1. Batswadi ba Bakriste ba nyaka go kgonthišetša’ng pele bana ba bona ba ka kolobetšwa?

GE Blossom Brandt a be a hlalosa seo se diregilego ge a be a nyaka go kolobetšwa, o itše: “Ke feditše dikgwedi ke botša tate le mma gore ke nyaka go kolobetšwa, gomme le bona ba be ba dula ba bolela le nna ka taba ye. Ba be ba nyaka go bona gore na ke tloga ke tiišitše ka phetho ya ka ya go nyaka go kolobetšwa. Mafelelong, letšatši leo le ile la fihla. E be e le ka di-31 tša December, 1934, e lego letšatši leo nka se tsogego ke le lebetše bophelong bja ka.” Lehono, batswadi ba Bakriste le bona ba nyaka go thuša bana ba bona gore ba dire diphetho tše dibotse. Ge motho a e tšwa a emenyana ka kolobetšo goba ge a dikadika go kolobetšwa ntle le lebaka leo le kwagalago, seo se ka dira gore segwera sa gagwe le Jehofa se senyege. (Jak. 4:17) Lega go le bjalo, pele bana ba bona ba ka kolobetšwa, ka bohlale batswadi ba nyaka go kgonthišetša gore bana bao ba loketše go ba barutiwa ba Kriste.

2. (a) Ke’ng seo balebeledi ba bangwe ba tikologo ba ilego ba se lemoga? (b) Re tlo ithuta ka’ng sehlogong se?

 ² Balebeledi ba bangwe ba tikologo ba lemogile gore bana ba bantši le bafsa bao ba lego mengwageng ya bo-20 ga se ba tšwa ba kolobetšwa gaešita le ge ba goletše ka malapeng a Dihlatse. Gantši bafsa ba ba ya dibokeng le tšhemong. Ba no ipona e le Dihlatse tša Jehofa. Lega go le bjalo, ka mabaka a itšego ba tšhaba go ineela go Jehofa le go kolobetšwa. Lebaka e ka ba e le lefe? Ka dinako tše dingwe, batswadi ke bona ba ba botšago gore ba tšwe ba emenyana ka go kolobetšwa. Sehlogong se, re tlo ahlaahla dilo tše nne tšeo di dirilego gore batswadi ba bangwe ba Bakriste ba dikadike go thuša bana ba bona gore ba swanelege go kolobetšwa.

3. Batswadi ba Blossom ba be ba tshwenyegile ka’ng?

³ Batswadi ba Blossom bao re boletšego ka bona serapeng sa mathomo, ba be ba na le mabaka a kwagalago a go tshwenyega ka morwedi wa bona. Ba be ba ipotšiša ge e ba morwedi wa bona a godile ka mo go lekanego gore a ka kwešiša bohlokwa bja go kolobetšwa le gore kolobetšo ga se papadi. Batswadi ba ka tseba bjang ge e ba ngwana wa bona a swanelega go ineela go Jehofa?

4. Taelo yeo e lego go Mateo 28:19, 20 e ka thuša bjang batswadi ge ba dutše ba ruta bana ba bona?

⁴ Bala Mateo 28:19, 20. Ka ge re kwele sehlogong se se fetilego, Beibele ga e bolele gore motho o swanetše go kolobetšwa a na le mengwaga e mekae. Lega go le bjalo, batswadi ba swanetše go naganišiša ka seo se bolelwago ke go dira barutiwa. Lentšu la Segerika leo le fetoletšwego e le ‘go dira barutiwa’ go Mateo 28:19, le na le kgopolo ya gore re swanetše go ruta batho ka maikemišetšo a gore re ba thuše go ba barutwana goba barutiwa. Morutwana ke motho yo a ithutago dithuto tša Jesu le go di kwešiša gomme a nyaka go di diriša bophelong bja gagwe. Ke ka baka leo, batswadi ka moka ba Bakriste ba swanetšego go ruta bana ba bona go tloga boseeng ka maikemišetšo a go ba thuša gore e tle e be barutiwa ba Kriste bao ba kolobeditšwego. Ke therešo gore lesea le ka se swanelege go kolobetšwa. Lega go le bjalo, Beibele e bontšha gore gaešita le bana ba banyenyane ba ka kgona go naganišiša ka ditherešo tša Beibele gaešita le go di tšeela godimo.

5, 6. (a) Tsela yeo Beibele e hlalosago Timotheo ka yona e re nea phetho efe mabapi le go kolobetšwa ga gagwe? (b) Batswadi bao ba nago le temogo ba ka thuša bana ba bona bjang?

