1-2. Lehono Bakriste ba kopana le bothata bofe bjoo bo swanago le bja Lota?

 GE RE bona batho bao re phelago le bona mo lefaseng ba hloka boitshwaro, re ikwa go swana le Lota. O be a “tlaišwa kudu ke boitshwaro bjo bo lešago dihlong bja batho bao ba nyatšago molao,” ka gobane o be a tseba gore Tatago rena wa legodimong o hloile boitshwaro bjo bobe. (2 Pet. 2:7, 8) Seo se mo thušitše gore a se ke a itshwara ka tsela yeo batho bao a bego a phela le bona ba bego ba itshwara ka yona. Le rena re phela le batho bao ba sa hlomphego melao ya Jehofa ya boitshwaro. Eupša ge re rata Modimo e bile re mmoifa, re ka kgona go dula re hlwekile boitshwarong.—Die. 14:2.

² Jehofa o re thuša go dira seo ka go re kgothatša a diriša puku ya Diema. Bakriste ka moka ba banna, basadi, bafsa le batšofadi, ba ka holega kudu ge ba ka diriša keletšo yeo e lego ka pukung ya Diema.

3. Go ya ka Diema 17:3, ke ka baka la’ng re swanetše go šireletša dipelo tša rena? (Bona le seswantšho.)

³ Lebaka le legolo leo le dirago gore re šireletše dipelo tša rena tša seswantšhetšo ke gore Jehofa o hlahloba dipelo tša rena. Seo se bolela gore o kgona go bona dilo tšeo ba bangwe ba sa kgonego go di bona go rena le go tseba gore re batho ba mohuta mang. (Bala Diema 17:3.) Ge e ba re dula re nagana ka keletšo ya gagwe yeo e ka re thušago gore re tle re phele go ya go ile, o tlo re rata. (Joh. 4:14) Ke moka re ka se tsoge re kwešitšwe bohloko ke maaka a Sathane le a batho ba babe gotee le boitshwaro bja bona. (1 Joh. 5:18, 19) Ge re dutše re e ba le segwera se sebotse le Jehofa, re tlo mo rata kudu le go mo hlompha. Ka ge re sa nyake go kweša Tatago rena bohloko, re tlo hloya le go nagana go dira selo se sebe. Ge re lekega go dira selo se sebe, re ka ipotšiša gore: ‘Ke  ka baka la’ng nka kweša motho yo a nthatago kudu bohloko ka boomo?’—1 Joh. 4:9, 10.

4. Go boifa Jehofa go thušitše kgaetšedi yo mongwe bjang gore a se ke a dira selo se sebe?

⁴ Marta e lego kgaetšedi wa kua Croatia yo a ilego a lekega go dira bootswa o ngwadile gore: “Ke be ke sa kgone go nagana gabotse e bile ke thatafalelwa ke go lwantšhana le go dira dilo tše mpe. Eupša go boifa Jehofa go ile gwa ntšhireletša.” b Go ile gwa mo šireletša bjang? Marta o re o naganišišitše ka ditlamorago tšeo di tlišwago ke go dira dilo tše mpe. Le rena re ka mo ekiša. Ditlamorago tšeo di kwešago bohloko kudu ke gore re tlo nyamiša Jehofa gomme ra se sa mo hlankela go ya go ile.—Gen. 6:5, 6.

5. Re ka ithuta’ng go seo se ilego sa diragalela Leo?

⁵ Ge e ba re boifa Jehofa, re tla kgonthišetša gore ga re gwerane le batho bao ba dirago dilo tše mpe. Leo yo a tšwago kua Congo o ile a ithuta go tšwa lebading. Ka morago ga ge a na le mengwaga e mene a kolobeditšwe o ile a ba le bagwera ba babe. O be a ipotša gore ka ge a sa dire dilo tše mpe tšeo bagwera ba gagwe ba di dirago, ga a direle Jehofa sebe. Eupša bagwera bao ba babe ba ile ba mo dira gore a nwe bjala ka tsela e feteletšego le go dira bootswa. Ke moka a thoma go nagana ka dilo tšeo batswadi ba gagwe ba Bakriste ba bego ba mo rutile tšona le kamoo a bego a thabile ka gona ge a be a hlankela Jehofa. Mafelelo e bile afe? O ile a thoma go dira se se lokilego gape. Bagolo ba ile ba mo thuša gore a boele go Jehofa. Lehono o hlankela bjalo ka mogolo yo a thabilego e bile ke mmulamadibogo yo a kgethegilego.

