1. Ke’ng seo batho ba se lemogago ge ba etla dibokeng tša rena la mathomo? (Bona le seswantšho.)

 NAGANA ka banyalani ba etla Holong ya Mmušo ya Dihlatse tša Jehofa la mathomo. Ba kgahlwa ke tsela yeo ba amogelwago ka yona le tsela yeo batho ba ka phuthegong ba bontšhanago lerato ka yona. Ge ba le tseleng ba boela gae, mosadi o re go monna wa gagwe, ‘Batho ba ba tloga ba fapana le batho ba bantši bao re kilego ra kopana le bona, ke thabetše go ba le bona.’

2. Ke ka baka la’ng ba bangwe ba ile ba nyama?

² Lerato leo le lego gona ka phuthegong ya Bokriste le a kgahliša. Ke nnete gore Dihlatse tša Jehofa ke batho bao ba sa phethagalago. (1 Joh. 1:8) Ka gona, ge re dutše re tsebana gabotse le batho ba bangwe ka phuthegong, re tlo bona diphošo tšeo ba di dirago. (Baroma 3:23) Ka manyami, ba bangwe ba dumeletše diphošo tšeo ba bangwe ba di dirago di ba nyamiša.

3. Ke’ng seo se hlaolago Bakriste ba therešo? (Johane 13:34, 35)

³ Nagana ka mantšu a sehlogo se. (Bala Johane 13:34, 35.) Ke’ng seo se hlaolago Bakriste ba therešo? Ke lerato e sego go phethagala. Hlokomela gore Jesu ga se a re: ‘Le tla tseba ka se gore le barutiwa ba ka.’ O itše: “Bohle ba tla tseba ka se gore le barutiwa ba ka.” Jesu o ile a bontšha gore ga se balatedi ba gagwe feela bao ba tlago go bona lerato leo le lego gare ga bona, eupša le batho bao ba lego ka ntle ga phuthego ya Bokriste ba tlo bona gore Bakriste ba a ratana.

4. Ke’ng seo batho ba bangwe ba ka nyakago go se tseba ka Bakriste ba therešo?

 ⁴ Batho ba bangwe bao e sego Dihlatse tša Jehofa ba ka ipotšiša gore: ‘Lerato le hlaola bjang Bakriste ba therešo? Jesu o bontšhitše baapostola ba gagwe lerato ka ditsela dife? Na go a kgonega go ekiša mohlala wa Jesu lehono?’ Go bohlokwa gore le ge re le Dihlatse tšeo di kolobeditšwego re naganišiše ka dikarabo tša dipotšišo tše. Go dira bjalo go tlo re thuša gore re bontšhane lerato le go feta, kudukudu ge re dirišana le bana babo rena bao ba sa phethagalago.—Baef. 5:2.

5. Hlalosa mantšu a Jesu ao a lego go Johane 15:12, 13.

⁵ Jesu o hlalositše gabotse gore lerato le ke le legolo e bile ke lona le tlago go hlaola balatedi ba gagwe. (Bala Johane 15:12, 13.) Gopola gore Jesu o ile a ba laela gore: “Le ratane go etša ge ke le ratile.” Seo se ra gore’ng? Jesu o ile a tšwela pele ka go bolela gore lerato le ke la moswananoši e lego leo le dirago gore Mokriste a ikemišetše go hwela Mokristegotee le yena ge e ba go hlokagala. b

6. Lentšu la Modimo le gatelela bjang bohlokwa bja go bontšha lerato?

⁶ Lentšu la Modimo le re ruta gore lerato ke seka se bohlokwa kudu. Batho ba bantši ba rata ditemana tše di latelago tša Beibele: “Modimo ke lerato.” (1 Joh. 4:8) “O rate moagišani wa gago ka mokgwa wo o ithatago ka wona.” (Mat. 22:39) “Lerato le bipa dibe tše dintši.” (1 Pet. 4:8) “Lerato le ka mohla ga le fele.” (1 Bakor. 13:8) Ditemana tše le tše dingwe di swanetše go re thuša go bona gore go bohlokwa go hlagolela dika tše tše dibotse le go di bontšha.

