1. Ke mathata afe ao bahlanka ba Jehofa ba ka bago le ona?

NA O lebeletšane le bothata bjo bogolo? Mohlomongwe motho yo mongwe ka phuthegong o go kwešitše bohloko. (Jak. 3:2) Goba bao o šomago le bona goba o tsenago le bona sekolo ba a go kwera ka ge o hlankela Jehofa. (1 Pet. 4:3, 4) Goba yo mongwe ka lapeng la gago goba ka geno a ka leka go go ganetša o eya dibokeng goba a go ganetša o botša ba bangwe ka ditumelo tša gago. (Mat. 10:35, 36) Ge e ba bothata bja gago bo go kweša bohloko kudu, o ka ba wa nagana gore go kaone gore o tlogele go hlankela Jehofa. Eupša o ka kgodišega gore Jehofa o tla go fa bohlale bja go dira diphetho tše dibotse le matla a go kgotlelela bothata le ge e le bofe bjo o nago le bjona.

2. Go ya ka Baroma 15:4, go bala Lentšu la Modimo go ka re thuša bjang?

² Jehofa o kgonthišeditše gore mehlala ya bahlanka ba gagwe ba nakong e fetilego e ngwalwe ka Beibeleng go re thuša go bona kamoo ba ilego ba kgona go kgotlelela mathata a magolo. Ke ka baka la’ng a ile a dira seo? O dirile seo gore re kgone go ithuta mehlaleng ya bona. Jehofa o ile a laela moapostola Paulo gore a ngwale seo go Baroma 15:4. (Bala.) Go bala ka mehlala yeo go a re kgothatša e bile go dira gore re be le kholofelo. Eupša e le gore mehlala ya batho bao e re hole, ga se ra swanela go no kga ka godimo ge re bala Beibele. Re swanetše go dumelela seo re se balago se fetoša tsela yeo re naganago ka yona le kamoo re ikwago ka gona. Ka mohlala, re ka dira’ng ge re nyaka keletšo yeo e ka re thušago go lebeletšana le bothata bjo itšego? Re ka dira dilo tše tše nne: (1) Rapela, (2) Nagana gore go be go le bjang, (3) Naganišiša, (4) Diriša seo o ithutago sona. A re boneng kamoo re ka dirago e nngwe le e nngwe  ya dilo tše. * Re tlo diriša mokgwa wo wa go bala Beibele go ithuta ka bophelo bja Kgoši Dafida le bja moapostola Paulo.

3. O swanetše go dira’ng pele o ka thoma go bala Beibele, gona ka baka la’ng?

³ (1) Rapela. Pele o ka thoma go bala Beibele, kgopela Jehofa gore a go thuše go bona gore o ka holwa bjang ke seo o tlago go se bala. Ka mohlala, ge e ba o nyaka keletšo yeo e ka go thušago go lebeletšana le bothata bjo itšego, kgopela Jehofa gore a go thuše go hwetša melao ya motheo yeo e ka go thušago go dira phetho e botse.—Bafil. 4:6, 7; Jak. 1:5.

4. Ke’ng se se ka go thušago go dira gore pego yeo o e balago ka Beibeleng e phele?

⁴ (2) Nagana gore go be go le bjang. Jehofa o re file bokgoni bjo bo kgahlišago bja go kgona go bona dilo ka leihlo la kgopolo e lego go kgona go nagana gore go be go le bjang. Gore o kgone go phediša seo o se balago, leka go ipona o le ka gare ga tiragalo yeo e bile o le motho yoo o balago ka yena. Leka go bona dilo tšeo motho yo o balago ka yena a ilego a di bona le go ikwa ka tsela yeo a ka bago a ile a ikwa ka yona.

5. Go naganišiša ke go dira’ng, gona o ka naganišiša bjang?

⁵ (3) Naganišiša. Go naganišiša ke go nagana ka mo go tseneletšego ka seo o se balago le go bona gore o ka se diriša bjang. Go go thuša go kopanya dikgopolo le go kwešiša gakaone seo o se balago. Go bala Beibele ke moka wa se naganišiše go no swana le ge o lebeletše dikarolwana tša seswantšho tšeo di lego tafoleng gomme o sa di kopanye. Go naganišiša go swana le go kopanya dikarolwana tšeo tša seswantšho gore mafelelong seswantšho seo se bonagale gabotse. Gore o kgone go naganišiša, o ka ipotšiša le go araba dipotšišo tša go swana le tše: ‘Motho yo ke balago ka yena pegong ye o ile a dira eng gore a hwetše thušo? Jehofa o ile a mo thuša bjang? Nka diriša bjang dilo tšeo ke ithutilego tšona go nthuša go kgotlelela ge ke na le mathata?’

