1. Re hwetša bjang bohlale bja Modimo, gona re tlo holega bjang ge re na le bjona?

BOHLALE bo tšwa go Jehofa, gomme o nea ka go rata bao ba bo nyakago. Jakobo 1:5 e re: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go goboša.” Tsela e nngwe yeo re ka hwetšago bohlale bja Modimo ke ka go amogela tayo. Go amogela tayo go tla re thuša gore re se dire dilo tše mpe gomme gwa dira gore re dule re le bagwera ba Jehofa. (Die. 2:10-12) Ke moka re tla “[dula] leratong la Modimo . . . ka tebelelo ya bophelo bjo bo sa felego.”​—Juda 21.

2. Re ka bontšha bjang gore re tšeela godimo tayo yeo Modimo a re neago yona?

² Go se phethagale le tsela yeo re godišitšwego ka yona, di ka dira gore re thatafalelwe ke go lebelela tayo e le selo se sebotse. Eupša ge re bona tsela yeo re holegago ka yona ge Modimo a re nea tayo, re kgona go bona kamoo a re ratago ka gona. Diema 3:11, 12 e re: “Morwa wa ka, o se ke wa gana tayo ya Jehofa; . . . ka gobane Jehofa o kgalema yo a mo ratago.” Ee, anke le ka mohla re se ke ra lebala gore Jehofa o na le taba le rena. (Bala Baheberu 12:5-11.) Ka ge Modimo a re tseba gabotse, ka mehla o re nea tayo e swanetšego ka nako e swanetšego. Anke ga bjale re ahlaahleng mehuta e mene ya tayo: (1) go itaya, (2) go laiwa ke batswadi, (3) tayo yeo re e hwetšago ka phuthegong ya Bokriste le (4) selo se bohloko kudu go feta tayo le ge e le efe yeo re ka e newago.

3. Go tla bjang gore ngwana a kgone go itaya? Nea mohlala.

³ Motho yo itayago o laola mekgwa ya gagwe le tsela yeo a naganago ka yona. Ga re belegwe re na le bokgoni bja go itaya. Re swanetše go ithuta go itaya. Ka mohlala, ge ngwana a ithuta go reila paesekela, gantši motswadi wa gagwe o swarelela paesekela yeo gore ngwana yoo a se ke a wa. Eupša ge nako e dutše e eya, ngwana yoo o tlwaela go e reila. Ke moka ge motswadi a bona gore bjale ngwana yo o kgona go e reila gabotse, o mo tlogelela sa ruri. Ka mo go swanago, ge batswadi ba dutše ba tlwaetša bana ba bona “ka tayo le temošo ya Jehofa” ba sa fele pelo, ba ba thuša go itaya le go ba bohlale.​—Baef. 6:4.

4, 5. (a) Ke ka baka la’ng go itaya go le bohlokwa? (b) Ke ka baka la’ng re sa swanela go fela matla gaešita le ge re ka dira diphošo?

⁴ Batho bao ba thomago go tseba Jehofa ba šetše ba godile ba swana le ngwana yo a ithutago go namela paesekela. Ba ka ba ba kgona go itaya dilong tše dingwe. Eupša ge go tliwa dilong tša moya, ba thoma ba sa tsebe selo. Ka gona ganyenyane-ganyenyane ba ka gola moyeng ge ba ithuta go apara “semelo se sefsa” sa go swana le sa Kriste. (Baef. 4:23, 24) Go itaya go re thuša gore re gole moyeng. Le gona go re thuša go “[gana] dikganyogo tša lefase, re phele ka monagano o hlaphogetšwego le toko le boineelo go Modimo gare ga tshepedišo ye ya dilo ya gona bjale.”​—Tito 2:12.

⁵ Lega go le bjalo, ga go na motho yo a sa dirego sebe. (Mmo. 7:20) Eupša na ge re dira phošo se se bolela gore ga re kgone go itaya? Aowa ga go bjalo. Diema 24:16 e re: “Moloki le ge a ka wa gašupa, o tla tsoga gape.” Ke’ng seo se tlago go re thuša gore re “[tsoge] gape”? Re tlo thušwa ke moya o mokgethwa wa Modimo, e sego matla a rena. (Bala Bafilipi 4:13.) Moya woo o tšweletša seka sa boitshwaro, e lego seka seo se tswalanago le go itaya.

