KE GOLETŠE kua Graz nageng ya Austria. Ge ke be ke na le mengwaga e šupa, ke ile ka išwa sekolong gore ke yo rutwa ka bodumedi. Eupša ke ile ka bona ge baruti ba eba le thobalano le baitlami ka tsela e gobogilego. Ka baka leo, mma o ile a ntumelela go tlogela sekolo seo le pele ngwaga o ka fela.

Ka morago ga moo, ke ile ka ya sekolong seo bana ba sekolo ba tsenago ba dula go sona. Bošegong bjo bongwe, Tate o ile a tla go ntšea sekolong gomme a nkiša lefelong la tšhireletšego ka ge moo Graz go be go thuntšhwa dipomo. Re ile ra tšhabela toropong ya Schladming. Ge re sa tšwa go fihla gomme re tshetše leporogo, leporogo leo le ile la thuntšhwa ka pomo. Nakong e nngwe, batho bao ba bego ba le ka gare ga difofane tšeo di bego di fofela fase ba ile ba thuntšha nna le makgolo’aka re le ka gae. Ge ntwa yeo e be e fela, re ile ra ikwa eka kereke le mmušo di re lahlile.

Ka 1950, Hlatse e nngwe e ile ya thoma go ithuta Beibele le mma. Ke be ke fela ke theetša poledišano ya bona gomme ka dinako tše dingwe ke felegetša mma dibokeng tše dingwe tša phuthego. Ka ge mma a be a kgodišegile gore Dihlatse tša Jehofa di ruta therešo, o ile a kolobetšwa ka 1952.

Ka nako yeo, ke be ke bona okare phuthego ya lefelong la gešo e no ba lefelo leo bakgekolo ba kopanago go lona. Lega go le bjalo, ka moragonyana ga moo, re ile ra etela phuthego yeo e bego e na le bafsa ba bantši. E be e se lefelo leo ke bego ke nagana gore ke la bakgekolo! Ge re boetše Graz, ke ile ka thoma go ya dibokeng ka mehla, gomme go se go ye kae, le nna ke ile ka kgodišega gore seo ke bego ke ithuta sona e be e le therešo. Le gona, ke ile ka thoma go bona gore Jehofa ke Modimo yo a dulago a thekga bahlanka ba gagwe. O dula a re thekga gaešita le ge rena re bona eka re ka se kgone go kgotlelela mathata a rena.​—Ps. 3:5, 6.

Ke be ke nyaka go botša batho ka Modimo, ka gona ke ile ka thoma ka bana ba gešo. Bosesi ba ka ba bane ba be ba šetše ba tlogile gae gomme ba šoma e le barutiši. Ka gona, ke ile ka ba etela moo ba  bego ba dula gona gomme ka ba kgothaletša gore ba ithute Beibele. Mafelelong, bana ba gešo ka moka ba ile ba ithuta Beibele gomme ya ba Dihlatse tša Jehofa.

Bekeng ya bobedi ya ge ke sa tšwa go thoma go ruta batho ka ntlo le ntlo, ke ile ka kopana le mosadi yo a bego a le mengwageng ya bo-30 gomme ka mo ruta Beibele. O ile a tšwela pele gabotse go fihlela a kolobetšwa gomme ka morago gwa kolobetšwa monna wa gagwe le barwa ba bona ba babedi. Go ithuta le mosadi yoo, go ile gwa matlafatša tumelo ya ka. Ke ka baka la’ng go ile gwa e matlafatša? Ka gobane go be go se na motho yo a nthutilego Beibele ka tsela e rulagantšwego. Ka gona ke be ke swanelwa ke gore ka mehla ke lokišetše gabotse. Ge e le gabotse, ke be ke ithuta pele e le gore ke tle ke kgone go ruta morutwana wa ka! Ruri seo se ile sa dira gore ke rate therešo ya Beibele le go feta. Ka April 1954, ke ile ka bontšha gore ke ineetše go Jehofa ka gore ke kolobetšwe.

