1, 2. Ke dipotšišo dife tšeo re ka ipotšišago tšona mabapi le seo Jesu a se boletšego go Mateo 24:14?

JESU o boletše e sa le pele gore mehleng ya bofelo, ditaba tše dibotse tša Mmušo di be di tla bolelwa ditšhabeng tšohle. (Mateo 24:14) Ka ge re le Dihlatse tša Jehofa, re tsebja lefaseng ka moka ka modiro wa rena wa boboledi. Batho ba bangwe ba rata molaetša wa rena, mola ba bangwe ba sa o rate. Eupša le bao ba sa ratego molaetša wa rena, ba a re hlompha ka baka la modiro wo re o dirago. Re ipolela gore ke rena re dirago modiro wa boboledi woo Jesu a boletšego ka wona e sa le pele. Na re na le tshwanelo ya go bolela seo? Ke’ng seo se re kgodišago gore modiro wa rena wa boboledi ke modiro wo Jesu a boletšego ka wona e sa le pele?

² Madumedi a mantši a ipolela gore a ruta batho molaetša wa Jesu. Eupša a ruta feela dikerekeng, thelebišeneng goba Inthaneteng, goba a no botša ba bangwe seo a ithutilego sona ka Jesu. Ba bangwe ba nagana gore ge ba thuša badiidi goba ba dira mešomo ya boithaopi e le dingaka, baoki, goba  barutiši ke gona ge ba bolela ditaba tše dibotse. Eupša na mešomo ye ke wona modiro wa boboledi wo Jesu a boletšego ka wona?

3. Go ya ka Mateo 28:19, ke dilo dife tše nne tšeo balatedi ba Jesu ba swanetšego go di dira?

³ Na Jesu o be a nyaka gore barutiwa ba gagwe ba letele gore batho ba tle go bona? Aowa! Ka morago ga tsogo ya gagwe, Jesu o boditše balatedi ba gagwe ba bantši gore: ‘Ka gona, eyang le dire batho ba ditšhaba ka moka barutiwa, le ba kolobetše, le ba rute go boloka dilo tšohle tšeo ke le laetšego tšona.’ (Mateo 28:19, 20) Ka gona, ka ge re le balatedi ba Jesu re swanetše go dira dilo tše di latelago tše nne. Re swanetše go dira barutiwa, re ba kolobetše le go ba ruta. Eupša sa mathomo, re swanetše go ya go batho. Seithuti se sengwe sa Beibele se hlalosa ka gore: “Go ‘ya’ [bathong] ke mošomo wa modumedi yo mongwe le yo mongwe, e ka ba go ya go bao ba dulago kgauswi le wena goba bao ba lego mošola wa mawatle.”​—Mateo 10:7; Luka 10:3.

4. Go ba “barei ba batho” go akaretša’ng?

⁴ Jesu o be a letetše’ng go barutiwa ba gagwe? Na o be a nyaka gore yo mongwe le yo mongwe wa bona a ikele tšhemong a nnoši, goba na o be a nyaka gore ba šome e le sehlopha seo se rulagantšwego? Ka ge go ka se kgonege gore motho o tee a dire boboledi go “ditšhaba ka moka,” barutiwa ba gagwe ba be ba swanetše go šoma e le sehlopha seo se rulagantšwego. Se ke seo Jesu a bego a se bolela ge a be a laletša barutiwa ba gagwe gore e be “barei ba batho.” (Bala Mateo 4:18-22.) Jesu o be a sa bolele ka motho o tee yo a reago dihlapi lewatleng. Go e na le moo, o be a bolela ka go rea dihlapi ka malokwa goba ka dinete. Mohuta wo wa go rea dihlapi o nyaka gore batho ba šome ka thata, ba rulaganywe gabotse, e bile o nyaka gore batho ba bantši ba swarišane.​—Luka 5:1-11.

5. Ke dipotšišo dife tše nne tšeo re swanetšego go di araba, gona ka baka la’ng?

⁵ E le gore re tsebe bao ba bolelago ditaba tše dibotse lehono, re swanetše go araba dipotšišo tše tše nne:

• Ke molaetša ofe wo balatedi ba Jesu ba swanetšego go o bolela?

• Maikemišetšo a bona e swanetše go ba afe ge ba dira modiro wo?

• Ba swanetše go diriša mekgwa efe go dira boboledi?

• Modiro wo o swanetše go dirwa go fihla kae, gona o swanetše go dirwa go fihla neng?

Dikarabo tša dipotšišo tše di tla re thuša go tseba gore ke bomang bao ba dirago modiro wo wa go phološa maphelo le gona di tla matlafatša kganyogo ya rena ya go tšwela pele re bolela.​—1 Timotheo 4:16.

