1, 2. (a) Hlalosa lebaka leo kolobetšo e sego papadi. (b) Motho o swanetše go kgodišega ka’ng pele a kolobetšwa, gona ka baka la’ng?

NA O ngwana yo a nyakago go kolobetšwa? Ge e ba go le bjalo, ye ke tokelo e kgolo kudu yeo o ka bago le yona. Bjalo ka ge go boletšwe sehlogong se se fetilego, kolobetšo ga se papadi. Ge o kolobetšwa, o bontšha ba bangwe gore o ineetše go Jehofa, ke gore, o mo holofeditše gore o tlo mo hlankela ka mo go sa felego le gore selo se segolo bophelong bja gago e tlo ba go dira thato ya gagwe. Ka ge kholofetšo yeo e se papadi, o swanetše go kolobetšwa ge feela o godile ka mo go lekanego monaganong, e le phetho yeo o itiretšego yona e bile o kwešiša seo go ineela go Modimo go se bolelago.

² Lega go le bjalo, mohlomongwe o nagana gore ga se wa hlwa o lokela go kolobetšwa. Goba mohlomongwe o nagana gore o loketše go kolobetšwa eupša batswadi ba gago ba re o emenyana go fihlela o gotše ka mo go lekanego e bile o na le phihlelo. O swanetše go dira’ng?  O se ke wa nyama. Go e na le moo, diriša nako yeo go ikaga moyeng e le gore ge nako e dutše e eya o tle o swanelege go kolobetšwa. Go oketša moo, o ka ipeela pakane ya go šomela dilong tše tše tharo: (1) kgodišega ka ditumelo tša gago, (2) kaonefatša ditiro tša gago le (3) go ba le tebogo.

3, 4. Bana ba ka ithuta’ng mohlaleng wa Timotheo?

³ Nagana kamoo o bego o ka araba dipotšišo tše di latelago: Ke ka baka la’ng ke dumela gore Modimo o gona? Ke ka baka la’ng ke dumela gore Beibele e ngwadilwe ke Modimo? Ke ka baka la’ng ke phela ka melao ya Modimo go e na le go ekiša tsela yeo batho ba lefase ba phelago ka yona? Dipotšišo tše di ka go thuša gore o kwe keletšo ya moapostola Paulo yeo e rego: “Le itlhatselele thato e botse le e amogelegago le e phethegilego ya Modimo.” (Baroma 12:2) Go re’ng o swanetše go dira seo?

⁴ Mohlala wa Timotheo o ka go thuša. Timotheo o be a tseba Mangwalo gabotse ka gobane mmagwe le makgolo wa gagwe ba be ba mo rutile wona. Lega go le bjalo, Paulo o ile a botša Timotheo gore: “Tšwela pele dilong tše o ithutilego tšona gomme wa kgodišwa gore o di dumele.” (2 Timotheo 3:14, 15) Lengwalong le, lentšu “kgodišwa” le bolela “go kgodišega le go se belaele gore selo se itšego ke therešo.” Ka gona Timotheo o be a swanetše go kgodišega gore a ka hwetša therešo ka Mangwalong. O ile a e amogela, e sego ka gobane mmagwe le makgolo wa gagwe ba be ba mmoditše gore a e amogele, eupša ka gobane o ile a naganišiša ka seo a ithutilego sona gomme a se kgolwa.​—Bala Baroma 12:1.

5, 6. Ke ka baka la’ng go le bohlokwa gore o ithute go diriša ‘matla a gago a go hlatha’ o sa le yo monyenyane?

⁵ Go thwe’ng ka wena? Mohlomongwe ke kgale o tseba therešo. Ge e ba go le bjalo, ipeele pakane ya go naganišiša ka mabaka a seo o se dumelago. Seo se tla go thuša go matlafatša tumelo ya gago le go phema go dira diphetho tše di fošagetšego ka baka la kgateletšo ya dithaka, tsela ya lefase ya go nagana goba maikwelo a gago.