6. Ke ka baka la’ng re swanetše go diriša seo re ithutago sona?

⁶ (4) Diriša seo o ithutago sona. Jesu o ile a re ge e ba re sa diriše seo re ithutago sona re swana le monna yo a agago ntlo ya gagwe godimo ga santa. O šoma ka thata eupša o itshenyetša nako. Ka baka la’ng? Ka gobane ge diphefo le mafula di ka tla, ntlo yeo ya gagwe e tlo wa. (Mat. 7:24-27) Ka mo go swanago, le rena ge re ka rapela, ra bona ditiragalo ka leihlo la kgopolo, ra naganišiša eupša ra se diriše seo re ithutago sona, re tla be re itshenyetša nako. Ge e ba re welwa ke mathata e bile re tlaišwa, tumelo ya rena e ka se dule e tiile. Eupša ge e ba re ithuta ke moka ra diriša seo re ithutago sona, re tlo kgona go dira diphetho tše dibotse, ra ba le khutšo e bile ra ba le tumelo e tiilego. (Jes. 48:17, 18) A re boneng gore re ka diriša bjang dilo tše tše nne go ithuta se sengwe ka bophelo bja Kgoši Dafida.

7. Gona bjale re tlo ithuta ka mohlala wa mang wa ka Beibeleng?

⁷ Na mogwera wa gago goba yo mongwe wa geno o go kwešitše bohloko? Ge e ba go le bjalo, o tla thušwa ke go ithuta ka seo Kgoši Dafida a ilego a se dira ge morwa wa gagwe Abesalomo a be a mo kwešitše bohloko e bile a nyaka go itira kgoši.—2 Sam. 15:5-14, 31; 18:6-14.

8. O ka dira’ng gore Jehofa a kgone go go thuša?

⁸ (1) Rapela. Ge o badile pego yeo, rapela Jehofa gomme o mmotše kamoo seo se diragetšego se go kwešitšego bohloko ka gona. (Ps. 6:6-9) O se ke wa tšhaba go botša Jehofa kamoo  o ikwago ka gona. Mo kgopele gore a go thuše go hwetša melao ya motheo yeo o ka e dirišago go go thuša go kgotlelela bothata bjo o lebeletšanego le bjona.

9. Go diragetše’ng magareng ga Dafida le Abesalomo?

⁹ (2) Nagana gore go be go le bjang. Nagana ka dilo tšeo di ilego tša direga pegong ye, le kamoo Kgoši Dafida a ilego a ikwa ka gona. Abesalomo e lego morwa wa Dafida, o ile a fetša mengwaga e mentši a šoma ka thata gore setšhaba se mo rate. (2 Sam. 15:7) Ge Abesalomo a be a bona eka nako ya gore e be kgoši e fihlile, o ile a romela dihlodi melokong ka moka ya Isiraele gore di lokišetše setšhaba go tlo mo amogela e le kgoši. O ile a ba a kgona le go goketša yo mongwe wa bagwera ba Dafida le moeletši wa gagwe Ahithofele gore le yena a be gare ga bona. Abesalomo o ile a itsebiša gore ke yena kgoši, e bile a leka le go bolaya Dafida yoo ka nako yeo a bego a babja kudu. (Ps. 41:1-9) Dafida o ile a kwa ka seo Abesalomo a bego a nyaka go se dira, ke moka a tšhaba Jerusalema. Mafelelong madira a Abesalomo a ile a lwa le a Dafida. Ke moka madira ao a Abesalomo a ile a fenywa gomme yena a bolawa.

10. Kgoši Dafida a ka ba a ile a dira’ng?

¹⁰ Nagana kamoo Kgoši Dafida a ka bago a ile a ikwa ka gona ge dilo tše ka moka di be di mo diragalela. O be a rata Abesalomo e bile a tshepa Ahithofele. Eupša ba ile ba mo kweša bohloko kudu. Ba ile ba mo nyamiša e bile ba leka le go mmolaya. Dafida a ka ba a ile a nagana gore bagwera ba gagwe ba bangwe le bona ba thekga Abesalomo e bile a se sa ba tshepa. Le gona a ka ba a ile a nagana ka yena feela ke moka a leka go tšhaba a nnoši. Goba a ka ba a ile a no fela matla. Eupša Dafida ga se a ka a dira le setee sa dilo tšeo. Go e na le moo, o ile a fenya bothata bjoo. Ke ka baka la’ng a ile a kgona go bo fenya?

11. Dafida o ile a dira’ng ge a be a lebeletšane le maemo a thata?

¹¹ (3) Naganišiša. O ka hwetša melao efe ya motheo pegong ye ya Dafida? Ipotšiše gore: “Dafida o ile a dira’ng gore a hwetše thušo?” Dafida ga se a ka a tšhoga ke moka a dira diphetho tša bošilo kapejana. E bile ga se a ka a tshwenyega kudu moo a bego a sa tsebe le gore a dire eng. O ile a kgopela thušo go Jehofa. Le gona o ile a kgopela bagwera ba gagwe gore ba mo thuše, e bile o be a gata mogato kapejana ka morago ga gore a dire phetho. Le ge Dafida a be a kwele bohloko kudu, ga se a ka a ba le lehloyo goba a se sa tshepa ba bangwe. O ile a tšwela pele a tshepa Jehofa le bagwera ba gagwe.

