Beibele ga e re botše. Eupša e re nea ditaba tše dingwe tše di kgahlišago gore ke ka baka la’ng ba ka ba ba ile ba kgetha go se boele Natsaretha.

Morongwa o ile a botša Maria gore o be a tlo ima gomme a belega. Ge morongwa a be a bolela molaetša wo, Maria le Josefa ba be ba dula Natsaretha e lego motseng wa Galilea moo Josefa a tšwago gona. (Luka 1:26-31; 2:4) Ka morago ge ba boa Egipita, ba ile ba boela Natsaretha. Jesu o goletše moo gomme ya ba Monatsaretha. (Mat. 2:19-23) Ke ka baka leo ge re bolela ka Josefa, Maria le Jesu, re gopola ka motse wa Natsaretha.

Maria o be a na le wa leloko la gabo yo a bitšwago Elisabetha yo a bego a dula Juda. Elisabetha e be e le mosadi wa moperisita Sakaria gomme ka morago a tla a ba mmago Johane mokolobetši. (Luka 1:5, 9, 13, 36) Maria o ile a etela Elisabetha kua Juda gomme a dula le yena ka dikgwedi tše tharo, ke moka a boela Natsaretha. (Luka 1:39, 40, 56) Ke ka baka leo Maria a bego a tseba motse wa Juda.

Ge nako e dutše e eya Josefa o ile a kwa taelo ya gore batho ‘ba ye go ngwadišwa.’ Ka morago o ile a tloga Natsaretha a ya Betlelehema, e lego “motseng wa Dafida” moo go ilego gwa porofetwa gore Mesia o be a tla belegelwa gona. (Luka 2:3, 4; 1 Sam. 17:15; 20:6; Mika 5:2) Ka morago ga gore Jesu a belegelwe moo, Josefa o be a se sa nyaka gore ba boele morago Natsaretha le leseana la bona leo le sa tšwago go belegwa. Ba ile ba dula Betlelehema moo e lego bokgole bja dikhilomithara tše senyane go tloga Jerusalema. Seo se be se tla ba thuša gore ba tšee leseana la bona ba ye tempeleng ke moka ba dire sehlabelo go ya le kamoo molao o bego o laetše ka gona.—Lef. 12:2, 6-8; Luka 2:22-24.

Morongwa wa Modimo o be a kile a botša Maria gore morwa wa gagwe o tla dula “sedulong sa bogoši sa Dafida” ke moka a “buša e le Kgoši.” Mohlomongwe Maria le Josefa ba be ba bona go le bohlokwa gore Jesu a belegelwe Motseng wa Dafida. (Luka 1:32, 33; 2:11, 17) Go ka direga gore ba be ba nagana gore ke gabohlale gore ba tšwele pele ba dutše moo go fihlela ba tseba gore Modimo o nyaka gore ba dire eng.

Ga re tsebe gore Maria le Josefa ba be ba na le nako e kae ba le Betlelehema ge balepi ba dinaledi ba etla go bona. Ka nako yeo Maria le Josefa ba be ba dula ka ntlong, gomme morwa wa bona e le lesea. (Mat. 2:11) Go bonagala ba sa ka ba boela Natsaretha gomme ba dutše Betlelehema go fihla ba eba le ga bona.

Heroda o ile a laela gore “bašemane ka moka Betlelehema . . . go tloga ka ba nywaga e mebedi le ka tlase” ba bolawe. (Mat. 2:16) Morongwa wa Modimo o ile a lemoša Maria le Josefa ka taba yeo ke moka ba tšhabela Egipita le Jesu gomme ba dula moo go fihla Heroda a ehwa. Ka morago, Josefa o ile a tšea lapa la gagwe a ya le lona Natsaretha. Ke ka baka la’ng ba se ba boela Betlelehema? Ka nako yeo morwa wa Heroda yo a bitšwago Arakelose o be a buša Judea gomme a le sehlogo kudu. Le gona morongwa o ile a lemoša Josefa gape gore a se ke a ya moo. Josefa o be a tla godiša Jesu a šireletšegile moo e bile e le morapedi wa nnete wa Modimo.—Mat. 2:19-22; 13:55; Luka 2:39, 52.

Go ka direga gore Josefa o ile a hlokofala pele Jesu a dira gore go kgonege gore batho ba ye legodimong. Nakong e tlago Josefa o tlo tsošwa mo lefaseng. Batho ba bantši ba tlo kopana le yena gomme ba ithuta dilo tše dintši go yena le gore ke ka baka la’ng yena le Maria ba ile ba dula Betlelehema ka morago ga gore Jesu a belegwe.