⁶ Ge e ba o ithuta go diriša ‘matla a gago a go hlatha’ ge o sa dutše o le yo monyenyane, o tla kgona go araba dithaka tša gago ge di go botšiša dipotšišo tša go swana le gore: ‘O tseba bjang gore Modimo o gona? Ge e ba Modimo a re rata, go re’ng a dumelela dilo tše mpe di direga? Modimo yena o bopilwe ke mang?’ Ge o itokišitše, dipotšišo tše bjalo di ka se go bakele dipelaelo eupša di tla go tutueletša go ithuta Beibele ka mo go tseneletšego.

7-9. Hlalosa kamoo lelokelelo la dihlogo tša wepesaeteng ya rena tša “Ke Eng Seo Beibele e se Rutago?” di ka go kgodišago gore o hweditše therešo.

⁷ Go ithuta Beibele ka kelohloko go ka go thuša go araba dipotšišo, go se be le dipelaelo le go kgodišega ka ditumelo tša gago. (Ditiro 17:11) Re na le dikgatišo tše mmalwa tšeo di ka go thušago go  dira seo. Ba bantši ba thušitšwe kudu ke go bala poroutšha ya The Origin of Life—Five Questions Worth Asking le puku ya Is There a Creator Who Cares About You? Le gona bafsa ba bangwe ba hotšwe ke go bala lelokelelo la dihlogo tša “Ke Eng Seo Beibele e se Rutago?” go jw.org/nso. Lebelela ka tlase ga DITHUTO TŠA BEIBELE. Morero wa sehlogo se sengwe le se sengwe lelokelelong le ke go go thuša go ba le tumelo e tiilego dithutong tša Beibele.

⁸ Ka ge o ithuta Beibele, o ka ba o šetše o tseba dikarabo tša tše dingwe tša dipotšišo tšeo di lego dihlogong tšeo. Eupša na o kgodišegile ka dikarabo tša gago? Dihlogo tšeo di tla go thuša go naganišiša ka mangwalo a fapafapanego gomme tša go kgothaletša go ngwala mabaka ao o dumelago dithuto tša Beibele. Seo se tla go thuša go tseba kamoo o ka hlalosetšago ba bangwe ditumelo tša gago. Ge e ba o kgona go tsena wepesaeteng ya rena, bala dihlogo tša “Ke Eng Seo Beibele e se Rutago?” thutong ya gago ya motho ka noši gore o kgodišege gore o hweditše therešo.

⁹ O swanetše go itlhatselela ka noši gore o bodumeding bja therešo. Seo se tla go thuša gore o itokišeletše go kolobetšwa. Kgaetšedi yo mongwe wa mofsa o itše: “Pele nka kolobetšwa, ke ile ka ithuta Beibele gomme ka bona gore bjo ke bodumedi bja therešo. Le gona letšatši le lengwe le le lengwe, ke kgodišega le go feta gore ke bodumeding bja therešo.”

10. Ke ka baka la’ng re ka letela gore ditiro tša Mokriste yo a kolobeditšwego di dumelelane le tumelo ya gagwe?

¹⁰ Beibele e re: “Tumelo le yona ge e le nnoši, e se na mediro, e hwile.” (Jakobo 2:17) Ge e ba tumelo ya gago e tiile, o tla bontšha seo ka ditiro tša gago. O tla bonagatša seo Beibele e se bitšago ‘ditiro tše kgethwa  tša boitshwaro le mediro ya boineelo go Modimo.’​—Bala 2 Petro 3:11.

11. Polelwana yeo e rego, ‘ditiro tše kgethwa tša boitshwaro’ e bolela’ng?

¹¹ ‘Ditiro tše kgethwa tša boitshwaro’ ke’ng? Ge e ba ditiro tša gago e le tše kgethwa, seo se ra gore o hlwekile boitshwarong. Ka mohlala, nagana dikgweding tše tshela tše di fetilego. Ge o be o lebeletšane le teko ya go dira selo se se fošagetšego, na o ile wa naganišiša ka seo Modimo a rego se nepagetše goba se fošagetše? (Baheberu 5:14) Na go na le dinako tšeo ka tšona o ilego wa ganetša teko goba kgateletšo ya dithaka? Kua sekolong, na ba bangwe ba bona o itshwere gabotse? Na o dula o botegela Jehofa, goba na o leka go swana le bao o tsenago le bona ka klaseng e le gore ba se ke ba go kwera? (1 Petro 4:3, 4) Ke therešo gore ka moka ga rena ga se ra phethagala. Ka dinako tše dingwe, gaešita le bao ba hlanketšego Jehofa ka nywaga e mentši ba ka ikwa ba tšhaba goba ba thatafalelwa ke go botša ba bangwe ka Beibele. Eupša motho yo a ineetšego go Modimo o tla ikgantšha ka go ba Hlatse ya Jehofa, gomme a bontšha seo ka boitshwaro bja gagwe bjo bo hlwekilego.

