1. Go ya ka 1 Petro 5:​2, ke tokelo efe yeo bagolo ba e thabelago?

  BAGOLO ba phuthego ba neilwe boikarabelo bja go hlokomela dinku tša Jehofa. Bana babo rena ba bao ba botegago, ba tšeela godimo tokelo ye ya go hlankela bana babo bona le dikgaetšedi e bile ba šoma ka thata gore e be ‘badiši bao ba dišago.’ (Jer. 23:4; bala 1 Petro 5:2.) Ruri re thabela go ba le banna ba go swana le ba ka diphuthegong tša gabo rena!

2. Ke mathata afe ao bagolo ba bangwe ba kopanago le ona?

² Bagolo ba kopana le mathata a mantši ge ba phetha boikarabelo bja bona. Ba swanetše go šoma ka thata gore ba hlokomele phuthego. Tony, e lego mogolo wa kua United States, o ile a swanelwa ke go fokotša mošomo o montši wo a bego a na le ona. O re: “Mathomong a leuba la COVID-19, ke be ke dira mošomo o montši kudu wa go lokišetša diboka le tšhemo. Eupša go sa šetšwe mošomo o montši woo ke bego ke o dira, go be go dula go na le o mongwe woo ke bego ke swanetše go o dira. Mafelelong, ke ile ka swarega kudu moo ke ilego ka se sa ba le nako ya go bala Beibele, ya go dira thuto ya motho ka noši le ya go rapela.” Ilir, e lego mogolo wa kua Kosovo, yena o ile a kopana le bothata bjo bo fapanego. Ge a be a le lefelong leo le nago le ntwa, o ile a hwetša go le thata go latela tlhahlo ya mokgatlo. O re: “Ge ofisi ya lekala e be e nnea kabelo ya go thuša bana babo rena le dikgaetšedi bao ba lego lefelong le kotsi, ke ile ka se be le sebete sa go dira bjalo. Ke be ke tšhogile e bile ke bona tlhahlo yeo ba nneilego yona e ka se šome.” Tim, e lego moromiwa kua Asia, o be a thatafalelwa ke go dira dilo ka moka tšeo a bego a swanetšego go di dira letšatši le letšatši. O re: “Ka dinako tše dingwe, ke be ke ikwa ke lapile kudu moo ke bego ke palelwa ke go hlokomela bana bešo le dikgaetšedi.” Bagolo bao ba kopanago le mathata a go swana le a ba ka thušwa ke’ng?

3. Re ka holega bjang ka go ithuta mohlaleng wa Moahlodi Gideone?

 ³ Bagolo ba ka ithuta mohlaleng wa Moahlodi Gideone. (Baheb. 6:12; 11:32) O be a šireletša batho ba Modimo e bile a ba hlokomela. (Baa. 2:​16; 1 Dikor. 17:⁠6) Go swana le Gideone, bagolo le bona ba kgethilwe gore ba hlokomele batho ba Modimo nakong ye e thata. (Dit. 20:​28; 2 Tim. 3:⁠1) Mohlala wa Gideone o ka re ruta go ikokobetša, go ipoetša le go kwa. O ile a hwetša go le thata go kgotlelela diteko tšeo a bego a kopana le tšona ge a be a dira dikabelo tša gagwe. Go sa šetšwe gore re bagolo goba aowa, re ka ithuta go leboga bagolo ba rena. Re ka thekga banna ba bao ba šomago ka thata.​​—⁠Baheb. 13:17.

4. Gideone o ile a bontšha bjang gore o na le boipoetšo le boikokobetšo?

⁴ Gideone o be a na le boipoetšo e bile a ikokobeditše. b Ge morongwa wa Jehofa a be a botša Gideone gore o kgethilwe gore a phološe Baisiraele go Bamidiane ba matla, monna yoo yo a ikokobeditšego o ile a araba ka gore: “Lapa lešo ke le lenyenyane baneng ba Manase, gomme ke nna yo monyenyane-nyenyane lapeng la tate.” (Baa. 6:​15) O be a bona eka ga a swanelwe ke kabelo yeo, eupša Jehofa o be a tseba gore a ka kgona go e dira. Jehofa o ile a thuša Gideone gore a kgone go phetha kabelo ya gagwe gabotse.

