1. Bahlanka ba bangwe ba botegago ba Jehofa ba ka ikwa bjang?

 GO TLOGA go kgothatša go tseba gore Jehofa o amogela batho ba gagwe e le sehlopha! Beibele e re: “Jehofa o kgahlwa ke batho ba gagwe.” (Ps. 149:4) Ka dinako tše dingwe batho ba bangwe ba ikhwetša ba nyamile kudu mo ba feleletšago ba ipotšiša ge e ba Jehofa a ba amogela. Bahlanka ba bangwe ba botegago ba Jehofa ba mehleng ya Beibele, ba ile ba thatafalelwa ke go dumela gore Jehofa o a ba amogela.—1 Sam. 1:​6-10; Jobo 29:​2, 4; Ps. 51:11.

2. Ke bomang bao ba amogelwago ke Jehofa?

² Beibele e bontšha gabotse gore batho ba sa phethagalago ba ka amogelwa ke Jehofa. Bjang? Re swanetše go bontšha tumelo go Jesu Kriste gomme re kolobetšwe. (Joh. 3:16) Ge re dira bjalo re tla be re bontšha phatlalatša gore re itsholela dibe tša rena e bile re tshepiša go dira thato ya Modimo. (Dit. 2:38; 3:19) Jehofa o thaba kudu ge re dira se gore re kgone go ba bagwera ba gagwe. Jehofa o a re amogela le go re lebelela re le bagwera ba gagwe ge e ba re dira sohle seo re ka se kgonago go phelela keno yeo re e dirilego ge re be re ineela gore yena.—Ps. 25:14.

3. Re tlo araba dipotšišo dife?

³ Ke ka baka la’ng batho ba bangwe ba nagana gore Modimo ga a ba amogele? Jehofa o bontšha bjang gore o a re amogela? Le gona, ke’ng seo se ka kgodišago Mokriste gore Modimo o a mo amogela?

KE KA BAKA LA’NG BATHO BA BANGWE BA KA NAGANA GORE JEHOFA GA A BA AMOGELE?

4-5. Re ka kgodišega ka’ng le ge re ka ikwa re se na mohola?

⁴ Ba bangwe ba rena e sa le re no ipona re se na mohola go tloga re sa le bana. (Ps. 88:15) Ngwanabo rena yo a bitšwago  Adrián o re: “Ke be ke ipona ke se na mohola. Ke gopola ge ke be ke sa le mošemanyana, ke rapelela gore lapa la gešo le tsene paradeiseng, eupša nna ke kgodišegile gore nka se tsene ka ge ke se na mohola.” Tony, yo a sego a golela ka lapeng la Dihlatse o re: “Batswadi ba ka ga se ba ka ba mpotša gore ba a nthata goba ba ikgantšha ka nna. Ba be ba no mpotša gore nka dira se sekaone go feta seo ke se dirago.”

⁵ Ge e ba ka dinako tše dingwe re ikwa re se na mohola, re ka gopola gore Jehofa o ile a re gogela go yena. (Joh. 6:44) O bona dika tše dibotse tšeo re nago le tšona tšeo rena re ka se kgonego go di bona e bile o re tseba gabotse. (1 Sam. 16:7; 2 Dikor. 6:30) Ka gona, re ka mo tshepa ge a bolela gore re ba bohlokwa.—1 Joh. 3:​19, 20.

6. Moapostola Paulo o be a ikwa bjang ka dibe tše a di dirilego nakong e fetilego?

⁶ Pele re ithuta therešo, ba bangwe ba rena re ile ra dira dilo tšeo re sa ikwago molato ka tšona le lehono. (1 Pet. 4:3) Le Bakriste ba bangwe bao e lego kgale ba hlankela Jehofa, ba na le mafokodi a mangwe ao a ba tshwenyago. Na le wena o fela o ikwa ka tsela yeo? Ge e ba go le bjalo, o ka kgothatšwa ke go tseba gore bahlanka ba bangwe ba botegago ba Jehofa ba fela ba e ba le maikwelo a bjalo. Ka mohlala, moapostola Paulo o be a nyama kudu ge a nagana ka diphošo tšeo a ilego a di dira. (Baroma 7:24) Re a tseba gore Paulo o ile a itsholela dibe tša gagwe gomme a kolobetšwa. Lega go le bjalo, o ile a bolela gore “ke yo monyenyane go baapostola ka moka” le gore “ke yo mobe go bona ka moka.”—1 Bakor. 15:9; 1 Tim. 1:15.

