1. Dafida o bapetša Jehofa le eng? (Psalme 18:46)

 KA DINAKO tše dingwe re kopana le mathata ao a ka dirago gore bophelo bja rena bo be thata goba bo fetoge ka mo go feletšego. Go a kgothatša go tseba gore re ka ya go Jehofa ge re hloka thušo! Sehlogong se se fetilego re ithutile gore Jehofa ke Modimo yo a phelago e bile o dula a ikemišeditše go re thuša. Ge a re thuša, re a kgodišega gore “Jehofa ke Modimo yo a phelago!” (Bala Psalme 18:46.) Ka morago ga go bolela mantšu ao, Dafida o ile a re Modimo “o swana le Leswika le legolo.” Ke ka baka la’ng a ka swantšha Modimo yo a phelago le leswika?

2. Re tlo boledišana ka’ng sehlogong se?

² Sehlogong se, re tlo kwa gore ke ka baka la’ng Jehofa a swantšhwa le leswika le gore polelwana ye e re ruta’ng ka yena. Re tlo kwa le gore re ka dira’ng gore re mmone bjalo ka Leswika la rena. Mafelelong re tlo bona gore re ka dira’ng gore re kgone go ekiša dika tša Jehofa.

KE KA BAKA LA’NG JEHOFA A SWANTŠHWA LE LESWIKA?

3. Gantšhi Beibele e bapetša Jehofa bjang le “leswika”? (Bona letlakala la ka ntle.)

³ Beibele e diriša lentšu “leswika” go re thuša go kwešiša dika tše dingwe tšeo Jehofa a nago le tšona. Gantšhi ka Beibeleng ge bahlanka ba Jehofa ba mo tumiša ba mo hlalosa e le leswika. Jehofa o bitšwa Leswika la mathomo go Doiteronomio  32:4. Ge Hanna a be a rapela, o ile a re “ga go leswika leo le etšago Modimo wa rena.” (1 Sam. 2:2) Habakuku o ile a re Jehofa ke “Leswika la ka.” (Habak. 1:12) Mongwadi wa Psalme 73 o ile a re Modimo “ke leswika la ka.” (Ps. 73:26) Jehofa le yena o ile a ipitša leswika. (Jes. 44:8) A re boledišaneng ka dika tše tharo tšeo di bontšhago gore Jehofa o swana le leswika le go bona kamoo re ka mo dirago gore e be “Leswika la rena.”—Doit. 32:31.

4. Jehofa ke setšhabelo sa rena bjang? (Psalme 94:22)

⁴ Jehofa ke setšhabelo sa rena. Go swana le ge re ka ikuta ka leswika ge go na le ledimo, Jehofa le yena o re šireletša go dilo tšeo di ka beago maphelo a rena kotsing. (Bala Psalme 94:22.) O a re šireletša gore re se ke ra tlaišega kudu. E bile o tshepiša gore o tlo fediša dilo ka moka tšeo di dirago gore re se ke ra ikwa re bolokegile.—Hesek. 34:​25, 26.

5. Jehofa a ka ba setšhabelo sa rena bjang?

⁵ Tsela e nngwe yeo re ka dirago gore Jehofa e be Leswika la rena ka yona ke ka go rapela. Ge re rapela, Jehofa “o tla šomiša Kriste Jesu go [re] nea khutšo” yeo e šireletšago dipelo tša rena le menagano. (Bafil. 4:​6, 7) Nagana ka phihlelo ya ngwanabo rena Artem, yo a ilego a golegwa ka baka la tumelo ya gagwe. O be a dula a sekišwa ke maphodisa ao a bego a mo nyenyefatša le go mo dira gore a lewe ke dihlong. O re: “Ka mehla ke be ke tshwenyega kudu ge ke ekwa ba mpitša. . . . Ke be ke dula ke rapela Jehofa ke mo kgopela gore a nthuše go dula ke išitše maswafo fase le go ba bohlale. Makatika ao maphodisa a bego a diriša ga se a ka a šoma go nna. . . . Ka ge Jehofa a be a nthuša, go be go le bjalo ka ge e ka ke ithekgile ka leswika.”

