KA MOKA ga rena re nyaka go tsebja re le batho ba go loka. Eupša go ba motho wa go loka go boima mehleng ye re phelago go yona. Lebaka le lengwe ke gore batho ba bantši “[ga ba] rate go loka.” (2 Tim. 3:3) Ba gana go kwa melao ya Jehofa. Dilo tšeo Jehofa a rego di lokile bona ba re ke ‘tše mpe,’ gomme tšeo a rego ke tše mpe bona ba re ‘di lokile’. (Jes. 5:20) Le gona go boima go bontšha go loka ka gobane ga se ra phethagala. E bile dilo tšeo re kilego ra di dira goba tšeo di kilego tša re diragalela nakong e fetilego, di ka ba di re kgomile gampe. Ka gona, re ka ikwa go swana le Anne, * yoo a hlanketšego Jehofa ka mengwaga e mentši. Go sa šetšwe mengwaga yeo a e feditšego a hlankela Jehofa, o re: “Ke thatafalelwa ke go dumela gore nka ba motho wa go loka.”

Sa go thabiša ke gore ka moka ga rena re ka kgona go ba batho ba go loka! Go loka ke seka sa Modimo seo se enywago ke moya o mokgethwa. Le gona moya wa Modimo o matla go feta tutuetšo e mpe yeo e tšwago lefaseng le yeo e tšwago bathong bao re phelago le bona. E bile o matla go feta go se phethagale ga rena goba go feta dilo tšeo di sa kgahlišego tšeo re kilego ra di dira goba tšeo di kilego tša re diragalela nakong e fetilego. Anke ga bjale re ithuteng gore ge e le gabotse go loka ke eng, e bile re boneng gore re ka bontšha bjang seka se kutšwanyana.

Toko e hlaloswa e le go itshwara gabotse, go loka goba go se dire bobe. Motho wa go loka o dula a nyaka ditsela tša go thuša ba bangwe gomme a ba direla dilo tše dibotse

Mohlomongwe o bone batho ba bantši bao ba kilego ba direla batho ba gabo bona goba bagwera ba bona dilo tše dibotse. Eupša na seo ka bosona se bolela gore motho o lokile? Aowa! Beibele e re “ga go motho yo a lokilego yo a dirago seo se lokilego gomme a sa dire sebe.” (Mmo. 7:20) Moapostola Paulo o ile a bolela gore: “Ke tseba gore ka go nna, ke gore, nameng ya ka, ga go dule se sebotse.” (Baroma 7:18) Ka gona, ruri go a kwagala go phetha ka gore re swanetše go kgopela Jehofa gore a re thuše go bontšha go loka, ka ge e le yena Mothopo wa seka se.

Jehofa Modimo o re beela melao ya seo se lokilego. Ge Beibele e bolela ka Jehofa, e re: “O yo botse [goba O lokile] gomme o dira tše botse [goba tše di lokilego]. Nthute ditaelo tša gago.” (Ps. 119:68) Anke re boleleng ka ditsela tše pedi tšeo ka tšona re bonago botse bja Jehofa goba go loka ga gagwe, go etša ge temana ye e mo hlalosa.

Jehofa o lokile. Jehofa o lokile kudu moo e lego gore ga go kgonege gore a dire selo seo se sa lokago. Ela hloko seo se ilego sa direga ge Jehofa a botša Moshe gore: “Ke tla dira gore botho bja ka [goba go loka ga ka] ka moka bo fete pele ga sefahlego sa gago.” Jehofa o ile a bontšha Moshe letago la gagwe go akaretša le botho bja gagwe. Moshe o ile a kwa lentšu la Jehofa le mo hlalosa ka tsela ye: “Jehofa a feta pele ga sefahlego sa gagwe gomme a bolela a re: ‘Jehofa, Jehofa, Modimo yo a gaugelago le yo a šokelago, yo a diegago go galefa, yo a tletšego botho le therešo, yo a bolokelago ba dikete botho bja gagwe, yo a swarelago molato, karogo le sebe; eupša a ka se lese go tliša kotlo.’” (Ek. 33:19; 34:6, 7) Se se bontšha gabotse gore Jehofa o lokile ditseleng tša gagwe ka moka. Le ge Jesu a be a lokile go feta batho ka moka, o ile a re: “Ga go yo botse [goba yo a lokilego] ge e se o tee, yena Modimo.”—Luka 18:19.

