1-2. Gantši go direga’ng ge batho ba kolobetšwa, gona o swanetše go nagana ka’ng?

 NA O kile wa bona sehlopha sa batho bao ba yago go kolobetšwa? O kwa ba araba go tšwa pelong ge ba botšišwa dipotšišo tše pedi tša pele ga ge ba kolobetšwa. Ka nako yeo o bona ba gabo bona le bagwera ba bona ba ikgantšha ka bona. Ge ba etšwa ka meetseng o bona batho ba phaphatha matsogo e bile barutwana bao ba thabile. Mo e ka bago beke e nngwe le e nngwe, batho ba bantši ba ineela gore e be Dihlatse tša Jehofa Modimo tšeo di kolobeditšwego.

² Go thwe’ng ka wena? Ge e ba o nyaka go kolobetšwa o yo bohlokwa kudu mo lefaseng le le lebe ka gobane o ‘tsoma Jehofa.’ (Ps. 14:1, 2) Sehlogo se se ngwaletšwe motho yo mongwe le yo mongwe, go sa šetšwe gore o yo mogolo goba o yo monyenyane. Eupša le rena bao re šetšego re kolobeditšwe, re nyaka go dula re hlankela Jehofa go ya go ile. A re boneng a mangwe a mabaka a mararo ao a dirago gore re hlankele Jehofa.

3. Ke ka baka la’ng bahlanka ba Jehofa ba rata therešo le go loka? (Psalme 119:128, 163)

³ Jehofa o laetše batho ba gagwe gore ba “rate therešo.” (Sak. 8:19) Jes o ile a kgothaletša balatedi ba gagwe gore ba phegelele toko. (Mat. 5:6) Se se ra gore motho o swanetše go kganyoga go dira seo se lokilego le seo se hlwekilego pele ga Jehofa. Na o rata therešo le go loka? Re kgodišegile gore o a di rata. O hloile maaka le dilo ka moka tšeo di fošagetšego le tše mpe. (Bala Psalme 119:128, 163.) Motho yo a bolelago maaka o ekiša Sathane e lego mmuši wa lefase le.  (Joh. 8:44; 12:31) Sathane o dula a ikemišeditše go senya leina la Jehofa Modimo le lekgethwa. Sathane o be a dutše a bolela maaka ka Modimo wa rena ga e sa le go tloga ge batho ba be ba thoma go se kwe Modimo tšhemong ya Edene. O leka go dira gore batho ba nagane gore Jehofa ga a na taba le bona, ke moetapele yo a se nago nnete le gore o ba tima dilo tše dibotse. (Gen. 3:1, 4, 5) Maaka ao a Sathane a dira gore batho ba nagane gore Jehofa Modimo ke yo mobe. Ge e ba batho ba kgetha go se ‘rate therešo,’ Sathane a ka dira gore ba dire dilo ka moka tša go se loke le tše mpe.—Baroma 1:25-31.

4. Jehofa o bontšhitše bjang gore ke “Modimo wa therešo”? (Bona le seswantšho.)

⁴ Jehofa ke “Modimo wa therešo,” e bile o dula a e ruta bao ba mo ratago. (Ps. 31:5) Ge a dira bjalo, o ba thuša gore Sathane a se ke a hlwa a ba fora ka maaka ao a a bolelago. Le gona, Jehofa o ruta bahlanka ba gagwe gore e be bao ba botegago le bao ba lokilego. Se se dira gore ba itlhomphe e bile ba be le khutšo ya monagano. (Die. 13:5, 6) Na le wena o šetše o bone kamoo a go thušago ka gona ge o dutše o ithuta Beibele? O ithutile gore ditsela tša Jehofa di hola batho ka moka go akaretša le wena. (Ps. 77:13) O nyaka go dira dilo tšeo Jehofa a rego di lokile. (Mat. 6:33) O nyaka go ruta batho therešo le go ba thuša go bona gore dilo tšeo Sathane a di bolelago ka Modimo wa rena ke maaka. O ka dira seo bjang?