12. E mengwe ya ‘mediro ya boineelo go Modimo’ ke efe, gona o swanetše go e lebelela bjang?

¹² ‘Mediro ya boineelo go Modimo’ ke’ng? E akaretša dilo tšeo o di dirago ka phuthegong, dilo tša go swana le go ya dibokeng le tšhemong. Eupša e bile e akaretša seo o se dirago ge o le nnoši, go swana le go rapela Jehofa le go ithuta. Motho yo a neetšego bophelo bja gagwe go Jehofa a ka se nagane gore mediro ye e boima. O tla ikwa go swana le Kgoši Dafida, yo a itšego: “Wena Modimo wa ka, ke kgahlwa ke go dira thato ya gago, molao wa gago o ka garegare ga ka.”​—Psalme 40:8.

13, 14. Ke tokišetšo efe yeo e ka go thušago go dira ‘mediro ya boineelo go Modimo,’ gona tokišetšo ye e thušitše bafsa ba bangwe bjang?

¹³ E le gore o kgone go ipeela dipakane, hlahloba letlakala la go itlhahloba go letlakala 308 le 309ka pukung ya Dipotšišo tša Bafsa​—le Dikarabo tše Šomago, Bolumo 2. Letlakaleng leo la go itlhahloba, o ka ngwala dikarabo tša dipotšišo tše bjalo ka tše di rego: “O rapela ka eng, gona dithapelo tša gago di utolla’ng ka go rata ga gago Jehofa?” “Ke dilo dife tšeo o di akaretšago thutong ya gago ya motho ka noši?” “Na o kgona go ya bodireding gaešita le ge batswadi ba gago ba sa ye?” Letlakala leo le bile le na le dikgoba tšeo o ka ngwalago dipakane le ge e le dife tšeo o ka ratago go ipeela tšona mabapi le thapelo, thuto ya motho ka noši le tšhemo.

¹⁴ Bana ba bantši bao ba nyakago go kolobetšwa ba hweditše gore letlakala leo le thuša kudu. Kgaetšedi yo mongwe wa mofsa yo a bitšwago Tilda o re: “Ke ile ka diriša letlakala leo go ipeela dipakane. Ke ile ka fihlelela dipakane tšeo ka go latelana, gomme mo e ka bago ka morago ga ngwaga ka ba ke šetše ke loketše go kolobetšwa.” Ngwanabo rena wa mofsa yo a bitšwago Patrick le yena o bile le mafelelo a swanago. O re: “Ke be ke tseba dipakane tša ka, eupša go di ngwala fase go ile gwa ntutueletša go šoma ka thata go di fihlelela.”

15. Hlalosa gore go reng kolobetšo e swanetše go ba phetho ya gago.

 ¹⁵ Potšišo e nngwe letlakaleng leo la go itlhahloba e re: “Na o tla hlankela Jehofa gaešita le ge batswadi ba gago le bagwera ba ka kgaotša go dira bjalo?” Ge o neela bophelo bja gago go Jehofa gomme o kolobetšwa, o ba le tswalano le yena. Ka gona seo o se direlago Jehofa ga se sa swanela go ithekga ka batswadi ba gago goba motho le ge e le ofe. Ditiro tša gago tše kgethwa tša boitshwaro le mediro ya boineelo go Modimo di bontšha gore o kgodišegile gore o hweditše therešo le gore o nyaka go phela ka ditekanyetšo tša Modimo. Go se go ye kae o tla swanelega go kolobetšwa.

16, 17. (a) Ke’ng seo se swanetšego go tutuetša motho gore e be Mokriste? (b) Tsela yeo re lebogago topollo ka yona e ka swantšhwa le eng?

