1-2. Motho o swanetše go dira’ng pele a kolobetšwa?

 MENGWAGA e mehlano e fetilego, batho ba ka godimo ga ba 1 milione ba ile ba kolobetšwa gore e be Dihlatse tša Jehofa. Bontšhi bja batho ba, ba ile ba rutwa therešo “go tloga boseeng” go swana le morutiwa wa lekgolong la pele la mengwaga e lego Timotheo. (2 Tim. 3:​14, 15) Ba bangwe ba ithutile ka Jehofa ge ba dutše ba gola mola ba bangwe ba ithutile ka Jehofa ba šetše ba tšofetše. Mosadi yo mongwe yo a ithutilego Beibele le Dihlatse tša Jehofa o kolobeditšwe a na le mengwaga e 97!

² Ge e ba o ithuta Beibele le Dihlatse tša Jehofa goba o godišwa ke Dihlatse tša Jehofa, na o nagana ka go kolobetšwa? Ge e ba go le bjalo, o dira gabotse kudu! Le ga go le bjalo pele o ka kolobetšwa o tlo swanelwa ke go ineela go Jehofa. Sehlogo se se tlo re hlalosetša gore go ineela go Jehofa go bolela’ng. Se tlo go thuša gape go bona gore ke ka baka la’ng o se wa swanela go dikadika go ineela go Modimo le gore o kolobetšwe ge o itokišeleditše go dira bjalo.

BOINEELO KE ENG?

3. Nea mehlala ya ka Beibeleng ya batho bao ba bego ba ineetše go Jehofa.

³ Ka Beibeleng motho yo a ineetšego go Jehofa o be a kgethilwe go phetha morero o itšego. Setšhaba sa Isiraele se be se ineetše go Jehofa. Eupša batho ba bangwe setšhabeng ba be ba ineetše go Jehofa ka tsela e kgethegilego. Ka mohlala, Arone o be a apara “seka se sekgethwa sa boineelo,” e lego phaphathi ya go phadima ya gauta yeo e bego e le ka pele ga tuku ya gagwe. Phaphathi yeo e be e bontšha gore o be a kgethilwe go hlankela ka tsela e kgethegilego e le moprista yo a phagamego  wa Isiraele. (Lef. 8:9) Banasari le bona ba be ba ineetše go Jehofa ka tsela e kgethegilego. Lentšu “Monasari,” leo le fetoletšwego go tšwa lentšung la Seheberu leo le rego nazirʹ, le bolela gore “Yo a Ikarotšego,” goba “Yo a Ineetšego.” Banasari ba be ba swanetše go phela ka melao yeo ba e ngwaletšwego Molaong wa Moshe.—Num. 6:​2-8.

4. (a) Bao ba ineetšego go Jehofa ba dira tirelo e kgethwa bjang? (b) Go ‘itatola’ go bolela’ng? (Bona le seswantšho.)

⁴ Ge o ineela go Jehofa o kgetha go ba morutiwa wa Jesu Kriste le go dira gore thato ya Modimo e tle pele bophelong bja gago. Seo se bolela’ng? Jesu o itše: “Ge e ba motho le ge e le ofe a nyaka go ntšhala morago, a a itatole.” (Mat. 16:24) Polelwana ya Segerika yeo e fetoletšwego e le “a a itatole” e ka bolela gape gore “a se sa iphelela.” Bjalo ka mohlanka yo a ineetšego go Jehofa, o tlo swanelwa ke go gana selo se sengwe le se sengwe seo se sa thabišego Jehofa. (2 Bakor. 5:​14, 15) Se se ka akaretša “mediro ya nama” e bjalo ka boitshwaro bjo bo hlephilego. (Bagal. 5:​19-21; 1 Bakor. 6:18) Na go gana dilo tše bjalo go ka go thatafaletša bophelo? Seo se ka se direge ge e ba o rata Jehofa e bile o kgodišegile gore melao ya gagwe e tlo go hola. (Ps. 119:97; Jes. 48:​17, 18) Ngwanabo rena Nicholas o re: “O ka lebelela melao ya Modimo go swana le ditšhipi tša kgolegong tšeo di go thibelago go dira dilo tšeo o di nyakago, goba ditšhipi tšeo di tswaleletšego ditau gore di se ke tša go gobatša.”

