1. Re hwetša ditšhegofatšo dife ka go ba karolo ya mokgatlo wa Jehofa?

 RE THABELA go ba karolo ya mokgatlo wa Jehofa mehleng ye e thata ya bofelo. Ge maemo a lefase le a dutše a mpefala le go feta, Jehofa o re nea bana babo rena le dikgaetšedi gore ba re thuše go kgotlelela. (Ps. 133:1) O re thuša gore re be le malapa a thabilego. (Baef. 5:33–6:1) O re nea le bohlale bjo re bo hlokago gore re kgone go lebeletšana le dipelaelo le go dula re thabile.

2. Re swanetše go dira’ng, gona ka baka la’ng?

² Re swanetše go šoma ka thata gore re dule re hlankela Jehofa ka go botega. Ka baka la’ng? Ka gobane ka dinako tše dingwe re ka kgopišwa ke diphošo tšeo batho ba bangwe ba di dirago. Re ka nyamišwa le ke diphošo tšeo rena re di dirago, kudukudu ge e ba re dula re di bušeletša gantšhi le gantšhi. Re swanetše go kgotlelela (1) ge ngwanabo rena goba kgaetšedi a re kgopiša, (2) ge molekane wa rena a re nyamiša, le (3) ge re nyamišwa ke diphošo tšeo re di dirago. Sehlogong se, re tlo boledišana ka mehlala e meraro ya batho ba ka Beibeleng bao ba ilego ba dula ba botega le ge ba be ba lebeletšane le maemo a swanago le a.

BONTŠHA KGOTLELELO GE NGWANABO RENA GOBA KGAETŠEDI A GO KGOPIŠA

3. Bahlanka ba Jehofa ba kopana le mathata afe?

³ Bothata. Bana babo rena ba bangwe le dikgaetšedi ba na le mekgwa yeo e sa re kgahlego. Ba bangwe ba ka dira dilo tšeo di re nyamišago goba ba re swara ka tsela yeo e sego ya botho. Bao ba etelelago pele ba ka dira diphošo. Mathata a ka dira gore ba bangwe ba ipotšiše ge e ba mokgatlo wo e le wa Modimo. Go ena le gore ba tšwele pele ba hlankela Modimo “ka botee” le bana babo bona le dikgaetšedi, ba ka tlogela go boledišana le bao ba ba kgopišitšego goba ba tlogela le go ya dibokeng.  (Tsef. 3:9) Eupša yeo ga se tharollo. A re boledišaneng ka mohlala wa motho wa ka Beibeleng yo a ilego a kopana le mathata a swanago.

4. Moapostola Paulo o ile a kopana le bothata bofe?

⁴ Mohlala wa ka Beibeleng. Moapostola Paulo o be a tseba gore bana babo le dikgaetšedi ba Bakriste ga se ba phethagala. Ka mohlala, ba bangwe ba ile ba thoma go mo ahlola ge a be a thoma go kopanela le phuthego. (Dit. 9:26) Ka morago, ba bangwe ba ile ba bolela ka yena gampe gomme ba mo senya leina. (2 Bakor. 10:10) Paulo o ile a bona mogolo a dira phetho e fošagetšego yeo e ka bago e ile ya kgopiša batho ba bangwe. (Bagal. 2:​11, 12) Le gona Mareka, e lego yo mongwe wa batho bao ba bego ba šoma kgauswi le Paulo o ile a mo nyamiša kudu. (Dit. 15:​37, 38) Paulo nkabe a ile a tlogela go kopanela le phuthego ka baka la dilo tšeo di mo nyamišitšego. Go ena le moo, o ile a dula a lebelela bana babo le dikgaetšedi gabotse gomme a dula a hlankela Jehofa ka mafolofolo. Ke eng seo se thušitšego Paulo gore a kgotlelele?

