1-2. Go ya ka Ditiro 8:27-31, 35-38, ke’ng seo se ilego sa dira gore molaki wa Moethiopia a kolobetšwe?

NA O nyaka go kolobetšwa gore o be morutiwa wa Kriste? Batho ba bantši ba thušitšwe ke go rata Jehofa le go leboga seo a ba diretšego sona e le gore ba kolobetšwe. Nagana ka mohlala wa molaki yo a bego a šomela kgošigadi ya kua Ethiopia.

² Molaki yoo wa Moethiopia o ile a kolobetšwa gateetee ka morago ga gore a kwe gore Mangwalo a re o swanetše go dira bjalo. (Bala Ditiro 8:27-31, 35-38.) Ke’ng seo se ilego sa mo dira gore a nyake go kolobetšwa? Ga go pelaelo gore o be a rata Lentšu la Modimo ka gobane ge a be a le koloing ya gagwe o be a bala ditemana tše itšego ka pukung ya Jesaya. Le gona ge Filipi a be a thoma go bolela le molaki yo, molaki yoo o ile a bontšha gore o leboga seo Jesu a mo diretšego sona. Eupša ke ka baka la’ng molaki yo a be a ile Jerusalema? Ke ka gobane o be a šetše a thomile go rata Jehofa. Re tseba bjang seo? Re tseba se ka gobane o be a sa tšwa go yo rapela Jehofa kua Jerusalema. Go bonagala monna yo a be a fetošitše bodumedi bja gagwe gomme a thomile go hlankela gotee le setšhaba seo se bego se ineetše go Modimo wa therešo. Le gona ka ge a be a rata Jehofa, o ile a dira selo se sengwe se bohlokwa. O ile a kolobetšwa gomme ya ba morutiwa wa Kriste.—Mat. 28:19.

3. Ke’ng seo se ka thibelago motho go kolobetšwa? (Bona lepokisi leo le rego, “ Pelo ya Gago e Swana le Mmu wa Mohuta Mang?”)

³ Go rata Jehofa go ka go dira gore o nyake go kolobetšwa. Eupša go rata dilo tše dingwe goba batho ba bangwe go feta Jehofa go ka go thibela go kolobetšwa. Seo se ka kgonega bjang? Nagana ka mehlala ye e sego kae. O ka ba o rata bagwera  ba gago kudu goba ba geno bao e sego Dihlatse tša Jehofa gomme o tshwenyegile ka gore ge o ka kolobetšwa, ba tlo go hloya. (Mat. 10:37) Goba o ka ba o rata mekgwa yeo o tsebago gore Jehofa o e hloile, gomme o thatafalelwa ke go e tlogela. (Ps. 97:10) Goba o ka ba o godile o keteka matšatši a maikhutšo ao a tswalanago le bodumedi bja maaka. Le gona go ka ba go na le dilo tšeo di go thabišago tšeo o di gopolago ka go keteka matšatši ao. Ka baka leo, o ka thatafalelwa ke go tlogela mekgwa yeo Jehofa a e hloilego. (1 Bakor. 10:20, 21) Ka gona o swanetše go ipotšiša gore, “Ke’ng goba ke mang yo ke mo ratago kudu?”

4. Lebaka le legolo leo le tlago go go dira gore o nyake go kolobetšwa ke lefe?

⁴ Go na le dilo tše dintši tše dibotse tšeo o ka di ratago le go di leboga. Ka mohlala, le pele o ithuta le Dihlatse tša Jehofa, go ka direga gore o be o šetše o hlompha Beibele kudu. Le gona, go ka direga gore o be o šetše o rata Jesu. Ka ge gona bjale o tseba Dihlatse tša Jehofa, mohlomongwe o rata go fetša nako le tšona. Eupša ga se gore go rata dilo tšeo tše dibotse go tla dira gore o nyake go ineela go Jehofa gomme o kolobetšwe. Lebaka le legolo leo le tlago go go dira gore o nyake go kolobetšwa ke gore o rate Jehofa Modimo. Ge e ba o rata Jehofa go feta dilo ka moka, o ka se dumelele selo le ge e le sefe goba motho le ge e le ofe a go thibela go mo hlankela. Go rata Jehofa go tla go dira gore o kolobetšwe, e bile go tla go thuša gore o dule o botegela Jehofa le ka morago ga gore o kolobetšwe.

