Re swanetše go ba le tumelo gore re kgone go thabiša Jehofa. Eupša Beibele e re “tumelo ga se batho bohle ba nago le yona.” (2 Bathes. 3:2) Paulo o be a bolela ka bao ba bego ba mo tlaiša e lego “batho ba kotsi le ba kgopo” bao a bego a nyaka go hlakodišwa go bona. Eupša seo a se boletšego ka tumelo se be se kgoma le batho ba bangwe. Batho ba bangwe ba kgetha go gana bohlatse bjo bo lego molaleng bja gore go na le Mmopi, e lego Modimo. (Baroma 1:20) Ba bangwe ba ka bolela gore ba dumela go motho yo mongwe yo a nago le matla a magolo. Eupša seo ba se bolelago ga se dire gore ba thabiše Jehofa.

Re swanetše go kgodišega gore Jehofa o gona le gore ‘o putsa’ bao ba nago le tumelo e tiilego. (Baheb. 11:6) Tumelo ke seka seo se enywago ke moya o mokgethwa. Go rapela Jehofa go ka re thuša gore re amogele moya o mokgethwa. (Luka 11:​9, 10, 13) Tsela e nngwe e bohlokwa yeo e ka re thušago go amogela moya o mokgethwa, ke go bala Lentšu la Modimo leo le buduletšwego. Re ka naganišiša ka seo re se balago le go leka go se diriša. Moya o mokgethwa o ka re thuša go phela ka tsela yeo e thabišago Jehofa.