BATHO ba bantši ba tseba pego ya gore Jesu o ile a kokotelwa koteng a le gare ga disenyi tše pedi. (Mat. 27:35-38) Eupša bare Beibele ga e bolele therešo ge e re ka morago Jesu o ile a bolokwa ka lebitleng—Mar. 15:42-46.

Baganetši ba bangwe ba Beibele ga ba dumele gore motho yo a bego a kokotetšwe koteng o be a ka dumelelwa gore a bolokwe ka lebitleng, go e na le moo ba be ba dumela gore disenyi di be di swarwa ka tsela e fapanego. Raditaba yo a bitšwago Ariel Sabar, o ngwadile ka makasineng wo o bitšwago Smithsonian gore: “Batho bao e bego e le disenyi tše dikgolo ba be ba kokotelwa koteng le gona ditsebi di bolela gore e be e tlo ba go hloka tlhaologanyo gore Baroma ba dumelele motho yo bjalo gore a bolokwe ka seriti.” Baroma ba be ba leša motho yo bjalo dihlong, ka gona ba be ba tlogela setopo sa gagwe koteng gore se jewe le diphoofolo tša naga. Ka morago mašaledi a motho yo bjalo a ka no lahlelwa ka moleteng.

Baepi ba marope ba ile ba utolla selo se sengwe seo se fapanego mabapi le go bolawa ga Bajuda. Ka 1968, go ile gwa hwetšwa mašaledi a monna yo mongwe yo a ka bago a bolailwe mehleng ya Jesu. Mašaledi ao a ile a hwetšwa dirapeng tša lapa la Bajuda kgauswi le Jerusalema. A be a le ka gare ga lepokisi. Ka gare ga mašaledi ao go be go na le lerapo la serethe. Le be le kokotetšwe koteng ka sepikiri sa disenthimithara tše e ka bago tše 11.5. Sabar o re “Mašaledi a monna yo a bitšwago Yehochana e bile bohlatse bja gore ke ka baka la’ng taba ya gore Jesu o ile a bolokwa ka lebitleng e be e ka ba nnete.” Mašaledi ao e be e le mohlala wa go bontšha gore go be go na le Bajuda bao ba bego ba kokotetšwe koteng mehleng ya Jesu bao ba bego ba ba dumelela gore ba hwetše poloko ya Sejuda.

Go na le dipotšišo tše dintši tša mabapi le gore Jesu o be a kokotetšwe bjang koteng ka baka la marapo ao a hweditšwego a Yehochanan. Eupša re a tseba gore disenyi tše dingwe tšeo di ilego tša kokotelwa koteng di ile tša bolokwa ka lebitleng. Ditopo tša bona a se tša no lahlwa. Ka gona re a dumela gore seo Beibele e se bolelago ka gore setopo sa Jesu se ile sa bolokwa ka lebitleng ke nnete.

Bohlatse bjo bo hweditšwego bo dumelelana le seo Beibele e se bolelago. Sa bohlokwa le go feta ke gore Jehofa o boletše e sa le pele gore Jesu o be a tla bolokwa ka lebitleng la monna wa mohumi, le gona, re a tseba gore ga go na motho yo a ka thibelago seo Jehofa a se boletšego gore se direge.—Jes. 53:9; 55:11.