5. (a) O ineela go Jehofa bjang? (b) Phapano ke’ng magareng ga go ineela le go kolobetšwa? (Bona le seswantšho.)

⁵ O ineela bjang go Jehofa? O mo tshepiša ka thapelo gore o tlo hlankela yena a nnoši le gore o tlo mo etiša pele bophelong bja gago. Le gona o mo tshepiša le gore o tlo tšwela pele o mo rata “ka pelo ya gago ka moka, ka moya  wa gago ka moka, ka monagano wa gago ka moka le ka matla a gago ka moka.” (Mar. 12:30) Ge o ineela go Jehofa o dira seo ka sephiring, mola ge o kolobetšwa o dira seo phatlalatša. O bontšha batho gore o ineetše go Jehofa. Boineelo ke selo se sekgethwa. O swanetše go phelela se o se tshepišitšego Jehofa, e bile Jehofa le yena o letetše gore o dire bjalo.—Mmo. 5:​4, 5.

KE KA BAKA LA’NG O SWANETŠE GO INEELA GO JEHOFA?

6. Ke ka baka la’ng motho a ka kgetha go ineela go Jehofa?

⁶ Lebaka le legolo la gore o ineele go Jehofa ke ka gobane o a mo rata. Lerato le ga se la ithekga feela ka maikwelo, go e na le moo le ithekgile ka, “tsebo e nepagetšego” le “tlhaologanyo ya moya” e lego dilo tše o ithutilego tšona ka Jehofa tšeo di dirilego gore lerato le o mo ratago ka lona le gole. (Bakol. 1:9) Go ithuta Beibele go go kgodišitše (1) gore Jehofa ke wa kgonthe, (2) gore Beibele ke Lentšu la gagwe leo le buduletšwego, le gore (3) o šomiša mokgatlo wa gagwe go phethagatša thato ya gagwe.

7. Re swanetše go dira’ng pele re ka ineela go Modimo?

⁷ Bao ba ineetšego go Jehofa ba swanetše go tseba dithuto tša motheo tša Beibele gomme ba phele ka go dumelelana le seo e se rutago. Ba dira sohle seo ba ka se kgonago go botša ba bangwe ka seo ba ithutilego sona. (Mat. 28:​19, 20) Lerato leo ba ratago Jehofa ka lona le a gola, e bile ba tloga ba nyaka go hlankela yena a nnoši. Na le wena ga o ikwe ka tsela ye? Ge e ba o rata Jehofa ka pelo ya gago ka moka, o ka se ineele le go kolobetšwa ka gobane o nyaka go kgahliša motho yo o ithutago  le yena Beibele, goba batswadi ba gago goba ka gobane o latela tsela yeo bagwera ba gago ga dirago dilo ka yona.

8. Go leboga Jehofa go ka go thuša bjang gore o tšee phetho ya go ineela go yena? (Psalme 116:​12-14)

⁸ Ge o nagana ka dilo ka moka tšeo Jehofa a go diretšego tšona, o tlo mo leboga kudu gomme wa nyaka go ineela go yena. (Bala Psalme 116:​12-14.) Beibele e bitša Jehofa gore ke monei “wa mpho e nngwe le e nngwe e botse le neo e nngwe le e nngwe e phethagetšego.” (Jak. 1:17) Mpho e kgolokgolo yeo a re neilego yona, ke sehlabelo sa Morwa wa gagwe, Jesu. E no nagana ka tsela yeo sehlabelo se dirilego gore go kgonege gore re be le segwera se sebotse le Jehofa ka gona! O dirile gore go kgonege gore o tle o phele ka mo go sa felego. (1 Joh. 4:​9, 10, 19) Ge o ineela go Jehofa o mmontšha gore o leboga tsela yeo a go bontšhago gore o go rata ka yona, le ditšhegofatšo ka moka tšeo a go neilego tšona. (Doit. 16:17; 2 Bakor. 5:15) Tsela ye ya go leboga e bontšhitšwe go thuto 46 ntlha 4, ka pukung ya O ka Thabela Bophelo go ya go Ile! yeo e nago le bidio ya metsotso e meraro yeo e rego Dimpho Tšeo re ka di Neago Jehofa.