6. Re ka ba bjang barutwana ba babotse ba Lentšu la Modimo? (Bona seswantšho seo se lego mathomong a sehlogo.)

⁶ Go rapela, go bala Beibele le go naganišiša di tla re thuša gore re kgone go itaya. Eupša go thwe’ng ge e ba o thatafalelwa ke go bala Lentšu la Modimo goba o sa rate go ithuta? Dula o gopola gore Jehofa o tla go thuša ge e ba o mo dumelela gore a go thuše. A ka go thuša gore o “[hlagolele] kganyogo ya go kganyoga” Lentšu la gagwe. (1 Pet. 2:2) Sa pele, rapela Jehofa gore a go thuše go itaya gore o bale Lentšu la gagwe. Ke moka, dira dilo ka go dumelelana dithapelo tša gago, mohlomongwe o ka thoma ka go bala ka nako e kopana. Ge nako e dutše e eya, o tla thabela go ithuta gomme go ithuta gwa ba bonolo go wena! Ruri o tlo thabela dinako tšeo o di fetšago o naganišiša ka dikgopolo tša Jehofa tše bohlokwahlokwa.​—1 Tim. 4:15.

7. Go itaya go ka re thuša bjang gore re fihlelele dipakane tša moya?

⁷ Go itaya go re thuša gore re fihlelele dipakane tša rena tša moya. Nagana ka monna yo mongwe yo a nago le lapa, yoo a bego a ikwa eka ga a sa fišega tirelong ya Jehofa. Ka ge a be a tshwenyegile ka seo, o ile a ipeela pakane ya go ba mmulamadibogo wa ka mehla gomme a thoma go bala dihlogo tšeo di bolelago ka bobulamadibogo dimakasineng tša rena. Go dira bjalo le go rapela, go mo thušitše gore a gole moyeng gomme kganyogo ya gagwe ya go bula madibogo ya gola le go feta. Le gona o be a tšea bobulamadibogo bja go thuša ge nako e mo dumelela. Mafelelo e bile afe? Go sa šetšwe mathata ao a bego a lebeletšana le wona, o ile a dula a nagana ka pakane ya gagwe ya go ba mmulamadibogo wa ka mehla gomme mafelelong o ile a ba mmulamadibogo.

8-10. Ke’ng seo se ka thušago batswadi ba Bakriste gore ba atlege ge ba godiša bana ba bona gore ba hlankele Jehofa? Nea mohlala.

⁸ Batswadi ba Bakriste ba na le boikarabelo bjo bohlokwahlokwa bja go godiša bana ba bona “ka tayo le temošo ya Jehofa.” (Baef. 6:4) Wo ke mošomo o mogolo, kudukudu mehleng ye ya bofelo. (2 Tim. 3:1-5) Ke nnete gore bana ga ba belegwe ba tseba phapano magareng ga se sebotse le se sebe. Ba belegwa ba na le letswalo, eupša letswalo leo le swanetše go rutwa goba go tlwaetšwa. (Baroma 2:14, 15) Seithuti se sengwe sa Beibele se hlalositše gore lentšu la Segerika leo le fetoletšwego e le “tayo” le ka bolela le gore “go gola ga ngwana” goba go godiša ngwana gore e tle e be motho yo mogolo yo a nago le maikarabelo.

⁹ Ge batswadi ba laya bana ba bona ka lerato, gantši bana bao ba ikwa ba šireletšegile. Ba a tseba gore tokologo e na le moo e felelago gona le gore diphetho tšeo ba di dirago le tsela yeo ba itshwarago ka yona di na le ditlamorago tše dibotse goba tše mpe. Ka gona go bohlokwa gore batswadi ba Bakriste ba kgopele Jehofa gore a ba hlahle. O se ke wa lebala gore tsela yeo re dirago dilo ka yona e fapana go ya ka ditšo goba meloko. Ka gona, batswadi bao ba ithekgago ka bohlale bja Modimo, ga ba phopholetše seo ba swanetšego go se dira e bile ga ba ithekge ka bokgoni bja bona goba dikgopolo tša bona.

