1. Gantši Beibele e hlalosa tayo bjang?

O NAGANA’NG ge o ekwa lentšu “tayo”? Mohlomongwe o nagana ka kotlo. Eupša tayo e bolela seo se fetago seo. Beibele e re tayo e a re hola, le gona ka dinako tše dingwe ge e bolela ka tayo e bolela le ka tsebo, bohlale, lerato le bophelo. (Die. 1:2-7; 4:11-13) Ka baka la’ng? Ka gobane ge Modimo a re laya o bontšha gore o a re rata e bile o nyaka gore re tle re hwetše bophelo bjo bo sa felego. (Baheb. 12:6) Tayo ya gagwe ga e sehlogo. Ge e le gabotse tayo e sepedišana le go ruta, go no swana le ge motswadi a ruta ngwana wa gagwe yo a mo ratago.

2, 3. Tayo e sepedišana bjang le go ruta le kotlo? (Bona seswantšho se se lego ka mo godimo.)

² Nagana ka mohlala wo: Mošemane yo a bitšwago Lesiba o bapadiša kgwele ka ntlong. Ke moka mmagwe o mmotša gore: “Lesiba, o a tseba gore ga se wa swanela go bapala ka kgwele ka ntlong ka gobane o ka thuba se sengwe.” Eupša mošemane yoo ga a theetše mmagwe gomme o thuba sebjana sa go kgabiša. O nagana gore mmagwe o be a tla mo laya bjang? Mohlomongwe a ka thoma pele ka go mo hlalosetša gore ke ka baka la’ng seo a se dirilego se fošagetše gomme ka morago a mo otla. Ge a mo otla, o nyaka go mmontšha gore go  kwa batswadi go bo bohlokwa, le gore melao ya bona ga se e methata e bile e a kwagala. Go oketša moo, a ka mo otla ka tsela ya maleba go mmontšha gore seo a bego a se bolela, o be a sa bapale. Ka mohlala, a ka mo otla ka go mo tšeela kgwele ya gagwe. Seo se tla thuša Lesiba go bona gore go se kwe go na le ditlamorago tše di sa kgahlišego.

³ Ka mo go swanago, ka ge re le ditho tša phuthego, re karolo ya ntlo ya Modimo. (1 Tim. 3:15) Ka baka leo, re swanetše go hlompha tshwanelo ya Jehofa ya go re beela melao le go re otla ka lerato ge re sa phele ka yona. Go oketša moo, ge re wetšwe ke ditlamorago tše di sa kgahlišego ka ba ka la ditiro tša rena, tayo ya Jehofa e tla re gopotša gore go bohlokwa go kwa Tatago rena wa legodimong. (Bagal. 6:7) Modimo o re rata kudu, le gona ga a nyake gore re welwe ke mathata.​—1 Pet. 5:6, 7.

4. (a) Jehofa o nyaka gore re tlwaetše batho bjang? (b) Sehlogong se re tlo araba dipotšišo dife?

⁴ Tayo yeo e theilwego melaong ya motheo ya Beibele e ka thuša motho go fihlelela dipakane tša moya, go swana le go thuša ngwana wa gago goba morutwana wa Beibele go ba molatedi wa Kriste. Lentšu la Modimo, e lego selo sa mathomothomo seo re se dirišago go tlwaetša ba bangwe, le re thuša go “laya ka toko.” Ka gona, re ka kgona go thuša ngwana wa rena goba morutwana wa Beibele go kwešiša le ‘go boloka dilo tšohle tšeo Jesu a re laetšego tšona.’ (2 Tim. 3:16; Mat. 28:19, 20) Jehofa o nyaka gore re ba tlwaetše ka tsela ye, e le gore le bona ba kgone go thuša ba bangwe gore e be barutiwa ba Kriste. (Bala Tito 2:11-14.) Ga bjale anke re arabeng dipotšišo tše tše tharo tše bohlokwa: Ya pele, tayo ya Modimo e bontšha bjang gore o a re rata? Ya bobedi, re ka ithuta’ng go batho bao Jehofa a ilego a ba nea tayo nakong e fetilego? Ya boraro, re ka ekiša bjang Jehofa le Morwa wa gagwe ge re nea batho ba bangwe tayo?

