1-2. Go ya ka Psalme 25:​14, re swanetše go dira’ng gore re be le segwera se sebotse le Jehofa?

 O NAGANA gore ke dika dife tše bohlokwa tšeo di ka go thušago gore o dule o na le segwera se sebotse le motho yo mongwe? Mohlomongwe o ka araba ka gore bagwera ba nnete ba swanetše go bontšhana lerato le go thekgana. Ke nnete gore o ka no se bolele gore poifo ke seka se bohlokwa seo bagwera ba nnete ba swanetšego go ba le sona. Eupša lengwalo la sehlogo se, le bontšha gore bao ba nyakago go ba le segwera se sebotse le Jehofa, ba swanetše go “mmoifa.”​​—⁠Bala Psalme 25:⁠14.

² Go sa šetšwe gore re na le nako e kaakang re hlankela Jehofa, ka moka ga rena re swanetše go dula re mmoifa. Go boifa Modimo go bolela’ng? Re ka dira’ng gore re boife Modimo? Mohlala wa molaki yo a bitšwago Obadia, Moperisita yo a Phagamego Jehoyada, le Kgoši Jehoashe o re ruta’ng ka go boifa Modimo?

3. Hlalosa gore ke dilo dife tšeo di ka dirago gore re boife le gore di ka re hola bjang.

³ Ge e ba re bona eka selo se itšego se ka re gobatša, seo se ka re dira gore re ikwe re boifa. Ga se phošo go boifa ka tsela ye ka gobane go tla re thuša gore re dire diphetho tše dibotse. Go boifa go tlo re thuša gore re se ke ra sepelela ntlhaneng ya leswika. Go boifa go gobala go ka re thuša gore re be kgole le dilo tšeo di ka re bakelago kotsi. Go boifa go senya segwera sa rena le motho yo re mo ratago go tla re thuša gore re se ke ra bolela goba ra dira selo seo se mo kwešago bohloko.

4. Sathane o nyaka gore re boife Jehofa bjang?

⁴ Sathane o nyaka gore re boife Jehofa ka mo go feteletšego. Sathane o nyaka gore re dumele gore Elifase o be a bolela nnete ge a be a re Jehofa o dula a galefile, o nyaka go re otla e bile re ka se tsoge re kgonne go mo thabiša. (Jobo 4:​18, 19) O nyaka gore re tšhabe Jehofa e bile re se sa mo hlankela. E le gore re se ke ra dira seo, re swanetše go ithuta go mo hlompha le go tšhaba go mo kweša bohloko.

5. Go boifa Modimo go bolela’ng?

⁵ Motho yo a ratago Jehofa go tšwa pelong o mmontšha gore o a mo rata e bile ga a nyake go dira selo le ge e le sefe seo se ka senyago segwera sa gagwe le yena. Jesu o be a “boifa Modimo.” (Baheb. 5:⁠7) O be a sa boife Jehofa ka mo go feteletšego goba go mo tšhaba. (Jes. 11:​2, 3) Go e na le moo, o be a mo rata go tšwa pelong e bile a nyaka go mo kwa. (Joh. 14:​21, 31) Go swana le Jesu, re hlompha Jehofa ka pelo ka moka e bile re a mmoifa ka gobane o na le lerato, o bohlale, o lokile e bile o na le matla. Le gona re a tseba gore Jehofa o re rata kudu e bile o na le taba le gore re arabela bjang ge a re ruta. Eupša ka dinako tše dingwe re ka mo thabiša goba ra mo kweša bohloko.​—⁠Ps. 78:​41; Die. 27:⁠11.

6. O ka dira’ng gore o ithute go boifa Jehofa? (Psalme 34:⁠11)

⁶ Ka ge re se ra belegwa re na le bokgoni bja go boifa Jehofa, re swanetše go ithuta go mmoifa. (Bala Psalme 34:​11.) Tsela e nngwe yeo re ka dirago bjalo, ke ka go ithuta ka tlholo. ‘Dilo tšeo Jehofa a di bopilego’ di bontšha gore o bohlale, o na le matla e bile o re rata kudu gomme seo se dira gore re mo hlomphe kudu le go mo rata. (Baroma 1:​20) Kgaetšedi yo a bitšwago Adrienne o re, “Ge ke bona bohlale bja Jehofa go dilo tšeo a di bopilego, ke a makala gomme seo se nthuša gore ke bone gore o tseba seo ke se hlokago.” Go naganišiša go mo dirile gore a phethe ka gore, “Ga ke nyake go dira selo le ge e le sefe seo se ka senyago segwera sa ka le Jehofa, yena yo a mphilego bophelo. Na o ka ipha nako mo bekeng ye gore o nagane ka selo se sengwe seo Jehofa a se bopilego? Go dira bjalo go tlo go thuša gore o hlomphe Jehofa kudu le go mo rata.​—⁠Ps. 111:​2, 3.