5. Ke neng moo go ka bago thata gore mogolo a bontšhe boipoetšo le boikokobetšo?

⁵ Bagolo ba šoma ka thata gore ba bontšhe boipoetšo le boikokobetšo dilong ka moka tšeo ba di dirago. (Mika 6:⁠8; Dit. 20:​18, 19) Ga ba ikgantšhe ka dilo tšeo ba kgonago go di dira goba tšeo ba di fihleletšego, e bile ge ba dirile diphošo, ga ba ipone eka ga ba na mohola. Ka dinako tše dingwe go ka ba thata gore mogolo a bontšhe boipoetšo le boikokobetšo. Ka mohlala a ka amogela dikabelo tše dintši gomme a hwetša go le thata gore a di dire ka moka. Goba a ka retwa ka baka la tsela yeo a dirilego kabelo ya gagwe goba a swaiwa phošo ka baka la tsela yeo a dirilego kabelo e itšego. Bagolo ba ka ithuta eng go Gideone maemong a?

6. Bagolo ba ka ithuta’ng mohlaleng wa Gideone ka go ba le boipoetšo? (Bona le seswantšho.)

⁶ Kgopela thušo. Motho yo a nago le boipoetšo o tseba dilo tšeo a sa kgonego go di dira.  Gideone o be a ipoeditše e bile a ikemišeditše go kgopela batho ba bangwe thušo. (Baa. 6:27, 35; 7:24) Bagolo ba bohlale le bona ba dira se se swanago. Tony, yo re boletšego ka yena pejana o re: “Ka baka la tsela yeo ke godišitšwego ka yona, ke no amogela mošomo o mongwe le o mongwe le ge nka se kgone go o dira. Ka gona ke ile ka phetha ka gore borapeding bja lapa re bolele ka taba ya mabapi le boipoetšo gomme ka kgopela mosadi wa ka gore a bolele seo a se naganago. Ke ile ka bogela le bidio yeo e lego go jw.org/nso yeo e rego, Tlwaetša ba Bangwe, ba Bote le go ba Matlafatša go Etša Jesu. Tony o ile a thoma go kgopela ba bangwe gore ba mo thuše ka mošomo wa gagwe. Mafelelo e bile afe? O re: “Gona bjale go na le batho bao ba nthušago go dira mošomo wa phuthego, e bile ke na le nako e ntši ya go matlafatša segwera sa ka le Jehofa.”

7. Bagolo ba ka ekiša Gideone bjang ge ba bangwe ba ba swaya diphošo? (Jakobo 3:⁠13)

⁷ O se ke wa galefa ge ba bangwe ba go swaya diphošo. Bothata bjo bongwe bjoo bagolo ba ka lebeletšanago le bjona ke ge ba swaiwa diphošo. Le mo lekgeng le mohlala wa Gideone o ka ba thuša. Ka ge a be a tseba gore o na le mafokodi, ge Baefuraime ba be ba mo swaya diphošo, o ile a bolela le bona gabotse. (Baa. 8:1-3) Gideone ga se a ka a bolela le Baefuraime a galefile. O ile a bontšha gore o ikokobeditše ka go theetša seo ba se bolelago gomme a bolela le bona ka botho, ke moka seo sa dira gore ba iše maswafo fase. Bagolo ba bohlale ba ekiša mohlala wa Gideone ka go theetša gabotse ge batho ba bangwe ba bolela le go se arabe ba galefile ge ba bangwe ba ba swaya diphošo. (Bala Jakobo 3:13.) Ge ba dira bjalo, ba dira gore go be le khutšo ka phuthegong.