5. Ke ka ditsela dife tayo ya Jehofa e bontšhago gore o a re rata?

⁵ Ka ge Jehofa a na le lerato, o a re phošolla, o a re ruta le go ba tlwaetša e le gore ba dule leratong la gagwe le gore ba tle ba hwetše bophelo bjo bo sa felego. (1 Joh. 4:16) Ge a re phošolla ga a re dire gore re ikwe re nyatšega goba re se na mohola. (Die. 12:18) Go e na le moo, Jehofa o šetša kudu dika tša rena tše dibotse e bile o hlompha tshwanelo ya rena ya go itirela diphetho. Na o gopola seo ge Modimo a go nea tayo, go sa šetšwe gore tayo yeo e tšwa ka Lentšung la Gagwe, dikgatišong tšeo di theilwego Beibeleng, go batswadi ba Bakriste goba bagolo ba phuthego? Ge e le gabotse, ge bagolo ba leka go re thuša ka tsela e lerato le e botho le pele ga ge re ka lemoga gore re dirile selo se se fošagetšego, ba re bontšha gore Jehofa o a re rata.​—Bagal. 6:1.

6. Tayo e bontšha bjang gore Modimo o a re rata gaešita le ge re ka lahlegelwa ke ditokelo ka phuthegong?

⁶ Ka dinako tše dingwe go nea tayo ga go no bolela go fa motho keletšo. Ge motho a dirile sebe se segolo o tlo lahlegelwa ke ditokelo ka phuthegong. Eupša re swanetše go dula re gopola gore tayo e bjalo e re bontšha gore Jehofa o a re rata. Ka mohlala, ge motho a lahlegetšwe ke ditokelo, se se mo thuša gore a bone gore go bohlokwa kudu gore a bale Beibele ka mehla, a naganišiše ka seo a se badilego gomme a rapele. Ka go re’alo a ka kgona go tia moyeng. (Ps. 19:7) Ge nako e dutše e eya motho yoo a ka bušetšwa ditokelo ka phuthegong. Gaešita le ge motho a ka kgaolwa, seo se bontšha gore Jehofa o rata phuthego ka gobane o e šireletša go modiradibe yoo a ka e tutuetšago ka mekgwa e mebe. (1 Bakor. 5:6, 7, 11) Le gona, ka ge Modimo a re laya ka tsela e swanetšego, go kgaolwa go ka dira gore modiradibe a lemoge bogolo bja phošo ya gagwe gomme a itshole.​—Dit. 3:19.

7. Shebana e be e le mang, gona o ile a thoma go ba le mekgwa efe e mebe?

⁷ E le gore re bone kamoo tayo e lego bohlokwa ka gona, a re boleleng ka batho ba babedi bao Jehofa a ilego a ba laya. Wa mathomo ke Shebana yo a phetšego mehleng ya Kgoši Hesekia, gomme wa bobedi ke Graham, e lego ngwanabo rena wa mehleng ye. Ka ge Shebana e be e le molaki “yo a okametšego ntlo,” mohlomongwe ya Kgoši Hesekia, o be a na le matla ka bogošing. (Jes. 22:15) Eupša ka manyami, o ile a thoma go ikgogomoša, gomme a nyaka go tuma le go retwa. O be a bile a ikepetše lebitla la maemo, le gona o be a sepela ka “dikoloi tša letago.”​—Jes. 22:16-18.