NA O ITOKIŠELEDITŠE GO INEELA LE GO KOLOBETŠWA?

9. Ke ka baka la’ng motho a se a swanela go gapeletšega go ineela?

⁹ Go ka direga gore o ikwa eka ga se wa itokišeletša go ineela le go kolobetšwa. Mohlomongwe o sa nyaka go dira diphetogo bophelong bja gago gore o latele melao ya Jehofa goba mohlomongwe o sa nyaka go tiiša tumelo ya gago. (Bakol. 2:​6, 7) Ga se barutwana ba Beibele ka moka bao ba dirago tšwelopele ka tsela e swanago. Le gona ga se baswa ka moka bao ba itokišeditšego go ineela le go kolobetšwa ka nako e swanago. Leka go kwešiša gore ke diphetogo dife tšeo o kgonago go di dira gomme o leke se o ka kgonago go se dira o sa ipapetše le motho yo mongwe.—Bagal. 6:​4, 5.

10. O swanetše go dira’ng ge o ikwa okare ga se wa itokišeletša go ineela le go kolobetšwa? (Bona le lepokisi leo le rego: “ Bao ba Godišitšwego ke Dihlatse tša Jehofa.”)

¹⁰ Le ge gona bjale o ka lemoga gore ga se wa itokišeletša go ineela go Jehofa, ipeele pakane ya gore o tle o ineele go yena ka letšatši le lengwe. Rapela Jehofa gore a šegofatše maiteko a gago a go dira diphetogo tše o swanetšego go di dira bophelong bja gago. (Bafil. 2:13; 3:16) O ka kgodišega gore o tlo kwa thapelo ya gago gomme a go thuša.—1 Joh. 5:14.

KE KA BAKA LA ENG BA BANGWE BA DIKADIKA?

11. Jehofa a ka re thuša bjang gore re dule re mmotegela?

¹¹ Batho ba bangwe bao ba itokišeditšego go ineela le go kolobetšwa, ba a dikadika. Ba ka ba ba ipotšiša gore, ‘Go tlo direga’ng ge ka morago nka dira sebe se segolo gomme ka kgaolwa?’ Ge e ba o tšhoga, kgodišega gore Jehofa o tlo go nea dilo ka moka tše o di hlokago ‘gore o sepele ka mo go swanetšego le gore o mo kgahliše ka mo go tletšego.’ (Bakol. 1:10) O tlo boela a go nea le matla a go dira seo se lokilego. O bontšhitše gore o tlo go thuša ka gobane o šetše a thušitše batho ba bantšhi go dira se se lokilego. (1 Bakor. 10:13) Ke ka baka leo go bago le batho ba mmalwa bao ba kgaolwago ka phuthegong. Jehofa o thuša batho ba gagwe gore ba dule ba botega.

12. Re ka dira’ng go phema go dira sebe se segolo?

¹² Motho yo mongwe le yo mongwe yo a sa phethagalago, o lekega go dira dilo tše mpe. (Jak. 1:14) Le ga go le bjalo, ke wena o tla kgethago ge e ba o tla dira dilo tšeo tše mpe goba o ka se di dire. Ge e le gabotse, ke wena o  laolago tsela yeo o tlago go phela ka yona. Batho ba bangwe ba bolela maaka a gore re ka se kgone go laola tsela yeo re phelago ka yona le dilo tšeo re di dirago. Eupša o ka ithuta go se dire dilo tše mpe. Le ge o ka lekega o ka kgetha go se dire selo seo. O ka thušwa ke go rapela ka mehla, go bala Beibele ka mehla le go ba gona dibokeng tša Bokriste. Botša batho ba bangwe ka dilo tšeo o ithutilego tšona. Go dira dilo tše ka moka go tlo go thuša gore o phelele boineelo bja gago go Modimo. Le gona o se ke wa lebala gore Jehofa o tlo go thuša go dira bjalo.—Bagal. 5:16.

