Nakong ya Ntwa ya Bobedi ya Lefase batswadi ba ka ba ile ba tloga Estonia gomme ba ya Germany moo ke belegetšwego gona. Ka morago ga moo ba ile ba itokišeletša go hudugela Canada. Legae la rena la mathomo kua Canada le be le le kgauswi le Ottawa, e be e le moago o monyenyane moo go bego go dula le dikgogo. Re be re diila kudu, eupša go be go sa swane ka gobane re be re kgona go ja mae mesong.

Ka letšatši le lengwe Dihlatse tša Jehofa di ile tša balela mma Kutollo 21:3, 4. Seo ba mmaletšego sona se ile sa mo kgoma kudu mo a ilego a lla. Mma le tate ba ile ba ithuta Beibele go fihla ba swanelega go kolobetšwa.

Batswadi ba ka ba be ba sa tsebe Sekgowa gabotse. Eupša ba be ba fišegela go hlankela Jehofa. Mo e ka bago Mokibelo o mongwe le o mongwe, le ge tate a be a šomile bošego ka moka feketoring ya go tološa tšhipi kua Sudbury, Ontario, ge a boa o be a tšea nna le moratho wa ka Sylvia gore re ye tšhemong. Le gona beke e nngwe le e nngwe re be re bala Morokami re le lapa. Mma le tate ba ile ba nthuta gore ke rate Modimo. Se se ile sa dira gore ka 1956 ke ineele go Jehofa ge ke be ke na le mengwaga e lesome. Ka ge ba be ba rata Jehofa kudu seo se ile sa dira gore ke tšwele pele ke mo hlankela.

Ka morago ga go fetša sekolo ke ile ka se sa hlankela Jehofa gabotse. Ke ile ka nagana gore ge nka tšea bobulamadibogo ke be nka se tsoge ke dirile tšhelete e ntši gore ke kgone go ya dinageng tše dingwe e lego seo ke bego ke se nyaka go tloga le mathomong. Ke ile ka hwetša mošomo woo ke bego ke o rata seteišeneng sa radio moo ke bego ke letša mmino. Eupša ke be ke šoma bošego, ke dula ke se gona dibokeng e bile ke phela le batho bao ba sa ratego Modimo. Eupša ka ge letswalo la ka le be le tlwaeditšwe ke Beibele ke ile ka dira diphetogo.

Ke ile ka hudugela kua Oshawa, Ontario, ke moka ka kopana le Ray Norman, sesi wa gagwe Lesli le babulamadibogo ba bangwe. Ka moka ga bona ba be ba mpontšha gore ba a nthata. Ge ke be ke bona ka moo ba bego ba thabile ka gona seo se ile sa dira gore ke nagane gore ke nyaka go dira eng ka bophelo bja ka. Ba ile ba nkgothaletša gore ke tšee bobulamadibogo. Ke moka ke ile ka thoma go ba mmulamadibogo ka September 1966. Ke be ke thabile e bile dilo di ntshepelela gabotse. Eupša bophelo bja ka bo be bo le kgauswi le go fetoga ke sa letela.

Ge ke be ke sa tsena sekolo, ke ile ka tlatša fomo ya go ya Bethele kua Toronto, Canada. Ka morago  ge ke be ke le mmulamadibogo ke ile ka laletšwa go tlo hlankela Bethele ka mengwaga e mene. Eupša ke be ke rata Lesli e bile ke tšhoga gore ge nka amogela taletšo yeo nka se sa mmona gape. Ka morago ga go rapela ka taba ye ka nako e telele ke ile ka phetha ka go ya Bethele gomme ka laela Lesli ke nyamile.

Ke be ke šoma go hlatswa kua Bethele gomme ka morago ka ba mongwaledi. Ge nako e dutše e eya Lesli e ile ya ba mmulamadibogo yo a kgethegilego kua Gatineau, Quebec. Ke be ke dula ke ipotšiša gore o phela bjang e bile ke ipotšiša ge e ba ke dirile phetho e botse. Go ile gwa direga selo se se makatšago kudu bophelong bja ka. Ray, e lego ngwanabo Lesli o ile a laletšwa go tlo šoma Bethele. Re be re dula gotee! Se se ile sa mpha sebaka sa gore ke tsošološe segwera sa ka le Lesli. Re ile ra nyalana ka di-27 tša February 1971, ka letšatši la ka la mafelelo la kabelo ya ka ya mengwaga e mene.

