Bakriste ba bangwe ba diriša thekinolotši go boledišana le ba gabo bona le Bakristegotee le bona. Eupša Bakriste bao ba beago mohlala o mobotse ba tla dula ba gopola keletšo ye: “Yo bohlale o itše go bona kotsi a ikuta; yo a se nago temogo o fetile a yo wela kotsing.”—Die. 27:12.

Re a tseba gore Jehofa o nyaka go re šireletša. Ka baka leo, ga re gwerane le bao ba bakago dikarogano, bao ba kgaotšwego goba batho bao ba tlišago dithuto tša maaka ka phuthegong. (Baroma 16:17; 1 Bakor. 5:11; 2 Joh. 10, 11) Ge re kgetha bagwera, re swanetše go dula re gopola gore batho ba bangwe ka mo phuthegong ba ka no be ba sa phele ka go dumelelana le melao ya Beibele. (2 Tim. 2:20, 21) Ka baka leo, go ka se be bonolo go kgetha bagwera gabotse ge re diriša mananeo a go romelana melaetša.

Go bohlokwa gore re be šedi ge re romelana melaetša, kudukudu ge re dira se sehlopheng sa go ba le batho ba bantši. Bakriste ba bangwe ba ile ba tsena dihlopheng tšeo tša go romelana melaetša le batho ba bantši, gomme seo ga se sa ba le mafelelo a mabotse. Na ruri go ka kgonega gore ngwanabo rena goba kgaetšedi a be šedi ka gare ga sehlopha sa batho ba bantšintši? Aowa go ka se kgonege. Ka gobane o ka se kgone go tseba gabotse gore batho bao ba lego sehlopheng seo ke bomang le gore tumelo ya bona e tiile gakaakang. Psalme 26 temana 4 e re: “Ga se ka dula le batho ba maaka; ga ke tsene mo go nago le bao ba utago seo ba lego sona.” Se se bontšha gore ke ga bohlale go romelana melaetša feela le batho bao o ba tsebago gabotse.

Le ge sehlopha seo sa go romelana melaetša e se sa batho ba bantši, Mokriste o swanetše go hlokomela nako yeo a e fetšago a romela le go bala melaetša ya sehlopheng seo le dilo tšeo go boledišanwago ka tšona moo. Ga se wa swanela go ikwa eka o a gapeletšega go araba nako le nako ge go romelwa molaetša, go sa šetšwe gore go boledišanwa ka eng goba seo se tla go jela nako e kaakang. Paulo o ile a lemoša Timotheo ka batho bao e bego e tla ba “basebi le bao ba tsenatsenago ditabeng tša batho ba bangwe.” (1 Tim. 5:13) Lehono go a kgonega go seba le go tsenatsena ditaba tša batho ba bangwe re diriša difouno.

Mokriste yo a godilego ga a sebe, ga a theetše lesebo e bile ga a utolle diphiri tša Bakriste gotee le yena. (Ps. 15:3; Die. 20:19) Ga se a swanela go feteletša ge a botša ba bangwe ditaba e bile ga se a swanela ge fetiša ditaba tšeo a sa tsebego ge e ba ke nnete. (Baef. 4:25) Wepesaete ya rena ya jw.org le mananeo a kgwedi le kgwedi a Kgašo ya JW a na le ditaba tše dintši tšeo di theilwego Beibeleng tšeo re ka di tshepago.

Bakriste ba bangwe ba diriša mananeo a go romelana melaetša go rekiša, go reka, go bapatša dilo tšeo ba di rekišago goba go fa ba bangwe mešomo. Ditaba tšeo ke tša kgwebo, ga di sepedišane le go hlankela ga rena Jehofa. Bakriste bao ba sa nyakego “go rata tšhelete,” ga ba diriše Bakristegotee le bona go dira kgwebo.—Baheb. 13:5.

Na o swanetše go diriša dihlopha tša go romelana melaetša go kgoboketša tšhelete ya go thuša bana babo rena bao ba diilago goba bao ba wetšwego ke dikotsi? Ka ge re rata bana babo rena re thabela go ba thuša le goba thekga ka goba kgothatša. (Jak. 2:15, 16) Eupša go leka go ba thuša re diriša dihlopha tša go romelana melaetša tša batho ba bantši go ka dira gore go be thata gore Ofisi ya Lekala goba phuthego e kgone go thuša bana babo rena bao. (1 Tim. 5:3, 4, 9, 10, 16) Ga go le o tee wa rena yo a nyakago gore batho ba nagane gore re filwe kabelo e kgethegilego ya go hlokomela bana babo rena.

Re nyaka go dira dilo tšeo di tlago go dira gore Modimo a retwe. (1 Bakor. 10:31) Ge e ba ke dira phetho ya go diriša mananeo a go romelana melaetša goba mekgwa e mengwe ya go boledišana ka thekinolotši ke swanetše go naganišiša ka dikotsi tšeo di ka bago gona e bile ke be šedi.