5. Ke’ng seo se thušitšego Paulo gore a rate bana babo le dikgaetšedi? (Bakol. 3:​13, 14) (Bona le seswantšho.)

⁵ Paulo o be a rata bana babo le dikgaetšedi. Tsela yeo Paulo a bego a rata ba bangwe ka yona e mo thušitše gore a lebelele dika tša bona tše dibotse e sego mafokodi a bona. Le gona, lerato le thušitše Paulo go dira seo a se ngwadilego go Bakolose 3:​13, 14. (Bala.) A re boneng kamoo a ilego a swara Mareka ka gona. Le ge Mareka a ile a mo tlogela leetong la gagwe la mathomo, Paulo ga se a ka a dula a mo kwatetše. Ka morago ge Paulo a be a ngwalela phuthego ya Kolose lengwalo le borutho, o ile a reta Mareka gomme a bolela kamoo e lego mošomigotee yo mokaone ka gona, e bile e le motho yo a bego a ‘tloga a mo matlafatša.’ (Bakol. 4:​10, 11) Ge Paulo a be a golegilwe kua Roma, o ile a kgopela Mareka gore a tle a mo thuše. (2 Tim. 4:11) Ruri Paulo o be a lebalela bana babo le dikgaetšedi. Re ka ithuta’ng go Moapostola Paulo?

6-7. Ke’ng se se ka re thušago go tšwela pele re rata bana babo rena le dikgaetšedi le ge ba dira diphošo? (1 Johane 4:7)

⁶ Seo re ithutago sona. Jehofa o nyaka gore re dule re rata bana babo rena le dikgaetšedi. (Bala 1 Johane 4:7.) Ge e ba motho yo mongwe a palelwa ke go bontšha seka se itšego sa Bokriste, re ka no phetha ka gore seo se diregile ka baka la ge a se a phethagala. (Die. 12:18) Modimo o rata bahlanka ba gagwe bao ba botegago le ge ba mo direla diphošo. Ga a dule a re kwatetše ge re mo direla diphošo e bile a ka se tsoge a re lahlile. (Ps. 103:9) Go  bohlokwa gore re ekiše Tatago rena yo a lebalelago!—Baef. 4:32–5:1.

⁷ Ge bofelo bo dutše bo batamela, re swanetše go dula re le kgauswi le bana babo rena le dikgaetšedi. Re ka letela gore tlaišego e oketšege. Re ka golegwa ka baka la tumelo ya rena. Ge seo se ka direga, re tlo hloka bana babo rena le dikgaetšedi go feta le ge e le neng pele. (Die. 17:17) Ekwa seo se ilego sa diragalela ngwanabo rena Josep, a e lego mogolo yo a tšwago Spain. Yena le bana babo rena ba bangwe ba ile ba golegwa ka baka la go se tšee karolo ditabeng tša dipolotiki. O re: “Ge re be re le kgolegong, go be go le bonolo gore re tenwe ke bana babo rena ka ge re be re dula re le felo gotee. Re ile ra swanelwa ke go phedišana ka khutšo le go lebalelana ka bolokologi. Se se ile sa re thuša gore re dule re na le botee e bile re hlokomelana. Re be re dikologilwe ke bagolegwa ba bangwe bao ba sa hlankelego Jehofa. Ka nako e nngwe ke ile ka gobala letsogo gomme ka rwala samente, ka gona ke be ke sa kgone go itlhokomela. Yo mongwe wa bana bešo o ile a ntlhatswetša diaparo le go ntlhokomela ka ditsela tše dingwe. Ke ile ka bona gore ke ratwa kudu.” Se se re ruta gore re swanetše go lokiša mathata ao re nago le ona le ba bangwe gona bjale!