7. Thapelo e ka re thuša bjang gore re dule re na le segwera se sebotse le Jehofa?

⁷ Tsela e nngwe yeo re ka boifago Modimo ka yona ke ka go dula re mo rapela. Re tseba Jehofa gabotse ge re dula re mo rapela. Nako le nako ge re mo kgopela gore a re thuše go kgotlelela mathata, re bona gore o na le matla a magolo. Ge re mo leboga ka mpho yeo a re neilego yona e lego Morwa wa gagwe, re bona gore o re rata kudu. Le gona ge re kgopela Jehofa gore a re thuše ka bothata bjoo re nago le bjona, re bona gore o bohlale kudu. Dithapelo tša go swana le tše di dira gore re hlomphe Jehofa kudu. E bile di re thuša go dira selo le ge e le sefe seo se ka senyago segwera sa rena le yena.

8. Re ka dira’ng gore re dule re boifa Modimo?

⁸ Re ka dula re boifa Modimo ka go ithuta Beibele, gomme re ikemišetše go ithuta mehlaleng e mebotse le e mebe. A re boledišaneng ka mehlala e mebedi ya bahlanka ba Jehofa bao ba botegago, e lego Obadia yoo e bego e le molaki wa ntlo ya Kgoši Ahaba le Moperisita yo a Phagamego Jehoyada. Ke moka re tlo bona gore re tlo ithuta’ng mohlaleng wa Kgoši Jehoashe wa Juda, yoo a ilego a thoma a hlankela Jehofa gabotse ke moka mafelelong a mo tlogela.

9. Go boifa Jehofa go thušitše bjang Obadia? (1 Dikgoši 18:​3, 12)

⁹ Ge Beibele e be e bolela ka Obadia b la mathomo, e re: “O be a boifa Jehofa kudu.” (Bala 1 Dikgoši 18:​3, 12.) Go boifa Jehofa go thušitše bjang Obadia? Go mo thušitše gore a botege, gomme kgoši ya mmea gore a okamele dilo tša ka mošate. Ka ge Obadia a be a boifa Modimo, seo se mo dirile gore a be le sebete e lego seka seo a bego a tloga a se hloka. O phetše mehleng ya Kgoši Ahaba yo mobe, yoo a ilego a “dira tše mpe mahlong a Jehofa go feta bohle [dikgoši] bao ba bilego gona pele ga gagwe.” (1 Dikg. 16:​30) Isebele e lego mosadi wa Ahaba yo a bego a rapela Baali, o be a hloile Jehofa moo a ilego a leka go fediša bahlanka ka moka ba Jehofa bao ba bego ba le ka leboa la mmušo wa Isiraele. O ile a ba a bolaya le baporofeta ba bantši ba Modimo. (1 Dikg. 18:⁠4) Ruri Obadia o hlanketše Jehofa mehleng e thata.

10. Obadia o bontšhitše bjang gore o be a tloga a na le sebete?

¹⁰ Obadia o ile a bontšha bjang gore o tloga a na le sebete? Ge Isebele a be a thoma go nyaka baporofeta ba Modimo gore a ba bolaye, Obadia o ile a tšea ba lekgolo gomme ‘a ba khutiša ka dihlopha tša ba masomehlano ka leweng, a ba a ba nea senkgwa le meetse.’ (1 Dikg. 18:​13, 14) Ge nkabe Isebele a tsebe ka seo Obadia a se dirilego, ruri o be a tlo mmolaya. Ke nnete gore go swana le motho yo mongwe le yo mongwe, Obadia o be a sa nyake go hwa. Eupša Obadia o be a rata Jehofa le batho bao ba mo hlankelago go feta tsela yeo a bego a ithata ka yona.