8. Jehofa o ile a laya Shebana bjang, gona Shebana o ile a arabela bjang?

⁸ Ka ge Shebana a be a nyaka go tuma, Modimo o ile a mo ‘tloša bolaking bja gagwe,’ gomme legatong la gagwe a bea Eliakima. (Jes. 22:19-21) Se se diregile ge Kgoši ya Asiria e lego Sanheribe a be a leka go hlasela motse wa Jerusalema. Ge nako e dutše e eya, kgoši yeo e ile ya romela bahlankedi ba bagolo le mašole a mantši Jerusalema. Ka baka la’ng? O be a nyaka go fetša Bajuda matla le go dira gore kgoši Hesekia a ineele. (2 Dikg. 18:17-25) Hesekia o ile a laela Eliakima gore a yo bolela le bahlankedi ba bagolo, eupša o be a se noši. O ile a ya le banna ba babedi, yo mongwe wa bona e be e le Shebana, yoo ka nako yeo e bego e le mongwaledi. Na se ga se bontšhe gore Shebana o ile a ithuta go ikokobetša ka go amogela maikarabelo a tlasana, go e na le go boloka sekgopi goba go ikgogomoša? Ge e ba go le bjalo, re ka ithuta’ng pegong ye ya Beibele? A re boleleng ka dilo tše tharo tšeo re ka ithutago tšona.

9-11. (a) Re ka ithuta’ng pegong ya Shebana? (b) O ikwa bjang ka tsela yeo Jehofa a ilego a laya Shebana ka yona?

⁹ Sa mathomo, Shebana o ile a lahlegelwa ke maemo a gagwe. Seo se re bontšha gore “moya wa boikgogomošo o eta go kgopša pele.” (Die. 16:18) Ge e ba o na le ditokelo ka phuthegong, mohlomongwe tšeo di go dirago gore o tume, na o tla dula o ikokobeditše? Na bokgoni bjo o nago le bjona o tla bo diriša gore go retwe Jehofa go e na le gore go retwe wena? (1 Bakor. 4:7) Moapostola Paulo o ngwadile gore: “Ke botša yo mongwe le yo mongwe gare ga lena gore a se ke a ikgopola kudu go feta kamoo go nyakegago gore a nagane ka gona.”​—Baroma 12:3.

¹⁰ Sa bobedi, tayo e matla yeo Jehofa a ilego a e nea Shebana e ka ba e be e bontšha gore Jehofa o be a dumela gore Shebana a ka fetoga. (Die. 3:11, 12) Ruri wo ke mohlala o mobotse go bana babo rena le dikgaetšedi bao ba lahlegelwago ke  ditokelo ka phuthegong. Go e na le gore ba galefe le go boloka sekgopi, eka ba ka leka ka matla go hlankela Jehofa ka dipelo tša bona ka moka maemong ao ba lego go wona, gomme ba lebelele tayo yeo e le bohlatse bja gore Jehofa o a ba rata. Gopola gore ge feela re ikokobetša, Tatago rena wa legodimong a ka se tsoge a re hlapile diatla. (Bala 1 Petro 5:6, 7.) Tayo e lerato ya Jehofa e ka re bopa ge feela re swana le letsopa le boleta.

¹¹ Sa boraro, tsela yeo Jehofa a ilego a laya Shebana ka yona e ruta bao ba nago le tshwanelo ya go laya ba bangwe thuto e bohlokwa kudu. Ke thuto efe? Le ge tayo ya Jehofa e bontšha gore o hloile sebe, eupša e bontšha le gore o tshwenyegile ka motho yo a dirilego sebe. Ge e ba o le motswadi goba o le molebeledi ka phuthegong gomme o swanetše go laya ngwana wa gago goba Mokriste gotee le wena, na o tla ekiša Jehofa ka go hloya se sebe eupša ka nako e swanago o lebeletše dilo tše dibotse go bona?​—Juda 22, 23.

12-14. (a) Bana babo rena ba bangwe ba arabela bjang ge ba newa tayo e tšwago go Jehofa? (b) Lentšu la Modimo le ile la thuša bjang ngwanabo rena yo mongwe go fetoša mokgwa wa gagwe, gona mafelelo e bile afe?

¹² Ka manyami, ka morago ga gore bana babo rena ba bangwe ba newe tayo, ba kwa bohloko kudu moo e lego gore ba tlogela Modimo le phuthego ya gagwe. (Baheb. 3:12, 13) Eupša na seo se ra gore batho ba bjalo ba ka se tsoge ba boile ka phuthegong? Nagana ka mohlala wa Graham, yoo a ilego a kgaolwa gomme ge nako e dutše e eya a bušetšwa ka phuthegong. Ka morago ga gore a bušetšwe o ile a fola moyeng. Ka morago ga mengwaga e mmalwa, Graham o ile a kgopela mogolo yo a bego a mo tlwaetše gore a ithute Beibele le yena.

