1. Bophelo bja gago bo be bo le bjang pele o thoma go ithuta Beibele?

 BOPHELO bja gago bo be bo le bjang pele o thoma go ithuta Beibele le Dihlatse tša Jehofa? Ba bantši ba rena ga re nyake go nagana ka seo. Re ka ba re be re phela go ya le kamoo lefase le bolelago ka gona ka se se lokilego le se se sa lokago. Ge e ba go be go le bjalo, ‘re be re se na kholofelo gomme re se na Modimo lefaseng.’ (Baef. 2:12) Eupša ka morago ga gore re ithute Beibele re ile ra fetoša maphelo a rena.

2. Go ile gwa direga’ng ka morago ga ge o ithutile Beibele?

² Ge o ithuta Beibele o ile wa bona gore o na le Tate yo a lego legodimong yo a go ratago kudu. O ile wa bona gore ge e ba o nyaka go thabiša Jehofa le go ba mohlanka wa gagwe, o swanetše go fetoša tsela yeo o phelago ka yona le yeo o naganago ka yona. O swanetše go ba o ithutile go dira dilo tšeo Jehofa a rego di lokile le go tlogela go dira dilo tše mpe.—Baef. 5:3-5.

3. Go ya ka Bakolose 3:9, 10, Jehofa o nyaka gore re dire’ng, gona re tlo ithuta’ng sehlogong se?

³ Ka ge Jehofa e le mmopi wa rena le Tatago rena wa legodimong o na le tshwanelo ya go re botša gore re swanetše go itshwara bjang. Le gona o re kgopela gore pele re kolobetšwa, re leke go “hlobola semelo sa kgale le ditlwaelo tša sona.” * (Bala Bakolose 3:9, 10.) Sehlogo se se tlo thuša bao ba nyakago go kolobetšwa go araba dipotšišo tše tše tharo:  (1) “Semelo sa kgale” ke’ng? (2) Ke ka baka la’ng Jehofa a re laela gore re se hlobole? (3) Re ka se hlobola bjang? Bao re šetšego re kolobeditšwe, sehlogo se se tlo re thuša gore re se dumelele dimelo tša kgale di boa.

4. Motho yo a laolwago ke “semelo sa kgale” o itshwara bjang?

⁴ Motho yo a laolwago ke “semelo sa kgale” o nagana le go dira dilo ka tsela yeo Jehofa a sa e ratego. A ka ba a inaganela a nnoši, a kwata ka pela, a sa leboge e bile a ikgogomoša. A ka ba a thabela go bogela diswantšho le dibidio tša batho bao ba sa aparago le tšeo di nago le bošoro. Ka ge a na le dika tše dibotse, a ka ba a itsholela dilo tše mpe tšeo a di dirago. Eupša o hloka thušo gore a fetoše tsela yeo a naganago ka yona le yeo a dirago dilo ka yona.—Bagal. 5:19-21; 2 Tim. 3:2-5.

5. Na re ka kgona go hlobola semelo sa kgale ka mo go feletšego? Hlalosa. (Dit. 3:19)

⁵ Ga se ra phethagala, ka gona ga go le o tee wa rena yoo a ka tlošago dilo tše mpe ka mo go feletšego ka dipelong tša rena le ka monaganong wa rena. Ka dinako tše dingwe re tlo dira goba ra bolela dilo tšeo re tlago go itsholela tšona. (Jer. 17:9; Jak. 3:2) Eupša ge re hlobola semelo sa kgale ga re sa itshwara go swana le kamoo lefase le itshwarago ka gona. Re fetoga batho ba bafsa.—Jes. 55:7; bala Ditiro 3:19.

6. Ke ka baka la’ng Jehofa a re kgopela gore re tlogele dilo tše mpe tšeo re di dirago le tšeo re di naganago?

⁶ Ka ge Jehofa a re rata kudu e bile a nyaka gore re thabele bophelo, o nyaka gore re tlogele dilo tše mpe tšeo re di dirago le tšeo re di naganago. (Jes. 48:17, 18) O a tseba gore bao ba dirago dilo tše mpe ba tlo kwa bohloko le go kweša ba bangwe bohloko. Le gona seo se mo kweša bohloko.