5. Re tlo bolela ka eng sehlogong se?

⁵ Jesu o itše re swanetše go rata Jehofa ka pelo ka moka, ka moya ka moka, ka monagano ka moka le ka matla ka moka. (Mar. 12:30) O ka thušwa ke’ng gore o rate Jehofa ka tsela yeo e tseneletšego? Ge e ba o naganišiša ka tsela yeo Jehofa a go ratago ka yona, seo se tla dira gore le wena o mo rate. (1 Joh. 4:19) Sehlogong se, re tlo bolela ka ditšhišinyo tše mmalwa tšeo di tlago go go thuša gore o rate Jehofa ka mo go tseneletšego. Le gona, re tlo bolela ka dilo tšeo lerato leo le tlago go go thuša gore o kgone go di dira. *

6. Go ya ka Baroma 1:20, tsela e nngwe ya go ithuta ka Jehofa ke efe?

⁶ Ithute ka Jehofa tlholong. (Bala Baroma 1:20; Kut. 4:11) Naganišiša ka dimela le diphoofolo tšeo Jehofa a di bopilego le kamoo di bontšhago gore Jehofa o bohlale kudu. Ithute le ka tsela e kgahlišago yeo mmele wa gago o bopilwego ka yona. (Ps. 139:14) Le gona, nagana ka matla a magolo ao a lego letšatšing. E bile gopola gore letšatši le balwa gare ga dinaledi tše dintšintši tšeo di lego gona. * (Jes. 40:26) Ge o dutše o naganišiša ka tlholo ya Jehofa, o tlo mo hlompha le go feta. Eupša go tseba gore Jehofa o bohlale le gore o na le matla, e no ba feela mathomo a segwera sa gago le yena. E le gore o matlafatše segwera sa gago le Jehofa, o swanetše go tseba dilo tše dingwe tše dintši ka yena.

7. O swanetše go kgodišega ka’ng e le gore o rate Jehofa kudu?

⁷ O swanetše go kgodišega gore Jehofa o go rata kudu. Na o thatafalelwa ke go dumela gore Mmopi wa legodimo le lefase o a go tseba e bile o na le taba le wena? Ge e ba o ikwa bjalo, gopola gore Jehofa “ga a kgole le yo mongwe le yo mongwe wa rena.” (Dit. 17:26-28)  O “lekola dipelo ka moka” e bile o go tshepiša gore “ge e ba o ka mo tsoma, yena o tla dira gore o mo hwetše.” (1 Dikor. 28:9) Ge e le gabotse, gona bjale o ithuta Beibele ka gobane Jehofa ‘o go gogetše go yena.’ (Jer. 31:3) Ge o tseba dilo ka moka tšeo Jehofa a go diretšego tšona, o tlo mo rata le go feta.

8. O ka bontšha bjang gore o leboga gore Jehofa o a go rata?

⁸ Tsela e nngwe ya go bontšha gore o leboga gore Jehofa o a go rata ke ka go bolela le yena ka thapelo. O tlo thoma go rata Jehofa kudu ge o mmotša ka dilo ka moka tšeo di go tshwenyago le ge o mo leboga ka dilo ka moka tšeo a go direlago tšona. Le gona segwera sa gago le Jehofa se tlo matlafala ge o dutše o bona kamoo a arabago dithapelo tša gago ka gona. (Ps. 116:1) O tla kgodišega gore o a go kwešiša. Eupša e le gore segwera sa gago le Jehofa se matlafale le go feta, o swanetše go tseba dilo tšeo a di ratago le tšeo a sa di ratego, le gore ke ka baka la eng a dira dilo ka tsela e itšego. Le gona o swanetše go tseba gore o nyaka gore o dire eng. Tsela e nnoši ya gore o tsebe seo, ke ka go ithuta Lentšu la gagwe e lego Beibele.

9. O ka bontšha bjang gore o rata Beibele?

⁹ Ithute go rata Lentšu la Modimo e lego Beibele. Ke Beibele feela yeo e tlago go go botša therešo ka Jehofa le gore ke ka baka la eng a go bopile. O ka bontšha bjang gore o rata Beibele? O ka bontšha seo ka go e bala letšatši le letšatši, ka go lokišeletša pele o tlo bala le motho yo a go rutago Beibele le ka go diriša seo o ithutago sona. (Ps. 119:97, 99; Joh. 17:17) Na o na le lenaneo la go bala Beibele letšatši le letšatši? Na o latela lenaneo leo?