8. Bagolo ba swanetše go arabela bjang ge ba retwa? Nea mohlala.

⁸ Išang ditheto ka moka go Jehofa. Ge Gideone a be a retwa ka baka la ge a fentše Bamidiane, o ile a iša ditheto go Jehofa. (Baa. 8:​22, 23) Banna bao ba kgethilwego ba ka ekiša Gideone bjang? Ba ka reta Jehofa ka dilo tšeo ba di fihleletšego. (1 Bakor. 4:​6, 7) Ka mohlala, ge mogolo a retwa ka baka la bokgoni bja gagwe bja go ruta, a ka bolela gore o be a hlahlwa ke Lentšu la Modimo, goba o tlwaeditšwe ke mokgatlo wa Jehofa. Ka dinako tše dingwe bagolo ba swanetše go hlokomela ge e ba tsela yeo ba rutago ka yona e sa dire gore go retwe bona. Nagana ka mohlala wa mogolo yo a bitšwago Timothy. Ge a be a sa tšwa go kgethwa go ba mogolo o be a rata go fa dipolelo tša phatlalatša. O re: “Ke be ke rata matseno le mehlala e metelele. Dilo tše di be di dira gore batho ba nthete. Le gona, se se be se dira gore batho ba šetše nna go e na le go šetša seo Beibele e se rutago goba Jehofa.” Ge nako e dutše e eya Timothy o ile a bona gore go bohlokwa gore a fetoše tsela yeo a rutago ka yona gore batho ba se ke ba hlwa ba reta yena kudu. (Die. 27:​21) Mafelelo e bile afe? O re: “Bana babo rena le dikgaetšedi ba mpotša gore polelo ya ka e ba thušitše go kgotlelela mathata le go ba thuša gore ba batamele kgauswi le Jehofa. Ke thaba kudu ge ke ekwa mantšu ao a bona go feta kamoo ke bego ke retwa ka gona mengwageng e ­fetilego.”

9. Ke’ng seo se ilego sa dira gore Gideone a thatafalelwe ke go kwa le go bontšha sebete? (Bona seswantšho sa le-tlakala la ka ntle.)

⁹ Ka morago ga gore Gideone a kgethwe gore e be moahlodi, o ile a thatafalelwa ke go kwa le go bontšha sebete. O ile a fiwa kabelo e kotsi ya gore a phušole aletare ya Baali ya tatagwe. (Baa. 6:​25, 26) Ka morago ga gore Gideone a kgobokanye mašole, Jehofa o ile a mo laela ka makga a mabedi gore a a fokotše. (Baa. 7:2-7)  Ka morago o ile a laelwa gore a hlasele mašole ao a lego kampeng gare ga bošego.​​—⁠Baa. 7:9-11.

10. Ke eng seo se ka dirago gore bagolo ba thatafalelwe ke go kwa?

¹⁰ Bagolo ba swanetše go ‘ikemišetša go kwa.’ (Jak. 3:​17) Mogolo yo a ikemišeditšego go kwa o dira seo Mangwalo a se bolelago e bile o ikemišetša go latela tlhahlo yeo e tšwago ka mokgatlong wa Modimo. Ge a dira bjalo o beela batho ba bangwe mohlala o mobotse. Eupša ka dinako tše dingwe go ka ba thata gore a kwe. Ka mohlala, a ka thatafalelwa ke go latela tlhahlo yeo a e hwetšago. Maemong a mangwe a ka ipotšiša ge e ba tlhahlo yeo a e hwetšago e ka šoma. Goba a ka kgopelwa go dira kabelo yeo e ka dirago gore a feleletše a swerwe. Bagolo ba ka ekiša bjang go kwa ga Gideone maemong a?

11. Bagolo ba ka thušwa ke’ng gore ba kwe?

¹¹ Theetšang gabotse ge le newa tlhahlo e bile le e diriše. Modimo o ile a botša Gideone gore a phušole bjang aletare ya tatagwe, a agele kae aletare ya Jehofa, le gore a dire sehlabelo ka phoofolo ya mohuta mang. Gideone ga se a ka a botšiša gore ke ka baka la eng a swanetše go dira bjalo, eupša o ile a latela taelo yeo. Lehono, mokgatlo wa Jehofa o nea bagolo tlhahlo o diriša mangwalo, ditsebišo le ditlhahlo tše dingwe tšeo di dirago gore re dule re šireletšegile le go ba le segwera se sebotse le Jehofa. Re rata bagolo ba rena ka gobane ba latela tlhahlo ya mokgatlo ka go botega. Le gona, seo se hola phuthego ka moka.​​—⁠Ps. 119:​112.

