Dipotšišo tše di Tšwago go Babadi
Ke ka baka la’ng batho ba bangwe ba nagana gore mantšu ao a lego go Psalme 12:7 a šupa go “dipolelo tša Jehofa”(temana 6) mola Phetolelo ya Lefase le Leswa e šupa go “bao ba sa kgonego go itwela” (temana 5)?
Temana ye e bolela ka batho.
Lengwalo la Psalme 12:1-4, le re: “Batho bao o ka ba tshepago ga ba sa le gona.” Go Psalme 12:5-7, Dafida o bolela gore:
“‘Jehofa o re: Ka ge batho bao ba sa kgonego go itwela ba gateletšwe,
Le ka baka la ge badiidi ba lla,
Ke tla ema
‘gomme ka ba phološa go batho bao ba ba hloilego.’
Dipolelo tša Jehofa di hlwekile,
Di etša silifera yeo e sekišitšwego sebešong sa fase, yeo e hlwekišitšwego gašupa.
Wena Jehofa, o tlo ba hlokomela,
Le gona o tlo dula o ba šireletša go batho ba ba babe.”
Temana 5 e re botša ka seo Modimo a tlo se direlago “bao ba sa kgonego go itwela.” O tlo ba phološa.
Temana 6 e re “dipolelo tša Jehofa di hlwekile,” “di etša silifera yeo e sekišitšwego.” Bakriste bao ba ineetšego ba dumelelana le mantšu a.—Ps. 18:30; 119:140.
Bjale ekwa seo se bolelwago go Psalme 12:7 yeo e rego: “Wena Jehofa, o tlo ba hlokomela, le gona o tlo dula o ba šireletša go batho ba ba babe.” Temana ye e bolela ka’ng?
Ka ge mantšu ao a lego go temana 7 a latela ao a rego “dipolelo tša Jehofa,” ba bangwe ba ka phetha ka gore Modimo o tlo šireletša dipolelo tša gagwe. Re a tseba gore ke kgale Modimo a šireletša Beibele go sa šetšwe gore baganetši ba be ba leka go e thibele le go e senya.—Jes. 40:8; 1 Pet. 1:25.
Temana 5 le yona e bolela nnete ge e re Jehofa o tlo šireletša bao ba sa kgonego go itwela. Jehofa o tlo dula a thuša le go “šireletša” bao ba sa kgonego go itwela le bao ba “gateletšwego.”—Jobo 36:15; Ps. 6:4; 31:1, 2; 54:7; 145:20.
Bjale temana 7 e bolela ka’ng?
Ge re bala Psalme 12 re a bona gore e bolela ka batho.
Ge Psalme 12 e thoma, Dafida o bolela ka ‘batho ba botegago’ bao ba forilwego ke batho ba kgopo. Ka morago re kwa gore Jehofa ga a rate batho bao ba forago ba bangwe. Psalme ye e re kgonthišetša gore Jehofa o tlo šireletša batho ba gagwe ka gobane dipolelo tša gagwe di hlwekile.
Ka gona temana 7 e bontšha gore Jehofa o tlo hlokomela le go šireletša bao ba gatelelwago ke batho ba kgopo.
Mantšu ao a dirišitšwego temaneng ye a tšwa Mangwalong a botegago a Seheberu. Ge Septuagint ya Segerika e diriša lentšu “rena” gabedi go temana 7, e šupa go bahlanka ba Jehofa ba botegago bao ba sa kgonego go itwela e bile ba gateletšwe. Temana 7 e re “o tlo dula o ba šireletša go batho ba ba babe ka gobane bana ba batho ba dira dilo tše mpe.” (Ps. 12:7, 8) Temana 7 ka Mangwalong a Seheberu ka phetolelo ya Searama e re: “Wena MORENA, o tla hlokomela ba lokilego wa ba šireletša kgahlanong le moloko wo o kgopo go ya go ile. Letšatši le lengwe le lengwe batho ba kgopo ba ba bjalo ka dikgofa tše di nwago madi a bana ba batho.” Se ke bohlatse bja gore Psalme 12:7 ga e šupe go dipolelo tša Modimo.
Ge e le gabotse temana ye e nea batho ba botegago kholofelo ya gore Modimo o tlo ba hlokomela.
