1. Ke’ng seo batswadi ba nyakago go se direla bana ba bona?

 BATSWADI, re a tseba gore le nyaka go thuša bana ba lena gore ba tsebe Jehofa le go mo rata. Eupša re ka se kgone go bona Modimo. O ka thuša bjang bana ba gago gore ba mo tsebe le gore ba gwerane le yena?—Jak. 4:8.

2. Batswadi ba ka ruta bjang bana ba bona ka dika tša Jehofa?

² Tsela e bohlokwa ya go thuša bana ba gago gore ba gwerane le Jehofa ke ka go ithuta Beibele le bona. (2 Tim. 3:14-17) Eupša Beibele e bolela ka tsela e nngwe yeo bana ba ka ithutago ka Jehofa ka yona. Ka pukung ya Diema, tate o gopotša morwa wa gagwe gore a se ke a lebala ka dika tša Jehofa tšeo di bonagalago tlholong. (Die. 3:19-21) Re tlo boledišana ka ditsela tše dingwe tšeo batswadi ba ka dirišago tlholo go ruta bana ba bona ka Jehofa.

3. Batswadi ba swanetše go thuša bana ba bona bjang?

³ Beibele e re “dika tša gagwe tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego.” (Baroma 1:20) Batswadi, go ka direga gore le rata go fetša nako le dutše le bana ba lena ge le ile lefelong le itšego. Diriša nako yeo go thuša bana ba gago go bona gore “dilo tšeo di dirilwego” di sepedišana bjang le dika tša Modimo tšeo di kgahlišago. A re boneng gore batswadi ba ka diriša bjang mohlala wa Jesu.

4. Jesu o ile a diriša bjang tlholo ge a be a ruta barutiwa ba gagwe? (Luka 12:24, 27-30)

 ⁴ Jesu o be a diriša tlholo ge a ruta. Ka nako e nngwe o ile a kgopela barutiwa ba gagwe gore ba lebelele magokobu le matšoba ao a bitšwago lili. (Bala Luka 12:24, 27-30.) Jesu a ka ba a ile a bolela ka phoofolo e nngwe le e nngwe goba mohlare o mongwe le o mongwe, eupša o ile a kgetha go bolela ka tšeo barutiwa ba gagwe ba di tsebago gabotse. Barutiwa ba gagwe ba ka ba ba ile ba bona magokobu a fofa goba matšoba a hloga serapeng. Nagana Jesu a šupa dilo tše ge a dutše a bolela. O ile a dira’ng ka morago ga go bolela ka mehlala ye? O rutile barutiwa ba gagwe thuto e bohlokwa ka Tatago bona wa legodimong ya gore o rata go nea e bile ke yo botho. Jehofa o tlo hlokomela bahlanka ba gagwe bao ba botegago ka go ba nea dijo le diaparo go swana le ge a hlokomela magokobu le matšoba.

5. Ke mehlala efe yeo e hwetšwago tlholong yeo batswadi ba ka e dirišago go ruta bana ba bona ka Jehofa?

⁵ Batswadi, na le ka ekiša mohlala wa Jesu ge le ruta bana ba lena? O ka botša ngwana wa gago ka selo seo o se ratago seo Modimo a se bopilego, mohlomongwe phoofolo goba mohlare o itšego. Ge o dutše o dira bjalo, mmotše gore dilo tšeo di utolla eng ka Jehofa. O ka botšiša ngwana wa gago gore yena o rata phoofolo efe goba mohlare ofe. Ge o mo hlalosetša ka dika tša Jehofa o diriša selo seo Jehofa a se bopilego, seo a šetšego a se rata o tlo go theetša gabotse.