10. Ke selo sefe seo se dirago gore Beibele e se swane le dipuku tše dingwe?

¹⁰ Selo se sengwe seo se dirago gore Beibele e se swane le dipuku tše dingwe ke gore e na le dipego tša batho bao ba bonego Jesu ka mahlo. Ke puku e nnoši yeo e re botšago therešo ka seo Jesu a re diretšego sona. Ge o dutše o ithuta seo Jesu a se boletšego le seo a se dirilego, o tlo nyaka go ba mogwera wa gagwe.

11. Ke’ng seo se ka go thušago gore o rate Jehofa?

¹¹ Ithute go rata Jesu, gomme seo se tla dira gore o rate Jehofa le go feta. Ke ka baka la’ng re re’alo? Ka gobane ge Jesu a be a le mo lefaseng o be a ekiša dika tša Tatagwe gabotse.  (Joh. 14:9) Ka gona, ge o dutše o ithuta dilo tše dintši ka Jesu, seo se tla go thuša go kwešiša Jehofa le go mo rata. Nagana kamoo Jesu a bego a kwela bohloko badiidi, balwetši le batho bao ba bego ba sa kgone go itwela, e lego batho bao ba bego ba nyatšwa ke batho ba bangwe. Le gona, nagana ka keletšo e botse yeo a go neago yona le kamoo bophelo bja gago bo kaonefalago ge o e diriša.—Mat. 5:1-11; 7:24-27.

12. Go ithuta ka Jesu go tla dira gore o nyake go dira’ng?

¹² O tla rata Jesu kudu ge o ka naganišiša ka sehlabelo seo a se dirilego e le gore dibe tša rena di lebalelwe. (Mat. 20:28) Ge o ka kwešiša gore Jesu o be a ikemišeditše go go hwela, seo se tla dira gore o itshole dibeng tša gago gomme o kgopele Jehofa gore a go lebalele. (Dit. 3:19, 20; 1 Joh. 1:9) Ge o rata Jesu le Jehofa, seo se tla dira gore o nyake go phela le batho bao ba ba ratago.

13. Jehofa o tla go thuša bjang ge batho ba geno ba go ganetša go mo hlankela?

¹³ Ithute go rata batho bao ba ratago Jehofa. Batho ba geno bao e sego Dihlatse tša Jehofa le batho bao e bego e le bagwera ba gago ba ka no se kwešiše gore ke ka baka la eng o nyaka go ineela go Jehofa. Le gona ba ka go ganetša go hlankela Jehofa. Jehofa o tla go thuša ka go dira gore bana beno le dikgaetšedi ka phuthegong ba be bjalo ka lapa la geno. Ge o ka dula o gwerane le bona, ba tla go rata le go go thekga. (Mar. 10:29, 30; Baheb. 10:24, 25) Ge nako e dutše e eya, batho ba geno ba ka thoma go hlankela Jehofa gotee le wena gomme ba phela ka melao ya gagwe.—1 Pet. 2:12.

14. Go ya ka Johane wa Pele 5:3, ke’ng seo o se lemogilego ka go phela ka melao ya Jehofa?

¹⁴ Ithute go hlompha melao ya Jehofa le go phela ka yona. Go ka direga gore pele o tseba Jehofa o be o no iphelela, eupša gona bjale o a bona gore go phela ka melao ya Jehofa go kaone kudu. (Ps. 1:1-3; bala 1 Johane 5:3.) Nagana ka keletšo ya ka Beibeleng yeo e newago banna, basadi, batswadi le bana. (Baef. 5:22–6:4) Ge o dutše o diriša keletšo yeo, na o bona bophelo bja lapa la gago bo kaonefala? Le gona, na go latela keletšo ya Beibele ya gore o kgethe bagwera gabotse, go go thušitše go kaonefatša bophelo bja gago? Na go phela ka melao ya Jehofa go dira gore o thabe? (Die. 13:20; 1 Bakor. 15:33) Ga go pelaelo gore o tla araba dipotšišo tše ka ee.