 Mediro ya Jehofa e lokile. Dilo ka moka tšeo Jehofa a di dirago di bontšha gore o lokile. Beibele e re: “Jehofa ke yo a lokilego go bohle, kgaugelo ya gagwe e ukametše mediro ya gagwe ka moka.” (Ps. 145:9) Ka ge Jehofa a lokile e bile a se na kgethollo, o nea batho bohle bophelo e bile o ba nea dilo tšohle tšeo ba di hlokago gore ba phele. (Dit. 14:17) Le gona re bona go loka ga Jehofa ge a re lebalela. Mopsalme o ngwadile gore: “Gobane wena Jehofa o lokile e bile o ikemišeditše go lebalela.” (Ps. 86:5) Re kgodišegile gore ‘bao ba sepelago ka go hloka bosodi goba ka go botega, Jehofa a ka se ba time selo le ge e le sefe se sebotse.’—Ps. 84:11.

Jehofa o re bopile ka seswantšho sa gagwe, ka gona re ka kgona go ba batho ba lokilego le go dira dilo tše dibotse. (Gen. 1:27) Lega go le bjalo, seo se ka se direge ka mohlolo, Jehofa o re botša seo re swanetšego go se dira. O re re “[Ithute] go dira se se lokilego.” (Jes. 1:17) Eupša re ka ithuta go dira se se lokilego bjang? Ela hloko ditsela tše tharo tšeo re ka dirago seo.

Sa pele, re ka rapelela moya o mokgethwa, woo o ka re thušago gore re be bao ba lokilego pele ga mahlo a Jehofa. (Bagal. 5:22) Ee, moya wa Modimo o ka re thuša gore re rate seo se lokilego gomme re gane se se sebe. (Baroma 12:9) Ge e le gabotse, Beibele e re Jehofa a ka re “matlafatša tirong e nngwe le e nngwe e botse le lentšung le lengwe le le lengwe le lebotse.”—2 Bathes. 2:16, 17.

Sa bobedi, re swanetše go bala Lentšu la Modimo. Ge re bala Beibele, Jehofa o re “[hlama] ka mo go feletšego bakeng sa modiro o mongwe le o mongwe o mobotse.” (Die. 2:9; 2 Tim. 3:17) Le gona ge re naganišiša ka seo re se badilego ka Beibeleng, re tlo rata Modimo e bile ra rata le go dira thato ya gagwe. Dipelo tša rena di swana le letlotlo. Ge re bala Beibele e bile re naganišiša ka seo re se badilego, re bea dilo tše dibotse ka dipelong tša rena, e lego seo se swanago le go bea dilo tše bohlokwahlokwa ka letlotlong, tšeo di tlago go re thuša nakong e tlago.—Luka 6:45; Baef. 5:9.

Sa boraro, re swanetše go dira sohle seo re ka se kgonago gore re ‘ekiše se sebotse.’ (3 Joh. 11) Ka Beibeleng, go na le mehlala e mebotse yeo re ka e ekišago. Ke therešo gore mehlala e megolo ke Jehofa le Jesu. Eupša re ka ekiša le ba bangwe bao Beibele e bolelago ka bona gore ba be ba lokile. Ba babedi ba bona bao o ka naganago ka bona ke Thabitha le Baranaba. (Dit. 9:36; 11:22-24) O ka holega kudu ge o ka bala ka bona ka Beibeleng thutong ya gago ya motho ka noši. Ge o dutše o ithuta ka bona, bona seo ba ilego ba se dira go thuša batho ba bangwe. Nagana ka seo wena o ka se dirago go thuša ba bangwe ka lapeng goba ka phuthegong. Le gona, bona gore ke dilo dife tše dibotse tšeo Thabitha le Baranaba ba ilego ba di hwetša ka ge ba be ba thuša ba bangwe. Le wena o ka holega go swana le bona.

 Re ka nagana gape le ka bana babo rena le dikgaetšedi bao ba dirago dilo tše dibotse lehono. Ka mohlala, nagana ka bagolo bao ba šomago ka thata bao ba “ratago go loka.” Le gona nagana ka dikgaetšedi tšeo di botegago, tšeo di beago mohlala ka go ‘ruta se sebotse’ ka dilo tšeo di di bolelago le dilo tšeo di di dirago. (Tito 1:8; 2:3) Kgaetšedi yo a bitšwago Roslyn o re: “Mogwera wa ka o dira sohle seo a ka se kgonago go kgothatša ba bangwe ka phuthegong. O nagana ka maemo a bona gomme gantši o ba nea dimphonyana goba a ba thuša ka ditsela tše dingwe. Ke nagana gore ka nnete o lokile.”

