Go bolela nnete, lehono ga go na motho yo a tsebago kamoo Paulo a bego a bogega ka gona. Diswantšho tša Paulo tšeo di lego ka dikgatišong tša rena di thadilwe ke batho. Ga se dinepe tšeo di hlatsetšwego ke baepi ba marope.

Lega go le bjalo, ke kgale re lemogile gore go na le dilo tšeo di re bontšhago kamoo Paulo a bego a bogega ka gona. Ka mohlala, makasine wa Zion’s Watch Tower wa March 1, 1902, o ile wa bolela ka tše dingwe tša tšona. O itše: “Ge e le mabapi le tsela yeo Paulo a bego a bogega ka yona . . . Pukung ya ‘Acts of Paul and Thecla,’ . . . yeo e ngwadilwego mo e ka bago ka 150 A. D. go na le tlhaloso ya Paulo yeo go ka diregago gore ke yona e kaonekaone, le yeo e bolelago nnete. Puku ye e mo hlalosa e le ‘yo mokopana, a na le lefatla, digoro, digoba e bile dintšhi tša gagwe tša ka godimo ga mahlo di kopane le gona a na le nko e botsana.’”

Ge kgatišo ya 1997 ya The Oxford Dictionary of the Christian Church e bolela ka mengwalo ya kgale, e re: “Go ka no direga gore puku ya ‘Acts’ (goba “Acts of Paul and Thecla”) e na le dipego tše dingwe tša histori tšeo di nepagetšego.” Puku ye ya The Acts of Paul and Thecla e be e tšeelwa godimo kudu mehleng ya kgale, ka ge se se hlatselwa ke taba ya go ba gona ga dingwalwa tša yona tše 80 tša Segerika, gotee le ditokollo tša maleme a mangwe. Ka baka leo, diswantšho tša rena di dumelelana le seo dipuku tša kgale di se hlalosago mabapi le tsela yeo Paulo a bego a bogega ka yona.

Lega go le bjalo, gopola gore go na le dilo tše bohlokwa kudu go feta gore Paulo o be a bogega bjang. Gaešita le nakong ya ge Paulo a be a swaregile ka bodiredi bja gagwe, baswayadiphošo ba ile ba re “ge a le gona ka nama o [be] a fokola gomme polelo ya gagwe [e le] e nyatšegago.” (2 Bakor. 10:10) Eupša ga se ra swanela go lebala gore o ile a fetoga Mokriste ka baka la ge a ile a bona mohlolo woo Jesu a mo diretšego wona. Re ka nagana gape le ka seo Paulo a ilego a se fihlelela e le ‘sebjana seo Kriste a se kgethilego gore se iše leina la Jesu ditšhabeng.’ (Dit. 9:3-5, 15; 22:6-8) Le gona, nagana kamoo re holegago ka gona ge re bala dipuku tšeo Jehofa a ilego a laela Paulo go di ngwala.

Paulo ga se a ka a ikgantšha ka dilo tšeo a di dirilego pele e eba Mokriste, e bile ga se a ka a bolela ka tsela yeo a bego a bogega ka yona. (Dit. 26:4, 5; Bafil. 3:4-6) O itše: “Ke yo monyenyane go baapostola ka moka gomme ga ke swanelwe ke go bitšwa moapostola.” (1 Bakor. 15:9) Ka morago o ile a ngwala gore: “Nna motho yo a fetwago le ke yo monyenyane wa bakgethwa bohle, ke neilwe botho bjo bogolo bja Modimo gore ke bolele ditaba tše dibotse ditšhabeng mabapi le mahumo a ka se kego a lekanywa a Kriste.” (Baef. 3:8) Ruri molaetša wo o bohlokwa kudu go feta go tshwenyega ka gore Paulo o be a bogega bjang.