BONTŠHA KGOTLELELO GE MOLEKANE WA GAGO A GO NYAMIŠA

8. Banyalani ba kopana le mathata afe?

⁸ Bothata. Manyalo ka moka a na le mathata. Beibele e bolela ka mo go kwagalago gore batho bao ba lego lenyalong ba ba le “tlaišego nameng.” (1 Bakor. 7:28) Ka baka la’ng? Ka gobane lenyalong go tsena batho ba babedi bao ba sa phethagalago, bao ba nago le dika tša go se swane e bile ba rata goba ba sa rate dilo tša go swana. Banyalani ba ka ba ba etšwa ditšong tše sa swanego goba ba godišitšwe ka ditsela tše di sa swanego. Ge nako e dutše e eya, ba ka bontšha dika tšeo molekane yo mongwe a bego a sa di bone pele ba nyalana. Dilo tšeo ka moka di ka dira gore go be le mathata lenyalong. Go e na le gore yo mongwe a bone gore le yena a ka ba a na le phošo gomme ba leke go e lokiša, a ka thoma go bea yo mongwe molato. Ba ka ba ba nagana gore tharollo ya mathata ke go arogana goba go hlalana. Eupša go lahlela toulo ga go lokiše bothata. b A re ithuteng ka mohlala wa motho wa ka Beibeleng yo a ilego a kgotlelela le ge lenyalo la gagwe le be le le boima.

9. Abigaile o be a lebeletšane le bothata bofe?

⁹ Mohlala wa ka Beibeleng. Abigaile o be a nyalane le Nabala yo Beibele e bolelago gore o be a le bogale e bile a na le mekgwa e mebe. (1 Sam. 25:3) Go ka ba go be go le thata gore Abigaile a phele le monna wa mohuta woo. Na Abigaile o be a ka leka go tšwa lenyalong leo? O ile a hwetša sebaka sa go dira bjalo ge Dafida yo e bego e tlo ba kgoši ya Isiraele, a be a nyaka go bolaya monna wa gagwe ka baka la ge a mo rogile e bile a rogile le banna bao a bego a sepela le bona. (1 Sam. 25:​9-13) Abigaile nkabe a ile a tšhaba gomme a tlogela Dafida gore a tšwele pele ka seo a bego a rerile go se dira. Eupša o ile a tsena ditaba gare gomme a dira gore Dafida a se ke a bolaya Nabala. (1 Sam. 25:​23-27) A ka ba a ile a šušumetšwa ke eng gore a dire se?

10. Ke’ng seo se ka bago se thušitše Abigaile gore a kgotlelele lenyalo leo le bego le le boima?

¹⁰ Abigaile o be a rata Jehofa e bile a hlompha  le melao ya gagwe ya mabapi le lenyalo. Ga go pelaelo gore o be a tseba seo Modimo a se boditšego banyalani ba mathomo e lego Adama le Efa. (Gen. 2:24) Abigaile o be a tseba gore Jehofa o lebelela lenyalo e le le lekgethwa. O be a nyaka go kgahliša Modimo, gomme seo se ka ba se ile sa dira gore a dire sohle seo a ka se kgonago gore a šireletše lapa la gagwe le monna wa gagwe. O ile a tšea kgato ka pelapela gomme a dira gore Dafida a se ke a bolaya Nabala. O ile a ikemišetša le go kgopela tshwarelo ka selo seo a sa se dirago. Ruri Jehofa o be a rata mosadi yoo wa go ba le sebete le yo a bego a sa inaganele a nnoši. Basadi le banna bao ba lego lenyalong ba ka ithuta’ng mohlaleng wa Abigaile?

11. (a) Jehofa o letetše’ng go batho bao ba lego lenyalong? (Baefeso 5:33) (b) O ithutile’ng tseleng yeo Carmen a ilego a dira dilo ka yona gore a boloke lenyalo la gagwe? (Bona le seswantšho.)

