1. Bakriste ba lekgolong la pele la mengwaga ba ile ba lebeletšana le maemo afe?

NENGNENG magareng ga ngwaga wa bo-62 le 64 C.E., moapostola Petro o ile a ngwalela “badiiledi ba ba gašanego gohle Ponto, Galatia, Kapadokia, Asia le Bithinia.” (1 Pet. 1:1) Bana babo rena ba le dikgaetšedi ba be ba etšwa mafelong a fapafapanego. Ba be ba lebeletšane le “diteko tše šoro” goba ditlaišo. Ka gona ba be ba hloka go kgothatšwa le go hlahlwa. Le gona ba be ba phela dinakong tše thata. Petro o ngwadile gore: “Bofelo bja dilo tšohle bo batametše.” Ee, Jerusalema e ile ya fedišwa go se gwa tšwa go fela mengwaga e lesome. Ke’ng seo se bego se tla thuša Bakriste bao gore ba kgotlelele mathata dinakong tšeo?​—1 Pet. 4:4, 7, 12.

2, 3. Ke ka baka la’ng Petro a ile a kgothaletša bana babo gore ba amogelane ka borutho? (Bona seswantšho se se lego ka mo godimo.)

² Dilo tše dingwe tšeo Petro a ilego a di botša bana babo ke gore: “Amogelanang ka borutho.” (1 Pet. 4:9) Ka Segerika, lentšu “amogela” le bolela “go rata, goba go ba botho go batho bao o sa ba tsebego.” Lega go le bjalo, ela hloko gore Petro o ile a eletša bana babo le dikgaetšedi gore ba ‘amogelane,’ gaešita le ge ba be ba šetše ba tsebana e bile ba kopanela mmogo. Go amogelana go be go tla ba thuša bjang?

 ³ Go amogelana go be go tla dira gore ba tlwaelane. Nagana ka phihlelo ya gago. Na o sa gopola kamoo o ilego wa thaba ka gona ge o be o laleditšwe ke ngwaneno lapeng la gagwe? Na o sa gopola dilo tšeo di ilego tša go kgahla ge o be o le moo? Na ge wena o be o laleditše bana beno ka lapeng la gago, ga se wa thabela go tsebana le bona? Ga gona tsela e kaone ya go tsebana le bana babo rena le dikgaetšedi go feta go ba laletša ka malapeng a rena. Bakriste ba mehleng ya Petro ba be ba swanetše go ba ngatana e tee ka ge maemo a be a mpefala le go feta. Le rena lehono re swanetše go ba ngatana e tee, kudukudu ka ge re phela “mehleng ya bofelo.”​—2 Tim. 3:1.

4. Ke dipotšišo dife tšeo re tlago go di araba sehlogong se?

⁴ Re na le dibaka dife tša go “amogelana”? Re ka fenya bjang dilo tšeo di ka re thibelago gore re se amogelane? Re ka thušwa ke’ng gore re be baeng ba babotse?

5. Re ka bontšha bjang gore re amogela baeng ge re le dibokeng?

⁵ Dibokeng: Jehofa le mokgatlo wa gagwe ba re laletša gore re tle re je dijo tša moya dibokeng. Ka gona, re nyaka gore batho ka moka bao ba tlilego dibokeng tša rena tša Bokriste ba ikwe ba le gae ga mahlaku, kudukudu bao ba sa tšwago go thoma go kopanela. (Baroma 15:7) Le bona ke baeng ba Jehofa. Ka gona re swanetše go ba dira gore ba ikwe ba lokologile, go sa šetšwe gore ba bonagala bjang goba ba apere bjang. (Jak. 2:1-4) Ge e ba o bona okare moeng yo a tlilego dibokeng ga a tsebe motho, o ka dula le yena. A ka hloka motho wa go mo thuša gore a sepedišane le lenaneo, mohlomongwe le go hwetša mangwalo ao a tla bego a balwa. Ge o dira bjalo, o tla ba o “[latela] tsela ya go amogela baeng ka borutho.”​—Baroma 12:13.