¹⁰ Nagana ka mohlala wa Noa. Ge Jehofa a be a mo laela gore a age areka, Noa ga se a ka a ithekga ka phihlelo ya gagwe. O be a se a ka a aga areka peleng. Ka gona o ile a swanelwa ke go ithekga ka Jehofa, Beibele e re a dira “tšona tšeo”—ke gore, a dira tšeo Jehofa a mo laetšego tšona. (Gen. 6:22) Mafelelo e bile afe? Noa le lapa la gagwe ba ile ba phologa Meetsefula. Le gona Noa o ile a kgona go hlokomela lapa la gagwe gabotse. Le mo lekgeng le, o ile a bota bohlale bja Modimo. O ile a ruta bana ba gagwe gabotse le go ba beela mohlala o mobotse, e lego dilo tšeo di bego di le boima kudu mehleng yeo ya pele ga Meetsefula.​—Gen. 6:5.

11. Ke ka baka la’ng batswadi ba swanetše go šoma ka thata ge ba tlwaetša bana ba bona?

¹¹ Ge e ba o le motswadi, o ka ekiša Noa bjang gomme wa dira tšeo Jehofa a go laelago tšona? O ka dira seo ka go theetša Jehofa. Dumelela Jehofa a go thuše go godiša bana ba gago a diriša Lentšu la gagwe le mokgatlo wa gagwe. Ge nako e dutše e eya, bana ba gago ba tlo go leboga gore o ba godišitše ka tsela yeo! Ngwanabo rena yo mongwe o ngwadile gore: “Ke leboga kudu tsela yeo batswadi ba ka ba nkgodišitšego ka yona. Ba ile ba dira sohle seo ba ka se kgonago go fihlelela pelo ya ka. Ga bjale ke godile moyeng ka baka la bona.” Eupša go sa šetšwe maiteko a magolo ao batswadi ba a dirago, bana ba bangwe ba no tlogela Jehofa. Lega go le bjalo, batswadi bao ba lekilego ka thata go nweletša therešo dipelong tša bana ba bona, ba ba le matswalo a mabotse. Le gona ba ka holofela gore ka letšatši le lengwe ngwana yoo a ka tla a boela go Jehofa.

12, 13. (a) Batswadi ba Bakriste ba bontšha bjang gore ba kwa Modimo ge ngwana wa bona a kgaotšwe? (b) Lapa le lengwe le ile la holega bjang ge le be le ekwa tlhahlo ya Jehofa?

 ¹² E nngwe ya diteko tše dikgolo tša go bontšha ge e ba batswadi ba ekwa Modimo ke ge ngwana wa bona a kgaolwa ka phuthegong. Nagana ka mohlala wa mma yo mongwe yoo morwedi wa gagwe yo a kgaotšwego a ilego a tloga ka gae. Mma yo o re: “Go bolela nnete ke be ke nyaka sehlare-sa-ntšhirela ka dikgatišong tša rena e le gore ke tle ke fetše nako ke na le morwedi wa ka le setlogolo sa ka.” O oketša ka gore: “Eupša monna wa ka o ile a nthuša ka botho gore ke bone gore ngwana wa rena o be a tšwile taolong, le gore re be re sa swanela go tsenatsena tayo yeo Jehofa a bego a mo nea yona.”