6. Ke ka baka la’ng re swanetše go dula re ithekga ka Jehofa? (Jesaya 26:​3, 4)

⁶ Jehofa o a botega. Jehofa o tlo dula a le gona go swana le leswika leo le sa šuthego. Re ka mo tshepa ka gobane ke “Leswika la mehleng ya neng le neng.” (Bala Jesaya 26:​3, 4.) O tlo dula a le gona go phethagatša dilo tšeo a di tshepišitšego, go kwa dithapelo tša rena le go dula a re thekga. Re ka ithekga ka Jehofa ka gobane o botegela batho bao ba mo hlankelago. (2 Sam. 22:26) A ka se tsoge a lebetše dilo tšeo re di dirago e bile o tlo re putsa.—Baheb. 6:10; 11:6.

7. Go tlo direga’ng ge re ka ithekga ka Jehofa? (Bona le seswantšho.)

⁷ Re dira Jehofa Leswika la rena ge re ithekga ka yena. Ge re mo theetša ka mehla re tlo holega. (Jes. 48:​17, 18) Re tlo mo tshepa le go feta ge re bona ka mo a re thekgago ka gona. Re tlo kgona go lebeletšana le mathata ao re kopanago le ona re kgodišegile gore Jehofa o tlo re thuša. Gantšhi ge re kopana le mathata gomme go se na motho yo a ka re thušago, re lemoga gore Jehofa ke yena a nnoši yo a ka kgonago go re thuša. Ngwanabo rena Vladimir  o re: “Nako yeo ke e feditšego ke le tronkong e mpontšhitše gore nka kgona go tshepa Jehofa. Ke ile ka ithuta go tshepa Jehofa ka gobane ke be ke le noši e bile ke sa kgone go laola maemo ao ke bego ke le ka gare ga ona.”

8. (a) Ke ka baka la’ng re ka re Jehofa ga a šišinyege? (b) Re holega bjang ge Jehofa e le Leswika la rena? (Psalme 62:​6, 7)

⁸ Jehofa ga a šišinyege. Jehofa ga a šišinyege go swana le leswika le legolo leo le tiilego. O swana le leswika le legolo goba thaba e sa fetogego e bile merero ya gagwe ga e fetoge. (Mal. 3:6) Ge go be go e ba le borabele kua tšhemong ya Edene, Jehofa ga se a ka a tšewa ke maikwelo. Moapostola Paulo o ngwadile gore Jehofa “a ka se ke a itatola.” (2 Tim. 2:13) Se se bolela gore go sa šetšwe dilo tšeo di diregago, Jehofa a ka se tsoge a tlogetše dika tša gagwe, merero ya gagwe goba tsela yeo a dirago dilo ka yona. Ge re ka tshepa Modimo, re ka kgona go mo kgopela gore a re thuše ge re na le mathata.—Bala Psalme 62:​6, 7.

9. O ithutile’ng phihlelong ya Tatyana?

⁹ Go nagana ka dika tša Jehofa le merero ya gagwe ka lefase le batho go tlo re thuša gore re mo tshepe le go mo dira leswika la rena. Go dira bjalo go tlo re thuša gore re dule re thekgile ditho le ge re welwa ke mathata. (Ps. 16:8) Kgaetšedi Tatyana yo a bego a golegilwe ka ntlong ka baka la tumelo ya gagwe o ile a kgona go dira sona seo. O re: “Ke ile ka ikwa ke nnoši.” Eupša ka morago ga gore a lemoge gore mathata a gagwe a ama bjang morero wa Jehofa, o ile a kgona go kgotlelela le go ba le matla. O re: “Ka morago ga go kwešiša gore ke ka baka la’ng ke welwa ke mathata ao, ke ile ka lemoga gore seo se direga ka gobane ke rata Jehofa gomme ka se sa tshwenyega kudu.”