Nna le Lesli re ile ra abelwa go hlankela phuthegong ya leleme la Sefora kua Quebec. Ka morago ga mengwaga e sego kae ke ile ka makala ge ke be ke laletšwa go hlankela bjalo ka molebeledi wa tikologo ke na le mengwaga e 28. Ke be ke ikwa okare ke sa le ngwana le gore nka se kgone go dira kabelo yeo, eupša mantšu ao a lego go Jeremia 1:7, 8 a ile a nkgothatša. Le gona Lesli o be a ile a hwetša kotsi ya koloi ka makga a mmalwa e bile a sa kgone go robala gabotse. Bjale re be re tlo kgona bjang go ba balebeledi ba tikologo? Eupša Lesli o ile a re, “Ge e ba Jehofa a re laletša go dira se sengwe, re swanetše go se dira.” Re ile ra amogela taletšo yeo gomme ra thabela modiro wa bosepedi ka mengwaga e 17.

Ke be ke dula ke swaregile ka kabelo ya ka e bile ke se na nako e lekanego ya go ba le Lesli. Ke ile ka swanelwa ke go ithuta thuto e nngwe. Ka Mošupologo o mongwe mesong, motho o ile a kokota lebating la rena. Ge ke bula ke ile ka hwetša go se na motho, eupša go na le manki wo o nago le lešela, dienywa, tšhese, borotho, beine, digalase le molaetša wo o rego, “Eya o ipshine le mosadi wa gago.” Letšatši le be le tšwile. Eupša ke ile ka botša Lesli gore ke swanetše go lokišeletša dipolelo le gore nka se kgone go ya. O ile a kwešiša eupša a nyamile ganyenyane. Ge ke be ke dutše tafoleng ya ka, letswalo la ka le ile la thoma go ntshwenya. Ke ile ka nagana ka lengwalo la Baefeso 5:25, 28. Ke ile ka bona gore Jehofa o diriša mantšu a go nkgopotša gore ke swanetše go ba le taba le maikwelo a mosadi wa ka. Ka morago ga go rapela ke ile ka botša Lesli ka re, “Etla re sepele,” gomme a thaba. Re ile ra ya lefelong le lengwe le lebotse leo le lego kgauswi le noka, ra ala lešela la rena gomme ra thabela letšatši leo re le mmogo. E bile ke ile ka kgona le go lokišeletša dipolelo tša ka.

Re be re thabela go ba balebeledi ba tikologo, moo re hlanketšego go tloga British Columbia go fihla Newfoundland. Seo ke bego ke se kganyoga go tloga ke sa le yo monyenyane se be se phethagala. Ke be ke nyaka go ya Gileada eupša ke sa nyake go bo moromiwa nageng e nngwe. Ke be ke nagana gore ga ke swanelege go ba moromiwa ka ge baromiwa ba be ba  bonagala e le batho bao ba kgethegilego. Le gona ke be ke tšhaba gore re ka abelwa nageng e nngwe ya Afrika moo go nago le bolwetši goba ntwa. Ke be ke thabela go hlankela moo ke bego ke le gona.

Ka 1992 Dihlatse tša Jehofa di ile tša dumelelwa go bolela ditaba tše dibotse gape dinageng tše dingwe tša karolo ya Soviet Union. Bana babo rena ba ile ba re kgopela gore re hudugele nageng ya Estonia gore re be baromiwa ge e ba re ka kgona. Re ile ra makala kudu eupša re ile ra rapela ka taba ye. Re ile ra ipotša gape gore, ‘Ge Jehofa a re laletša go dira selo se sengwe re swanetše go se dira.’ Re ile ra amogela kabelo yeo, le gona ke ile ka thaba ka gobane re be re sa ye Afrika.

Re ile ra thoma go ithuta leleme la se-Estonia kapelapela. Ka morago ga dikgwedi tše sego kae re le moo, re ile ra kgopelwa go ba balebeledi ba tikologo. Re be re swanetše go etela diphuthego tše 46 le dihlopha tšeo di lego Estonia, Latvia, le Lithuania gotee le Kaliningrad, Russia. Seo se be se bolela gore re swanetše go ithuta maleme a se-Latvia, se-Lithuania, le se-Russia. Go be go se bonolo. Eupša bana babo rena le dikgaetšedi ba ile ba thaba ge ba bona re dira maiteko gomme ba re thuša. Ka 1999, kua Estonia go ile gwa ba le ofisi ya lekala gomme ka kgethwa gore ke be yo mongwe wa ditho tša Komiti ya Lekala ke na le Toomas Edur, Lembit Reile, le Tommi Kauko.