5. O ka dira’ng go bontšha gore o phelela therešo le go dira seo se lokilego?

⁵ O ka phela ka tsela yeo e tlogago e bontšha gore o gana maaka a Sathane e bile o phelela therešo, o kgetha Jehofa gore e be Mmuši wa gago e bile o nyaka go dira seo a rego se lokile. O ka dira seo bjang? O ka dira seo ka go rapela Jehofa, wa mmotša gore o nyaka go ineela go yena ke moka wa bontšha seo phatlalatša ka go kolobetšwa. Go rata therešo le go loka ke gona go dirago gore re feleletše re kolobeditšwe.

6. Psalme 45:4 e go nea mabaka afe a gore o rate Jesu Kriste?

⁶ Ke ka baka la’ng o rata Jesu Kriste? Ekwa a mangwe a mabaka ao a kwagalago ao re a hwetšago go Psalme 45:4. (Bala.) Jesu o rata therešo, boikokobetšo le go loka. Ge e ba o rata therešo le go loka, seo se bolela gore o  rata le Jesu Kriste. Nagana kamoo Jesu a ilego a bontšha sebete ka gore a lwele therešo le go loka. (Joh. 18:37) Jesu o re ruta bjang gore re be le boikokobetšo?

7. Ke’ng seo o se ratago ka boikokobetšo bja Jesu?

⁷ Jesu o re beetše mohlala wa go bontšha boikokobetšo. Ka mohlala, o iša letago ka moka go Tatagwe e sego go yena. (Mar. 10:17, 18; Joh. 5:19) Tsela yeo Jesu a ikokobeditšego ka yona e dira gore o ikwe bjang? Ruri e dira gore o rate Morwa wa Modimo le go mo latela. Ke ka baka la’ng Jesu a na le boikokobetšo? Ka gobane o rata Tatagwe yo a nago le boikokobetšo e bile o a mo ekiša. (Ps. 18:35; Baheb. 1:3) Na o rata Jesu yo a ekišago dika tša Jehofa tše dibotse?

8. Ke ka baka la’ng re thabela gore Jesu ke Kgoši ya rena?

⁸ Re thabela gore Jesu ke Kgoši ya rena ka gobane o na le tshwanelo ya go buša. Jehofa o tlwaeditše Morwa wa gagwe ka boyena, ke moka a mo kgetha gore a buše. (Jes. 50:4, 5) Nagana le kamoo Jesu a ilego a bontšha batho lerato ka gona. (Joh. 13:1) O swanetše go rata Jesu ka ge e le Kgoši ya gago. O boletše gore bao ba mo ratago go tšwa pelong, e lego bao a ba bitšago bagwera ba gagwe, ba bontšha gore ba a mo rata ka gore ba kwe ditaelo tša gagwe. (Joh. 14:15; 15:14, 15) E tloga e le tokelo e kgolo go ba mogwera wa Morwa wa Jehofa.

9. Kolobetšo ya Bakriste e swana bjang le ya Jesu?

⁹ E nngwe ya ditaelo tšeo Jesu a di neilego balatedi ba gagwe ke gore ba kolobetšwe. (Mat. 28:19, 20) O re beetše mohlala. Kolobetšo ya Jesu e fapana le ya balatedi ba gagwe ka ditsela tše itšego. (Bona lepokisi leo le rego, “ Kamoo Kolobetšo ya Jesu le ya Balatedi ba Gagwe di Fapanago ka Gona.”) Eupša di swana ka ditsela tše itšego. Ge Jesu a be a kolobetšwa, o be a bontšha gore o dira thato ya Tatagwe. (Baheb. 10:7) Ka mo go swanago, ge balatedi ba Jesu ba kolobetšwa ba bontšha batho gore ba ineetše go Jehofa Modimo. Go tloga ka nako yeo, selo se bohlokwa maphelong a bona ke gore ba dire thato ya Modimo e sego ya bona. Ba latela mohlala wa Mong wa bona.

10. Ke ka baka la’ng go rata Jesu go go dira gore o nyake go kolobetšwa?

¹⁰ O dumela gore Jesu ke Morwa wa Jehofa a nnoši e bile o mo kgethile gore e be Kgoši yeo e re bušago. O a tseba gore Jesu o na le boikokobetšo e bile o ekiša Tatagwe. O ithutile gore o ile a fepa bao ba bego ba swerwe ke tlala, a kgothatša bao ba bego ba nyamile, a fodiša le bao ba bego ba babja. (Mat. 14:14-21) O bona le kamoo a etelelago pele phuthego ya gagwe ka gona lehono. (Mat. 23:10) E bile o a tseba le gore o tlo dira ka mo go oketšegilego nakong e tlago ge e tla be e le Kgoši ya Mmušo wa Modimo. O ka bontšha bjang gore o rata Jesu? Ka go latela mohlala wa gagwe. (Joh. 14:21) O ka thoma ka go ineela go Jehofa le go kolobetšwa.