⁵ Ge Timotheo e be e sa le yo monyenyane, o ile a tšeela therešo godimo. Moapostola Paulo o boletše gore Timotheo o ile a ithuta ditherešo tša Beibele go tloga boseeng. Gaešita le ge tatago Timotheo a be a sa hlankele Jehofa, mmagwe le makgolo’agwe ba ile ba mo thuša gore a nweletše Mangwalo ka pelong ya gagwe. Ka baka leo, seo se ile sa dira gore tumelo ya gagwe e tie. (2 Tim. 1:5; 3:14, 15) Ge a be a le mengwageng ya bo-20, Timotheo e be e le morutiwa wa Mokriste yo a bego a ka newa ditokelo ka phuthegong.​—Dit. 16:1-3.

⁶ Ke therešo gore bana ga ba swane. Ba ka se gole monaganong go swana. Bana ba bangwe ba gola ka pela monaganong gomme ba ka nyaka go kolobetšwa e sa le ba banyenyane. Ba bangwe ba ka no se lokele go kolobetšwa go ba go fihla ba gotšenyana. Ka baka leo, batswadi bao ba nago le temogo ga ba gapeletše bana ba bona gore ba kolobetšwe. Go e na le moo, ba thuša yo mongwe le yo mongwe wa bana bao gore a dire tšwelopele moyeng go ya ka kwešišo ya gagwe. Batswadi ba a thaba ge ngwana wa bona a ekwa mantšu ao a lego go Diema 27:11. (Bala.) Lega go le bjalo, ga se ba swanela go lebala gore morero wa bona ke go thuša bana ba bona gore e tle e be barutiwa ba Bakriste. Ba dutše ba gopola seo, batswadi ba swanetše go ipotšiša potšišo ye: ‘Na ngwanaka o na le tsebo e lekanego gore a ineele go Modimo le go kolobetšwa?’

7. Na motho yo a nyakago go kolobetšwa o swanetše go tseba selo se sengwe le se sengwe seo se lego ka Beibeleng pele a kolobetšwa? Hlalosa.

⁷ Ka ge batswadi e le barutiši ka lapeng, ba nyaka gore bana ba bona ba be le tsebo go tloga boseeng, e lego seo se tla dirago gore ba kgone go ineela go Modimo. Eupša seo ga se bolele gore ngwana o swanetše go tseba selo se sengwe le se sengwe sa ka Beibeleng pele a ka ineela go Jehofa le go kolobetšwa. Ka morago ga gore barutiwa ba kolobetšwe, ba swanetše go tšwela pele ba gola tsebong e nepagetšego. (Bala Bakolose 1:9, 10.) Bjale go nyakega tsebo e kaakaa’ng e le gore motho a kolobetšwe?

8, 9. Re ka ithuta dithuto dife pegong ya Paulo, Silase le mohlapetši wa kgolego?

⁸ Seo se ilego sa diragalela lapa le lengwe la lekgolong la pele la mengwaga se ka thuša batswadi lehono. (Dit. 16:25-33) Ge Paulo a be a le leetong la gagwe la bobedi la boromiwa, moo e ka bago ka 50 C.E., o ile a etela motseng wa Filipi. Ge a be a le moo, yena le modirišani wa gagwe Silase, ba ile ba pharwa ka molato wa maaka gomme ba golegwa. Ge ba be ba le moo kgolegong, gare ga bošego go ile gwa ba le tšhišinyego e kgolo ya lefase yeo e ilego ya dira gore mejako ka moka ya kgolego e bulege. Mohlapetši wa kgolego o ile a nagana gore bagolegwa ba tšhabile, ke moka a leka go ipolaya. Eupša Paulo o ile a mo thibela. Paulo le Silase ba ile ba kgona go nea bohlatse go mohlapetši yoo le lapa la gagwe. Ka morago ga gore lapa leo le kwe therešo mabapi le Jesu, le ile la tutueletšega go dira’ng? Le ile la kolobetšwa ntle le go senya nako. Re ka ithuta’ng pegong ye?

⁹ Go ka direga gore pele monna yoo e eba mohlapetši wa kgolego, e be e le lešole la Baroma. O be a sa tsebe Mangwalo gabotse. Ka gona e le gore a be le tsebo ya motheo ya Mangwalo, o ile a swanelwa ke go ithuta dithuto tša bohlokwa tša Beibele, go kwešiša seo se bolelwago ke go ba yo mongwe wa bahlanka ba Modimo le go kgona go latela dithuto tša Jesu. Seo a ithutilego sona ka nako yeo e nyenyane se ile sa mo dira gore a nyake go kolobetšwa. Ga go pelaelo gore o ile a tšwela pele a ithuta dilo tše dingwe ka morago ga gore a kolobetšwe. O naganne ka mohlala wo, o swanetše go dira’ng ge ngwana wa gago a bontšha gore o rata dithuto tša bohlokwa tša Mangwalo go tšwa pelong, e bile a bontšha gore o tseba seo go ineela go Modimo le go kolobetšwa go se bolelago? Lena batswadi ba Bakriste, le ka phetha ka gore ngwana wa lena a ye go bagolo ba phuthego e le gore ba bone ge e ba a swanelega go kolobetšwa. * Go etša barutiwa ba bangwe bao ba kolobeditšwego, le yena o tla tšwela pele a oketša tsebo ya gagwe ka morero wa Jehofa, gona bjale le ka mo go sa felego.​—Baroma 11:33, 34.