7. Re swanetše go lebelela bjang dibe tšeo re di dirilego nakong e fetilego?

⁷ Tatago rena wa legodimong o tshepiša go re lebalela ge e ba re itshola. (Ps. 86:5) Ka gona, ge e ba re itshola ka baka la dibe tšeo re di dirilego, re ka tshepa seo Jehofa a se bolelago ge a re o re lebaletše.—Bakol. 2:13.

8-9. Ke’ng seo se ka re thušago go bona gore re bohlokwa go Jehofa?

⁸ Ka moka ga rena re nyaka go dira sohle seo re ka se kgonago go hlankela Jehofa. Eupša ba bangwe ba nagana gore ga go na se se kaone se re ka se dirago gore Jehofa a re amogele. Kgaetšedi yo a bitšwago Amanda o re: “Ke fela ke nagana gore go dira sohle seo nka se kgonago go hlankela Jehofa, go ra gore ke swanetše go dula ke dira ka mo go oketšegilego. Ke fela ke nyaka go dira dilo tšeo ke tsebago gore nka se kgone go di dira. Ge ke palelwa, ke nagana gore ke nyamišitše Jehofa go swana le ka mokgwa wo ke nyamišitšego ka gona.”

⁹ Re ka dira’ng ge re bona eka ga re dire ka mo go lekanego go kgahliša Jehofa? Gopola gore Jehofa o fetofetoga le maemo. Ga se a letela gore re dire dilo tšeo a tsebago gore di tlo re palela. O a leboga ge re dira sohle seo re ka se kgonago gore re mo hlankele go tšwa pelong. Nagana le ka mehlala ya batho ba ka Beibeleng bao ba hlanketšego Jehofa ka dipelo tša bona ka moka. Ka mohlala, nagana ka moapostola Paulo. O ile a šoma ka thata ka mengwaga e mentšhi, a sepela maeto a matelele e bile a hloma diphuthego. Eupša ge maemo a gagwe a fetoga, seo se be se sa bolele gore Jehofa ga a sa mo amogela. O ile a tšwela pele a dira sohle seo a bego a kgona go se dira e bile Jehofa o ile a mo šegofatša. (Dit. 28:​30, 31) Ka mo go swanago, seo re kgonago go se direla Jehofa se ka fetoga ka dinako tše dingwe. Eupša sa bohlokwa ke maikemišetšo a rena a go mo hlankela. Ga bjale a re boneng kamoo Jehofa a re bontšhago ka gona gore o a re amogela.

 JEHOFA O BONTŠHA BJANG GORE O A RE AMOGELA?

10. Re ka dira’ng gore re ‘kwe’ ge Jehofa a re botša gore o a re amogela? (Johane 16:27)

¹⁰ O diriša Beibele. Jehofa o rata go bontšha batho bao ba mo hlankelago gore o a ba rata e bile o a ba amogela. Mangwalo a bolela ka makga a mabedi moo Jehofa a ilego a botša Jesu gore o a mo rata e bile o mo amogetše. (Mat. 3:17; 17:5) Na le wena o ka thabela go kwa Jehofa a go botša gore o a go amogela? Lehono Jehofa ga a bolele le rena go tšwa legodimong eupša o bolela le rena a diriša Beibele. Re ka kgona go “kwa” lentšu la Jehofa ge re bala seo Jesu a se boletšego ka gare ga diebangedi. (Bala Johane 16:27.) Jesu o be a ekiša semelo sa Tatagwe gabotse. Ka gona, ge re bala mantšu ao Jesu a a boditšego balatedi ba gagwe ba botegago le ba sa phethagalago gore o a ba amogela, re ka kgona go kwa ge Jehofa a re botša mantšu ao.—Joh. 15:​9, 15.

11. Ke ka baka la’ng go welwa ke mathata go sa bolele gore Jehofa ga a sa re amogela? (Jakobo 1:12)

¹¹ O re nea dilo tšeo re di hlokago. Jehofa o ikemišeditše go re thuša, go swana le ka go re nea dilo tšeo re di hlokago gore re thabele bophelo. Ka dinako tše dingwe Jehofa a ka re dumelela gore re welwe ke dilo tše mpe go swana le ge a ile a dira ka monna yo a bego a lokile e lego Jobo. (Jobo 1:​8-11) Go welwa ke mathata ga go bolele gore Modimo ga a sa re amogela. Go e na le moo, mathata a ka dira gore re bone ge e ba re rata Modimo goba re mo tshepa. (Bala Jakobo 1:12.) Ge re na le mathata re tlo bona kamoo a re ratago ka gona le kamoo a re thušago ka gona go kgotlelela.