11. Lebaka le legolo la gore o kolobetšwe ke lefe, gona ka baka la’ng?

¹¹ Lebaka le legolo la gore o kolobetšwe ke lefe? Jesu o bontšhitše gore taelo e kgolo go ditaelo tša Modimo ke gore: “O rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Mar. 12:30) Na mantšu a a bontšha kamoo o ratago Modimo ka gona?

12. Ke ka baka la’ng o rata Jehofa? (Bona le seswantšho.)

¹² Go na le mabaka a mantši a go dira gore o rate Jehofa. Ka mohlala, o ithutile gore ke  “mothopo wa bophelo” le gore ke Monei wa “mpho e nngwe le e nngwe e botse le neo e nngwe le e nngwe e phethagetšego.” (Ps. 36:9; Jak. 1:17) Dilo ka moka tšeo o di thabelago di tšwa go Modimo wa rena yo lerato.

13. Ke’ng seo se dirago gore topollo e be mpho e botse kudu?

¹³ Topollo ke mpho e botse kudu yeo Jehofa a re neilego yona. Ke ka baka la’ng re re’alo? Nagana ka segwera seo se lego gona magareng ga Jehofa le Morwa wa gagwe. Jesu o itše: “Tate o a nthata” e bile “Ke rata Tate.” (Joh. 10:17; 14:31) Segwera sa bona se be se dutše se gola ge ba be ba phela gotee ka mengwaga e dibilione. (Die. 8:22, 23, 30) Nagana ka bohloko bjoo Modimo a ilego a bo kwa ge a be a dumelela Morwa wa gagwe gore a tlaišwe le go bolawa. Jehofa o rata batho, go akaretša le wena moo a ilego a dumelela Morwa wa gagwe gore e be sehlabelo gore re tle re kgone go hwetša bophelo bjo bo sa felego. (Joh. 3:16; Bagal. 2:20) Le ke lebaka le legolo la gore re rate Modimo.

14. Ke selo sefe se bohlokwa seo o ka se dirago bophelong?

¹⁴ O tšwela pele o rata Jehofa kudu ka gobane o ithuta dilo tše dintši ka yena. Re kgodišegile gore o nyaka go ba mogwera wa Modimo gona bjale le ka mo go sa felego. Ruri o ka kgona. O go kgothaletša gore o thabiše  pelo ya gagwe. (Die. 23:15, 16) O ka kgona go dira seo ka mediro e sego ka go bolela feela. Tsela yeo o phelago ka yona e tla bontšha gore o rata Jehofa. (1 Joh. 5:3) Go phela ka tsela yeo e kgahlišago Jehofa ke selo se bohlokwa seo o ka se dirago.

15. O ka bontšha bjang gore o rata Jehofa?

¹⁵ O ka bontšha bjang gore o rata Jehofa? O ka thoma ka go rapela go tšwa pelong gomme wa ineela go Modimo a nnoši wa therešo. (Ps. 40:8) Ke moka wa bontšha boineelo bjoo phatlalatša ka go kolobetšwa. Ka ge re boletše mathomong a sehlogo se, go kolobetšwa ke selo se bohlokwa le seo se thabišago seo o ka se dirago bophelong bja gago. Go tloga ka nako yeo o thoma go phelela Jehofa. (Baroma 14:8; 1 Pet. 4:1, 2) Yeo e tloga e le kgato e kgolo kudu yeo o ka e tšeago bophelong bja gago e bile e tlo go thuša gore o phele bophelo bjo bo botse kudu. Bjang?