10, 11. (a) Ke phošo efe yeo batswadi ba bangwe ba e dirago? (b) Ke’ng seo se tlago go šireletša ngwana go Sathane le batho ba gagwe?

¹⁰ Batswadi ba bangwe ba ile ba phetha ka gore go tla ba kaone gore morwa goba morwedi wa bona a tšwe a emenyana ka go kolobetšwa e le gore a rutege pele gomme a hwetše mošomo. Batswadi bao ba ka ba ba ipotša gore ba thuša ngwana wa bona, eupša na seo se tla thuša ngwana wa bona gore a atlege dilong tša Modimo? Sa bohlokwa kudu, na thuto e bjalo e dumelelana le Mangwalo? Beibele e re’ng tabeng ye?​—Bala Mmoledi 12:1.

¹¹ Go bohlokwa go gopola gore lefase le le dilo ka moka tša lona di ganetšana le seo Jehofa a se nyakago, le tsela yeo a naganago ka yona. (Jak. 4:7, 8; 1 Joh. 2:15-17; 5:19) Ge ngwana a eba le tswalano e botse le Jehofa seo se tla mo šireletša  go Sathane le go batho ba gagwe bao ba dirago dilo tše mpe. Ge motswadi a kgothaletša ngwana gore a etiše thuto e phagamego pele bophelong bja gagwe, seo se ka gakantšha ngwana gomme sa senya bokamoso bja gagwe. Na ruri batswadi ba Bakriste bao ba nago le lerato ba ka nyaka gore lefase le le bope ngwana wa bona ka thuto ya lona? Therešo ke gore re hwetša lethabo la kgonthe ge feela re etiša Jehofa pele maphelong a rena.​—Bala Psalme 1:2, 3.

12. Ke ka baka la’ng batswadi ba bangwe ba phethile ka gore ngwana wa bona a tšwe a emenyana ka go kolobetšwa?

¹² Ge mma yo mongwe wa Mokriste a hlalosa mabaka a gagwe a go thibela morwedi wa gagwe gore a se kolobetšwe, o itše: “Ke lešwa dihlong ke go bolela gore lebaka la ka le legolo e be e le go tšhaba gore ngwanaka a ka tla a kgaolwa.” Go swana le kgaetšedi yo, batswadi ba bangwe ba ipeela mabaka ka gore gokaone gore ngwana wa bona a tšwe a emenyana ka go kolobetšwa go fihlela a gotše gomme a na le maikarabelo. (Gen. 8:21; Die. 22:15) Ba ka no phetha ka gore: ‘Ka ge ngwanaka a se a kolobetšwa, a ka se kgaolwe.’ Ke ka baka la’ng go nagana bjalo e le go iphora?​—Jak. 1:22.

13. Na ge motho a se a kolobetšwa go ra gore ga a ikarabele go Jehofa? Hlalosa.

¹³ Ke therešo gore batswadi ba Bakriste ba nyaka gore ngwana wa bona a gole monaganong pele a ka kolobetšwa e le gore a tle a ineele go Jehofa ka pelo ka moka. Lega go le bjalo, e tla ba phošo go phetha ka gore ge ngwana a se a kolobetšwa ga a ikarabele go Jehofa. Ke ka baka la’ng re rea’lo? Go ikarabela go Jehofa ga se gwa ithekga ka gore re kolobeditšwe. Go e na le moo, ngwana o ikarabela go Jehofa ge a tseba seo Jehofa a rego se nepagetše goba se fošagetše. (Bala Jakobo 4:17.) Ka gona, go e na le gore ba thibele ngwana wa bona go kolobetšwa, batswadi ba bohlale ba šoma ka thata gore ba beele ngwana wa bona mohlala. Ba nyaka go ruta ngwana wa bona go tloga boseeng gore a rate go phela ka melao ya Jehofa ya boitshwaro. (Luka 6:40) Ge ngwana wa bona a rata melao yeo, seo se tla mo šireletša gore a se dire sebe se segolo ka gobane o tlo nyaka go dira seo Jehofa a rego se lokile.​—Jes. 35:8.