¹¹ Seo re ithutago sona. Jehofa o nyaka gore batho bao ba lego lenyalong ba hlomphe lenyalo le ge go le thata go phedišana le balekane ba bona. Jehofa o thaba kudu ge a bona batho bao ba lego lenyalong ba šoma ka thata go lokiša mathata a bona e bile ba bontšhana lerato le tlhompho. (Bala Baefeso 5:33.) Nagana ka mohlala wa Carmen. Ka morago ga mengwaga e tshela a le lenyalong, o ile a thoma go ithuta le Dihlatse tša Jehofa gomme ka morago a kolobetšwa. Carmen o re: “Monna wa ka ga se a thabela seo. Ka mehla o be a galefa ge ke eya dibokeng le ge ke boledišana le batho ka ditaba tše dibotse. O be a nthoga e bile a ntšhošetša ka gore o tlo ntlogela.” Le ga go le bjalo, Carmen o ile a dula a kgotleletše lenyalong la gagwe. O ile a šoma ka thata gore a rate monna wa gagwe le go mo hlompha ka mengwaga e 50. O re: “Ge nako e dutše e eya ke ile ka leka go kwešiša kamoo monna wa ka a ikwago ka gona le go boledišana le yena ka tlhompho. Ke ile ka šoma ka thata gore ke šireletše lenyalo la ka ka ge ke tseba gore lenyalo ke le lekgethwa mahlong a Jehofa. Ga se ka ka ka tlogela molekane wa ka ka gobane ke rata Jehofa.” c Ge o ka ba le mathata lenyalong la gago, o ka tshepa gore Jehofa o tlo go thekga le go go thuša go kgotlelela.

BONTŠHA KGOTLELELO GE O NYAMIŠWA KE DIPHOŠO TŠEO O DI DIRILEGO

12. Re ka lebeletšana le bothata bofe ge re ka dira sebe se segolo?

¹² Bothata. Re ka ikwa re nyamile kudu ka morago ga gore re dire sebe se se segolo. Beibele e bontšha gore dibe tša rena di ka dira gore re be le “pelo e nyamilego le e kwelego  bohloko.” (Ps. 51:17) Ngwanabo rena yo a bitšwago Robert o ile a šoma ka thata ka mengwaga e mentšhi gore a swanelege go ba mohlanka wa bodiredi. Eupša o ile a dira sebe se segolo gomme a lemoga gore o senyeditše Jehofa. O re: “Ka morago ga gore ke lemoge se, letswalo la ka le ile la ntshwenya kudu. Ke be ke dula ke nyamile. Ke ile ka lla le go rapela Jehofa. Ke gopola ke nagana gore Modimo a ka se tsoge a ntheeditše, Ke ka baka la’ng a ka theetša motho wa go swana le nna? Ke mo nyamišitše.” Ge re ka dira sebe se segolo re ka ikwa re nyamile ka gobane pelo ya rena e robegilego e dumela gore Jehofa ga a sa na taba le rena. (Ps. 38:4) Ge e ba o ikwa ka tsela ye, nagana ka mohlala wa motho wa ka Beibeleng yo a ilego a dula a hlankela Jehofa le ka morago ga go dira sebe se segolo.

13. Moapostola Petro o ile a dira sebe sefe se segolo, gona ke eng se se dirilego gore a dire sebe seo?

¹³ Mohlala wa ka Beibeleng. Bošegong bja pele ga ge Jesu a ka bolawa, moapostola Petro o ile a dira diphošo tše dintšhi tšeo di ilego tša dira gore a feleletše a dirile sebe se segolo. Petro o ile a ipota, a ikgantšha ka gore yena o tla dula a botega le ge baapostola ba bangwe ba ka lahla Jesu. (Mar. 14:​27-29) Ke moka nakong ya ge ba le serapeng sa Getsemane, Petro o ile a palelwa ke go dula a phakgame. (Mar. 14:​32, 37-41) Ka morago ge lešaba le etla go golega Jesu, Petro o ile a mo tlogela ke moka a tšhaba. (Mar. 14:50) Mafelelong Petro o ile a latola Jesu ka makga a mararo a ba a dira keno ka maaka ao a gagwe. (Mar. 14:​66-71) Petro o ile a ikwa bjang ge a lemoga gore o dirile sebe se segolo? O ile a lla gabohloko ka baka la go ipona molato. (Mar. 14:72) Nagana bohloko bjoo Petro a ilego a bo kwa diiri ka morago ga gore mogwera wa gagwe Jesu a bolawe. Petro a ka ba a ile a ikwa a se na mohola!