6. Ke basadi bafe ba babedi ba seswantšhetšo bao re tlago go bolela ka bona?

⁶ A re boledišaneng ka Diema kgaolo 9, yeo e bolelago ka basadi ba babedi. Yo mongwe o swantšhetša bohlale mola yo mongwe a swantšhetša  botlaela. (Bapiša le Baroma 5:14; Bagalatia. 4:24.) Ge re dutše re boledišana ka kgaolo ye, dula o gopola gore lefase le le bušwago ke Sathane le ineetše boitshwarong bjo bobe bja tša thobalano le go bogela diswantšho le dibidio tša batho bao ba sa aparago. (Baef. 4:19) Ka gona go bohlokwa gore re ithute go boifa Modimo le go furalela go dira dilo tše mpe. (Die. 16:6) Ka moka ga rena go sa šetšwe gore re banna goba basadi, re ka holega ka go ithuta kgaolo ye. Yo mongwe le yo mongwe wa basadi ba ba babedi o hlaloswa a mema bao ba hlokago temogo e lego bao ba “nago le pelo ya bošilo.” Yo mongwe le yo mongwe wa bona o re, ‘Etlang ntlong ya ka gomme le je dijo.’ (Die. 9:1, 5, 6, 13, 16, 17) Eupša ditlamorago tša bao ba amogelago taletšo yeo ga di swane.

7. Go ya ka Diema 9:13-18, e nngwe ya ditaletšo e lebiša kae? (Bona le seswantšho.)

⁷ Nagana ka taletšo yeo e tšwago go “mosadi wa setlaela.” (Bala Diema 9:13-18.) Ge a bitša bao ba hlokago temogo gore ba tle ka ntlong ya gagwe gore ba tlo ja dijo ga a lewe ke dihlong. Ba diragalelwa ke’ng? “Bao ba hwilego ba moo.” O ka ba o gopola mantšu a seswantšhetšo ao a swanago le a, ao a hwetšagalago dikgaolong tša mathomo tša puku ya Diema. Re lemošwa ka “mosadi yo a gobogilego.” Re boditšwe gore: “Ntlo ya gagwe e sobelela lehung.” (Die. 2:11-19) Diema 5:3-10, e re lemoša ka ‘mosadi yo mongwe yo a gobogilego’ yoo “maoto a gagwe a theogelago lehung.”

8. Re swanetše go dira phetho efe?

⁸ Bao ba kwago ge “mosadi wa setlaela” a ba mema, ba swanetše go dira phetho ya ge e ba ba tla amogela taletšo yeo goba aowa. Le rena re ka swanelwa ke go dira phetho ya go swana le yeo. Re tlo dira’ng ge e ba re bona boitshwaro bjo bo gobogilego goba dibidio le diswantšho tša batho bao ba sa aparago inthaneteng goba social media?

9-10. Ke mabaka afe a mangwe ao a bontšhago gore ga se ra swanela go dira thobalano yeo e sego molaong?

⁹ Go na le mabaka ao a kwagalago ao a bontšhago gore ke ka baka la eng re swanetše go phema boitshwaro bjo bobe bja tša thobalano. “Mosadi wa setlaela” o hlaloswa a bolela gore: “Meetse ao a utswitšwego a bose.” “Meetse ao a utswitšwego” ke’ng? Beibele e swantšha thobalano yeo e bago gona gare ga monna le mosadi bao ba nyalanego le meetse ao a lapološago. (Die. 5:15-18) Monna le mosadi ba ka thabela thobalano ge e ba ba nyalane semolao. Thobalano ya mohuta wo e fapana le “meetse ao a utswitšwego.” Meetse ao a utswitšwego a ka ba a šupa go thobalano yeo e sego molaong. Gantši batho bao ba dirago thobalano yeo e sego molaong ba e dira ka sephiring, go no swana le lehodu leo le  utswago ka sephiring. “Meetse ao a utswitšwego” a ka bonagala a le bose ge e ba bao ba a nwago ba nagana gore ga go yo a ka tsebago ka seo. Ruri batho ba bjalo ba iphora ka lefeela! Jehofa o bona dilo ka moka. Ga go selo seo se kwešago bohloko go feta gore Jehofa a se sa re amogela. Ruri dilo tšeo di tlago go re diragalela di ka se be “bose!” (1 Bakor. 6:9, 10) Eupša go sa na le ditlamorago tše dingwe.

¹⁰ Bootswa bo ka dira gore re lewe ke dihlong, re ikwe re se selo, re ime re sa letela gaešita le go thuba malapa. Ke ga bohlale gore re se ke ra dumela ge mosadi wa setlaela a re mema gore re tle ka “ntlong” ya gagwe go tlo ja le yena. Batho ba bantši bao ba itshwarago gampe, ga ba lahlegelwe ke segwera sa bona le Jehofa feela eupša ba tsenwa ke malwetši ao a dirago gore ba feleletše ba ehwa. (Die. 7:23, 26) Kgaolo 9 temana 18 e phetha ka gore: “Bao mosadi yoo a ba biditšego ba kua tlasetlase Bodulabahu.” Ke ka baka la’ng batho ba bantši ba amogela taletšo ya gagwe ya bofora yeo e dirago gore ba be le ditlamorago tše mpe?—Die. 9:13-18.