6. Re ithuta’ng mohlaleng wa mmago Christopher?

⁶ Na batswadi ba swanetše go fetša nako e telele ba dira nyakišišo ka phoofolo e itšego goba semela se itšego pele ba ka hlalosetša bana ba bona ka seo se se utollago ka dika tša Jehofa? Ga go hlokagale. Jesu ga se a fetša nako e ntši a hlalosa gore na dilili di gola bjang goba gore magokobu a ja bjang. Le ge ka dinako tše dingwe ngwana wa gago a thabela gore le bolele ka mo go tseneletšego ka tlholo, eupša ka dinako tše dingwe go no bolela ka selo se itšego goba go botšiša potšišo go ka mo dira gore a ithute. A re boneng seo ngwanabo rena yo a bitšwago Christopher a se gopolago ka nako ya ge e be e sa le ngwana, o re: “Mma o be a no bolela ganyenyane ka tlholo go re thuša gore re e thabele. Ka mohlala, ka dinako tše dingwe ge re le kgauswi le dithaba o be a ka no re, ‘bona gore dithaba tše ke tše dikgolo e bile ke tše dibotse bjang! Na se ga se bontšhe gore Jehofa o a kgahliša?’ Goba ge re le kgauswi le lewatle, o be a ka no re, ‘bona gore maphoto a a na le matla a makaakang! Na se ga se bontšhe gore Modimo o na le matla?’” Christopher o re: “Mantšu ao a manyenyane feela a be a dira gore re naganišiše.”

7. O ka ruta bjang bana ba gago gore ba naganišiše ka tlholo?

⁷ Ge bana ba gago ba dutše ba gola o ka ba ruta gore ba naganišiše ka tlholo le go ithuta ka Jehofa. O ka boledišana le bona ka selo se sengwe seo Jehofa a se bopilego ke moka wa ba botšiša gore, “selo se se re ruta’ng ka Jehofa?” O ka makala, wa ba wa thabišwa ke go kwa dilo tšeo bana ba gago ba di naganago.—Mat. 21:16.

8. Ke dibaka dife tšeo batswadi ba Baisiraele ba bego ba na le tšona ge ba be ba sepela“tseleng”?

⁸ Batswadi ba Baisiraele ba be ba laetšwe gore ba rute bana ba bona ka ditaelo tša Jehofa ge ba “sepela tseleng.” (Doit. 11:19) Go be go na le ditsela tše dintši kua Isiraele. Go be go na le diphoofolo tše di  fapafapanego, dinonyana le matšoba. Ge malapa a Baisiraele a be a sepela tseleng, batswadi ba be ba ka kgona go boledišana le bana ba bona ka dika tša Jehofa. Go ka direga gore le lena batswadi le na le dibaka tše dintši tša go diriša tlholo go ruta bana ba lena. A re boneng gore batswadi ba bangwe ba dirile seo bjang.

9. Re ithuta’ng go Punitha le Katya?

⁹ Punitha e lego mma yo a dulago toropong e nngwe kua India o re: “Ge re etela ba leloko kua magaeng, re bona seo e le sebaka sa gore re thuše bana ba rena ka go ba ruta ka tlholo ya Jehofa e kgahlišago. Ke nagana gore bana ba ka ba kwešiša tlholo gabotse ge ba le kgole le diterata tšeo di tletšego tša toropong.” Batswadi, bana ba lena ba ka se tsoge ba lebetše nako yeo ba e fetšago le lena lefelong le lebotse. Katya, e lego kgaetšedi yo a tšwago Moldova, o re: “Dilo tše dintši tšeo ke di gopolago ge ke be ke sa le ngwana ke tšeo ke ithutilego tšona ge ke be ke le magaeng. Ke leboga gore batswadi ba ka ba nthutile ke sa le yo monyenyane gore ke naganišiše ka dilo tšeo Jehofa a di bopilego le go dira gore tlholo e nthuše go bona gore ke Modimo wa mohuta mang.”

10. Batswadi ba ka dira’ng ge e ba ba sa kgone go ya lefelong leo go nago le dilo tše dintši tša tlhago? (Bala lepokisi leo le rego, “ Dilo Tšeo di ka Thušago Batswadi.”)

¹⁰ O ka ruta bjang bana ba gago le ge o palelwa ke go ya lefelong leo go nago le dilo tše dintši tša tlhago? Amol, yo le yena a dulago India, o re: “Mo ke dulago gona, batswadi ba šoma diiri tše dintši, le gona leeto la go ya magaeng le ka tura. Eupša le ka ya phakeng goba la dula ka godimo ga ntlo ke moka la lebelela tlholo le go ithuta ka dika tša Jehofa.” Ge o ka lebelela gabotse o ka bona le dilo tše dingwe tša tlholo kgauswi le legae la gago tšeo o ka bolelago ka tšona le bana ba gago. (Ps. 104:24) O ka bona dinonyana, dikhunkhwane,  mehlare le dilo tše dingwe tše dintši. Karina yo a tšwago Germany, o re: “Mma o rata matšoba, e bile o be a dula a mpontšha ona ge re dutše re sepela.” Batswadi, le ka diriša dikgatišo le dibidio tšeo di tšweletšwago ke mokgatlo wa rena tša go bolela ka tlholo go ruta bana ba lena ka Jehofa. Go sa šetšwe gore o dula kae, o ka kgona go ruta bana ba gago ka dilo tšeo Jehofa a di bopilego. Ga bjale a re boleleng ka tše dingwe tša dika tša Jehofa tšeo o ka di rutago bana ba gago.