11. Bahlanka ba Jehofa ba lehono ba swana le Obadia bjang? (Bona le seswantšho.)

¹¹ Lehono bahlanka ba bantši ba Jehofa ba dula dinageng tšeo Modiro wa rena o thibetšwego. Ba hlompha ba mmušo, eupša go swana le Obadia, ba nea Jehofa seo se mo swanetšego e lego boineelo bjo bo feletšego. (Mat. 22:​21) Ba bontšha gore ba boifa Modimo ka go mo theetša go e na le gore ba theetše batho. (Dit. 5:​29) Ba dira se ka go tšwela pele ba botša batho ditaba tše dibotse le ka go bokana  gotee ka sephiring. (Mat. 10:​16, 28) Ba kgonthišetša gore bana babo bona le dikgaetšedi ba na le seo ba se hlokago e le gore ba dule ba na le segwera se sebotse le Jehofa. Nagana ka mohlala wa Henri yo a dulago nageng e nngwe kua Afrika moo modiro wa rena o bego o thibetšwe ka nakwana. Nakong ya ge modiro wa rena o thibetšwe, Henri o ile a ithaopela go išetša bana babo rena dikgatišo. O ngwadile gore: “Ka tlhago ke na le dihlong, eupša go boifa Jehofa go nthušitše gore ke be le sebete seo ke bego ke se hloka.” Na le wena o ka kgona go ba le sebete seo Henri a bego a na le sona? O ka kgona ge e ba o ka ba le segwera se sebotse le Modimo.

12. Moperisita yo a phagamego Jehoyada le mosadi wa gagwe ba bontšhitše bjang gore ba botegela Jehofa?

¹² Moperisita yo a Phagamego Jehoyada o be a boifa Jehofa, gomme seo sa mo thuša gore a botege le go thekga borapedi bja nnete. Seo se ile sa bonagala ge Athalia morwedi wa Isebele a ipea gore e be kgošigadi kua Juda. Batho ba be ba na le mabaka a kwagalago a go boifa Athalia. O be a na le pelo e mpe e bile a nyaka go ba kgošigadi, moo a ilego a leka go bolaya ba leloko ka moka la ka mošate e lego ditlogolo tša gagwe! (2 Dikor. 22:​10, 11) Yo mongwe wa bana bao e be e le Jehoashe. Yena o ile a phologa ka gobane mosadi wa Jehoyada e lego Jehoshabeathe, o ile a mo phološa. Jehoshabeathe le monna wa gagwe ba ile ba hlokomela ngwana yoo. Ka baka leo, ba ile ba thuša gore leloko la bogoši la Dafida le dule le le gona. Jehoyada o be a botegela Jehofa e bile a sa boife gore Athalia a ka mo thibela go dira se se lokilego.​—⁠Die. 29:⁠25.

13. Ge Jehoashe a be a na le mengwaga e šupa, Jehoyada o ile a bontšha bjang gape gore o botegela Jehofa?

¹³ Ge Jehoashe a be a na le mengwaga e šupa, Jehoyada o ile a bontšha gape gore o botegela Jehofa. O ile a loga leano. Ge leano leo le be le ka atlega, Jehoashe e be e tla ba kgoši, ka ge e be e le yena a swanelegago go tšwa molokong wa Kgoši Dafida. Ge leano leo le be le ka se atlege, Jehoyada o be a ka bolawa. Eupša Jehofa o ile a šegofatša leano leo gomme la atlega. Dikgošana le Balefi ba ile ba thekga Jehoyada ba bea Jehoashe gore e be kgoši gomme ba laela gore Athalia a bolawe. (2 Dikor. 23:​1-5, 11, 12, 15; 24:⁠1) Ke moka Jehoyada “a dira kgwerano magareng ga Jehofa, kgoši le setšhaba, gore bona e be setšhaba sa Jehofa.” (2 Dikg. 11:​17) Ka gona “a bea baletakgoro dikgorong tša ntlo ya Jehofa gore motho yo a sa hlwekago ka tsela le ge e le efe a se ke a tsena.”​​—⁠2 Dikor. 23:⁠19.

14. Jehoyada o ile a godišwa bjang ka baka la go godiša Jehofa?

¹⁴ Jehofa o be a kile a bolela gore: “Bao ba nkgodišago ke tla ba godiša.” Ka nnete o ile a godiša Jehoyada. (1 Sam. 2:​30) Ka mohlala o ile a dira gore mediro e mebotse yeo e dirilwego ke Moperisita yoo yo a Phagamego e ngwalwe ka Beibeleng gore re tle re ithute go yona. (Baroma 15:⁠4) Le gona ge Jehoyada a ehwa, o ile a hlomphiwa ka gore a bolokwe “Motseng wa Dafida gotee le dikgoši, ka gobane o be a dirile gabotse Isiraeleng, kudukudu go Modimo wa therešo le ntlong ya gagwe [Modimo].”​​—⁠2 Dikor. 24:​15, 16.