11. Ke ka baka la’ng go bogela dibidio le diswantšho tša batho bao ba sa aparago go le kotsi kudu?

¹¹ Selo se sengwe seo re swanetšego go ba kgole le sona ke dibidio le diswantšho tša batho bao ba sa aparago. Ba bangwe ba nagana gore go bogela dibidio le diswantšho tša batho bao ba sa aparago ga go kotsi. Eupša di kotsi. Di dira gore batho ba se ke ba go hlompha le gore o se ke wa hlompha ba bangwe e bile go thata go tlogela go di bogela. Ge motho a bogela diswantšho tša batho bao ba sa aparago, ga go bonolo gore di tloge ka monaganong wa gagwe. Le gona, diswantšho le dibidio tša batho bao ba sa aparago ga di dire gore motho a se sa ba le kganyogo e mpe feela, eupša di oketša dikganyogo tšeo. (Bakol. 3:5; Jak. 1:14, 15) Batho ba bantši bao ba bogelago dibidio le diswantšho tša batho bao ba sa aparago, ba feleletša ba itshwara ka tsela yeo e gobogilego.

12. Re bontšha bjang gore re leka go se lebelele diswantšho tšeo di ka dirago gore re be le kganyogo ya tša thobalano?

¹² Bjalo ka Bakriste, re swanetše go dira’ng ge e ba re bona diswantšho tša batho bao ba sa aparago di tšwelela didirišweng tša rena tša elektroniki? Re swanetše go tlogela go di lebelela kapelapela. Ge re ka gopola gore selo se bohlokwa kudu ke segwera sa rena le Jehofa, go tlo ba bonolo go tlogela go di lebelela. Le diswantšho tšeo di sa bontšhego ka go lebanya gore ke tša thobalano, di ka dira gore re kganyoge go ba le thobalano. Ke ka baka la’ng re se ra swanela go di bogela? Ka gobane ga re nyake go dira selo le ge e le sefe, le ge e ka ba se se nyenyane seo se ka dirago gore re feleletše re hlotlotše ka dipelong tša rena. (Mat. 5:28, 29) Mogolo yo a tšwago Thailand yo a bitšwago David o re: “Ke ipotšiša gore le ge diswantšho di ka bonagala e se tša thobalano, na Jehofa o tla nkamogela ge nka tšwela pele ke di lebeletše? Go nagana ka tsela ye go nthuša gore ke dire diphetho tše dibotse.”

13. Re ka thušwa ke’ng gore re dire dilo ka bohlale?

¹³ Go boifa go dira selo le ge e le sefe seo se ka nyamišago Jehofa, go re thuša gore re dire dilo ka bohlale. Go boifa Modimo ke “mathomo” a “bohlale.” (Die. 9:10) Taba ye go hlaloswa ka yona gabotse mathomong a Diema kgaolo 9, yeo e re botšago ka mosadi yo mongwe wa seswantšhetšo yoo a swantšhetšago “bohlale” bja kgonthe.

14. Ke taletšo efe e nngwe yeo go bolelwago ka yona go Diema 9:1-6?

¹⁴ Bala Diema 9:1-6. Lengwalong le, re bala ka taletšo yeo e tšwago go Jehofa, e lego Mmopi wa rena le mothopo wa bohlale ka moka. (Die. 2:6; Baroma 16:27) Lengwalo le le bolela ka ntlo yeo e nago le diphilara tše šupa. Se se bolela gore Jehofa ga a timane e bile o amogela batho ka moka bao ba nyakago go ithuta go yena gore ba be bohlale.

15. Modimo o re laletša gore re dire’ng?

 ¹⁵ Jehofa ga a timane e bile ke yena a re neago dilo ka moka. Mohlala wo o bontšhago gore “bohlale” bja kgonthe bo swantšhetša mosadi, o re ruta gore Jehofa ga a timane e bile o re nea dilo tše dintši tše dibotse. Mohlala wo go bolelwa ka ona go Diema kgaolo 9. Pego ya Diema e bontšha gore mosadi wa seswantšhetšo o lokišitše nama, a tswaka beine, a ba a beakanya tafola ya gagwe ka ntlong ya gagwe. (Die. 9:2) Le gona, go ya ka ditemana 4 le 5, o re [go mothofatšwa bohlale bja kgonthe] go “mang le mang yo a nago le pelo ya bošilo: ‘Etlang, le iphepe ka senkgwa sa ka.’” Ke ka baka la’ng re swanetše go amogela taletšo ya mosadi yo ya gore re tle re je dijo ka ntlong ya gagwe? Jehofa o nyaka gore bana ba gagwe ba be bohlale le go šireletšega. Ga a nyake re dira diphošo tšeo re tlago go itsholela tšona ka baka la dilo tšeo re di dirilego. Ke ka baka leo ‘a bolokelago bao ba lokilego bohlale.’ (Die. 2:7) Ge e ba re boifa Jehofa go tšwa pelong re tlo nyaka go mo thabiša. Re kwa keletšo ya gagwe e bohlale e bile re thabela go e diriša.—Jak. 1:25.