11. Batswadi ba ka thuša bana ba bona bjang go bona gore Jehofa o a ba rata?

¹¹ Ge e ba o nyaka go thuša bana ba gago go bona gore Jehofa o a ba rata, o ka boledišana le bona ka tsela yeo diphoofolo di hlokomelago bana ba tšona ka yona. (Mat. 23:37) O ka bolela le ka dilo tše dintši tšeo re di thabelago tša tlholo. Karina yo re boletšego ka yena pejana o re: “Ge re be re sepela, mma o be a dula a nkgothaletša gore ke eme e le gore ke bone ka tsela yeo matšoba a fapanago ka yona le kamoo bobotse bja ona bo bontšhago lerato la Jehofa. Le ge go fetile mengwaga e mentši, ke sa dutše ke thabela go bona matšoba a go fapafapana, tsela yeo a bopegilego ka yona le mebala ya ona. Matšoba a a nkgopotša gore Jehofa o re rata kudu.”

12. Batswadi ba ka thuša bjang bana ba bona go bona gore Jehofa o bohlale? (Psalme 139:14) (Bona le seswantšho.)

¹² Thuša bana ba gago gore ba bone bohlale bja Modimo. Jehofa ke yo bohlale kudu go re feta. (Baroma 11:33) Ka mohlala, o ka botša ngwana wa gago kamoo meetse a fetogago maru ka gona ke moka ka morago a tloga lefelong le lengwe go ya go le lengwe. (Jobo 38:36, 37) O ka mmotša le kamoo mmele wa motho o bopilwego ka tsela e makatšago ka gona. (Bala Psalme 139:14.) Ekwa seo tate yo mongwe yo a bitšwago Vladimir a se dirilego. O itše: “Ka letšatši le lengwe morwa wa rena o ile a wa ka paesekela ke moka a gobala. Ntho ya gagwe e ile ya fola ka morago ga matšatšinyana. Nna le mosadi wa ka re ile ra mmotša gore Jehofa o bopile mmele wa rena ka tsela ya gore o kgone go iphodiša. Re ile ra mmotša le gore ga se ra ka ra bona selo sa go swana le se dilong tšeo di  dirilwego ke batho. Ka mohlala, koloi e ka se itokiše ka morago ga gore e senyege. Se se ile sa thuša morwa wa rena go bona gore Jehofa o bohlale.”

13. Batswadi ba ka thuša bana ba bona bjang go bona matla a Modimo? (Jesaya 40:26)

¹³ Jehofa o re botša gore re emiše mahlo a rena ke moka re lebelele godimo, gomme re nagane kamoo matla a gagwe a dirago gore dinaledi di dule di le maemong a tšona. (Bala Jesaya 40:26.) O ka kgothaletša bana ba gago gore ba lebelele godimo gomme ba naganišiše ka seo ba se bonago. Ekwa seo se ilego sa diragalela kgaetšedi Tingting yo a tšwago Taiwan ka nako yeo e be e sa le ngwana, o re: “Ka letšatši le lengwe mma o ile a nkiša leeto ke moka bošego ra lebelela dinaledi re sa šitišwe ke mabone. Ka nako yeo ke be ke tshwenywa ke kgateletšo ya dithaka e bile ke ipotšiša ge e ba ke tla kgona go tšwela pele ke hlankela Jehofa ka go botega. Mma o ile a nkgothaletša gore ke nagane ka matla ao Jehofa a a dirišitšego go bopa dinaledi ka moka le go nkgopotša gore o tla diriša matla ao go nthuša go lebeletšana le mathata ao ke kopanago le ona. Ka morago ga go ithuta ka tlholo leetong leo, ke ile ka ipotša gore ke nyaka go tseba Jehofa gabotse le go tšwela pele ke mo hlankela.”