¹⁶ Ka letšatši le lengwe, monna yo mongwe yo a bego a tseba Molao wa Moshe gabotse o ile a botšiša Jesu gore: “Taelo e kgolokgolo Molaong wa Moshe ke efe?” Jesu o ile a mo araba ka gore: “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” (Mateo 22:35-37) Jesu o hlalositše gore motho  o swanetše go kolobetšwa le go ba Mokriste ka gobane a rata Jehofa. E nngwe ya ditsela tše dibotse kudu tša go matlafatša tsela yeo o ratago Jehofa ka yona ke ka go naganišiša ka topollo, e lego mpho e kgolokgolo yeo Modimo a e neilego batho. (Bala 2 Bakorinthe 5:14, 15; 1 Johane 4:9, 19.) Ge o dira bjalo, o tlo tutueletšega go bontšha gore o leboga mpho yeo e botse.

¹⁷ Tsela yeo o lebogago topollo e ka hlaloswa ka tsela e latelago: A re re o nwelela ka bodibeng gomme motho yo a itšego a tla a go phološa. Na o tlo no ya gae, wa ikomoša gomme wa lebala ka seo motho yoo a go diretšego sona? Aowa! O tlo dula o leboga motho yoo ka ge a go phološitše lehung! Ka mo go swanago, re swanetše go tloga re leboga Jehofa le Jesu bakeng sa topollo. Re ba kolota maphelo a rena! Ba re phološitše sebeng le lehung. Ka ge ba re rata, gona bjale re na le kholofelo ya go tlo phela ka mo go sa felego Paradeiseng mo lefaseng!

18, 19. (a) Ke ka baka la’ng o sa swanela go tšhaba go ineela go Jehofa? (b) Go hlankela Jehofa go kaonefatša bophelo bja gago bjang?

¹⁸ Na o leboga seo Jehofa a go diretšego sona? Ge e ba go le bjalo, gona o swanetše go ineela go yena le go kolobetšwa. Ge o ineela go Modimo, o mo holofetša gore o tlo dira thato ya gagwe ka mo go sa felego. Na o swanetše go tšhaba go mo holofetša seo? Aowa! Jehofa o nyaka gore o holege, e bile o tlo putsa bao ba dirago thato ya gagwe. (Baheberu 11:6) Ge o neela bophelo bja gago go Modimo gomme o kolobetšwa, bophelo bja gago e ka se be mathata feela, bo tla ba kaone kudu! Ngwanabo rena yo mongwe wa nywaga e 24 yo a kolobeditšwego pele e ka ba mofsa o re: “Ke therešo gore nkabe ke ile ka ba le kwešišo e tseneletšego ge nkabe ke ile ka kolobetšwa ke godile, eupša go dira phetho ya go ineela go Jehofa ke sa le yo monyenyane go ile gwa ntšhireletša dilong tša lefase.”

¹⁹ Jehofa o nyaka gore o holege. Eupša Sathane o na le boithati e bile ga a na taba le wena. Le ka la mohlolo a ka se tsoge a go neile selo se sebotse ge o ka mo latela. O tla go nea bjang seo a se nago sona? Ga a na ditaba tše dibotse, le gona ga a na kholofelo ka bokamoso. Seo a ka go neago sona ke lehu, ka gobane bjoo ke bokamoso bja gagwe!​—Kutollo 20:10.

20. Ngwana a ka dira’ng gore a tle a ineele go Modimo le go kolobetšwa? (Bona le lepokisi le le rego, “Seo se ka go Thušago go Dira Tšwelopele.”)

²⁰ Ga go na phetho e botsebotse yeo o ka e dirago go phala go neela bophelo bja gago go Jehofa. Na o šetše o loketše go dira seo? Ge e ba go le bjalo, o se ke wa tšhaba go dira phetho yeo. Eupša ge e ba o nagana gore ga se wa hlwa o lokela go kolobetšwa, diriša ditšhišinyo tše di lego sehlogong se go dira tšwelopele. Paulo o ile a botša bana babo rena ba kua Filipi gore ba dule ba dira tšwelopele. (Bafilipi 3:16) Ge o ka latela keletšo yeo, go se go ye kae o tla nyaka go neela bophelo bja gago go Jehofa gomme wa kolobetšwa.