¹³ Mogolo yoo o gopola ka gore: “Graham o be a na le bothata bja boikgogomošo. O be a sola-sola bagolo bao ba mo kgaotšego. Ka gona, dithutong tše di latelago, re ile ra boledišana kudu ka seo Beibele e se bolelago ka boikgogomošo le mafelelo a bjona. Graham o ile a thoma go diriša Lentšu la Modimo e le seipone sa go itlhahloba, gomme a se rate seo a bego a le sona. Bophelo bja gagwe bo ile bja fetoga kudu. Ka morago ga gore a lemoge gore o be a na le ‘kota’ ya boikgogomošo ka leihlong, le gore o be a na le mokgwa wa go solasola bagolo o ile a thoma go fetoša bophelo bja gagwe kapejana. O ile a thoma go ba gona dibokeng ka mehla, a bala lentšu la Modimo le go le diriša bophelong bja gagwe, gomme a thoma go rapela ka mehla. Go oketša moo, o ile a phetha maikarabelo a gagwe bjalo ka hlogo ya lapa, gomme seo sa dira gore lapa la gagwe le thabe kudu.​—Luka 6:41, 42; Jak. 1:23-25.

¹⁴ Mogolo yoo o tšwela pele ka gore: “Ka letšatši le lengwe Graham o ile a mpotša mantšu ao a ilego a nkgoma pelo. O ile a re: ‘Ke kgale ke tseba ditherešo, le gona nkile ka ba mmulamadibogo. Eupša ke gona nka bolelago go tšwa pelong gore ke rata Jehofa.’ E se kgale o ile a newa tokelo ya go sepetša dimaekrofouno ka dibokeng, e lego tokelo yeo a ilego a e thabela kudu. Phihlelo ya gagwe e nthutile gore ge motho a ikokobeletša Jehofa ka go amogela tayo, Jehofa o tla mo šegofatša kudu.”

15. Ge e ba re nyaka gore batho ba bangwe ba re theetše ge re ba nea tayo, re swanetše go dira’ng?

¹⁵ E le gore re be barutiši ba babotse re swanetše go thoma pele ka go ba barutwana ba babotse. (1 Tim. 4:15, 16) Ka baka leo, batho bao Jehofa a ba filego tshwanelo ya go nea ba bangwe tayo ba swanetše go latela tlhahlo ya Jehofa ka boikokobetšo. Ge ba dira bjalo, seo se tla dira gore batho ba bangwe ba ba hlomphe gomme sa ba dira gore ba be le tokologo ya polelo ge ba tlwaetša ba bangwe le ge ba ba nea tayo. Ela hloko mohlala wa Jesu.

16. Re ka ithuta dithuto dife go Jesu mabapi le go nea tayo e swanetšego le go ruta batho ka tsela e šomago?

 ¹⁶ Jesu o be a ekwa Tatagwe ka mehla gaešita le ge ka dinako tše dingwe go dira bjalo go be go le thata. (Mat. 26:39) Le gona, o be a iša theto go Tagagwe ka baka la thuto ya gagwe le bohlale bja gagwe. (Joh. 5:19, 30) Ka ge Jesu a be a ikokobeditše e bile a dula a ekwa Tatagwe, seo se ile sa dira gore batho ba dipelo tše dibotse ba tle go yena gomme sa mo thuša gore e be morutiši yo a kwelago batho bohloko le go ba gaugela. (Bala Luka 4:22.) Mantšu a gagwe a mabotse a ile a homotša bao ba bego ba swana le lehlaka le le thinyegilego goba bao ba bego ba swana le thapo ya lebone leo le lego kgauswi le go tima. (Mat. 12:20) Gaešita le ge ka dinako tše dingwe go se fele pelo ga Jesu go be go lekwa, o be a dula a le botho e bile a bontšha lerato. Se se ile sa bonagala gabotse ge a be a phošolla baapostola ba gagwe ge ba be ba ngangišana ka taba ya gore ke mang yo e lego yo mogolo gare ga bona.​—Mar. 9:33-37; Luka 22:24-27.