¹³ Ka morago ga mengwaga e itšego, morwedi wa bona o ile a bušetšwa ka phuthegong. Mma yoo o itše: “Ga bjale o a mphounela le go nngwalela melaetša gantši. Le gona o hlompha nna le monna wa ka ka gobane re ile ra kwa Modimo. Ga bjale re bagwera ba bagolo.” Ge ngwana wa gago a kgaotšwe, na o tla ‘bota Jehofa ka pelo ya gago ka moka, gomme wa se ithekge ka tlhaologanyo ya gago’? (Die. 3:5, 6) Gopola gore tayo ya Jehofa e bontšha gore bohlale bja gagwe le lerato la gagwe ga di bapišwe le selo. O se ke wa lebala gore Morwa wa gagwe o hwetše batho ka moka, go akaretša le ngwana wa gago. Modimo ga a nyake gore motho le ge e le ofe a tle a fedišwe. (Bala 2 Petro 3:9.) Lena batswadi, tšwelang pele le bota gore Jehofa o re nea tayo le tlhahlo ka tsela ya maleba, gaešita le ge go kwa tayo yeo go ka ba bohloko. Ka gona, theetšang tayo ya Modimo, le se ke la thulana le yona.

14. Re holwa bjang ke tayo yeo Jehofa a re neago yona a diriša “molaki yo a botegago”?

¹⁴ Jehofa o holofeditše go šireletša phuthego ya Bokriste, go e hlokomela le go e ruta. O dira seo ka ditsela tše difapafapanego. Ka mohlala Jehofa o kgethile morwa wa gagwe gore a hlokomele phuthego, ke moka morwa wa gagwe le yena a kgetha “molaki yo a botegago” gore a re nee dijo tša moya ka nako e swanetšego. (Luka 12:42) Ka ge dijo tše re di hwetša ka ditsela tše difapafapanego, di re nea tlhahlo e bohlokwa kudu le tayo. Ipotšiše gore: ‘Ke gakae moo polelo goba sehlogo seo se lego ka dikgatišong tša rena se ilego sa ntira gore ke dire diphetogo tseleng yeo ke naganago ka yona goba ka mokgwa wo ke itshwarago ka gona?’ Ge e ba o ile wa arabela gabotse, seo se tla go thabiša ka gobane o dumelela Jehofa gore a go bope, goba a go nee tayo, yeo e tlago go go hola.​—Die. 2:1-5.

15, 16. (a) Re ka holwa bjang ke “dimpho tšeo e lego banna” tšeo di lego ka phuthegong? (b) Re ka dira’ng gore bagolo ba ipshine ka mošomo wa bona?

¹⁵ Le gona, Kriste o neile phuthego “dimpho tšeo e lego banna”—e lego banna bao ba dišago mohlape wa Modimo. (Baef. 4:8, 11-13) Re ka holwa bjang ke dimpho tšeo tše bohlokwa e lego bagolo? Re ka ekiša tumelo ya bona le mohlala wa bona o mobotse. Le gona re ka kwa keletšo ya bona e tšwago Mangwalong. (Bala Baheberu 13:7, 17.) Gopola gore bagolo ba a re rata e bile ba nyaka gore re gole moyeng. Ka mohlala, ge ba lemoga gore re lofa diboka goba ga re sa le mafolofolo tirelong ya Jehofa, kapelapela ba tla go rena gore ba re thuše. Ba tlo re theetša gomme ka morago ba leka go re aga ka mantšu a kgothatšago le go re nea keletšo ya Mangwalo e swanetšego. Na o lebelela thušo yeo e le tsela yeo Jehofa a go bontšhago gore o a go rata?

¹⁶ Dula o gopola gore ka dinako tše dingwe bagolo ba ka thatafalelwa ke go tla go rena gore ba re nee keletšo yeo re e hlokago. Ka mohlala, nagana kamoo go ka bago go be go le boima ka gona gore moporofeta Nathane a bolele le kgoši Dafida ka morago ga gore kgoši ye e leke go uta sebe sa yona se segolo. (2 Sam. 12:1-14) Ka mo go swanago, moapostola Paulo le yena o ile a swanelwa ke go bontšha sebete e le gore a  phošolle Petro yo e bego e le yo mongwe wa baapostola ba 12. Ke ka baka la’ng a be a swanetše go mo phošolla? Ke ka gobane Petro o be a kgetholla bana babo bao e bego e se Bajuda. (Bagal. 2:11-14) Ka gona o ka dira’ng gore bagolo ba phuthegong ya geno ba se thatafalelwe ke go go nea keletšo? Ikokobetše, dira gore go be bonolo gore ba bolele le wena gomme o ba leboge ge ba go neile keletšo. Lebelela thušo ya bona e le tsela yeo Jehofa a go bontšhago gore o a go rata. Seo se ka se thuše wena o nnoši eupša se tla thuša le bona gore ba ipshine ka mošomo wa bona.