Ka 1955, ke ile ka ya dikopanong tša ditšhabatšhaba tšeo di bego di swaretšwe Engelane, Fora le Jeremane. Ge ke be ke le London, ke ile ka kopana le Ngwanabo rena Albert Schroeder. E be e le mohlahli wa Sekolo sa Beibele sa Gilead, gomme ka morago a hlankela e le setho sa Sehlopha se Bušago. Ge re be re le Musiamong wa Brithania, Ngwanabo rena Schroeder o ile a re bontšha dingwalwa tše dingwe tša Beibele. Di be di na le leina la Modimo ka ditlhaka tša Seheberu, ke moka a re hlalosetša bohlokwa bja tšona. Seo se ile sa dira gore ke rate Jehofa le therešo ya Beibele le go feta, sa ntira gore ke ikemišetše le go feta gore ke tsebiše batho therešo ya Beibele.

Ka di-1 tša January, 1956, ke ile ka thoma go hlankela ke le mmulamadibogo wa ka mehla. Ka morago ga dikgwedi tše nne, ke ile ka abelwa go hlankela ke le mmulamadibogo yo a kgethegilego kua Austria. Ka nako yeo, toropong ya Mistelbach yeo ke bego ke yo hlankela go yona go be go se na Dihlatse tša Jehofa. Eupša ke ile ka lebeletšana le bothata bjo itšego. Tsela yeo ke bego ke godišitšwe ka yona e be e fapana le tsela yeo mmulamadibogo yo ke bego ke šoma le yena a bego a godišitšwe ka yona. Ke be ke ke le kgauswi le go swara mengwaga e 19, le gona ke goletše toropong. Yena o be a na le mengwaga e 25 gomme o goletše magaeng. Ke be ke sa rate go tsoga ka pela mesong mola yena a be a go rata go tsoga ka pela. Bošego ke be ke sa robale ka pela mola yena a be a rata go robala ka pela. Eupša re ile ra diriša keletšo ya Beibele go rarolla mathata ao a rena gomme ra thabela go šoma gotee.

Ge e le gabotse, re ile ra ba le mathata a mangwe a magolo. Re be re fela re tlaišwa eupša Jehofa o be a se a re lahla. (2 Bakor. 4:7-9) Letšatšing le lengwe ge re be re le tšhemong motsaneng o mongwe, batho ba bangwe ba ile ba re bulelela dimpša. Gateetee ke ge re dikaneditšwe ke dimpša tše dikgolo, di re goba e bile di re ntšheditše meno. Re ile ra swarana ka diatla ka ba ka rapela, ka re: “Hle Jehofa, re kgopela gore ge di ka re loma re nape re hwe le semetseng!” Ge dimpša tšeo di šetše di le kgauswiuswi le rena, di ile tša ema, tša šikinya mesela ya tšona ka morago tša goma. Re ile ra bona gore re be re šireleditšwe ke Jehofa. Ka morago ga moo, re ile ra šoma motsaneng woo ka moka, gomme ra thabišwa ke gore batho ba be ba theetša molaetša wa rena. Mohlomongwe ba be ba makaditšwe ke gore dimpša di be di se tša re loma goba gore re ile ra kgotlelela gaešita le ka morago ga tiragalo yeo e sehlogo. Mafelelong  ba bangwe ba bona ba ile ba fetoga Dihlatse tša Jehofa.

Re ile ra tšhošwa ke selo se sengwe gape. Ka letšatši le lengwe, monna yo re bego re hirile ka ga gagwe, o ile a boa gae a tagilwe gomme a thoma go re tšhošetša ka gore o nyaka go re bolaya ka ge a be a re re tshwenya baagišani. Mosadi wa gagwe o ile a leka go mo thibela eupša a palelwa. Dilo tšeo ka moka re di kwele re le ka kamoreng ya rena yeo e bego e le ka lebatong la ka godimo. Kapejana re ile ra bea ditulo pele ga mojako wa kamora ya rena gomme ra thoma go paka disutukheise tša rena. Ge re bula lebati, re ile ra bona monna yoo a eme setepising sa mafelelo sa lebato, a swere thipa e kgolo. Ka gona re ile ra tšwa ka lebati la ka morago gomme ra tšhaba re swere dilo tša rena ka moka. Re ile ra se sa boela.