Jehofa o kgothaletša batho ba gagwe go ‘tsoma se se lokilego.’ (Amose 5:14) Ge e ba re dira bjalo, seo se tla re thuša gore re rate dilo tšeo Jehofa a rego di lokile gomme sa re thuša go rata go dira dilo tšeo.

E le gore re be ba lokilego, ga se gore re swanetše go direla batho dilo go no ba kgahliša goba go ba rekela dilo tša go tura. Ka mohlala: E le gore sebjalo se gole, ga re se nošetše gatee ka meetse a mantši ya ba go fedile, go e na le moo re se nošetša gantšintši ka meetse a manyenyane. Ka mo go swanago, ge e ba re direla batho ba bangwe dilo tše dinyenyane eupša e le tše dintši tšeo di tlago go ba thuša, seo se tla be se bontšha gore re lokile.

Beibele e re kgothaletša gore re be bao ba ‘itokišeditšego’ le bao ba ‘loketšego’ go direla ba bangwe dilo tše dibotse, kudukudu bana babo rena. (2 Tim. 2:21; Tito 3:1) Ge e ba re šetša seo se diregago maphelong a batho ba bangwe, re tlo kgona go bona ditsela tša go ba thuša. (Baroma 15:2) Seo se ka akaretša go ba nea dilo tšeo re nago le tšona. (Die. 3:27) Ka mohlala, re ka mema motho yo a itšego gore a tle a ipshine le rena ka dijonyana goba go kgothatšana. Ge e ba re tseba gore motho yo mongwe o a babja, re ka mo romela karata, ra mo romela molaetša ka founo, ra mo etela goba ra mo founela. Ee, re ka hwetša ditsela tše dintši tša go bolela “polelo e botse ya go aga moo go nyakegago, gore e fetišetše se se holago bao ba kwago.”—Baef. 4:29.

Go swana le Jehofa, re nyaka go direla batho ka moka dilo tše dibotse. Ka gona ga se ra swanela go ba le kgethollo. Tsela e nngwe yeo re ekišago Jehofa tabeng ya go se be le kgethollo ke ka go botša batho ka moka ditaba tše dibotse. Go etša ge Jesu a re laetše, re nyaka go direla batho bohle botse, gaešita le bao ba re hloilego. (Luka 6:27) E ka se tsoge ebile phošo go direla motho dilo tše dibotse ka gobane “ga go na molao o ganetšanago le dilo tše bjalo.” (Bagal. 5:22, 23) Ge e ba re direla batho dilo tše dibotse gaešita le ge ba re swara gampe, re ka dira gore ba bangwe ba nyake go hlankela Jehofa gomme seo sa dira gore a retwe.—1 Pet. 3:16, 17.

Beibele e re: “Yo a lokilego o tla khora mafelelo a mediro ya gagwe.” (Die. 14:14) A mangwe a mafelelo ao ke afe? Ke gore ge e ba re direla batho dilo tše dibotse, gantši le bona ba tla re swara gabotse. (Die. 14:22) Gaešita le ge ba bangwe ba sa re sware gabotse, re swanetše go tšwela pele re ba direla dilo tše dibotse. Mafelelong seo se ka dira gore ba letefale goba ba fetoge gomme ba thoma go re swara gabotse.—Baroma 12:20, mongwalo wa tlase.

Ge e ba re dira dilo tše dibotse gomme re tlogela go dira dilo tše mpe, le rena ka borena re a holega. Ba bantši ba bana babo rena le dikgaetšedi ba re se se ile sa ba diragalela. Ela hloko mohlala wa Nancy. O re: “Ge ke be ke sa gola, ke be ke se na taba le batho, ke se na boitshwaro e bile ke sa hlomphe. Eupša ge ke dutše ke ithuta melao ya Modimo le go e diriša, ke ile ka thaba kudu. Ga bjale ke na le seriti e bile ke a itlhompha.”

Lebaka le legolo leo le dirago gore re leke ka gohle go ba batho ba go loka, ke gore go dira bjalo go thabiša Jehofa. Gaešita le ge batho ba sa bone seo re se dirago, Jehofa yena o a re bona. Nako le nako ge re dira dilo tše dibotse e bile re nagana ka dilo tše dibotse, o a re bona. (Baef. 6:7, 8) Mafelelong o tlo re putsa ka eng? Beibele e re: “Motho yo a lokilego o amogelwa ke Jehofa.” (Die. 12:2) Ka gona anke re tšweleng pele re bontšha toko. Jehofa o holofetša “letago, kgodišo le khutšo go yo mongwe le yo mongwe yo a dirago se sebotse.”—Baroma 2:10.