16. Go boifa Modimo go thušitše Alain bjang go dira phetho e bohlale, gona mafelelo e bile afe?

¹⁶ Nagana kamoo go boifa Modimo go ilego gwa thuša Alain go dira phetho e bohlale. Ngwanabo rena Alain ke mogolo wa phuthego e bile ke morutiši sekolong. O re: “Batho ba bantši bao ke šomago le bona ba lebelela difilimi tša batho bao ba sa aparago e le tsela ya go ruta ka tša thobalano.” Eupša Alain o be a tseba gore seo ga se nnete. O re: “Ka ge ke rata Jehofa le go mo hlompha, ke ile ka gana ke tiišitše go lebelela difilimi tšeo. Ke ile ka hlalosetša batho bao ke šomago le bona gore ke ka baka la’ng ke sa nyake go di bogela.” O ile a diriša keletšo yeo e tšwago go “bohlale” bja kgonthe gore a “sepele thwii tseleng ya tlhaologanyo.” (Die. 9:6) Ka ge barutiši ba bangwe ba be ba kgahlilwe ke tsela yeo a dirago dilo ka yona, ga bjale ba ithuta Beibele e bile ba ya dibokeng.

17-18. Ke dilo dife tše dibotse tšeo di tlago go hwetšwa ke bao ba amogelago keletšo ya “bohlale” bja kgonthe, gona ba ka fela pelo ya go dira’ng? (Bona le seswantšho)

¹⁷ Jehofa o diriša mehlala ye ya basadi ba babedi ba seswantšhetšo go re bontšha gore re ka dira’ng gore re tle re ipshine ka bophelo nakong e tlago. Bao ba amogelago taletšo ya “mosadi wa setlaela” ba phegelela go ipshina ka dilo tše ‘dibose’ ka sephiring. Eupša ga ba lemoge gore dilo tšeo ba di dirago di tla ba kgoma bjang nakong e tlago. Ditlamorago tša bona ke lehu.—Die. 9:13, 17, 18.

¹⁸ Ditlamorago tša batho bao ba amogelago taletšo ya “mosadi wa setlaela” ga di swane le tša bao ba amogelago taletšo ya “bohlale” bja kgonthe! Gona bjale bao ba amogelago taletšo ya “bohlale” bja kgonthe ba thabile ka gobane ba na le dilo ka moka tšeo ba di hlokago tšeo di dirago  gore ba dule ba na le segwera se sebotse le Jehofa. (Jes. 65:13) Jehofa o ile a diriša moporofeta Jesaya go ngwala gore: “Ntheetšeng ka kelohloko, le je dijo tše dibotse, le gona anke moya wa lena o thabele menono.” (Jes. 55:1, 2) Re ithuta go rata seo Jehofa a se ratago le go hloya seo a se hloilego. (Ps. 97:10) Le gona re a thaba ka gobane re mema ba bangwe gore ba tle ba ithute ka “bohlale” bja kgonthe. Go bjalo ka ge eka re ‘goeletša re le mafelong a phagamego a motse re re: “Mang le mang yo a se nago temogo, anke a fapogele mo.’” Dilo tšeo rena le bao ba arabelago gabotse re di hwetšago ga e no ba tša gona bjale feela, eupša ke tša ka mo go sa felego e bile di re thuša gore re tle re ‘phele’ go ya go ile ge re dutše re ‘sepela thwii tseleng ya tlhaologanyo.’—Die. 9:3, 4, 6.

19. Go ya ka Mmoledi 12:13, 14 re swanetše go ikemišetša go dira’ng? (Bona le lepokisi leo le rego, “ Go Boifa Modimo go a re Šireletša.”)

¹⁹ Bala Mmoledi 12:13, 14. Eka go boifa Modimo go tšwa pelong, go ka re šireletša le go re thuša gore re dule re hlwekile boitshwarong mehleng ye ya bofelo. Go boifa Modimo ka tsela yeo go tlo re thuša gore re dule re mema batho ba bantši kamoo re ka kgonago ka gona gore ba tsome “bohlale” bja kgonthe le gore bo ba hole.