6. Batho ba mathomo bao re swanetšego go ba laletša ka malapeng a rena ke bomang?

⁶ Go ba laletša gore ba tlo ja dijo le wena: Mehleng ya ge Beibele e be e sa ngwalwa, go amogela baeng go be go akaretša go ba memela lapeng la gago gore le je mmogo. (Gen. 18:1-8; Baa. 13:15; Luka 24:28-30) Ge motho a be a laletša yo mongwe gore a tle a je dijo le yena, ge e le gabotse o be a mo laletša gore a tle a thabele segwera le yena. Re swanetše go laletša bomang pele malapeng a rena? Batho bao re phelago le bona, e lego bana babo rena le dikgaetšedi ba ka phuthegong. Ge dinako tše thata di fihla, na re ka se ba hloke? Re swanetše go tlwaelana le bana babo rena le dikgaetšedi ka moka gomme re be le khutšo le bona. Ka mohlala, ka 2011 Sehlopha se Bušago se ile sa fetoša nako yeo lapa la Bethele ya United States le bego le swara Thuto ya Morokami ka yona go tloga go 6:45 ya mantšiboa go ya go 6:15 ya mantšiboa. Ke ka baka la’ng go ile gwa dirwa phetogo ye? Tsebišong yeo go ile gwa bolelwa gore ka ge seboka se be se tlo fela ka pela, ditho tše dintši tša Bethele di ka thabela go laletša dithogotee le tšona magaeng a tšona. Diofisi tše dingwe tša makala le tšona di ile tša latela mokgwa o swanago. Tokišetšo ye e ile ya dira gore ditho tša lapa la Bethele di tlwaelane le go feta.

7, 8. Re ka bontšha bjang gore re amogela baeng bao e lego baemedi ba mokgatlo wa Jehofa?

⁷ Re thabela go etelwa ke diboledi tša baeng le balebeledi ba tikologo diphuthegong tša gabo rena go akaretša le baemedi ba ofisi ya lekala ya lefelong la gabo rena. Dinako tše bjalo di re nea sebaka sa go laletša bana babo rena ba gore re ba tsebe gabotse. (Bala 3 Johane 5-8.) Tsela e nngwe yeo re ka dirago se ke ka go ba laletša malapeng a rena gore ba tlo ja dijo le rena. Na le wena o ka ba laletša?

⁸ Kgaetšedi yo mongwe kua United States o re: “Ga e sa le go tloga kgale nna le monna wa ka re amogela diboledi tša baeng le basadi ba tšona ka lapeng la rena. Ka mehla ge re amogela baeng, tumelo ya rena e a tia e bile re ikwa re ipshina le bona. Ga sa nka ra itsholela go ba amogela.”

9, 10. (a) Ke bomang bao ba ka hlokago madulo a nako e teletšana? (b) Na batho bao ba nago le dintlo tše dinyenyane le bona ba ka amogela baeng? Nea mohlala.

⁹ Baeng bao ba dulago nako e teletšana: Mehleng ya bogologolo, go amogela baeng go be go akaretša go nea baeng bao marobalo goba madulo. (Jobo 31:32; Fil. 22) Le lehono go sa nyakega gore  re amogele baeng ba bjalo ka malapeng a rena. Gantši balebeledi ba tikologo ba ithekga ka diphuthego tšeo ba di etelago gore di ba nee madulo. Barutwana ba dikolo tša pušo ya Modimo le batho bao ba ithaopelago go aga mafelo a rena a borapedi ba ka hloka mafelo ao ba ka dulago go ona. Malapa a mangwe a ka šala a se na dintlo ka baka la dikotsi tša tlhago gomme a hloka madulo go fihlela ba mediro ya tlhakodišo ba lokiša dintlo tša ona. Ga se ra swanela go phetha ka gore bana babo rena le dikgaetšedi bao ba nago le dintlo tše dikgolo ke bona feela bao ba swanetšego go thuša. Go ka direga gore le bona ke kgale ba amogela baeng ka malapeng a bona. Na o ka nea ngwanabo rena goba kgaetšedi yo a itšego madulo gaešita le ge o dula ka ntlong e nyenyane?

¹⁰ Ngwanabo rena wa kua Korea Borwa o gopola ge a be a amogetše barutwana bao ba bego ba tlile dikolong tša pušo ya Modimo. O ngwadile gore: “Mathomong ke be ke dikadika go amogela baeng ka gobane nna le mosadi wa ka re be re sa tšwa go nyalana e bile re dula ka ntlong e nyenyane. Re ile ra thabela go amogela ba bangwe ba barutwana bao ba bego ba tlile dikolong tša pušo ya Modimo. Re ile ra kgona go bona kamoo banyalani ba ka thabago ka gona ge ba hlankela Jehofa le go phegelela dipakane tša moya ba le gotee.”