12. Bagolo ba ka diriša bjang lengwalo la Baheberu 13:​17 ge mokgatlo o ba laela gore ba dire diphetogo?

¹² Ikemišetše go fetofetoga le maemo. Gopola gore Jehofa o ile a botša Gideone gore a gomiše mo e ka bago mašole ka moka ao a bego a sepela le wona. (Baa. 7:⁠8) Mohlomongwe o be a ka ipotšiša gore: ‘Na se se a hlokagala? Na se se tla šoma?’ Eupša Gideone o ile a theetša. Le lehono bagolo ba ekiša Gideone ka go theetša ge mokgatlo o ba laela gore ba dire diphethogo. (Bala Baheberu 13:​17.) Ka mohlala ka 2014 Sehlopha se Bušago se ile sa fetoša tsela yeo Diholo tša Mmušo le Diholo tša Kopano di hlokomelwago ka gona ka tša ditšhelete. (2 Bakor. 8:​12-14) Diphuthego di be di ka se sa lefa tšhelete yeo di e kgopetšego go mokgatlo. Go e na le moo, diphuthego lefaseng ka moka di a neela gore go agwe meago ya mokgatlo mo e bego e nyakega gona go sa šetšwe gore phuthego ya lefelong leo e na le tšhelete e nyenyane gakaakang. Ge José a ekwa ka phetogo ye, o ile a bona eka seo se ka se kgonege, a ipotša gore: ‘Le Holo e tee ya Mmušo e ka se tsoge e agilwe. Dilo ga di dirwe ka tsela ye mo lefaseng.’ Ke eng seo se thušitšego José gore a thekge tlhahlo ye? O re: “Mantšu ao a lego go Diema 3:​5, 6 a nthušitše gore ke tshepe Jehofa. Le gona go tloga go bile le mafelelo a mabotse! Ga re no aga Diholo tša Mmušo tše dintši eupša re ithutile le gore re neele ka ditsela  tše di fapafapanego gore mošomo wo o kgone go tšwela pele.”

13. (a) Gideone o be a kgodišegile ka’ng? (b) Bagolo ba ka ekiša Gideone bjang? (Bona le seswantšho.)

¹³ Bontšha sebete gore o kgone go dira thato ya Jehofa. Gideone o ile a kwa Jehofa le ge a be a tšhogile e bile kabelo ya gagwe e le kotsi. (Baa. 9:​17) Ka morago ga gore Jehofa a kgonthišetše Gideone gore o tlo mo thekga, Gideone o ile a bona gore Modimo o tlo mo thuša go šireletša batho ba gagwe. Bagolo bao ba dulago mafelong ao modiro wa rena o thibetšwego ba ekiša Gideone. Ba bontšha sebete ka go etelela pele dibokeng le tšhemong go sa šetšwe gore ba tšhošetšwa ka gore ba tlo swarwa, ba sekišwa, ba lahlegelwa ke mošomo, goba ba tlaišwa. c Nakong ya masetlapelo a magolo, bagolo ba tlo swanelwa ke go bontšha sebete gore ba kwe ditaelo tšeo ba tlago go di hwetša le ge di ka bea maphelo a bona kotsing. Ditaelo tšeo di ka akaretša go botša batho molaetša wa kahlolo, le dilo tšeo re ka di dirago gore re phologe tlhaselo ya Gogo wa Magogo.​​—⁠Hesek. 38:​18; Kut. 16:⁠21.