15. Re ka ithuta’ng pegong ya Jehoyada? (Bona le seswantšho.)

¹⁵ Pego ya Jehoyada e ka re thuša ka moka gore re boife Modimo. Bagolo ba ka ekiša Jehoyada ka go dula ba nyaka ditsela tša go šireletša dinku tša Modimo. (Dit. 20:​28) Bao ba godilego ba ka ithuta go Jehoyada gore ge ba  ka dula ba boifa Jehofa le go mmotegela, a ka ba diriša go phethagatša merero ya gagwe. Ga a ba phaele ka thoko. Bafsa ba ka ithuta kamoo Jehofa a ilego a swara Jehoyada ka gona, ka go swara batšofadi bao ba botegago ka seriti le ka tlhompho, kudukudu bao ba nago le nako e telele ba hlankela Jehofa. (Die. 16:​31) Ka moka ga rena re ka ithuta go dikgošana le Balefi bao ba ilego ba thekga Jehoyada. Anke ka moka ga rena re dule re thekga “bao ba etelelago pele” ka go ba theetša.​—⁠Baheb. 13:⁠17.

16. Ke eng seo se bontšhago gore Kgoši Jehoashe o be a sa leboge?

¹⁶ Jehoyada o ile a thuša kgoši Jehoashe gore e be motho yo mokaone. (2 Dikg. 12:⁠2) Seo se ile sa thuša Jehoashe gore a nyake go thabiša Jehofa nakong ya ge e be e sa le mofsa. Eupša ka morago ga gore Jehoyada a hwe, Jehoashe o ile a thoma go theetša dikgošana tša bahlanogi. Mafelelo e bile afe? Yena le batho bao ba bego ba mo thekga, ba ile ba thoma go “hlankela dikota tše kgethwa le medingwana.” (2 Dikor. 24:​4, 17, 18) Ka ge Jehofa a be a kwele bohloko, o ile “a romela baporofeta mo gare ga bona gore ba ba bušetše go yena . . . , eupša ba se theetše.” Ga se ba ka ba theetša le Sakaria morwa wa Jehoyada, yoo e bego e le moporofeta le moperisita, e bile e le motswala wa Jehoashe. Eupša go e na le gore Kgoši Jehoashe a leboge lapa leo le ilego la mo thuša, o ile a laela gore Sakaria a bolawe.​—⁠2 Dikor. 22:​11; 24:​19-⁠22.

17. Go ile gwa direga’ng ka Jehoashe?

¹⁷ Jehoashe ga se a ka a dula a boifa Jehofa. Le gona dilo ga se tša ka tša mo sepelela gabotse. Jehofa o be a kile a bolela gore: “Bao ba nnyatšago ba tla nyatšega.” (1 Sam. 2:​30) Ka morago, madira a manyenyane a Basiria a ile a fenya “madira a mantši kudu” a Jehoashe. E bile Jehoashe o be “a na le dintho tše dintši.” Ka morago ga gore Basiria ba sepele, bahlanka ba Jehoashe ba ile ba mmolaya ka ge a ile a bolaya Sakaria. Batho ba be ba nagana gore kgoši yeo ke e kgopo moo e lego gore o be a se a swanelwa ke go bolokwa “mabitleng a dikgoši.”​—⁠2 Dikor. 24:​23-⁠25.

18. Go ya ka Jeremia 17:​7, 8, re swanetše go dira’ng gore re se ke ra swana le Jehoashe?

¹⁸ Mohlala wa Jehoashe o ka re ruta’ng? O be a swana le sehlare seo medu ya sona e ithekgilego ka kota. Ka morago ga gore Jehoyada yo a bego a thekga Jehoashe a hlokofale, Jehoashe o ile a thoma go theetša bahlanogi gomme a se sa botegela Jehofa. Mohlala wo o bontšha gore ga se ra swanela go kwa Jehofa feela ka gobane ba gabo rena le batho ba bangwe ka phuthegong ba re beela mohlala o mobotse. Eupša e le gore re dule re na le segwera se sebotse le Jehofa, re swanetše go mo rata kudu le go mmoifa ka gore re dule re ithuta, re naganišiša le go rapela.​—⁠Bala Jeremia 17:​7, 8; Bakol. 2:​6, 7.

19. Jehofa o re kgopela gore re dire’ng?

¹⁹ Jehofa ga a re kgopele gore re dire dilo tše dintši. O re kgopela feela gore re dire seo se lego go Mmoledi 12:​13, yeo e rego: “Boifa Modimo wa therešo gomme o lote ditaelo tša gagwe. Ka gobane se ke sohle seo motho a tlamegilego go se dira.” Ge re boifa Modimo re tlo kgona go lebeletšana le diteko tšeo di ka re welago nakong e tlago gomme ra kgotlelela go swana le Obadia le Jehoyada. Ga go selo seo se ka senyago segwera sa rena le Jehofa.