7. Go ya ka Baroma 12:1, 2, re swanetše go ikgethela go dira’ng?

⁷ Bagwera ba rena ba bangwe le ba leloko ba ka re kwera ge re leka go fetoša bophelo bja rena. (1 Pet. 4:3, 4) Ba ka re botša gore re ka ikgethela seo re nyakago go se dira le gore ga se ra swanela go theetša batho ba bangwe ba re botša gore re dire eng. Eupša bao ba sa latelego melao ya Jehofa ga se gore ba lokologile. Ge e le gabotse ba dirišwa ke lefase le le bušwago ke Sathane. (Bala Baroma 12:1, 2.)  Ka moka ga rena re swanetše go dira phetho ya ge e ba re nyaka go phela ka semelo sa kgale, seo se tutuetšwago ke lefase leo le bušwago ke Sathane, goba re nyaka go dumelela Jehofa gore a re thuše gore re phele bophelo bjo bobotse gona bjale.—Jes. 64:8.

8. Re ka thušwa ke’ng go phema go dira le go nagana ka dilo tše mpe?

⁸ Jehofa o a tseba gore go ka re tšea nako gore re pheme dilo tše mpe le go nagana ka tšona. (Ps. 103:13, 14) Eupša o re nea bohlale, matla le thekgo gore re fetoše tsela yeo re dirago dilo ka yona a diriša Beibele, moya o mokgethwa le mokgatlo wa gagwe. Re a tseba gore o šetše a go thušitše. Ga bjale a re boledišaneng ka dilo tšeo o ka di dirago tšeo di tlago go go thuša gore o hlobole semelo sa kgale le gore o swanelege go kolobetšwa.

9. Lentšu la Modimo le ka go thuša gore o dire’ng?

⁹ Diriša Beibele go itlhahloba. Lentšu la Modimo le swana le seipone, le ka go thuša go bona kamoo o naganago ka gona le go dira dilo ka gona. (Jak. 1:22-25) Motho yo a go rutago Beibele le Bakriste ba bangwe bao ba godilego moyeng ba ka go eletša. Ka mohlala ba ka diriša Mangwalo a ka Beibeleng go go thuša go bona dilo tšeo o swanetšego go di dira le mo o ka kaonefatšago gona. Ba ka go ruta go hwetša dikgatišo tšeo di theilwego Beibeleng tšeo di ka go thušago gore o kgone go tlogela go dira dilo tše di mpe. Le gona Jehofa o dula a ikemišeditše go go thuša. O a tseba gore o swanetše go go thuša bjang le gore ke eng seo se lego ka pelong ya gago. (Die. 14:10; 15:11) Ka gona dula o rapela ka mehla le go ithuta Lentšu la Modimo letšatši le lengwe le le lengwe.

10. Phihlelo ya Elie e go rutile’ng?

¹⁰ Kgodišega gore melao ya Jehofa ke e mebotse go feta melao ka moka. Re ka holwa ke dilo ka moka tšeo Jehofa a re kgopelago gore re di dire. Bao ba phelago ka melao ya gagwe ba itshwara gabotse, ba a tseba gore ba phelela eng e bile ba dula ba thabile. (Ps. 19:7-11) Eupša Bao ba sa latelego melao ya gagwe ba itsholela ditlamorago tšeo di tlišwago ke mediro ya nam. A re boneng seo Elie a se bolelago ka go gana go phela ka melao ya Modimo. O godišitšwe ke batswadi bao ba ratago Jehofa. Ge Elie a be a gola, o ile a thoma go phela le batho bao ba dirago dilo tše mpe. O ile a thoma go utswa, go diriša diokobatši le go phela bophelo bjo bo gobogilego. Elie o re o be a dula a galefile kudu e bile a rata dintwa. O re: “Ke dirile dilo ka moka tšeo ke ilego ka rutwa gore ga se ka swanela go di dira bjalo ka Mokriste.” Eupša Elie ga se a lebala seo ba ilego ba mo ruta sona ge a sa gola. O ile a thoma go ithuta Beibele gape. O ile a šoma ka thata go tlogela go dira dilo tše mpe gomme a kolobetšwa ka 2000. Go phela ka melao ya Jehofa go ile gwa mo hola bjang? Elie o re: “Gona bjale ke na le khutšo ya monagano le letswalo le le hlwekilego.” * Mohlala wo o re bontšha gore bao ba ganago melao ya Jehofa ba a ikgobatša. Lega go le bjalo, Jehofa o ikemišeditše go ba thuša gore ba fetoge.