14. Ge batswadi ba thuša bana ba bona gore ba kolobetšwe, bagolo ba ka thekga batswadi bao bjang?

¹⁴ Ka ge bagolo e le badiši ba phuthego, ba ka thekga maiteko ao batswadi ba a dirago ka gore le bona ba bolele gabotse ka dipakane tša moya. Kgaetšedi yo mongwe yo a hlanketšego e le mmulamadibogo ka mengwaga e fetago e 70, o gopola poledišano ya gagwe le Ngwanabo rena Charles T. Russell. Ka nako yeo kgaetšedi yoo o be a na le mengwaga e tshela gomme poledišano yeo e ile ya fetoša bophelo bja gagwe. O itše: “Ngwanabo rena Russell o ile a fetša metsotso e 15 a boledišana le nna ka dipakane tša ka tša moya.” Ee, mantšu a mabotse le dikgothatšo di ka ba le mafelelo a mabotse. (Die. 25:11) Le gona, bagolo ba ka bitša batswadi le bana ba bona ge ba dira mediro e itšego Holong ya Mmušo, ba ka nea bafsa mešongwana go ithekgile ka mengwaga ya bona le bokgoni bja bona.

15. Ke ditsela dife tše dingwe tšeo re ka kgothatšago bafsa ka phuthegong?

¹⁵ Bana babo rena le dikgaetšedi ka phuthegong ba ka thuša bafsa ka go ba bontšha gore ba na le taba le bona, eupša ka tsela ya maleba. Se se tla akaretša gore ba dule ba ntšhitše mahlo dinameng go bona ge e ba bafsa ba dira tšwelopele ya moya. Ba ka ipotšiša gore: ‘Na mofsa yo a itšego o ile a nea karabo e tšwago pelong, yeo a e lokišeditšego gabotse, goba na o ile a tšea karolo dibokeng tša gare ga beke? Na go na le mofsa yo a ilego a kgona go lebeletšana le teko e itšego goba yo a ilego a kgona go diriša sebaka se itšego gore a nee bohlatse sekolong?’ Ge e ba a  le gona, eba wa mathomo wa go reta mofsa yoo. Mohlomongwe o ka itirela pakane ya gore pele ga ge diboka di ka thoma goba ka morago ga tšona o boledišane le mofsa yo a itšego. Ge e ba re dira bjalo goba re dira dilo tše dingwe, bafsa ba ka bona gore ke karolo ya “phuthego e kgolo.”​—Ps. 35:18.

16, 17. (a) Ke ka baka la’ng go le bohlokwa gore bana ba kolobetšwe? (b) Batswadi ka moka ba Bakriste ba ka thabišwa ke’ng? (Bona seswantšho seo se lego mathomong a sehlogo.)

¹⁶ Go godiša ngwana ka “tayo le temošo ya Jehofa” ke e nngwe ya ditokelo tše dikgolo tšeo Jehofa a di neilego batswadi ba Bakriste. (Baef. 6:4; Ps. 127:3) Go fapana le bana ba kua Isiraeleng ya bogologolo bao Jehofa a bego a ba amogela ka baka la batswadi ba bona, lehono Jehofa ga a no amogela bana ba Bakriste feela ka gobane batswadi ba bona ba ineetše go yena. Go oketša moo, bana ga ba no belegwa ba rata Modimo le therešo ka baka la ge batswadi ba bona ba dira bjalo. Go tloga letšatšing leo ngwana a belegwago ka lona, batswadi ba swanetše go ikemišetša go dira ngwana wa bona morutiwa, ke gore, ba mo thuše gore a tle a be mohlanka wa Jehofa yo a ineetšego le go kolobetšwa. Eupša selo se bohlokwa ke’ng? Ke ge motho a ineela go Jehofa, a kolobetšwa gomme a dula a mmotegela, e lego seo se tlago go mo dira gore a phologe masetlapelo a magolo.​—Mat. 24:13.

¹⁷ Ge Blossom Brandt a be a re o nyaka go kolobetšwa, batswadi ba gagwe bao ba boifago Modimo ba ile ba nyaka go kgonthišetša gore Blossom o tloga a kwešiša phetho yeo a bego a nyaka go e dira. Ka morago ga gore ba bone gore o loketše go ka kolobetšwa, ba ile ba thekga phetho ya gagwe. Bošegong bja pele a ka kolobetšwa, tatagwe o ile a mo direla selo se sebotse kudu. Blossom o re: “O ile a re bitša ka moka gomme a re kgopela gore re khuname, ke moka a rapela. O ile a botša Jehofa gore o thabetše phetho yeo morwedinyana wa gagwe a e tšerego ya gore a ineele go Yena.” Ka morago ga mengwaga e fetago e 60, Blossom o re: “Nka se tsoge ke lebetše bošego bjoo!” Batswadi, anke le lena le latsweng lethabo le kgotsofalo tšeo di tlišwago ke go bona bana ba lena ba ineela go Jehofa, e bile e eba bahlanka ba Jehofa bao ba kolobeditšwego.