17. Ke dika dife tše dibotse tšeo di tlago go thuša bagolo gore ba diše mohlape wa Modimo gabotse?

¹⁷ Batho ka moka bao ba nago le tshwanelo ya go nea tayo yeo e theilwego Beibeleng ba swanetše go dula ba ekiša Kriste. Ruri ge ba dira bjalo ba bontšha gore ba nyaka go hlahlwa ke Jehofa le Morwa wa gagwe. Moapostola Petro o ngwadile gore: “Dišang mohlape wa Modimo woo le o hlokometšego, e sego ka go gapeletšwa, eupša e be ka go rata; le gona e se be ka go rata leruo la go se botege, eupša e be ka go fišega; gape e se be ka go buša bao e lego bohwa bja Modimo, eupša e be ka go ba mehlala go mohlape.” (1 Pet. 5:2-4) Bagolo bao ba ikokobeletšago Jehofa le Kriste, yena hlogo ya phuthego, ba tlo holega kudu e bile le batho bao ba ba hlokomelago ba tlo holega.​—Jes. 32:1, 2, 17, 18.

18. (a) Jehofa o nyaka gore batswadi ba dire’ng? (b) Jehofa o thuša batswadi bjang gore ba kgone go laya bana ba bona?

¹⁸ Ka lapeng, le gona re ka diriša melao ye ya motheo. Dihlogo tša malapa di laelwa gore: “Le se ke la befediša bana ba lena, eupša tšwelang pele le ba godiša ka tayo le temošo ya Jehofa.” (Baef. 6:4) Taba ye e bohlokwa gakaaka’ng? Diema 19:18 e re: “Otla morwa wa gago go sa na le kholofelo; o se ke wa mo kganyogela lehu.” Ee, batswadi ba Bakriste ba tlo ikarabela go Jehofa ge e ba ba sa laye bana ba bona! (1 Sam. 3:12-14) Lega go le bjalo, Jehofa o nea batswadi bohlale le matla tšeo ba di hlokago ge ba mo kgopela ka boikokobetšo gomme ba ithekga ka Lentšu la gagwe le ka moya o mokgethwa.​—Bala Jakobo 1:5.

19, 20. (a) Ke ditšhegofatšo dife tšeo re di hwetšago ge re ekwa tayo ya Jehofa? (b) Re tlo ithuta ka’ng sehlogong se se latelago?

¹⁹ Ge e ba re amogela tayo e tšwago go Modimo e bile re ekiša tsela yeo Yena le Jesu ba neago tayo ka yona, re tlo hwetša ditšhegofatšo tše dintši. Malapeng a rena le diphuthegong tša gabo rena go tla ba le khutšo, e bile yo mongwe le yo mongwe o tlo thaba kudu ka ge a tla be a ikwa a ratwa e bile a le bohlokwa. Seo e no ba mohlala wa ditšhegofatšo tšeo re tlago go di thabela nakong e tlago. (Ps. 72:7) Ruri tayo yeo Jehofa a re neago yona ga bjale e re lokišeletša go tlo phela ka khutšo le kwano nakong e tlago ge re tla be re le lapa le tee gomme re hlokometšwe ke Tatago rena, Jehofa. (Bala Jesaya 11:9.) Ge re lebelela tayo e tšwago go Modimo ka tsela yeo, re tlo gopola gore ge e le gabotse tayo ke bohlatse bjo bogolo bja gore Jehofa o a re rata.

²⁰ Sehlogong se se latelago, re tlo bolela kudu ka tayo yeo re ka e newago ka gae le ka phuthegong. E bile re tlo bolela ka go itaya, gomme ra ithuta kamoo re ka phemago selo se bohloko kudu go feta tayo le ge e le efe yeo re ka e newago.