11. Jehofa o hloile’ng?

¹¹ Ithute go hloya dilo tšeo Jehofa a di hloilego. (Ps. 97:10) Beibele e re botša gore Jehofa o hloile “mahlo a ikgantšhago, leleme la maaka le diatla tšeo di tšhollago madi a se nago molato.” (Die. 6:16, 17) “O hloile motho yo a tšhollago madi le yo a dirago tša bofora.” (Ps. 5:6) Jehofa o hloile mekgwa ye kudu mo a ilego a fediša batho ba ba sa lokago mehleng ya  Noa ka gobane ba be ba tladitše lefase ka bobe. (Gen. 6:13) Nagana ka mohlala o mongwe. Jehofa o ile a bolela a diriša moporofeta Maleaki gore o hloile bao ba hlalago basadi ba bona bao ba senago molato ka boradia. Modimo ga a ba amogele e bile ba tlo ikarabelela ka molato wa bona.—Mal. 2:13-16; Baheb. 13:4.

12. Go ‘hlaswa se kgopo’ go bolela’ng?

¹² Jehofa o nyaka re ‘hlaswa se kgopo.’ (Baroma 12:9) Lentšu ‘hlaswa’ le bolela go hloya selo ka mo go feletšego le gore se a go šišimiša. Nagana kamoo o bego o ka ikwa ka gona ge o ka kgopelwa gore o je dijo tše di bodilego. Seo se ka go šišimiša kudu. Ka tsela e swanago, go dira selo seo Jehofa a rego ke se sebe go swanetše go re šišimiša.

13. Ke ka baka la’ng re swanetše go šireletša menagano ya rena?

¹³ Šireletša tsela yeo o naganago ka yona. Monagano wa rena o kgoma tsela yeo re dirago dilo ka yona. Ke ka lebaka leo Jesu a ilego a re ruta gore re se ke ra nagana ka dilo tšeo di tlago go dira gore re feleletše re dirile sebe se segolo. (Mat. 5:21, 22, 28, 29) Ke nnete gore re nyaka go kgahliša Tatago rena wa legodimong. Ka gona go bohlokwa gore re ganetše dikgopolo tše mpe tšeo di tlago ka menaganong ya rena!

14. Tsela yeo re bolelago ka yona e bontšha gore re batho ba mohuta mang, gona re swanetše go araba dipotšišo dife?

¹⁴ Laola tsela yeo o bolelago ka yona. Jesu o itše: “Dilo tše di tšwago ka molomong di tšwa pelong.” (Mat. 15:18) Dilo tšeo re di bolelago di bontšha gore re batho ba mohuta mang. Ipotšiše dipotšišo tše: ‘Na ke gana go bolela maaka le ge go bolela nnete go ka ntsenya mathateng? Ge e ba ke na le molekane, na ke phema go raloka ka lerato le batho ba bong bjo bo fapanego le bja ka? Na ke phema go bolela dilo tšeo di tšwilego tseleng? Na nka kgona go fetola motho yo mongwe gabotse le ge ke nyamile?’ Go naganišiša ka dipotšišo tše go tlo go thuša. Re ka swantšha tsela yeo re bolelago ka yona le garane yeo e swerego morumo wa seaparo. Ge e ba o ka leka ka thata gore o tlogele polelo e gobogilego le go bolela maaka, go tlo ba bonolo gore o hlobole semelo sa kgale.

15. Go kokotela semelo sa rena sa kgale koteng go ra gore’ng?

¹⁵ Ikemišetše go dira selo se sengwe le se sengwe gore o hlobole semelo sa kgale.  Moapostola Paulo o dirišitše mohlala o mobotse kudu go re bontšha bohlokwa bja kamoo re swanetšego go fetoša tsela yeo re phelago ka yona. O ngwadile gore re swanetše go ‘kokotela’ semelo sa rena sa kgale “koteng.” (Baroma 6:6) Ka mantšu a mangwe re swanetše go latela mohlala wa Kriste. Re swanetše go bolaya mekgwa yeo Jehofa a e hloilego. Re swanetše go dira dilo tše gore re be le letswalo le le hlwekilego le kholofelo ya go tlo phela ka mo go sa felego. (Joh. 17:3; 1 Pet. 3:21) Gopola gore Jehofa a ka se fetoše melao ya gagwe gore a re thabiše. Eupša ke rena bao re swanetšego go fetoša tsela yeo re phelago ka yona le go latela melao ya gagwe.—Jes. 1:16-18; 55:9.