7. Ke ka baka la’ng Sathane a ka se kgone go dira gore batho ba bontšhane lerato la nnete?

⁷ Batho ba bantši ba ipotšiša gore ba  ka tseba bjang bodumedi bja therešo. Madumedi ka moka a bolela gore a ruta therešo eupša bjo bongwe le bjo bongwe bo bolela selo se se fapanego ka Modimo. Sathane o ile a dira gore batho ba bantši ba gakanege ka go dira gore go be le madumedi a mantši a maaka. Eupša a ka se tsoge a kgonne go dira gore batho ba lefaseng ka moka e be Bakriste bao ba bontšhanago lerato. Ke Jehofa feela yo a kgonago go dira seo. Seo se a kwagala ka gobane lerato la nnete le tšwa go yena. Ka gona, ke batho bao ba mo rapelago feela e bile ba na le moya wa gagwe o mokgethwa bao ba kgonago go bontšhana lerato leo. (1 Joh. 4:7) Ke ka baka leo Jesu a boletšego gore balatedi ba gagwe ba therešo ba tla ratana go tšwa pelong.

8-9. Batho ba bantši ba ikwa bjang ge ba bona lerato leo Dihlatse tša Jehofa di le bontšhago?

⁸ Go etša ge Jesu a boletše, batho ba bantši ba kgona go tseba balatedi ba gagwe ka gobane ba bontšhana lerato. Ka mohlala, ngwanabo rena Ian o gopola kopano ya mathomo ya selete yeo a ilego a ya go yona, yeo e bego e swaretšwe lepatlelong la kgauswi le ga gabo. Ian o be a kile a ya lepatlelong leo dikgweding tše mmalwa pele ga kopano go bogela papadi. O re: “Kopano ye e be e tloga e fapane kudu. Dihlatse di be di bontšha mekgwa e mebotse e bile di apere gabotse, gomme bana ba tšona ba be ba itshwere gabotse.” O oketša ka gore: “Godimo ga tšohle, batho ba ba be ba bonagala ba kgotsofetše e bile ba e na le khutšo—e lego selo seo ke bego ke se duma. Ga ke gopole le e tee ya dipolelo tšeo di ilego tša newa letšatšing leo, eupša ke ile ka kgahlwa kudu ke boitshwaro bja Dihlatse.” c Bana babo rena ba be ba itshwere ka tsela yeo ka gobane ba ratana. Re swara bana babo rena le dikgaetšedi ka botho le tlhompho ka gobane re a ba rata.

⁹ Ngwanabo rena John le yena o ile a ikwa ka tsela e swanago ge a be a thoma go ya dibokeng la mathomo. O re: “Ke ile ka kgahlwa ke bogwera. . . bja yo mongwe le yo mongwe moo—ba be ba bonala eka ke bakgethwa. Lerato la bona la kgonthe le ile la nkgodiša gore ke be ke hweditše bodumedi bja therešo.” d Gantši diphihlelo tša mohuta wo di bontšha gore batho ba Jehofa ke Bakriste ba therešo.

10. Ke neng moo re nago le sebaka sa go bontšha lerato la Bokriste? (Bona le mongwalo wa tlase.)

¹⁰ Ka ge re boletše mathomong a sehlogo se, badumedigotee le rena ga se ba phethagala. Ka dinako tše dingwe ba tlo bolela goba ba dira dilo tšeo di tlago go re kgopiša. e (Jak. 3:2) Ge seo se direga, re ba le sebaka sa go ba bontšha lerato la Bokriste ka dilo tšeo re di dirago le tšeo re di bolelago. Bjale potšišo ke gore, re ka ithuta’ng go mohlala wo Jesu a o beilego?—Joh. 13:15.