12. Jehofa o ile a dira’ng go thuša Dafida?

¹² Jehofa o ile a thuša Dafida bjang? Ge o ka dira nyakišišo, o tlo kgona go bona kamoo Jehofa a ilego a nea Dafida matla ao a bego a a hloka gore a kgone go kgotlelela bothata bjo. (Ps. 3:1-8; mantšu a mathomong a kgaolo) Jehofa o ile a šegofatša diphetho tšeo Dafida a bego a di dirile. Le gona Jehofa o ile a thekga bagwera ba Dafida ge ba be ba lwela go šireletša kgoši ya bona.

13. O ka ekiša Dafida bjang ge motho yo mongwe a go kwešitše bohloko kudu? (Mateo 8:15-17)

¹³ (4) Diriša seo o ithutago sona. Ipotšiše gore: ‘Nka ekiša bjang Dafida?’ O swanetše go dira se sengwe kapejana gore o rarolle bothata bjo o nago le bjona. Go ithekgile ka maemo a gago, o ka diriša keletšo ya Jesu yeo e lego go Mateo kgaolo 18. (Bala Mateo 18:15-17.) Eupša o se ke wa dira diphetho tša kapejana o sa kwele bohloko. O swanetše go kgopela Jehofa a go thuše gore o iše maswafo fase, le gore a go nee bohlale bjo o bo hlokago gore o lebeletšane le bothata bjoo. O se ke wa tlogela go tshepa bagwera ba gago, eupša o amogele thušo yeo ba go neago yona. (Die. 17:17) Sa bohlokwa le go feta, diriša keletšo yeo Jehofa a go neago yona a diriša Lentšu la gagwe.—Die. 3:5, 6.

14. Ke maemo afe ao a ka dirago gore o nagane ka Timotheo wa Bobedi 1:12-16; 4:6-11, 17-22?

¹⁴ Na yo mongwe ka lapeng la gago goba ka geno o go ganetša go hlankela Jehofa? Goba na o dula nageng yeo e mengwe ya mediro ya rena e thibetšwego goba moo modiro wa rena o thibetšwego ka mo go feletšego? Ge e ba go le bjalo, o ka kgothatšwa ke go bala Timotheo wa Bobedi 1:12-16 le 4:6-11, 17-22. * Ge Paulo a be a ngwala ditemana tšeo o be a le kgolegong.

15. O ka kgopela Jehofa eng?

¹⁵ (1) Rapela. Pele o bala ditemana tše, botša Jehofa ka bothata bja gago le gore bo dira gore o ikwe bjang. Mmotše dilo ka moka. Ke moka o mo kgopele gore a go thuše go hwetša melao ya motheo pegong yeo ya mabapi le Paulo yeo e tlago go go thuša go lebeletšana le bothata bjo o nago le bjona.

16. Go ile gwa direga’ng ka Paulo?

¹⁶ (2) Nagana gore go be go le bjang. Ipone o le Paulo. O be a tlemilwe ka diketane a le kgolegong kua Roma. E be e se la mathomo a eya kgolegong, eupša lekgeng le o be a kgodišegile gore o be a tlo bolawa. Batho ba bangwe bao a bego a sepela le bona ba be ba mo hlanogetše, e bile o be a lapile kudu.—2 Tim. 1:15.

17. Paulo a ka ba a ile a dira’ng?

¹⁷ Paulo a ka ba a ile a dulela go nagana ka dilo tša nakong e fetilego gomme a ipotša gore ge nkabe a se a ba Mokriste yo mafolofolo nkabe a se a golegwa. A ka be a ile a galefela banna ba seleteng sa Asia bao ba ilego ba mo hlanogela e bile a se sa tshepa bagwera ba gagwe ba bangwe. Eupša Paulo ga se a ka a dira le setee sa dilo tšeo. Ke ka baka la’ng a be a kgodišegile gore bagwera ba gagwe ba bangwe ba tla dula ba mmotegela e bile Jehofa o tlo mo nea moputso?