Re ile ra ya hoteleng e nngwe gomme ra hira phapoši. Ka morago ga moo, re ile ra feleletša re dutše moo hoteleng mo e nyakilego go ba ngwaga, e lego seo se ilego sa re thuša tšhemong. Seo se ile sa re thuša bjang? Hotele yeo e be e le gare ga toropo, le gona ba bangwe ba barutwana ba rena ba be ba nyaka re bala le bona mo re dulago gona. Go se go ye kae, ke ge re šetše re swarela thuto ya puku le Thuto ya Morokami ka kamoreng ya rena. Go be go etla batho ba e ka bago ba 15.

Re ile ra dula Mistelbach mo e ka bago ngwaga le dikgwedi. Ke moka ka abelwa go ya Feldbach, yeo e lego ka borwabohlabela bja Graz. Ke ile ka hwetša mmulamadibogo yo mongwe yoo ke bego ke tlo šoma le yena. Eupša le gona moo, go be go se na phuthego. Re be re dula lebatong la bobedi ka ntlong e nyenyane yeo e bego e agilwe ka mapolanka. Moya o be o tsena mašobeng a mapolanka, ka gona re ile ra a thiba ka dikuranta. Le gona re be re swanetše go ga meetse sedibeng. Eupša go be go le bose kudu. Ka dikgwedi tše sego kae, ke ge go šetše go na le sehlopha. Mafelelong, ditho tša lapa tše 30 tšeo re bego re ithuta le tšona di ile tša ba Dihlatse tša Jehofa!

Diphihlelo tše bjalo di ile tša mmatlafatša gomme tša ntira gore ke leboge thekgo yeo Jehofa a e neago bahlanka ba gagwe bao ba etišago Mmušo wa Modimo pele. Gaešita le ge batho ba bangwe ba sa kgone go re thuša, eupša Jehofa o dula a re thuša.​—Ps. 121:1-3.

Ka 1958, go be go tlo go swarwa dikopano tša ditšhabatšhaba kua New York City, Setediamong sa Yankee le Polo Grounds. Ke ile ka tlatša fomo ya go kgopela go ya moo, gomme ofisi ya lekala ya Austria ya mpotšiša ge e ba nka se rate go ya klaseng ya  bo-32 ya Sekolo sa Gilead. Ke be nka gana bjang? Ke ile ka re, “Ee!” di tloga fase.

Ka klaseng ya Gilead, ke be ke dula kgauswi le Martin Poetzinger yo a ilego a kgotlelela go tlaišwa o šoro dikampeng tša Manazi. Ka morago le yena o ile a hlankela e le setho sa Sehlopha se Bušago. Ka dinako tše dingwe ge klase ya Gilead e dutše e tšwela pele, Martin o be a fela a mpotšiša ka go ntshebela ka gore: “Erika, ka Sejeremane ba ra go re’ng?”

Ngwanabo rena Nathan Knorr o ile a tsebiša ka dikabelo tša rena pele klase ya rena e fela. Nna ke be ke abetšwe go ya Paraguay. Ka ge ke be ke sa le yo monyenyane kudu, tate o ile a swanela ke go nthuša go hwetša lengwalo la go tsena ka nageng yeo. Ka morago ga gore ke le hwetše, ke ile ka ya Paraguay ka March 1959. Ke ile ka abelwa go dula le moromiwa yo mongwe legaeng la baromiwa leo le bego le le Asunción.

Go se go ye kae, ke ile ka kopana le Walter Bright, e lego moromiwa yoo a bego a alogile klaseng ya bo-30 ya Gilead. Ge nako e dutše e eya, re ile ra nyalana gomme ra swarišana tsela mmogo. Nako le nako ge re be re e ba le mathata, re be re bala kholofetšo ya Jehofa yeo e lego go Jesaya 41:10, yeo e rego: “O se ke wa boifa gobane ke na le wena. O se ke wa lealea gobane ke Modimo wa gago. Ke tla go matlafatša.” Se se ile sa re kgodiša gore ge feela re leka ka thata go dula re botegela Jehofa, gomme re etiša Mmušo wa gagwe pele, gona a ka se ke a re lahla.