11. Jakobo le Johane ba bontšhitše mekgwa efe ya go se kgahliše? (Bona le seswantšho.)

¹¹ Jesu o be a se a letela gore baapostola ba gagwe e be batho bao ba phethagetšego.  Go e na le moo, ka lerato o be a ba thuša gore ba tlogele mekgwa ya bona e sa kgahlišego gore Jehofa a ba amogele. Ka nako e nngwe baapostola ba babedi e lego Jakobo le Johane ba ile ba botša mmago bona gore a ba kgopelele maemo a godimo Mmušong. (Mat. 20:20, 21) Seo Jakobo le Johane ba se dirilego se be se bontšha gore ba be ba ikgogomoša le gore ba nyaka go ba ba bohlokwa kudu go feta batho ba bangwe.—Die. 16:18.

12. Na Jakobo le Johane ke bona feela bao ba bontšhitšego mekgwa ya go se kgahliše? Hlalosa.

¹² Jakobo le Johane ga se bona feela bao ba bontšhitšego mekgwa e sa kgahlišego ka nako yeo. Ekwa gore baapostola ba bangwe ba arabetše bjang: “Eitše ge bale ba bangwe ba lesome ba ekwa ka se, ba galefela bana bao ba babedi ba motho.” (Mat. 20:24) Re ka nagana kamoo Jakobo, Johane le baapostola ba bangwe ba bego ba ngangišana ka gona e bile ba hlabana le ka mantšu. Mohlomongwe ba bangwe ba ile ba bolela gore: ‘Le nagana gore le bomang lena moo le ka kgopelago maemo a godimo Mmušong? Ga se lena feela le šomilego ka thata le Jesu. Le rena maemo ao a a re swanela!’ Go sa šetšwe seo se diragetšego, baapostola ba ile ba dumelela boemo bjo bo ba šitiša go bontšhana lerato.

13. Jesu o ile a arabela bjang ge baapostola ba gagwe ba be ba dira diphošo? (Mateo 20:25-28)

¹³ Jesu o ile a dira’ng boemong bjo? Ga  se a ka a galefa. Ga se a ka a re o yo nyaka baapostola ba bangwe ba bakaone bao ba tlago go ikokobetša go tšwa pelong le go dula ba bontšhana lerato. Eupša o ile a bolela le bona ka go se ba felele pelo. (Bala Mateo 20:25-28.) O ile a tšwela pele a ba bontšha lerato, le ge e be e se la mathomo goba la mafelelo baapostola ba gagwe ba ngangišana ka gore ke mang yo mogolo gare ga bona.—Mar. 9:34; Luka 22:24.

14. Baapostola ba Jesu ba goletše ka tlase ga maemo a mohuta mang?

¹⁴ Jesu o ile a gopola gore tsela yeo baapostola ba gagwe ba godišitšwego ka yona, ke yona e dirago gore ba itshware ka mokgwa woo ba bego ba itshwere ka wona. (Joh. 2:24, 25) Ba be ba goletše lefelong leo baetapele ba bodumedi ba bego ba rutile batho gore motho ke yo bohlokwa ge a le maemong a godimo. (Mat. 23:6.) Baetapele ba bodumedi bja Sejuda le bona ba be ba ipona ba le bohlokwa go feta batho ba bangwe. f (Luka 18:9-12) Jesu o be a kwešiša gore seo se ka kgoma tsela yeo baapostola ba itebelelago le go lebelela batho ba bangwe ka yona. (Die. 19:11) O be a se a letela gore baapostola ba gagwe ba se ke ba dira diphošo e bile o be a sa ba felele pelo. O be a tseba gore ba na le dipelo tše dibotse. Ka gona o be a sa ba felele pelo ge a be a ba thuša gore ba se sa ba le boikgogomošo le gore ba bontšhane lerato.