12. Re ithuta’ng phihlelong ya ngwanabo rena Dmitrii?

¹² Nagana ka seo se diragaletšego ngwanabo rena wa kua Asia yo a bitšwago Dmitrii. O ile a lahlegelwa ke mošomo gomme a palelwa ke go hwetša o mongwe ka dikgwedi tše mmalwa. O ile a thoma go fetša nako e ntšhi a le tšhemong go feta yeo a bego a e fetša ge a be a sa šoma e lego seo se bego se bontšha gore o tshepa Jehofa. Go ile gwa feta dikgwedi tše dintšhi a sa hwetše mošomo. Ke moka o ile a thoma go babja moo a ilego a palelwa le ke go fologa mpeteng. O ile a thoma go bona eka ke monna le tate yo a se nago mohola e bile a ipotšiša ge e ba Jehofa a mo amogela. Ka letšatši le lengwe morwedi wa gagwe o ile a mo ngwalela lengwalo leo le nago le mantšu ao a  lego go Jesaya 30:​15, ao a rego : “Le tla ba le matla ge le sa tshwenyege gomme le botega.” O ile a mo tlišetša pampišana yeo gomme a re go yena, “Papa, ge o ikwa o nyamile dula o gopola lengwalo le.” Dmitrii o ile a lemoga gore Jehofa o thušitše lapa la gagwe gore le be le dijo, diaparo le lefelo la go dula. O re: “Seo ke bego ke swanetše go se dira e be e le go dula ke išitše maswafo fase le go bota Modimo.” Ge e ba o na le mathata a swanago, o ka kgodišega gore Jehofa o a go rata, e bile o tlo go thuša go kgotlelela.

13. Jehofa a ka diriša bomang go re bontšha gore o a re amogela, gona o ba diriša bjang?

¹³ O diriša bana babo rena le dikgaetšedi. Jehofa o diriša bana babo rena le dikgaetšedi go re bontšha gore o a re amogela. Ka mohlala, a ka dira gore ba re botše mantšu ao a kgothatšago ka nako yeo re a hlokago ka yona. Kgaetšedi yo mongwe wa kua Asia o ile a bona seo nakong ya ge be a na le mathata. O be a lahlegetšwe ke mošomo e bile a babja kudu. Godimo ga moo monna wa gagwe o ile a dira sebe segolo gomme a se sa hlankela bjalo ka mogolo. O re: “Ke be ke sa kwešiše gore ke ka baka la’ng se se direga go nna.” Ke be ke nagana gore mohlomongwe ke senyeditše Jehofa gomme ga a sa nkamogela.” Kgaetšedi yoo o ile a lopa Jehofa gore a mmontšhe gore o sa mo amogela. Jehofa o arabile bjang thapelo yeo? O re: “Bagolo ba ile ba boledišana le nna gomme ba nkgodiša gore Jehofa o sa nthata.” Ka morago o ile a boela a kgopela Jehofa gore a mo thuše. O re: “Ka lona letšatši leo ke ile ka hwetša lengwalo leo le bego le etšwa go bana bešo le dikgaetšedi.” Ge ke bala lengwalo leo ke ile ka bona gore Jehofa o kwele thapelo ya ka.” Gantšhi Jehofa o bontšha gore o a re amogela ka go diriša batho ba bangwe gore ba re kgothatše.—Ps. 10:17.

14. Ke tsela efe e nngwe yeo Jehofa a re bontšhago ka yona gore o a re amogela?

 ¹⁴ Jehofa o re bontšha gore o a re amogela ka go diriša bana babo rena le dikgaetšedi gore ba re nee keletšo ge re e hloka. Ka mohlala, lekgolong la pele la mengwaga, Jehofa o ile a budulela moapostola Paulo gore a ngwale mangwalo a 14 ao a bego a eya go bana babo le dikgaetšedi. Mangwalo ao a be a na le keletšo e lebanyago le e lerato. Ke ka baka la’ng Jehofa a ile a budulela Paulo gore a nee keletšo yeo? Jehofa ke Tate yo lerato e bile o laya bana ba gagwe ‘bao a ba ratago.’ (Die. 3:​11, 12) Ka gona, ge re ka hwetša keletšo e tšwago Beibeleng, seo e swanetše go ba bohlatse bja gore Modimo o sa dutše a re amogela e bile o a re rata. (Baheb. 12:6) Ke dilo dife tše dingwe tšeo di bontšhago gore Jehofa o a re amogela?