Re ile ra tseba gore Dihlatse tše dintši tša Jehofa di be ke kile tša išwa Siberia. Le ge di kile tša swarwa gampe ge di be di golegilwe gomme tša aroganywa le malapa a tšona, ga se tša ka tša galefa. Di ile tša tšwela pele di thabile le go ba mafolofolo tšhemong. Mohlala wa Dihlatse tšeo o re ruta gore re ka kgona go kgotlelela ra ba ra thaba le ge re na le mathata.

Ge nako e dutše e eya, re be re se sa na nako e ntši ya go khutša, gomme Lesli o ile a thoma go ikwa a lapa kudu. Mathomong re be re sa tsebe gore go lapa mo go be go tlišwa ke bolwetši bjo a nago le bjona bjo bo bitšwago fibromyalgia. Ka nako yeo re ile ra nyaka go boela Canada kapelapela. Ge re be re laletšwa sekolong sa lekala kua Patterson, New York, U.S.A., ke ile ka nagana gore ga se ra swanela go ya. Eupša ka morago ga go rapela ka taba ye go tšwa pelong re ile ra amogela taletšo yeo. Jehofa o ile a šegofatša phetho yeo re ilego ra e dira. Ge re be re le moo sekolong, Lesli o ile a ya ngakeng gomme ba mo thuša. Ka morago re ile ra kgona go tšwela pele re hlankela Jehofa gabotse.

Bošegong bjo bongwe ka 2008 ge ke be ke le Estonia, bana babo rena ba go tšwa Ntlongkgolo ba ile ba nteletša mogala gomme ba nkgopela gore ke ye go hlankela kua Congo. Ke ile ka makala kudu ka gobane ke be ke swanetše go ba araba letšatšing le le latelago. Mathomong ke ile ka se botše Lesli ka taba ye ka gobane ke be ke tseba gore a ka se robale bošegong bjoo. Eupša ke nna ke ilego ka se robale bošego ka gobane ke be ke rapela Jehofa ka taba ye e bego e ntshwenya ya go ya Afrika.

Letšatšing le le latelago ge ke be ke botša Lesli ka taba yeo, re ile ra ipotša gore, “Jehofa o re laletša go ya Afrika. Re tseba bjang gore re ka se kgone go  phetha kabelo ye ka ntle le ge re ka e leka?” Ka morago ga go fetša mengwaga e 16 re le Estonia, re ile ra ya Kinshasa, Congo. Ofisi ya lekala e be e le kgauswi le serapa se sebotse moo go bego go homotše. Selo sa mathomo seo Lesli a ilego a se bea kamoo kamoreng ya rena ke karata yeo a tlilego le yona go tloga Canada. Godimo ga yona go be go ngwadile mantšu ao a rego, “Thabela mo o lego gona.” Ka morago ga go kopana le bana babo rena le dikgaetšedi, go swara dithuto tša Beibele, le go thabela go ba baromiwa, tsela yeo re thabelago go hlankela Jehofa ka yona e ile ya gola. Ge nako e dutše e eya re ile ra thabela go etela diofisi tša makala tše 13 tša Afrika. Seo se ile sa dira gore re kgone go bona mehutahuta ya batho le bobotse bja bona. Ke ile ka se sa tšhaba Afrika gomme ka leboga Jehofa gore o re rometše moo.

Kua Congo, re ile ra ithuta go ja dijo tšeo re bego re sa di tsebe go swana le dikhunkhwane tšeo re bego re nagana gore re ka se tsoge re di jele. Eupša ge re be re bona bana babo rena le dikgaetšedi ba di thabela, le rena re ile ra di leka gomme ra thaba ge re be re bona gore di a tsefa. Re ile ra ya ka bohlabela bja Afrika go yo kgothatša bana babo rena le dikgaetšedi le go ba nea dilo tšeo ba bego ba di hloka.

Mafelong ao go be go na le dihlopha tša mašole tšeo di bego di gobatša basadi le bana. Bana babo rena le dikgaetšedi ba bantši ba be ba diila. Eupša ka ge ba na le kholofelo e tiilego ya gore bahu ba tlo tsošwa, Ba rata Jehofa e bile ba botegela mokgatlo wa Jehofa, seo se ile sa re kgothatša kudu. Mohlala wa bona o re thušitše gore re ipotšiše gore ke ka baka la’ng re hlankela Jehofa le go tiiša tumelo ya rena go yena. Bana babo rena le dikgaetšedi ba bangwe ba be ba lahlegetšwe ke magae a bona le dilo tšeo ba bego ba di bjetše. Seo se ile sa mpontšha kamoo dilo tše di bonagalago di ka felago ka pela ka gona le kamoo go lego bohlokwa gore re tiiše segwera sa rena le Jehofa. Le ge bana babo rena ba be ba na le mathata a magolo kudu, ba be ba sa belaele. Tsela yeo ba bego ba itshwara ka yona e ile ya re kgothaletša gore re kgone go kgotlelela mathata a rena le malwetši ao a bego a re swere.