15. Re ka ithuta’ng go dilo tšeo di diragaletšego Jakobo le Johane?

¹⁵ Re ka ithuta dilo tše dintši go seo se diragaletšego Jakobo le Johane. Ba ile ba dira phošo ka go kgopela maemo a godimo Mmušong. Eupša baapostola ba bangwe le bona ba be ba fošitše ka go dumelela se se ba šitiša go ba le botee. Jesu o ile a bontšha baapostola ba gagwe ba 12 botho le lerato. Rena re ithuta’ng? Selo sa bohlokwa ga se dilo tšeo batho ba bangwe ba di dirago feela, eupša le tsela yeo rena re arabelago ka yona ge ba dirile diphošo e bohlokwa. Ke’ng seo se ka re thušago? Ge e ba re galefetše modumedigotee le rena, re ka ipotšiša gore: ‘Ke ka baka la’ng ke swanetše go galefišwa ke seo a ntirilego sona? Na se se ra gore ke na le bofokodi bjo itšego bjoo ke swanetšego go bo lokiša? Na go ka direga gore motho yo a nkgopišitšego o na le mathata? Le ge ke na lebaka le le kwagalago la go galefa, na nka mmontšha gore ke a mo rata gomme ka mo lebalela?’ Ge e ba re dirišana le batho ba bangwe ka lerato, re bontšha gore re balatedi ba Jesu ba nnete.

16. Ke’ng se sengwe seo re ka ithutago sona mohlaleng wa Jesu?

¹⁶ Mohlala wa Jesu o re ruta le gore re kwešiše maemo a bana babo rena le dikgaetšedi. (Die. 20:5) Re a tseba gore Jesu o be a kgona go bona seo se lego ka dipelong tša batho. Rena ga re kgone. Eupša re ka bontšha go se felele bana babo rena le dikgaetšedi pelo ge ba re direla diphošo. (Baef. 4:1, 2; 1 Pet. 3:8) Go tlo ba bonolo go dira bjalo ge e ba re tseba kamoo ba godišitšwego ka gona. A re kweng mohlala o latelago.

17. Molebeledi yo mongwe wa tikologo o ile a holega bjang ka go tseba modumedigotee le yena gabotse?

 ¹⁷ Molebeledi yo mongwe wa tikologo kua Bohlabela bja Afrika, o ile a bona eka ngwanabo rena yo mongwe ga a na botho. Molebeledi wa tikologo o ile a arabela bjang? O re: “Go e na le gore ke be kgole le ngwanabo rena yoo, ke ile ka phetha ka gore ke mo tsebe gakaone.” Seo se ile sa dira gore molebeledi wa tikologo a lemoge gore tsela yeo ngwanabo rena a godišitšwego ka yona, ke yona e dirago gore a itshware ka tsela yeo a bego a itshwere ka yona. Molebeledi wa tikologo o tšwela pele ka gore: “Ge ke se na go lemoga gore ngwanabo rena o be šoma ka thata gore a phedišane le batho ba bangwe gabotse, ke ile ka thoma go mo rata. Re ile ra ba bagwera ba bagolo.” Ruri ge re ka leka go tseba bana babo rena le dikgaetšedi gabotse, go tlo ba bonolo go ba bontšha lerato.

18. Re ka ipotšiša dipotšišo dife ge e ba modumedigotee le rena a re kgopišitše? (Diema 26:20)

¹⁸ Ka dinako tše dingwe re ka bona go le bohlokwa go boledišana le modumedigotee le rena yo a re kgopišitšego. Eupša pele re dira seo, go ka ba bohlokwa go ipotšiša dipotšišo tša go swana le gore: ‘Na ke tseba ditaba ka botlalo?’ (Die. 18:13) ‘Na o be a ikemišeditše go nkgopiša?’ (Mmo. 7:20) ‘Na nkile ka dira phošo e swanago?’ (Mmo. 7:21, 22) ‘Na ge nka ya go motho yoo, ke tlo oketša bothata bjo bo lego gona?’ (Bala Diema 26:20.) Ge re ka ipha nako ya go naganišiša ka dipotšišo tše, re ka kgona go lebala ka seo se diregilego.

19. O ikemišeditše go dira’ng?

¹⁹ Dihlatse tša Jehofa di bontšha gore ke balatedi ba nnete ba Jesu. Yo mongwe le yo mongwe wa rena o bontšha gore ke molatedi wa Jesu ka go bontšha bana babo rena le dikgaetšedi lerato go sa šetšwe go se phethagale ga bona. Ge re dira bjalo, re ka thuša batho ba bangwe go bona gore re bodumeding bja therešo ke moka le bona ba tla ba hlankela Jehofa Modimo yo lerato. Eka re ka tšwela pele re bontšhana lerato leo le hlaolago Bakriste ba therešo.