11. Ke ka baka la’ng re swanetše go amogela bao ba sa tšwago go fihla phuthegong ya gabo rena?

¹¹ Bao ba hudugetšego phuthegong ya gabo rena: Bana babo rena le dikgaetšedi bao ba nago le malapa goba bao ba se nago malapa ba ka hudugela tikologong yeo re dulago go yona. Ba bangwe ba ka ba ba tlile tlhokagalong phuthegong ya gabo rena. Ba bangwe e ka ba e le babulamadibogo bao ba abetšwego go tlo hlankela phuthegong ya gabo rena. Seo se dira gore maphelo a bona a fetoge. Ba tlo swanelwa ke go tlwaela lefelo, phuthego, goba mohlomongwe le leleme goba setšo. Ka gona go ba laletša gore ba tle ba je le rena malapeng a rena goba go ya le rena maeto, go ka ba thuša gore ba be le bagwera ba bangwe le go tlwaela maemo a mafsa.

12. Ke phihlelo efe yeo e bontšhago gore go amogela baeng ga go nyake dilo tše dintši?

¹² Go amogela baeng ga go nyake dilo tše dintši. (Bala Luka 10:41, 42.) Ngwanabo rena yo mongwe o gopola nakong ya ge yena le mosadi wa gagwe ba be ba sa tšwa go ba baromiwa, o re: “Re be re sa le bafsa, re se na phihlelo e bile re hlologela gae kudu. Bošegong bjo bongwe, mosadi wa ka o ile a hlologela gae kudu moo e lego gore ke be ke se sa tseba gore ke mo thuše bjang. Ke moka, mo e ka bago ka bo–7:30 ya mantšiboa re ile ra kwa go kokotwa mojakong wa rena. Ge re bula, re ile ra hwetša e le motho yo a bego a ithuta Beibele le Dihlatse tša Jehofa gomme o be a re tlišeditše dinamune tše tharo. O be a tlile go re amogela. Re ile ra re a tsene gomme ra mo fa meetse a go nwa. Ke moka ra dira teye le hot chocolate. Ka nako yeo re be re sa tsebe Seswahili gomme le yena a sa tsebe Seisemane. Eupša tiragalo yeo e ile ya ba mathomomayo a go dira bagwera le bana babo rena ba lefelong leo.”

13. Go amogela baeng go na le mehola efe?

¹³ Na o kile wa dikadika go amogela baeng? Ge e ba go le bjalo, o ka ba o fetilwe ke dibaka tša go ipshina le go dira bagwera. Go amogela baeng ke tsela e nngwe yeo e ka go thušago gore o se ke wa lewa ke bodutu. Eupša o ka ipotšiša gore: ‘Ke ka baka la’ng batho ba bangwe ba dikadika go amogela baeng?’ Go ka ba go na le mabaka a mmalwa.

14. Re ka dira’ng ge e ba re se na nako le matla a go amogela baeng, goba ge re se na nako ya go ya moo re laleditšwego gona?

¹⁴ Nako le matla: Bahlanka ba Jehofa ba dula ba swaregile e bile ba na le maikarabelo a mantši. Ba bangwe ba ka ikwa ba se na matla le nako ya go amogela baeng. Ge e ba le wena o ikwa ka tsela yeo, mohlomongwe o ka swanelwa ke go fetoša maemo a gago e le gore o kgone go amogela baeng goba o kgone go dumela ge ba bangwe ba go laletša. Mangwalo a kgothaletša Bakriste gore ba amogele baeng. (Baheb. 13:2) Go ipha nako ya go amogela baeng  ga se phošo, ge e le gabotse ke selo seo re swanetšego go se dira. Eupša e le gore o kgone go amogela baeng, o ka swanelwa ke go fokotša nako ya go dira dilo tša go hloka mohola.

15. Ke dilo dife tšeo batho ba bangwe ba ka tshwenyegago ka tšona ge ba nagana ka go amogela baeng?

¹⁵ Kamoo o ikwago ka gona: Na o kile wa nyaka go amogela baeng eupša wa ikwa o inyatša? Mohlomongwe o na le dihlong e bile o tšhoga gore baeng ba gago ba ka tla ba se ipshine. Mohlomongwe ga o na tšhelete e lekanego gomme o tshwenyega ka gore o ka se kgone go nea baeng ba gago dilo tšeo bana babo rena ba bangwe le dikgaetšedi ba ka kgonago go ba nea tšona. Gopola gore ga go hlokagale gore o dule ka ntlong e kgolo le e botse e le gore o amogele baeng, eupša baeng ba gago ba tla ipshina ge e ba ntlo ya gago e hlwekile, dilo di beilwe gabotse e bile o na le bogwera.