BOHLATSE BJO BONGWE BJO BO BONTŠHAGO GORE JEHOFA O A RE AMOGELA

15. Jehofa o nea bomang moya wa gagwe o mokgethwa, gona ke ka baka la’ng se se re kgodiša gore o a re amogela?

¹⁵ Jehofa o nea bao a ba amogelago moya wa gagwe o mokgethwa. (Mat. 12:18) Re ka ipotšiša gore, ‘na ke bontšha dika tšeo di enywago ke moya wa Modimo bophelong bja ka?’ Na o bontšha go se fele pelo ge o dirišana le batho ba bangwe go feta ka mo o bego o dira ka gona pele o ithuta ka Jehofa? Ge o dutše o bontšha dika tše di enywago ke moya wa Modimo, o tlo kgodišega gore Jehofa o a go amogela!—Bona lepokisi leo le rego “ Dika Tšeo di Enywago ke Moya wa Modimo ke . . . ”

16. Jehofa o diriša bomang go bolela ditaba tše dibotse, se se dira gore o ikwe bjang? (1 Bathesalonika 2:4)

¹⁶ Jehofa o nea bao a ba amogelago tokelo ya go bolela ditaba tše dibotse. (Bala 1 Bathesalonika 2:4.) Kgaetšedi yo a bitšwago Jocelyn, o ile a holwa ke go botša batho ba bangwe ditaba tše dibotse. Ka letšatši le lengwe kgaetšedi Jocelyn o ile a tsoga a nyamile. O re: “Ke ile ka tsoga ke se na matla e bile ke ekwa e ka ga go seo nka kgonago go se dira letšatšing leo, eupša ke be ke le mmulamadibogo e bile e le letšatši la ka la go ya tšhemong. Ke ile ka rapela gomme ka ya tšhemong.” Yona mesong yeo kgaetšedi Jocelyn o ile a kopana le Mary e lego mosadi yo botho yo a ilego a amogela thuto ya Beibele. Ka morago ga dikgwedi tše itšego ke ge Mary a bolela  gore o be a kgopela Jehofa gore a mo thuše gomme ke ge Joceylin a kokota mojakong wa gagwe. Ge kgaetšedi Jocelyn a nagana ka phihlelo ye o re, “Go be go le bjalo ka ge e ka Jehofa o re go nna, ‘Ke a go amogela.’” Ga se batho ka moka bao ba tlago go theetša molaetša wa rena. Eupša re ka kgodišega gore re kgahliša Jehofa ge re dira sohle seo re ka se kgonago gore re bolele ditaba tše dibotse.

17. Dilo tšeo kgaetšedi Vicky a di boletšego ka topollo di dira gore o ikwe bjang? (Psalme 5:12)

¹⁷ Jehofa o dira gore topollo e hole bao a ba amogelago. (1 Tim. 2:​5, 6) Eupša go thweng ge e ba re bona okare Jehofa ga a re amogele le ge re na le tumelo go topollo e bile re kolobeditšwe? Gopola gore ga se ra swanela go itshepa, eupša re swanetše go tshepa Jehofa. O lebelela bao ba nago le tumelo go topollo ba lokile mahlong a gagwe e bile o tshepiša gore o tlo ba šegofatša. (Bala Psalme 5:12; Baroma 3:26) Kgaetšedi yo a bitšwago Vicky o ile a holwa ke go naganišiša ka topollo. Ka letšatši le lengwe ka morago ga go naganišiša ka mo go tseneletšego ka topollo o ile a lemoga gore: “Ke kgale Jehofa a sa mphelele pelo. . . . Eupša go be go le bjalo ka ge e ka ke re go yena: ‘Lerato la gago ga le nthuše ka selo. Sehlabelo sa Morwa wa gago se ka se tsoge se phumotše dibe tša ka.’” Ka morago ga go naganišiša ka mpho ya topollo o ile a bona gore Jehofa o a mo rata. Le rena ge re ka naganišiša ka topollo re ka kgona go bona gore Jehofa o a re rata e bile o a re amogela.

18. Re ka kgodišega ka’ng ge re ka tšwela pele re rata Tatago rena wa legodimong?

¹⁸ Le ge re ka leka ka thata go diriša seo re ithutilego sona sehlogong se, ka dinako tše dingwe re ka ikhwetša re nyamile gomme re ipotšiša ge e ba Jehofa a re amogela. Ge e ba seo se ka direga, gopola gore Jehofa o amogela “bao ba tšwelago pele ba mo rata.” (Jak. 1:12) Ka gona, tšwela pele o batamela kgauswi le Jehofa, gomme o lemoge dilo tše a go direlago tšona go bontšha gore o a go amogela. Dula o gopola gore Jehofa “ga a kgole le yo mongwe le yo mongwe wa rena.”—Dit. 17:27.