14. Ke’ng seo se thušitšego Petro gore a tšwele pele a hlankela Jehofa? (Bona seswantšho sa letlakala la ka ntle.)

¹⁴ Petro o ile a kgona go kgotlelela go hlankela Jehofa a thušwa ke mabaka a sego kae. Ga se a ka a ipea lekatana, le gona o ile a ya go barutiwa ba bangwe gomme ga go pelaelo gore ba ile ba mo kgothatša. (Luka 24:33) Godimo ga moo ka morago ga gore Jesu a tsošwe, o ile a iponagatša go Petro mohlomongwe e le gore a mo kgothatše. (Luka 24:34; 1 Bakor. 15:5) Ka morago go e na le gore Jesu a sole Petro ka diphošo tša gagwe, o ile a mmotša gore o tlo hwetša maikarabelo a oketšegilego. (Joh. 21:​15-17) Petro o be a tseba gore o dirile sebe se segolo eupša ga se a ka fela maatla. Ka baka la’ng? Ka gobane o be a tseba gore Mong wa gagwe e lego Jesu ga se a mo hlapa diatla. Le  barutiwa ba bangwe ba ile ba tšwela pele ba thekga Petro. Re ithuta’ng mohlaleng wa Petro?

15. Jehofa o nyaka gore re kgodišege ka’ng? (Psalme 86:5; Baroma 8:​38, 39) (Bona le seswantšho.)

¹⁵ Bothata. Jehofa o nyaka gore re kgodišege gore o a re rata le gore o a re lebalela. (Bala Psalme 86:5; Baroma 8:​38, 39.) Ge re dirile sebe re ipona molato. Go tlwaelegile go ikwa ka tsela yeo. Eupša ga se ra swanela go nagana gore Jehofa ga a sa re rata le gore a ka se tsoge a re lebaletše. Go e na le moo re swanetše go hwetša thušo ka pelapela. Robert yo re boletšego ka yena pejana o re: “Ke dirile sebe ka gobane ke ile ka ithekga ka tlhaologanyo ya ka gomme ka palelwa ke go ganetša teko.” O ile a lemoga gore o swanetše go boledišana le bagolo. O re: “Ka morago ga go boledišana le bagolo, ba ile ba nthuša go bona gore Jehofa o sa nthata. Bagolo ga se ba ntlhapa diatla. Ba nthušitše go bona gore Jehofa ga se a ntahla.” Le rena re ka kgodišega gore Jehofa o re rata kudu e bile o a re lebalela ge re itshola ka baka la dibe tšeo re di dirilego, re kgopela thušo yeo re e hlokago e bile re leka go se sa bušeletša diphošo tšeo re di dirilego. (1 Joh. 1:​8, 9) Ge e ba re ka kgodišega gore Jehofa o a re rata, re ka se tsoge re tlogetše go mo hlankela le ge re ka dira diphošo.

16. Ke ka baka la’ng o ikemišeditše go tšwela pele o hlankela Jehofa?

¹⁶ Jehofa o leboga kudu maiteko ao re a dirago a go mo hlankela mehleng ye e thata ya bofelo. Jehofa o tlo re thuša gore re kgone go tšwela pele re mo hlankela go sa šetšwe diphošo tšeo re di dirago goba tšeo batho ba bangwe ba di dirago. Re ka tšwela pele re rata bana babo rena le dikgaetšedi le go ba lebalela ge ba re kgopiša. Re ka bontšha gore re rata Modimo kudu e bile re hlompha le thulaganyo ya gagwe ya lenyalo ka go dira sohle seo re ka se kgonago go lokiša mathata ao a ka tsogago lenyalong la rena. Ge re ka dira sebe se segolo re ka kgopela Jehofa gore a re thuše, ra amogela gore o a re rata e bile o a re lebalela ra ba ra tšwela pele re mo hlankela. Re ka kgodišega gore Jehofa o tlo re šegofatša kudu ge e ba re sa “[lape] go dira botse.”—Bagal. 6:9.