16, 17. Ke’ng seo o ka se dirago ge e ba o na le dipelaelo tša go amogela baeng?

¹⁶ Ge e ba o tšhoga go amogela baeng tseba gore ga o noši. Mogolo yo mongwe wa kua Britania o re: “Go lokišeletša baeng go ka go tšhoša. Eupša go no swana le ge tirelo e nngwe le e nngwe yeo re e direlago Jehofa e thabiša e bile e kgotsofatša, lethabo leo le tlišwago ke go amogela baeng le feta kgole dipelaelo tšeo re ka bago le tšona. Ke thabela go no dula le baeng ra nwa kofi gomme ra fo bolela.” Gopola gore ka mehla go bontšha baeng ba gago gore o na le taba le bona go a thuša. (Bafil. 2:4) Batho ba bantši ba rata go bolela ka dilo tšeo di ba diragaletšego bophelong. Ka gona, nako e botse yeo bana babo rena ba ka re kgopelago go kwa diphihlelo tša rena ke ge re le dipokanong. Mogolo yo mongwe o ngwadile gore: “Go laletša bana babo rena le dikgaetšedi lapeng la ka go ntira gore ke ba kwešiše gakaone, e bile go mpha sebaka sa go ba tseba gakaone, kudukudu go tseba gore ba hweditše ditherešo bjang.” Go bontšha batho ba bangwe gore o na le taba le bona go ka dira gore pokano le ge e le efe e thabiše.

¹⁷ Kgaetšedi yo mongwe wa mmulamadibogo yoo a ilego a amogela barutwana bao ba bego ba etla dikolong tše di fapafapanego tša pušo ya Modimo o itše: “Mathomong ke be ke tshwenyega ka gore ke na le ntlo e nnyane e bile fenetšhara ya ka ke ya kgale. Mosadi wa mohlahli yo mongwe wa dikolo tše o ile a dira gore ke se sa belaela. O ile a mpotša gore ge yena le monna wa gagwe ba dira modiro wa tikologo, ba be ba thaba kudu ge ba amogelwa ke motho yo a godilego moyeng yo a ka bago a se na dilo tše di dintši eupša a na le pono ya go swana le ya bona, e lego go hlankela Jehofa le go phela bophelo bja go se be le dilo tše dintši. Se se ile sa nkgopotša seo mma a bego a rata go re botša sona ge re be re sa gola. O be a re: ‘Go ja morogo mo go nago le lerato go phala go ja nama ya poo e nonnego moo go nago le lehloyo.’” (Die. 15:17) Ga se ra swanela go belaela ka gobane seo se lego bohlokwa kudu ke go bontšha baeng ba rena lerato.

18, 19. Go amogela baeng go ka re thuša bjang go fetoša tsela yeo re lebelelago ba bangwe ka yona?

¹⁸ Kamoo o ikwago ka gona ka batho ba bangwe: Na ka phuthegong ya lena go na le motho yo a go tenago? Ge e ba o sa leke go fetoša tsela yeo o ikwago ka yona ka motho yoo go ka se direge mohlolo wa gore o thome go mo kwešiša. Go se rate semelo sa motho yo mongwe go ka go dira gore o se mo laletše ka lapeng la gago. Goba mohlomongwe go na le motho yo mongwe yo a go kgopišitšego nakong e fetilego, gomme o palelwa ke go lebala seo a go dirilego sona.

¹⁹ E le go re thuša gore re rate batho ba bangwe, gaešita le manaba a rena, Beibele e re kgothaletša gore re ba amogele ka borutho. (Bala Diema 25:21, 22.) Go laletša motho yo mongwe go ka go thuša gore o fetoše tsela yeo o bego o mo lebelela ka yona gomme gwa go dira gore o be le khutšo le yena. O ka thoma go bona dika tša gagwe tše dibotse e lego dika tšeo Jehofa le yena a di bonego ge a be a mo gogela go Yena. (Joh. 6:44) Ge e ba lerato le go tutueletša go laletša motho yo mongwe yoo a bego a sa nagane gore o ka mo laletša, seo e ka ba mathomomayo a go ba le segwera se sebotse. O ka kgonthišetša bjang gore lerato ke lona le go tutueletšago go mo laletša? Tsela e nngwe ke ka go kwa kgothatšo ye e lego go Bafilipi 2:3, yeo e rego: “Ka boikokobetšo le tšee gore ba bangwe ba le feta ka  bogolo.” Re swanetše go nagana kamoo bana babo rena le dikgaetšedi ba re fetago ka bogolo. Mohlomongwe re ka nagana ka tumelo ya bona, kgotlelelo, sebete goba dika tše dingwe tša Bokriste tšeo ba nago le tšona. Go nagana ka dika tša bona tše dibotse go tla dira gore re ba rate le go feta, e bile gwa dira gore re ba laletše malapeng a rena.