10. Jehofa e ka ba Leswika la rena bjang gona bjale?

¹⁰ E se kgale, re tlo kopana le mathata ao a nyakago re ithekga ka Jehofa go feta le ge e le neng pele. Gona bjale re swanetše go tshepa gore Jehofa o tlo dira sohle seo a ka se kgonago gore a re thekge. Re ka dira bjang seo? Re ka bala Beibele le diphihlelo tša bana babo rena ba mehleng yeno. Naganišiša kamoo Jehofa a ilego a ba bjalo ka leswika go bahlanka ba gagwe. Naganišiša ka mo go tseneletšego ka dipego tšeo tša ka Beibeleng. Go dira bjalo go tlo go thuša gore o dire Jehofa Leswika la gago.

EKIŠA DIKA TŠA JEHOFA

11. Ke ka baka la’ng re nyaka go ekiša dika tša Jehofa? (Bona le lepokisi leo le rego “ Dilo Tšeo Bana Babo Rena ba Baswa ba ka di Dirago.”)

¹¹ Re boletše ka dilo tšeo di bontšhago gore Jehofa o swana le leswika. Ga bjale, a re kweng gore re ka ekiša bjang dika tša gagwe. Ge re ka ekiša dika tša gagwe re tlo kgona go kgothatša bana babo rena ka phuthegong. Ka mohlala, Jesu o ile a nea Simone leina la Kefase (yeo e  fetolelwago ka Segerika e le “Petro”), yeo e bolelago “Leswika.” (Joh. 1:42) Leina leo le be le bontšha gore Petro o tla tla a kgothatša phuthego le go e matlafatša. Bagolo ba hlaloswa e le “moriti wa leswika le legolo nageng e omilego.” Seo se bontšha kamoo ba šireletšago phuthego ka gona. (Jes. 32:2) Re a tseba gore phuthego e holega kudu ge bana babo rena le dikgaetšedi ba ekiša dika tša Jehofa.—Baef. 5:1.

12. Re ka thuša batho ba bangwe bjang ge ba na le mathata?

¹² Eba lefelo la botšhabelo. Ka dinako tše dingwe re ka kgona go nea bana babo rena lefelo la botšhabelo ge go na le dikotsi tša tlhago goba go na le dintwa. Ge lefase le le dutše le senyega le go feta, re tlo swanelwa ke go thuša bana babo rena le dikgaetšedi. (2 Tim. 3:1) Re ka kgona go homotša bana babo rena le go ba kgothatša ka dilo tša moya. Tsela e nngwe yeo re ka dirago seo ka yona ke ka go dira gore ba ikwe ba le gae ga mahlaku ge ba tlile dibokeng Holong ya Mmušo le go dira gore ka phuthegong go be le botee. Re phela lefaseng le kgopo le leo le tletšego ka mathata. Re nyaka gore ge bana babo rena ba etla dibokeng ba ikwe ba ratwa, ba lapologa le go ikwa ba bolokegile.

13. Bagolo ba ka ba bjang moriti wa leswika le legolo nageng e omilego? (Bona le seswantšho.)

¹³ Bagolo ba ka thuša bana babo bona bao ba nago le mathata goba bao ba wetšwego ke dikotsi. Nakong ya dikotsi goba ge motho a na le mathata a tša maphelo, bagolo ba ka kgona go mo thuša e bile ba mo kgothatša le ka dilo tša moya. Bana babo rena ba ka kgona go batamela mogolo ge ba bona gore o na le botho, o na le kwelobohloko e bile o ikemišeditše go ba theetša. Dika tšeo di dira gore ba bangwe ba ikwe ba ratwa  gomme seo se dira gore ba amogele keletšo e theilwego Beibeleng yeo mogolo a ba neago yona.—1 Bathes. 2:​7, 8, 11.

