Re ka lebalelwa dibe tša rena ka baka la sehlabelo sa topollo seo Jesu a se lefilego ka madi a gagwe. (Baef. 1:7) Eupša Beibele e re: “Modimo o dirile se e le gore a bontšhe toko ya gagwe gobane o be a lebalela dibe tšeo di dirilwego nakong e fetilego,” e lego seo se bolelago gore, pele ga ge a ka neela Jesu e le topollo. (Baroma 3:25) Jehofa a ka re lebalela bjang dibe pele a neela topollo ke moka ka nako e swanago a ba Modimo wa toka?

Jehofa o ile a tshepiša gore o tla nea “peu” yeo e bego e tla phološa bao ba bontšhago tumelo go yena le go ditshepišo tša gagwe. Le gona, ge a be a dira tshepišo yeo, e be e le bjalo ka ge e ka o šetše a lefeletše topollo. (Gen. 3:15; 22:18) Modimo o be a kgodišegile gore Morwa wa Gagwe yo a tswetšwego a nnoši o tlo dumela go ba topollo ka go rata. (Bagal. 4:4; Baheb. 10:​7-10) Ge Jesu a be a le mo lefaseng, Jehofa o ile a mo nea matla a go lebalela dibe le pele topollo e ka newa. Jesu o be a ka lebalela bao ba bontšhago tumelo go yena ka gobane o be a tseba gore sehlabelo seo a bego a tlo se nea se be se tlo bipa dibe tša bona.—Mat. 9:​2-6.