20. Ke ka baka la’ng re swanetše go ya mo re laleditšwego gona ge e ba go se na mabaka a kwagalago a gore re se ye?

²⁰ Mopsalme Dafida o ile a botšiša gore: “Wena Jehofa, ke mang a ka bago moeng tenteng ya gago?” (Ps. 15:1) Ka morago ga potšišo yeo o ile a bolela ka dika tša moya tšeo Modimo a di lebelelago go baeng ba gagwe. Se sengwe sa dika tšeo ke go botegela seo re se boletšego. Mopsalme o ngwadile gore: “Ge e ba [motho yoo] a ka ikana ka tše di ka mmakelago mathata, ga a fetoge.” (Ps. 15:4) Ge e ba re dumetše ge ngwanabo rena goba kgaetšedi a be a re laletša, ga se ra swanela go fetoša monagano ntle le mabaka. Mohlomongwe motho yoo o be a šetše a re lokišeditše dilo gore re tle re thabele pokano, ka gona ge re ka no se ye ntle le lebaka la go kwagala, maiteko ao a a dirilego e tla be a le a lefeela. (Mat. 5:37) Ka dinako tše dingwe batho ba bangwe ba ile ba fetoša monagano ge ba be ba laleditšwe e le gore ba amogele taletšo yeo e bonagalago e le kaone go phala ya mathomo. Go dira bjalo go tla be go sa bontšhe lerato le tlhompho. Go e na le moo, re swanetše go dumela taletšo ka pelo ka moka go sa šetšwe seo motho yoo a re laleditšego a tlago go re fa sona. (Luka 10:7) Ke therešo gore go ka ba le dilo tšeo di re dirago gore re gapeletšege go se ye moo re laleditšwego. Ge e ba seo se ka direga, re swanetše go tsebiša motho yoo a re laleditšego ka pelapela ka mo go ka kgonegago.

21. Go hlompha ditšo tša mafelong a batho ba bangwe go ka re thuša bjang gore re be baeng ba babotse?

²¹ Selo se sengwe se bohlokwa ke go hlompha setšo sa batho bao ba go laleditšego. Ditšong tše dingwe, o ka etela batho o se wa ba tsebiša, eupša ditšong tše dingwe go ka hlokagala gore o ba tsebiše pele o ba etela. Mafelong a mangwe, batho bao ba amogetšego baeng ba nea baeng ba bona dijo tše kaonekaone tšeo ba nago le tšona, mola mafelong a mangwe baeng le ditho tša lapa ba no ja dijo tša go swana. Mafelong a mangwe, gantši baeng ba tla ba swere se sengwenyana gore ba tlaleletše dijong, mola go a mangwe motho yo a laleditšego ba bangwe a sa nyake ba etla le selo. Le gona ditšong tše dingwe, baeng ba gana ka tlhompho ge motho a ba laletša ka lekga la mathomo goba la bobedi, mola ditšong tše dingwe ba lebelela seo e le go se leboge. Anke re direng sohle seo re ka se kgonago go dira gore batho bao ba re laleditšego ba ikwe ba thabetše gore ba re laleditše.

22. Ke ka baka la’ng go “amogelana ka borutho” go le bohlokwa?

²² Moapostola Petro o boletše gore: “Bofelo bja dilo tšohle bo batametše.” (1 Pet. 4:7) Masetlapelo a magolo ao sa kago a ba gona a kgauswi kudu. Ge mehla ye e dutše e mpefala le go feta, re tlo swanelwa ke go rata bana babo rena le dikgaetšedi kudu. Petro o re eleditše ka gore: “Amogelanang ka borutho.” Re swanetše go kwa keletšo ye go feta le ge e le neng pele. (1 Pet. 4:9) Ruri go amogela baeng ke karolo e kgahlišago kudu ya bophelo bja rena, gona bjale, le ka mo go sa felego.