Re ile ra newa kabelo e nngwe. Re ile ra kgopelwa gore re hudugele ofising ya lekala la Hong Kong. Ga se ra ka ra nagana gore re ka dula kua Asia. Eupša ka ge re be re šetše re bone gore Jehofa o be a  re thuša dikabelong ka moka, re ile ra amogela taletšo yeo. Ka 2013, re ile ra tlogela bagwera ba rena le bobotse bja naga ya Afrika re nyamile re sa tsebe gore moo re yago gona go bjang.

Go be go se bonolo go dula Hong Kong, ka gobane ke toropo yeo e tletšego kudu ka batho ba go tšwa lefaseng ka moka. Go be go se bonolo go ithuta leleme la Se-Cantone. Eupša bana babo rena le dikgaetšedi ba moo ba ile ba re amogela, e bile re ile ra thabela le dijo tša moo. Mošomo o be o gola ka lebelo ofising ya lekala gomme dilo di thoma go tura kudu. Ke moka Sehlopha se Bušago sa phetha ka go rekiša dilo tše dintši tša ofisi ya lekala. Ka moragonyana, ka 2015 re ile ra laelwa gore re ye South Korea, moo re ilego ra tšwela pele re hlankela re le gona. Re ile ra swanelwa ke go ithuta leleme le lengwe le le thata. Le ge re tšere nako e telele re ithuta leleme la moo, bagwera ba rena ba ile ba bona maiteko a rena a go boledišana le bona ka Sekorea.

Ka dinako tše dingwe ga go bonolo go dira bagwera, eupša ge re ka dira maiteko a gore gwerane le ba bangwe, re ka kgona go tlwaelana le bona ka pela. Re šetše re bone gore bana babo rena le dikgaetšedi ba a swana le gore tsela yeo Jehofa a re bopilego ka yona, e dira gore re kgone go rata bana babo rena le dikgaetšedi ba bantši ka pelo ka moka.—2 Bakor. 6:11.

Re bone kamoo go lego bohlokwa go amogela batho ka tsela yeo Jehofa a ba amogelago ka yona le kamoo a re ratago le go re hlahla ka gona. Nako le nako ge re be re nyamile e bile re ipotšiša ge e ba batho ba bangwe ba re amogela, re be re bala mangwalo ao a kgothatšago ao a tšwago go bagwera ba rena. Jehofa o arabile dithapelo tša rena a ba a re bontšha gore o a re rata ka go re nea matla a gore re kgone go tšwela pele re mo hlankela.

Mengwageng ye ka moka, nna le Lesli re bone kamoo go lego bohlokwa ka gona gore yo mongwe le yo mongwe wa rena a bee nako ka thoko gore re be gotee go sa šetšwe gore re swaregile ka eng. Le gona re bone kamoo go lego bohlokwa gore re se gane, ge yo mongwe a dira phošo kudukudu ge re ithuta leleme le lefsa. Le gona bošego bjo bongwe le bjo bongwe re leka go nagana ka selo seo re se thabetšego gore re kgone go leboga Jehofa.

Ke be ke bona okare nka se tsoge ke bile moromiwa goba ke dula dinageng tše dingwe. Ke ile ka thabišwa ke go tseba gore Jehofa o dira gore dilo ka moka di kgonege. Ke ile ka nagana ka mantšu a moporofeta Jeremia ao a rego: “O ntahleditše wena Jehofa.” (Jer. 20:7) O re diretše dilo tše dintši tše dibotse tšeo re bego re sa di nagane, e bile a phethagatša le kganyogo ya ka ya go tšea maeto ka sefofane. Re ile ra etela dinageng tše dintši go feta kamoo ke bego ke nagana ka gona ge ke be ke sa le mošemanyana. Ra ya diofising tše dintši tša makala tšeo di lego dikontinenteng tše 5. Ke leboga kudu ka tsela yeo Lesli a bego a ikemišeditše go nthekga ka gona dikabelong tša rena ka moka.

Re dula re ikgopotša gore dilo ka moka tšeo re di dirago re di dira ka gobane re rata Jehofa. Dilo tše dibotse tšeo re di thabelago, di bontšha kamoo nakong e tlago re tlago go ipshina ka bophelo go ya go ile ge Jehofa a tla be a ‘a bula seatla sa gagwe gomme a kgotsofatša kganyogo ya sephedi se sengwe le se sengwe.’—Ps. 145:16.