Lentšu “amene” le ra gore “a go be bjalo,” goba “go bjalo.” Le tšwa lentšung la Seheberu leo le rago gore “botega,” goba “tshepega.” Ka dinako tše dingwe le be le dirišwa ge go sekwa melato. Ka morago ga gore motho a ikane, o be a re “amene” go kgonthišetša gore seo a se boletšego ke therešo le gore o tla amogela ditlamorago tša seo se boletšwego. (Num. 5:22) Ge motho yoo a be a re “amene” pele ga batho ba bangwe, o be a itlama le go feta gore o tla dira seo a se holofeditšego.—Neh. 5:13.

Tsela e kgahlišago kudu ya kamoo lentšu “amene” le dirišitšwego ka yona e begilwe go Doiteronomio kgaolo 27. Ka morago ga gore Baisiraele ba tsene Nageng ya Kholofetšo, ba ile ba swanelwa ke go bokana magareng ga Thaba ya Ebala le Thaba ya Geritsima go theetša Molao wa Moshe. Ba be ba se ba yela feela go theetša, eupša ba be ba swanetše go bolela gore ba amogetše seo Molao woo o ba laelago gore ba se dire. Ba ile ba dira se ka go araba ka gore “Amene!” ka morago ga gore go balwe ditlamorago tša go se kwe molao. (Doit. 27:15-26) Nagana ka modumo wa mantšu a banna ba diketekete, basadi le bana ba araba ka go hlaboša! (Josh. 8:30-35) Ga go pelaelo gore ga se ba ka ba lebala mantšu ao ba ilego ba a bolela letšatšing leo. Baisiraele bao ba ile ba phetha seo ba bego ba se holofeditše ka gobane Beibele e re: “Baisiraele ba tšwela pele ba hlankela Jehofa mehleng ka moka ya Joshua le mehleng ka moka ya banna ba bagolo bao ba tšwetšego pele ba phela ka morago ga Joshua, bao ba tsebago ditiro ka moka tšeo Jehofa a di diretšego Isiraele.”—Josh. 24:31.

Le gona Jesu o ile a diriša lentšu “amene” go kgonthišetša gore seo se boletšwego ke therešo, eupša o ile a dira seo ka tsela e kgethegilego. O be a sa diriše lentšu le go araba taba e itšego, eupša o be a diriša lentšu “amene” (leo le fetoletšwego e le “ruri”) ge a thoma taba e itšego go gatelela gore taba  yeo ke therešo. Ka dinako tše dingwe o be a bušeletša lentšu leo, a re “amene amene.” (Mat. 5:18; Joh. 1:51) Ka gona o ile a kgonthišetša batheetši ba gagwe gore seo a se boletšego e be e le therešo e feletšego. Jesu o be a ka bolela a kgodišegile ka gobane ke yena a neilwego matla a go phethagatša dilo ka moka tšeo Modimo a re holofeditšego tšona.—2 Bakor. 1:20; Kut. 3:14.

Baisiraele ba be ba diriša gape “amene” ge ba be ba tumiša Jehofa le go mo rapela. (Neh. 8:6; Ps. 41:13) Ge bao ba bego ba theeditše thapelo ba be ba re “amene,” ba be ba bontšha gore ba dumelelana le seo se boletšwego thapelong yeo. Ka go dira bjalo, bohle bao ba bego ba eba gona ba be ba thabela go rapela Jehofa ka tsela ye. Se ke seo se ilego sa direga ge Kgoši Dafida a be a iša Areka ya Jehofa kua Jerusalema. Monyanyeng wo o ilego wa latela ka morago ga gore a iše Areka, Dafida o ile a rapela thapelo yeo e kgomago pelo yeo e bego e le bjalo ka koša. Thapelo yeo e go 1 Dikoronika 16:8-36. Batho bao ba bego ba le gona ba ile ba kgongwa kudu ke thapelo yeo moo “ka moka [ga bona ba ilego] ba re: ‘Amene,’ gomme ba tumiša Jehofa.” Ruri ba be ba thabetše go rapela Jehofa ba le gotee!

Bakriste ba lekgolong la pele la mengwaga le bona ba ile ba diriša lentšu “amene” ge ba be ba tumiša Jehofa. Batho bao ba ngwadilego Beibele gantši ba be ba ngwala lentšu leo le mangwalong a bona. (Baroma 1:25; 16:27; 1 Pet. 4:11) Le gona puku ya Kutollo e bolela ka dibopiwa tša moya tšeo di lego legodimong tšeo di retago Jehofa ka gore: “Amene! Tumišang Jah!” (Kut. 19:1, 4) Bakriste ba lekgolong la pele la mengwaga ba be ba tlwaetše gore “amene” ka morago ga gore go rapelwe ge ba le dibokeng. (1 Bakor. 14:16) Lega go le bjalo, “amene” e be e se lentšu leo ba bego ba no le bolela.

Ka morago ga go ithuta kamoo bahlanka ba Jehofa ba kgale ba bego ba diriša lentšu “amene,” re kgona go kwešiša gore ke ka baka la eng go le bohlokwa go phetha thapelo ka gore “amene.” Ge re re “amene” mafelelong a dithapelo tša rena, re bontšha gore re tloga re kgodišegile ka seo re se bolelago.  Le gona ge re re “amene” ge go rapela motho yo mongwe, le ge re ka e bolela ka pelong, re bontšha gore re dumelelana le seo se boletšwego. Ela hloko mabaka a mangwe ao a dirago gore re re “amene” mafelelong a thapelo.

Ge motho yo mongwe a rapela re a theetša ka gobane thapelo ke karolo ya borapedi bja rena. Ka ge thapelo e le karolo ya borapedi bja rena, ge go rapelwa re swanetše go šetša tsela yeo re itshwarago ka yona e sego feela go no dumelelana le seo se boletšwego thapelong ka go no re “amene.” Ka ge re nyaka go bolela “amene” yeo e tšwago pelong mafelelong a thapelo, seo se tla re thuša go itshwara gabotse nakong ya thapelo le go theetša ka kelohloko ge go rapelwa.

Thapelo e dira gore re be le botee. Ge ngwanabo rena a rapela ka phuthegong ka moka ga rena re kwa selo se se swanago. (Dit. 1:14; 12:5) Ge re tutueletšega gore “amene” ka nako e tee le bana babo rena le dikgaetšedi, seo se dira gore re be ngatana e tee le go feta. Ge ka moka ga rena re re “amene,” go sa šetšwe gore re e bolela ka pelong goba re e bolelela godimo, seo se nea Jehofa lebaka le le kwagalago la go araba thapelo ya rena.

Re tumiša Jehofa. Jehofa o bona dilo ka moka tšeo re di dirago gore re mo hlankele. (Luka 21:2, 3) O tseba maikemišetšo a rena e bile o bona seo se lego ka dipelong tša rena. Gaešita le maemong ao re swanelwago ke go theetša diboka ka founo, re ka kgodišega gore Jehofa o a re kwa ge re re “amene.” Ge re re “amene,” re tumiša Jehofa re le gotee le bao ba lego dibokeng.

Re ka no ipotša gore ge re re “amene” Jehofa ga a re kwe, eupša ga go bjalo le gatee. Puku e nngwe ya go hlalosa mantšu a ka Beibeleng e re bahlanka ba Modimo “ba diriša lentšu le le letee [go bontšha] kgodišego, go dumelelana le seo se bolelwago le go bolela seo se lego ka dipelong tša bona.” Eka re ka kgahliša Jehofa nako le nako ge re re “amene.”—Ps. 19:14.