14. Ke ka baka la’ng Gideone a be a thatafalelwa ke go kgotlelela?

¹⁴ Gideone o be a swanetše go šoma ka thata gore a hlankele e le moahlodi. Ge Bamidiane ba be ba tšhaba ntweng gare ga bošego, Gideone o ile a ba rakediša go tloga moeding wa Jeseriele go fihla nokeng ya Jorodane, moo go ka diregago gore lefelo leo le be le dikologilwe ke dithokgwa goba mehlare. (Baa. 7:​22) Na Gideone o ile a ema nokeng ya Jorodane? Aowa! Le ge yena le banna ba 300 bao a bego a sepela le bona ba be ba lapile, ba ile ba tshela noka yeo gomme ba tšwela pele ka go kitimiša manaba a bona. Mafelelong ba ile ba swara Bamidiane gomme ba ba fenya.​​—⁠Baa. 8:​4-⁠12.

15. Ke ka baka la’ng ka dinako tše dingwe go ka ba thata gore mogolo a kgotlelele?

¹⁵ Ka nako e nngwe mogolo a ka ikwa a lapišitšwe ke go hlokomela phuthego le lapa la gagwe. Bagolo ba ka ekiša Gideone bjang ge seo se direga?

16-17. Ke’ng seo se thušitšego Gideone gore a kgotlelele, gona bagolo ba ka kgodišega ka’ng? (Jesaya 40:​28-​31) (Bona le seswantšho.)

 ¹⁶ Tshepa gore Jehofa o tlo go matlafatša. Gideone o be a tshepa gore Jehofa o tlo mo fa matla le gona ga se a ka a mo nyamiša. (Baa. 6:​14, 34) Ka nako e nngwe, Gideone le banna bao a bego a sepela le bona, ba be ba rakediša dikgoši tše pedi tša Bamidiane ka maoto. Go ka direga gore dikgoši tšeo di be di nametše dikamela. (Baa. 8:​12, 21) Eupša Jehofa o ile a ba thuša gore ba fenye. Bagolo le bona ba ka ithekga ka Jehofa, yo a sa lapego goba go ‘felelwa ke matla.’ O tlo ba nea matla ge ba a hloka.​—Bala Jesaya 40:​28-​31.

¹⁷ Nagana ka mohlala wa Matthew e lego setho sa Komiti ya go Hloma Kwano le Dipetlele. Ke eng seo se mo thušago go kgotlelela? Matthew o re: “Ke bone go phethagala ga lengwalo la Bafilipi 4:​13. Ka dinako tše dintši ge ke be ke lapile e bile ke se sa na matla, ke be ke rapela Modimo go tšwa pelong, ke mo kgopela gore a nnee matla ao ke a hlokago gore ke kgone go thekga bana bešo. Ka dinako tšeo ke be ke ekwa moya wa Jehofa o mmatlafatša e bile o nthuša gore ke kgone go kgotlelela.” Go swana le Gideone, bagolo ba rena ba šoma ka thata go hlokomela bahlanka ba Jehofa le ge ka dinako tše dingwe go se bonolo. Eupša ba swanetše go gopola gore ga se ka mehla go tla bago bonolo go dira dilo ka moka tšeo ba nyakago go di dira. Eupša ba ka tshepa gore Jehofa o tlo kwa dithapelo tša bona tša go kgopela thušo e bile o tlo ba matlafatša gore ba kgone go kgotlelela.​​—⁠Ps. 116:⁠1; Bafil. 2:⁠13.

18. Go ya ka seo re ithutilego sona, bagolo ba ka ekiša Gideone bjang?

¹⁸ Go na le dilo tše dintši tšeo bagolo ba ka ithutago tšona go Gideone. Bagolo ba swanetše go bontšha boipoetšo le boikokobetšo ge ba dumela go dira mošomo wo ba o fiwago, le ge ba swaiwa diphošo. Ba swanetše go bontšha gore ba a kwa le gore ba na le sebete, kudukudu ka ge bofelo bo le kgauswi. Le gona ba swanetše go dula ba tshepa gore go sa šetšwe mathata ao ba tlago go lebeletšana le wona, Modimo o tlo ba matlafatša. Ruri re leboga badiši ba ba šomago ka thata ebile re ‘dula re ba swara ka tlhompho.’​​—⁠Bafil. 2:⁠29.