14. Re ka dira’ng gore re botege?

¹⁴ Botega. Re nyaka gore batho ba bangwe ba kgone go ithekga ka rena ge ba welwa ke mathata. (Die. 17:17) Re ka dira’ng gore re tsebege ka go botega? Re ka dira gore re bontšhe dika tša Jehofa ka mehla, e lego dika tše bjalo ka go dira dilo tšeo o tshepišitšego go di dira le go swara nako. (Mat. 5:37) Ge re tseba gore motho yo mongwe o hloka thušo ka selo se itšego, re ka mo thuša. Le gona, re kgonthišetša gore re phetha dikabelo tšeo re di neilwego le go latela ditaelo tšeo re di hwetšago.

15. Phuthego e holega bjang ge bagolo ba botega?

¹⁵ Bagolo bao ba botegago ba hola phuthego. Bjang? Bagoeledi ba thaba kudu ge ba kgona go ikgokaganya le mogolo, kudukudu yo e lego molebeledi wa sehlopha sa bona sa tšhemo. Le gona bagoeledi ba ikwa ba  hlokometšwe ge bagolo ba ikemišetša go ba thuša. E bile bagoeledi ba tshepa bagolo ge ba bona gore ba ithekga ka tlhahlo ya mokgatlo go ena le go ithekga ka dikgopolo tša bona. Bana babo rena le dikgaetšedi ba tshepa bagolo bao ba kgonago go swara sephiri le go dira dilo tšeo ba tshepišago go di dira.

16. Re holega bjang le go hola batho ba bangwe ge re sa šišinyege?

¹⁶ O se ke wa šišinyega. Re ka beela ba bangwe mohlala ge re ka theetša Jehofa dilong ka moka le go diriša melao ya motheo ya Beibele. Ge tumelo ya rena le tsebo ya rena di dutše di gola, re tsema medu therešong ya Jehofa. Ga re gakanege goba go gogwagogwa ke dikgopolo tša batho ba lefase le. (Baef. 4:14; Jak. 1:​6-8) Ge re na le tumelo go Jehofa e bile re tshepa dilo tšeo a re tshepišitšego tšona, re tlo dula re išitše maswafo fase ge re ekwa ditaba tšeo di kwešago bohloko. (Ps. 112:​7, 8) Re tlo kgona le go thuša bao ba nago le mathata.—1 Bathes. 3:​2, 3.

17. Ke’ng seo se ka thušago bagolo gore e be mohlala o mobotse?

¹⁷ Bagolo e swanetše go ba batho bao ba nago le boitshwaro bjo bo botse, ba hlaphogetšwego monaganong, ba nago le thulaganyo le bao ba nago le tekatekano. Banna ba ba beela ba bangwe mohlala o mobotse le go dira gore phuthego e be le botee ka go “swarelela ka go tia lentšung le le botegago.” (Tito 1:9; 1 Tim. 3:​1-3) Mohlala wo bagolo ba o beago le maeto a bodiši ao ba a dirago, di dira gore bagoeledi ba dule ba le gona dibokeng, tšhemong le go dira thuto ya motho ka noši. Ge bana babo rena le dikgaetšedi ba kopana le mathata, bagolo ba kgona go ba kgothatša le go ba thuša gore ba dule ba nagana ka Jehofa le merero ya gagwe.

18. Ke ka baka la’ng re nyaka go tumiša Jehofa le go gwerana le yena? (Bona le lepokisi leo le rego “ Kamoo re ka Gweranago le Jehofa ka Gona.”)

¹⁸ Ka morago ga go bolela ka dika tša Jehofa, re ka bolela mantšu a Kgoši Dafida ao a rego: “A go retwe Jehofa Leswika la ka.” (Ps. 144:1) Jehofa a ka se palelwe ke go ba Modimo yo re ka ithekgago ka yena. Go sa šetšwe gore re batho ba bagolo goba ba baswa, re ka bolela gore: “Jehofa ke leswika la ka” re kgodišegile gore Jehofa o tlo re thuša gore re dule re mo hlankela.—Ps. 92:​14, 15.