16. Ke ka baka la’ng o swanetše go ikemišetša go dula o lwantšhana le mafokodi a gago?

¹⁶ Dula o lwantšhana le dilo tšeo Modimo a sa di ratego. Le ka morago ga ge o kolobeditšwe o swanetše go dula o lwantšhana le dilo tšeo Modimo a sa di ratego. Nagana ka mohlala wa Maurício. Ge a be a gola o ile a thoma go ratana le batho ba bong bja gagwe. Ka morago o ile a kopana le Dihlatse tša Jehofa gomme a thoma go ithuta Beibele. O ile a fetoša tsela yeo a bego a phela ka yona ke moka a kolobetšwa ka 2002. Le ge Maurício a ile a hlankela Jehofa ka mengwaga e mentši, o re: “Ke a dumela gore ka dinako tše dingwe ke be ke swanetše go phema kganyogo ya go dira dilo tše mpe.” Ga a dumelele se se mo fetša matla eupša o re: “Ke ba le matla ge ke kgetha go thabiša Jehofa ka go se dire dilo tšeo a sa di ratego.” *

17. O kgothaditšwe ke’ng phihlelong ya Nabiha?

¹⁷ Rapela Jehofa gore a go thuše, ithekge ka moya wa gagwe o mokgethwa e sego ka matla a gago. (Bagal. 5:22; Bafil. 4:6) Re swanetše go ikemišetša go hlobola semelo sa kgale ka mo go feletšego. Nagana ka mohlala wa mosadi yo a bitšwago Nabiha. Tatagwe o ile a mo tlogela a na le mengwaga e tshela. O re: “Seo se ile sa nkweša bohloko kudu.” Ge a dutše a gola o ile a ba le sekgopi le go befelwa ka pela. O ile a rekiša diokobatši, a swarwa gomme a fetša mengwaga e itšego a le kgolegong. Dihlatse tšeo di bego di etela kgolego yeo a lego go yona di ile tša thoma go ithuta Beibele le yena. Nabiha o ile a thoma go dira diphetogo tše kgolo bophelong bja gagwe. O re. “Dilo tše dingwe go be go le bonolo go di tlogela, eupša ke be  ke thatafalelwa ke go tlogela go kgoga.” Nabiha o ile a fetša ngwaga ka moka a palelwa ke go tlogela go kgoga gomme mafelelong o ile a kgona. O kgonne bjang? O re: “Selo se segolo seo se nthušitšego kudu ke go rapela Jehofa go tšwa pelong gore a nthuše gore ke tlogele go kgoga.” Gona bjale o botša ba bangwe gore: “Ke a tshepa gore ge e ba ke kgonne go fetoša bophelo bja ka gore ke kgahliše Jehofa, motho yo mongwe le yo mongwe a ka kgona!” *

18. Go ya ka 1 Bakorinthe 6:9-11, bahlanka ba bantši ba Modimo ba ile ba kgona go dira’ng?

¹⁸ Nakong ya Bakriste ba pele, batho bao Jehofa a ba kgethilego gore ba tlo buša le Jesu Kriste ba thomile ba dira dilo tše mpe peleng. Ka mohlala, e be e le dihlotlolo, ba robala le batho ba bong bjo bo swanago le bja bona e bile e le mahodu. Moya o mokgethwa o ile wa ba thuša gore ba fetoše tsela yeo ba phelago ka yona. (Bala 1 Bakorinthe 6:9-11.) Le lehono Beibele e thušitše batho ba bantši gore ba fetoše tsela yeo ba bego ba dira dilo ka yona peleng. * Ba kgonne go tlogela go dira dilo tše mpe tšeo go bego go le thata go di tlogela. Mohlala wa bona o bontšha gore le wena o ka kgona go dira diphetogo bophelong bja gago wa ba wa swanelega gore o kolobetšwe.

19. Re tlo ithuta ka’ng sehlogong se se latelago?

¹⁹ Gore bao ba nyakago go kolobetšwa ba lahle semelo sa kgale ka mo go feletšego, ba swanetše go apara semelo se sefsa. Sehlogo se se latelago se tlo re thuša go bona gore re ka dira seo bjang le gore batho ba bangwe ba ka re thuša bjang.