Ke ka baka la’ng monna yo a bitšwago “Semangmang” a ile a bolela gore go nyalana le Ruthe go tla “senya” bohwa bja gagwe? (Ruthe 4:1, 6)

Mehleng ya Beibele, ge monna yo a nyetšego a be a ka hlokofala a se na bana, go be go eba le dipotšišo tša go swana le gore: Go tlo direga’ng ka naga ya gagwe? Na leina la gagwe le tlo hwelela? Molao wa Moshe o be o araba dipotšišo tšeo.

Go be go direga’ng ka naga ya monna ge a be a ka hlokofala goba ge a be a ka thoma go diila ke moka a e rekiša? Ngwanabo goba wa leloko wa kgauswi o be a ka rekolla naga yeo. Se se be se tla dira gore naga e boele go lapa la gabo monna yoo.—Lef. 25:23-28; Num. 27:8-11.

Ke’ng seo se bego se ka dirwa gore leina la monna yo a hlokofetšego le se ke la hwelela? Ngwanabo monna yo a hlokofetšego o be a ka nyala mosadi wa monna yoo go swana le ge go ile gwa dirwa ka Ruthe. Monna o be a ka nyala mosadi wa ngwanabo yo a hlokofetšego, ke moka a belega ngwana yo a tlago go dira gore leina la monna yo a hlokofetšego le se ke la hwelela gomme ngwana yoo o be a hwetša le thoto ya monna yoo gore e be bohwa bja gagwe. Tokišetšo ye e lerato e be e thuša le mosadi yo a hlokofaletšwego ke monna.—Doit. 25:5-7; Mat. 22:23-28.

Nagana ka mohlala wa Naomi. O be a nyalane le monna yo a bitšwago Elimeleke. Ge Elimeleke le barwa ba gagwe ba babedi ba hlokofala, Naomi o be a se na motho yo a ka mo hlokomelago. (Ruthe 1:1-5) Ka morago ga gore a boele Juda o ile a laela ngwetši ya gagwe e lego Ruthe gore a kgopele Boase gore a rekolle naga. Boase e be e le wa leloko la kgauswi la Elimeleke. (Ruthe 2:1, 19, 20; 3:1-4) Eupša Boase o ile a lemoga gore go be go na le wa leloko la kgauswi go mo feta yoo Beibele e mmitšago “Semangmang.” Ke yena a bego a swanelega go ba morekolodi.—Ruthe 3:9, 12, 13.

Mathomong “Semangmang” o be a ikemišeditše go thuša. (Ruthe 4:1-4) O be a tseba gore o swanetše go diriša tšhelete go reka naga yeo le gore Naomi o be a tšofetše kudu gore a ka tla a belega ngwana yo e tlago go ba mojabohwa wa naga ya Elimeleke. Semangmang o be a ka hwetša naga yeo ya Elimeleke gomme ya ba e nngwe ya bohwa bja gagwe, ka gona o be a tla ba a hweditše bohwa bjo bo oketšegilego.

Eupša Semangmang o ile a fetola monagano wa gagwe wa go rekolla naga yeo ge a lemoga gore o be a swanetše go nyala le Ruthe. O itše: “Ga ke kgone go ithekollela yona ka ge ke boifa gore nka senya bohwa bja ka.” (Ruthe 4:5, 6) Ke ka baka la’ng a ile a fetola monagano wa gagwe?

Ge Semangmang a be a ka nyala Ruthe ke moka ba ba le morwa, morwa yoo e be e tlo ba mojabohwa wa naga ya Elimeleke. Se se be se tla “senya” bjang “bohwa” bja Semangmang? Beibele ga e re botše, eupša a re kweng mabaka ao a ka bago a ile a dira gore go be bjalo.

• O be a ka lahlegelwa ke tšhelete yeo a e dirišitšego go reka naga ya Elimeleke ka gore mafelelong e be e ka se be ya gagwe. Naga yeo e be e tlo ba ya morwa wa Ruthe.

• O be a tlo swanelwa ke go hlokomela Ruthe le Naomi.

• Ge Ruthe a be a ka ba le bana le Semangmang, bana bao ba be ba tlo abelana bohwa le bana bao Semangmang a šetšego a e na le bona.

• Ge e ba Semangmang a se na bana, ke moka Ruthe a ba le morwa, morwa yoo o be a tlo hwetša naga ya Elimeleke le ya Semangmang. Ngwana yo a bitšwago ka leina la Elimeleke e be e tlo ba yena a hwetšago naga. Semangmang o be a se a ikemišetša go lahlegelwa ke bohwa bja gagwe gore a thuše Naomi. O ile a ikemišetša go dumelela morekolodi yo mongwe yo a swanelegago, e lego Boase gore a tšee boikarabelo bjoo. Boase o ile a dumela go thuša ka gobane o be a nyaka gore a “tsošetše mohu leina bohweng bja gagwe.”—Ruthe 4:10.

Semangmang o be a tshwenyegile kudu ka leina la gagwe le go ipolokela bohwa. O be a inaganela a nnoši. Go e na le gore leina leo le dule le le gona, le ile la hwelela. O ile a lahlegelwa le ke tokelo e bohlokwa yeo Boase a bilego le yona. Boase e ile ya ba yo mongwe wa borakgolokhukhu ba Mesia, e lego Jesu Kriste. Go kweša bohloko gore Semangmang o ile a lahlegelwa ke tokelo ye e bohlokwa ka baka la go gana go thuša motho yo a bego a hloka thušo. (Mat. 1:5; Luka 3:23, 32)