leo re nyaka go ba lebalela go tšwa pelong. Anke re direng sohle seo re ka se kgonago gore re se ke ra kgopišwa ke ba bangwe. Le gona, anke re “phegeleleng dilo tše di išago khutšong le dilo tše e lego tša go agana.”—Baroma 14:19.