18. Paulo o ile a dira’ng ge a be a lebeletšane le boemo bjo thata?

¹⁸ (3) Naganišiša. Ipotšiše gore: “Paulo o ile a dira’ng gore a hwetše thušo?” Le ge Paulo a be a tseba gore o kgauswi kudu le go bolawa, ga se a ka a lebala gore go bohlokwa kudu go tumiša Jehofa. O be a dula a nagana gore a ka dira eng go kgothatša ba bangwe. Le gona o be a ithekgile ka Jehofa ka go dula a mo rapela. (2 Tim. 1:3) Paulo ga se a ka a dulela go nagana ka bana babo bao ba ilego ba mo hlanogela, eupša o be a leboga bagwera ba gagwe bao ba mo thekgago le go mo thuša. Go oketša moo, Paulo o ile a dula a ithuta Lentšu la Modimo. (2 Tim. 3:16, 17; 4:13) Sa bohlokwa le go feta ke gore Paulo o be a kgodišegile gore Jehofa le Jesu ba a mo rata. O be a tseba gore ga se ba mo lahla e bile ba be ba tla mo putsa ka ge a ile a dula a botega.

19. Jehofa o ile a thuša Paulo bjang?

¹⁹ Jehofa o ile a lemoša Paulo gore o be a tla tlaišwa ka ge e le Mokriste. (Dit. 21:11-13) Jehofa o ile a thuša Paulo bjang? Jehofa o ile a araba dithapelo tša gagwe gomme a dula a mo nea matla. (2 Tim. 4:17) Paulo o ile a kgonthišetšwa gore o be a tla hwetša moputso woo a o šometšego ka thata. Le gona Jehofa o ile a diriša bagwera ba Paulo go mo nea thušo yeo a e hlokago.

20. Re ka ekiša bjang tsela yeo Paulo a ilego a bontšha tumelo go Baroma 8:38, 39?

²⁰ (4) Diriša seo o ithutago sona. Ipotšiše gore: ‘Nka ekiša bjang Paulo?’ Go swana le Paulo, le rena re swanetše go letela gore re tlo tlaišwa ka ge re hlankela Jehofa. (Mar. 10:29, 30) Gore re kgone go dula re botega le ge re tlaišwa, re swanetše go ithekga ka Jehofa ka go mo rapela le go ithuta Lentšu la gagwe ka mehla. E bile re swanetše go dula re gopola gore selo sa bohlokwa kudu seo re ka se dirago ke go tumiša Jehofa. Re ka kgodišega gore Jehofa a  ka se tsoge a re tlogetše e bile ga go na motho yo a ka dirago gore Jehofa a se sa re rata.—Bala Baroma 8:38, 39; Baheb. 13:5, 6.

21. Ke’ng seo se ilego sa thuša Aya le Hector go fenya mathata a bona?

²¹ Mehlala ya batho ba ka Beibeleng e ka re thuša go kgotlelela maemo le ge e le afe. Ka mohlala, Aya e lego mmulamadibogo yo a dulago kua Japane o re pego ya Jona e mo thušitše gore a se sa tšhaba go bolela ditaba tše dibotse mafelong a batho bohle. Hector e lego mofsa wa kua Indonesia yoo batswadi ba gagwe e sego Dihlatse tša Jehofa o re mohlala wa Ruthe o mo thušitše gore a nyake go hlankela Jehofa.

22. Ke’ng seo se ka go thušago gore o holwe kudu ke diterama tša Beibele goba ke dihlogo tša “Ekiša Tumelo ya Bona”?

²² O ka hwetša kae mehlala ya batho ba ka Beibeleng yeo e tlago go go matlafatša? Dibidio tša rena, diterama le dihlogo tša “Ekiša Tumelo ya Bona” di thuša go phediša dipego tša ka Beibeleng. * Pele o ka bogela, wa theetša goba wa bala dipego tšeo, kgopela Jehofa gore a go thuše go hwetša dintlha tše bohlokwa tšeo o ka di dirišago. Ipone o le motho yo o ithutago ka yena. Naganišiša ka dilo tšeo bahlanka ba ba botegago ba Jehofa ba ilego ba di dira le gore o ba thušitše bjang go fenya mathata a bona. Ke moka diriša seo o ithutilego sona. Leboga Jehofa ka thušo yeo a šetšego a go neile yona. O ka bontšha gore o leboga thušo yeo ka go nyaka ditsela tšeo o ka thekgago ba bangwe le go ba kgothatša.

23. Go ya ka Jesaya 41:10, 13, Jehofa o tshepiša go re direla’ng?

²³ Bophelo mo lefaseng le leo le laolwago ke Sathane ka dinako tše dingwe bo ka ba thata e bile wa hwetša re sa tsebe gore re dire eng. (2 Tim. 3:1) Eupša ga se ra swanela go tshwenyega kudu goba go boifa. Jehofa o tseba mathata a rena. O re tshepiša gore ge re hloka thušo o tla re swara ka seatla sa gagwe sa le letona. (Bala Jesaya 41:10, 13.) Re kgodišegile gore Jehofa o tla re thuša le gore Beibele e re fa matla ao re a hlokago go re thuša go kgotlelela bothata le ge e le bofe.