14. Batswadi ba ka diriša bjang tlholo go thuša bana ba bona go bona gore re hlankela Modimo yo a thabilego?

¹⁴ Tlholo ya Jehofa e bontšha gore ke Modimo yo a thabilego e bile o nyaka gore le rena re thabe. Borasaense ba lemogile gore diphoofolo tše bjalo ka dinonyana le dihlapi di a bapala. (Jobo 40:20) Na o kile wa bona bana ba gago ba sega ge ba dutše ba lebeletše diphoofolo di bapala? Mohlomongwe ba ile ba bona katse e bapadiša wulu goba dimpšanyana di bapala mmogo. Nakong e tlago ge o bona bana ba gago ba sega ge ba lebeletše diphoofolo di bapala, ba gopotše gore re hlankela Modimo yo a thabilego.—1 Tim. 1:11.

15. Ke’ng seo se ka thušago batswadi go tseba seo bana ba bona ba se naganago? (Diema 20:5) (Bona le seswantšho.)

¹⁵ Ka dinako tše dingwe batswadi ba ka palelwa  ke go dira gore bana ba bona ba ba botše ka dilo tšeo di ba tshwenyago. Ge e ba go le bjalo, o ka swanelwa ke go šoma ka thata gore o kgone go tseba dilo tšeo di tshwenyago bana ba gago. (Bala Diema 20:5.) Batswadi ba bangwe ba hweditše gore go bonolo go dira bjalo ge ba thabela tlholo le bana ba bona. Ka baka la’ng? Ka gobane ka nako yeo ga go selo seo se šitišago bana le batswadi. Masahiko e lego tate yo a tšwago Taiwan, o boletše ka lebaka le lengwe, o re: “Gantši bana ba rena ba ikwa ba lokologile ge re fetša nako re na le bona ge re ile go bethwa ke moya, mohlomongwe ge re ile go namela dithaba goba re sepela kgauswi le lewatle. Ka nako yeo go bonolo go ba dira gore ba bolele ke moka ra tseba gore ba nagana ka eng. Katya yo re boletšego ka yena pejana, o re: “Mma o be a rata go nkiša phakeng e botse ge ke etšwa sekolong. Ge re fihla moo ke be ke iketla ke moka ke kgona go mmotša ka dilo tšeo di bego di direga sekolong le ka dilo tše dingwe tšeo di ntshwenyago.”

16. Malapa a ka dira’ng gore a thabele go bona tlholo ya Jehofa?

¹⁶ Tlholo ya Jehofa e ka thuša malapa gore a iketle mmogo e bile a thabe, le gona se se ka dira gore a ratane le go feta. Beibele e re go na le “nako ya go sega” le “nako ya go bina.” (Mmo. 3:1, 4.) Jehofa o re diretše mafelo a mantši mo lefaseng gore re kgone go thabela dilo tšeo re di ratago. Malapa a mantši a thabela go ba mmogo diphakeng, dithabeng goba lewatleng. Bana ba bangwe ba rata go bapala phakeng, go bogela diphoofolo goba go rutha. Ruri re ka kgona go dula mmogo ke moka ra thabela go bona dilo tšeo Jehofa a di bopilego!

17. Ke ka baka la’ng batswadi ba swanetše go thuša bana ba bona go thabela dilo tšeo Modimo a di bopilego?

¹⁷ Lefaseng le lefsa la Modimo, bana le batswadi ba tlo thabela tlholo ya Jehofa ka mo go feletšego. Ka nako yeo re ka se be le lebaka la go tšhaba diphoofolo gomme le tšona di ka se re tšhabe. (Jes. 11:6-9) Re tlo thabela dilo tše Modimo a di bopilego ka mo go sa felego. (Ps. 22:26) Batswadi ba swanetše go thuša bana ba bona go thabela tlholo e sa le gona bjale. Ge o diriša tlholo go ruta bana ba gago ka Jehofa, ba ka tla ba dumelelana le mantšu a Kgoši Dafida ao a rego: “Wena Jehofa, ga go na mediro e swanago le ya gago.”—Ps. 86:8.