17. Kgaetšedi yo mongwe o ile a holwa bjang ke thušo e lerato yeo a e hweditšego go bagolo ba phuthego?

¹⁷ Kgaetšedi yo mongwe o kile a thatafalelwa ke go rata Jehofa ka baka la dilo tšeo di mo diragaletšego bophelong bja gagwe. O re: “Ge dilo tše di ntiragaletšego nakong e fetilego di nkimela, ke be ke tseba gore ke swanetše go bolela le bagolo. Ga sa nka ba nkgalefela goba go nnyenyefatša, eupša ba be ba nkgothatša le go mmatlafatša. Ka morago ga diboka tše dingwe le tše dingwe—go sa šetšwe gore ba be ba swaregile gakaakaa’ng—yo mongwe wa bona o be a etla go nna gomme a mpotšiša gore ke ikwa bjang. Dilo tše di ntiragaletšego nakong e fetilego di ntira gore ke ikwe ke sa swanelwe ke lerato la Modimo. Lega go le bjalo, nako le nako Jehofa o be a diriša phuthego le bagolo go nkgonthišetša gore o a nthata. Ke rapela gore ke se tsoge ke mo tlogetše.”

18, 19. Ke’ng seo se kwešago bohloko kudu go feta bohloko le ge e le bofe bjo bo tlišwago ke tayo? Nea mohlala.

¹⁸ Le ge tayo e ka ba bohloko, go na le selo se sengwe seo se kwešago bohloko le go feta—ditlamorago tša go gana tayo. (Baheb. 12:11) Ela hloko mehlala ye e mebedi, wa Kaine le wa Kgoši Tsedekia. Ka morago ga gore Modimo a bone gore Kaine o hloile ngwanabo e lego Abele e bile o nyaka le go mmolaya, o ile a lemoša Kaine ka gore: “O re’ng o tuka bogale e bile sefahlego sa gago se bontšha manyami? Na nka se go phagamiše ge o ka fetoga wa dira botse? Eupša ge e ba o sa fetoge wa dira botse, go na le sebe seo se go laletšego mojako, gomme se tloga se go kganyoga; a wena o ka se fenya?” (Gen. 4:6, 7) Kaine ga se a ka a theetša Modimo. Ka gona, sebe se ile sa mo fenya. Ruri Kaine o ile a ipakela bohloko le masetlapelo ao a bego a sa hlokagale! (Gen. 4:11, 12) Ge nkabe Kaine a ile a theetša Modimo, nkabe a se a ka a welwa ke masetlapelo ao.

¹⁹ Tsedekia, yoo e bego e le kgoši ya lefšega e bile a na le pelo e mpe, o ile a buša nakong ya ge Jerusalema e be e wetšwe ke mathata. Moporofeta Jeremia o ile a eletša Tsedekia gantšintši gore a tlogele mekgwa ya gagwe e mebe, eupša kgoši yeo e ile ya gana go kwa tayo. Go swana le Kaine, Tsedekia o ile a welwa ke masetlapelo. (Jer. 52:8-11) Ruri Jehofa ga a nyake gore re welwe ke ditlamorago tše bohloko go sa hlokagale!—Bala Jesaya 48:17, 18.

20. Ke’ng seo se tlago go diragalela batho bao ba amogelago tayo ya Modimo le bao ba e ganago?

²⁰ Lehono, batho ba bantši ba lefase ga ba iše felo ka tayo ya Modimo, e bile ba a e kwera. Eupša kgauswinyane motho yo mongwe le yo mongwe yo a ganago go kwa tayo o tlo welwa ke masetlapelo. (Die. 1:24-31) Ka gona anke re ‘theetšeng tayo gomme re hlalefe.’ Eka re ka dira seo Diema 4:13 e se bolelago ge e re: “Swarelela tayong; o se ke wa e tlogela. E lote ka gobane ke bophelo bja gago.”