15. O ka dira’ng ge e ba o sa tsebe gore o ka diriša bjang melao ya motheo ya Beibele?

¹⁵ Ka dinako tše dingwe o ka no se tsebe gore o ka diriša bjang melao ya motheo ya Beibele yeo o ithutago yona. Ke ka baka leo Jehofa a dirišago mokgatlo wa gagwe go tšweletša dikgatišo tšeo di theilwego Beibeleng, tšeo di re thušago go kwešiša melao ye ya motheo e le gore re tsebe se se nepagetšego le se se fošagetšego. (Baheb. 5:13, 14) Ge o dutše o ithuta dikgatišo tše, o tla bona kamoo melao ya motheo ya Beibele e holago ka gona le kamoo o ka e dirišago ka gona, gomme seo se tla go dira gore o nyake go ba karolo ya mokgatlo wa Jehofa.

16. Jehofa o rulagantše batho ba gagwe bjang?

¹⁶ Ithute go rata mokgatlo wa Jehofa le go o thekga. Jehofa o rulagantše batho ba gagwe ka diphuthego, gomme Morwa wa gagwe Jesu, ke hlogo ya diphuthego tšeo ka moka. (Baef. 1:22; 5:23) Jesu o kgethile sehlopha se senyenyane sa bana babo rena ba batlotšwa e le gore ba etelele pele go rulaganya modiro wo a nyakago o dirwa lehono. Jesu o rile sehlopha se ke “mohlanka yo a botegago le wa temogo,” gomme se tšeela godimo modiro wo se o neilwego wa go go thuša go batamela kgauswi le Modimo le go šireletša segwera sa gago le Jehofa. (Mat. 24:45-47) Tsela e nngwe yeo mohlanka yo a botegago a bontšhago  gore o a go hlokomela ke ka go kgonthišetša gore ka phuthegong go na le bagolo bao ba tlago go go hlahla le go go šireletša. (Jes. 32:1, 2; Baheb. 13:17; 1 Pet. 5:2, 3) Bagolo ba ikemišeditše go dira sohle seo ba ka se kgonago gore ba go kgothatše le go go thuša gore segwera sa gago le Jehofa se tie. Eupša se sengwe sa dilo tše bohlokwa kudu seo bagolo ba ka go direlago sona, ke go go thuša gore o rute ba bangwe ka Jehofa.—Baef. 4:11-13.

17. Go ya ka Baroma 10:10, 13, 14, ke ka baka la’ng re ruta batho ba bangwe ka Jehofa?

¹⁷ Thuša ba bangwe gore ba ithute go rata Jehofa. Jesu o laetše balatedi ba gagwe gore ba rute batho ba bangwe ka Jehofa. (Mat. 28:19, 20) Go a kgonega gore o latele taelo ye e le go no ithola kgwara. Eupša ge segwera sa gago le Jehofa se dutše se gola, o tla ikwa go swana le moapostola Petro le moapostola Johane bao ba ilego ba re: “Re ka se ke ra tlogela go bolela ka dilo tše re di bonego le tše re di kwelego.” (Dit. 4:20) Go thuša motho yo a itšego gore a rate Jehofa go thabiša kudu. Nagana kamoo moebangedi Filipi a ilego a thaba ka gona ka morago ga gore a thuše molaki wa Moethiopia gore a kwešiše therešo yeo e lego ka Mangwalong gomme ka morago a kolobetšwa! Ge o ekiša Filipi gomme o ekwa taelo ya Jesu ya go ruta batho ka Modimo, gona o bontšha gore o nyaka go ba Hlatse ya Jehofa. (Bala Baroma 10:10, 13, 14.) Ka gona, le wena o tlo ipotšiša potšišo yeo molaki wa Moethiopia a ilego a ipotšiša yona yeo e rego: “Ke’ng seo se nthibelago go kolobetšwa?”—Dit. 8:36.

18. Re tlo araba dipotšišo dife sehlogong se se latelago?

¹⁸ O tla dira phetho e bohlokwa kudu bophelong ge o ka phetha ka gore le wena o nyaka go kolobetšwa. Ka ge go kolobetšwa e le phetho e bohlokwa kudu, o swanetše go naganišiša pele gore go kolobetšwa go bolela eng. O swanetše go tseba eng ka kolobetšo? O swanetše go dira’ng pele o kolobetšwa le ka morago ga gore o kolobetšwe? Re tlo araba dipotšišo tše sehlogong se se latelago.