13. Josefa o re beetše mohlala ofe o mobotse?

¹³ Go tlo ba bonolo go phelela boineelo bja gago ge o ka tseba seo o tlago go se dira pele o lekega. Beibele e re botša ka batho ba bantšhi bao ba ilego ba kgona go dira bjalo le ge le bona ba be ba se ba phethagala. Ka mohlala, mosadi wa Potifara o ile a leka ka makga a mantšhi go goketša Josefa gore a robale le yena. Eupša Josefa o be a šetše a tseba gore o tlo dira eng. Beibele e re botša gore “o be a gana,” gomme a re: “nka dira bjang bobe bjo bjo bogolo gakaakaa gomme ka direla Modimo sebe?” (Gen. 39:​8-10) Go molaleng gore Josefa o be a šetše a tseba gore o tlo dira eng le pele a lekwa. Se se ile sa dira gore go be bonolo gore a dire selo se se lokilego ge a be a lekwa.

14. Re ka ithuta bjang go gana go dira dilo tše mpe?

¹⁴ O ka ekiša bjang Josefa? O ka kgetha gona bjale gore o tlo dira eng ge teko e tšwelela. Ithute go gana ka pela dilo tšeo Jehofa a di hloilego e bile o se ke wa nagana le ka tšona. (Ps. 97:10; 119:165) Ge o ka dira bjalo, le ge o ka lekega go dira sebe, o ka se se dire. O tla ba o šetše o tseba gore o tlo arabela bjang.

15. Motho a ka bontšha bjang gore o tsoma Jehofa ka phišego? (Baheberu 11:6)

¹⁵ Go ka direga gore o a tseba gore o hweditše therešo le gore o nyaka go hlankela Jehofa ka pelo ya gago ka moka, eupša go na le selo seo se dirago gore o dikadike go ineela le go kolobetšwa. O ka ekiša mohlala wa Kgoši Dafida gomme wa kgopela Jehofa ka gore: “Mphetleke o tsebe pelo ya ka, hle Modimo. Ntlhahlobe gomme o tsebe dikgopolo tša ka tšeo di ntshwenyago. Bona ge e ba go na le selo le ge e le sefe se sebe go nna, gomme o ntlhahle tseleng yeo e se nago mo e gomago gona.” (Ps. 139:​23, 24) Jehofa o šegofatša “bao ba mo tsomago ka phišego.” Ge o dutše  o šomela pakane ya gago ya go ineela go yena le go kolobetšwa, o mmontšha gore o dira sona seo.—Bala Baheberu 11:6.

TŠWELA PELE O BATAMELA KGAUSWI LE JEHOFA

16-17. Jehofa o gogela bjang bao ba godišitšwego ke Dihlatse tša Jehofa ka phuthegong? (Johane 6:44)

¹⁶ Jesu o boletše gore barutiwa ba gagwe ba gogwa ke Jehofa. (Bala Johane 6:44.) Nagana feela gore se se kgahliša bjang le gore se go kgoma bjang. Jehofa o bona selo se sebotse go motho yo mongwe le yo mongwe yo a mo gogelago go yena. O mo lebelela e le “thoto ya gagwe e kgethegilego.” (Doit. 7:6) Le wena o go lebelela bjalo.

¹⁷ Go ka direga gore o moswa yo a godišitšwego ke Dihlatse tša Jehofa. O ka ikwa eka o hlankela Jehofa ka gobane batswadi ba gago ba mo hlankela. Eupša Beibele e re: “Batamelang Modimo gomme o tla le batamela.” (Jak. 4:8; 1 Dikor. 28:9) Ge o tšea kgato ya go batamela kgauswi le Modimo, le yena o tlo batamela kgauswi le wena. Jehofa ga a go lebelele o no ba karolo ya sehlopha. O gogela motho yo mongwe le yo mongwe therešong go akaretša le bao ba godišitšwego ke Dihlatse tša Jehofa. Go ya ka Jakobo 4:​8, ge motho a dira maiteko a go batamela Jehofa, le yena o a mmatamela.—Bapiša le 2 Bathesalonika 2:13.

18. Re tlo boledišana ka’ng sehlogong se se latelago? (Psalme 40:8)

¹⁸ Ge o ineela go Jehofa gomme o kolobetšwa, o ekiša dika tša Jesu. O be a ikemišeditše go dira dilo ka moka tšeo tatagwe a mo kgopelago gore a di dire. (Bala Psalme 40:8; Baheb. 10:7) Sehlogong se se latelago re tlo bona gore o ka thušwa ke eng gore o dule o hlankela Jehofa ka go botega le ka morago ga ge o kolobeditšwe.