16. Psalme 41:12 e bontšha bjang gore Jehofa o tlo putsa bao ba mo hlankelago?

¹⁶ Jehofa ke yo botho go feta batho ka moka. Ge o dira maiteko a gore o mo nee se sengwe o tlo dula a go okeletša. (Mar. 10:29, 30) O tlo go nea bophelo bjo bo kgahlišago, bjo bo kgotsofatšago le bjo bo nago le morero gona mo lefaseng le lebe. Ao e no ba mathomomayo. Ga se wa swanela go no kolobetšwa ke moka gwa felela moo. Ka morago ga go kolobetšwa, o hwetša sebaka sa go hlankela Tatago yo lerato ka mo go sa felego. Tsela yeo le ratanago ka yona e tlo dula e gola e bile o tlo hwetša sebaka sa go phela ka mo go sa felego.—Bala Psalme 41:12.   

17. Ke mpho efe yeo o ka e neago Jehofa yeo a se nago yona?

¹⁷ Ge o kolobetšwa o ba le sebaka sa go nea Tatago wa legodimong mpho e bohlokwa kudu. O go neile dilo ka moka tše dibotse tšeo o di thabelago bophelong bja gago. O ka kgona go nea Mong wa legodimo le lefase selo seo a se nago sona, e lego go ikemišetša go mo hlankela ka pelo ya gago ka moka. (Jobo 1:8; 41:11; Die. 27:11) Ruri ye ke tsela e kaone kudu ya go phela. Go rata  Jehofa ke gona go dirago gore o nyake go kolobetšwa.

18. O ka ipotšiša dipotšišo dife?

¹⁸ O ka araba bjang potšišo e rego, na o tlo kolobetšwa? Ke wena o tsebago karabo. Eupša go ka ba kaone ge o ka ipotšiša gore, ke ‘letetše’ng?’ (Dit. 8:36) Gopola mabaka a mararo ao re boletšego ka ona. La pele ke gore o rata therešo le go loka. Ipotšiše gore, ‘na ke duma go bona ka letšatši le lengwe batho ka moka ba rata therešo le go dira dilo tša go loka?’ La bobedi ke gore o rata Jesu Kriste. Ipotšiše gore, ‘Na ke nyaka gore Morwa wa Modimo e be Kgoši ya ka e bile ke latele mohlala wa gagwe?’ Lebaka la boraro e bile e le la bohlokwa kudu ke gore o rata Jehofa. Ipotšiše gore, ‘Na ke nyaka go thabiša pelo ya Jehofa le go mo hlankela ka ge e le Modimo wa ka?’ Ge e ba karabo ya gago go dipotšišo tše e le ee, gona ke ka baka la’ng o sa kolobetšwe gona bjale.—Dit. 16:33.

19. Ke ka baka la’ng o se wa swanela go diega go kolobetšwa? Nea mohlala. (Johane 4:34)

¹⁹ Ge e ba o se wa kgodišega gore o swanetše go kolobetšwa, nagana ka mohlala wo Jesu a ilego a o diriša. (Bala Johane 4:34.) Jesu o ile a swantšha go dira thato ya Tatagwe le dijo. Ka baka la’ng? Ka gobane dijo di na le mohola. Jesu o be a tseba gore dilo ka moka tšeo Jehofa a re kgopelago gore re di dire di tlo re hola. Jehofa ga a nyake gore re dire selo le ge e le sefe seo se tlago go re gobatša. Na Jehofa o nyaka gore o kolobetšwe? Ee. (Dit. 2:38) O ka kgodišega gore go kwa taelo ye go tlo go hola. Ge e ba o ka se diege go ja, gona ke ka baka la’ng o swanetše go diega go kolobetšwa?

20. Re tlo boledišana ka’ng sehlogong se se latelago?

²⁰ Ke ka lebaka la’ng batho ba bangwe ba diega go kolobetšwa? Batho ba bantši ba ka araba potšišo ye ka gore, “Ga se ya hlwa e e ba nako ya maleba.” Selo seo o swanetšego go se tseba ke gore, go ineela go Jehofa le go kolobetšwa ke phetho e bohlokwa kudu yeo o ka e dirago bophelong bja gago. Ka gona go nyakega gore o naganišiše gabotse, o iphe nako e bile o dire sohle seo o ka se kgonago gore o swanelege go kolobetšwa. Ge e ba o nyaka go kolobetšwa, ke’ng seo o ka se dirago gore o itokiše? Re tlo araba potšišo ye sehlogong se se latelago.