Ge nako e dutše e eya, re ile ra abelwa lefelong le lengwe kgauswi le mollwane wa Brazil. Ge re le moo, moruti yo mongwe o ile a tutuetša bafsa ba bangwe gore ba foše legae la baromiwa leo re bego re dula go lona ka maswika, le gona legae leo le be le šetše le hlagetše. Ka morago ga moo, Walter o ile a thoma go ithuta Beibele le yo mogolo wa maphodisa. Monna yoo o ile a kgonthišetša gore re maphodisa a re hlokomele ka beke e tee, gomme bafsa bao ba se sa re tshwenya. Nakwana ka morago ga moo, re ile ra išwa dintlong tše dibotse tšeo di bego di le mollwaneng wa Brazil. Se se be se re thuša ka baka la gore re be re kgona go swara diboka Paraguay le Brazil. Pele re ka tloga kabelong yeo, go be go šetše go na le diphuthego tše pedi tše dinyenyane.

Dingaka di be di mpoditše gore nka se kgone go ba le bana. Ka gona, ka 1962 re ile ra makala ge ke be ke botšwa gore ke imile! Mafelelong re ile ra dula Hollywood, kua Florida, kgauswi le lapa la gabo Walter. Ka mengwaga e mmalwa, nna le Walter re ile ra emiša go bula madibogo. Re ile ra swanelwa ke go hlokomela lapa. Eupša re ile ra dula re etiša pele Mmušo wa Modimo.​—Mat. 6:33.

Ge re fihla Florida ka November 1962, re ile ra makatšwa ke gore batho ba lefelong leo ba be ba sa nyake gore batho ba bašweu le ba baso ba sware diboka ba le gotee, le gore ba se ye tšhemong mmogo. Eupša Jehofa ga a kgetholle batho go ya ka merafo, ka gona, o ile a dira tokišetšo ya gore batho ba merafo e sa swanego ba kopanele gotee. Ruri tokišetšo ye e ile ya re bontšha letsogo la Jehofa, ka ge ga bjale go na le diphuthego tše dintši lefelong leo.

Ka manyami, Walter o ile a ba le kankere ya bjoko gomme a hlokofala ka 2015. O bile molekane yo botse ka mengwaga e 55. O be a rata Jehofa e bile o thušitše le bana babo rena ba bantši. Ke fela pelo ya go tlo mmona ge a tsošitšwe bahung gomme a phetše gabotse mmeleng.​—Dit. 24:15.

Ke leboga gore ke bile tirelong ya nako e tletšego ka mengwaga ya ka godimo ga e 40. Le gona ke thabetše dilo tše dintši. Ka mohlala, nna le Walter re ile ra kgona go ba gona ge barutwana ba rena ba Beibele ba 136 ba kolobetšwa. Ke nnete gore mathata a ile a ba gona. Eupša ga se a ka a re dira gore re kgaotše go hlankela Modimo wa rena yo a botegago. Go e na le moo, re ile ra batamela kgauswi kudu le yena re tshepile gore o tla lokiša ditaba ka nako ya gagwe le ka tsela ya gagwe. Le gona o ile a dira bjalo!​—2 Tim. 4:16, 17.

Ke hlologela Walter kudu, eupša go bula madibogo go nthuša gore ke kgotlelele. Ke holwa kudu ke go ruta batho ka Modimo, le go ba botša ka gore Modimo o tlo tsoša bahu. Ke bone ka ditsela tše dintši gore Jehofa ga sa nka a ntahla. Go etša ge a holofeditše bahlanka ba gagwe gore o tla ba matlafatša, le nna o ile a nthuša, a dula a ntshwere ka “seatla sa gagwe sa le letona sa toko.”​—Jes. 41:10.