6. Ke ka baka la’ng o ka kgodišega gore Dihlatse tša Jehofa di bolela molaetša wa therešo?

⁶ Bala Luka 4:43. Jesu o be a botša  batho “ditaba tše dibotse tša Mmušo,” gomme o nyaka gore barutiwa ba gagwe ba dire se se swanago. Ke bomang lehono bao ba bolelago molaetša wo bathong ka moka? Ke Dihlatse tša Jehofa feela! Gaešita le batho ba bangwe bao ba re hloilego ba dumela seo. Ka mohlala, ekwa seo moruti yo mongwe yo e kilego ya ba moromiwa dinageng tše di fapafapanego a ilego a se botša yo mongwe wa Dihlatse tša Jehofa. Dinageng ka moka tšeo moruti yoo a bilego go tšona, o be a botšiša Dihlatse tša Jehofa gore di bolela molaetša ofe. Moruti yoo o itše: “Ka moka ga tšona e be e le ditlaela moo di nkarabilego ka go swana ka gore: ‘Re bolela ditaba tše dibotse tša Mmušo.’” Ge e le gabotse, seo moruti yoo a se boletšego se hlatsela gore ga re ditlaela, go e na le moo re Bakriste ba therešo bao ba nago le botee. (1 Bakorinthe 1:10) Le gona Mmušo wa Modimo ke molaetša o mogolo wo o ahlaahlwago ka makasineng wa Morokami o Tsebatša Mmušo wa Jehofa. Makasine wo o hwetšagala ka maleme a 254 gomme go tšweletšwa dikopi tše e ka bago tše 59 000 000 tša tokollo e nngwe le e nngwe, e lego seo se dirago gore e be makasine wo o phatlalatšwago kudu lefaseng go feta dimakasine tše dingwe!

7. Re tseba bjang gore baruti ba Bojakane ga ba bolele molaetša wa maleba?

⁷ Baruti ba Bojakane ga ba bolele ka Mmušo wa Modimo. Ge e ba ba bolela ka wona, ba bantši ba bona ba re ke selo seo se lego ka gare ga pelo ya motho. (Luka 17:21) Ga ba rute batho gore Mmušo wa Modimo ke pušo ya legodimong yeo kgoši ya wona e lego Jesu. Go e na le moo, gantši ba bolela ka Jesu nakong ya Keresemose goba ya Easter. Ga ba hlalose gore Mmušo wa Modimo o tla rarolla mathata ka moka a batho le gore kgauswinyane o tla fediša bobe ka moka mo lefaseng. (Kutollo 19:11-21) Go molaleng gore baetapele ba Bojakane ga ba tsebe seo Jesu a tlago go se dira bjalo ka kgoši ya Mmušo wa Modimo. Le gona ka ge ba sa kwešiše molaetša wa Jesu, ga ba kwešiše gore ke ka baka la eng ba swanetše go bolela ka Mmušo wa Modimo.

8. Ke maikemišetšo afe ao a fošagetšego a go dira boboledi?

⁸ Barutiwa ba Jesu ga se ba swanela go dira boboledi ka maikemišetšo a go dira tšhelete goba go aga meago ya mabaibai. Jesu o itše: “Le amogetše feela, neang feela.” (Mateo 10:8) Ka gona, ga go motho yo a swanetšego go ikhumiša ka modiro wa boboledi. (2 Bakorinthe 2:17) Barutiwa ba Jesu ga se ba swanela go kgopela go lefša ge ba dira modiro wo. (Bala Ditiro 20:33-35.) Gaešita le ge taelo ya Jesu e kwagala gabotse, dikereke tše dintši di a e hlokomologa ka go kgoboketša dikoleke gore di kgone go hlokomela meago ya tšona, go lefa baruti le go lefa bao ba šomago kerekeng. Ka baka la seo, baruti ba bantši ba Bojakane ba humile le dinala.​—Kutollo 17:4, 5.

9. Dihlatse tša Jehofa di bontšhitše bjang gore di dira modiro wa boboledi ka maikemišetšo a mabotse?

 ⁹ Na Dihlatse tša Jehofa di tšea dikoleke Diholong tša tšona tša Mmušo goba dikopanong? Aowa! Modiro wa tšona o thekgwa ka meneelo ya boithatelo. (2 Bakorinthe 9:7) Ngwagola, Dihlatse tša Jehofa di feditše diiri tše dibilione tše pedi di bolela ditaba tše dibotse gomme tša swara dithuto tša Beibele tše fetago tše dimilione tše senyane kgwedi e nngwe le e nngwe. Dihlatse tša Jehofa ga di lefelelwe ge di bolela ditaba tše dibotse, eupša di diriša tšhelete ya tšona go dira modiro wo. Monyakišiši yo mongwe o boletše ka modiro wa Dihlatse tša Jehofa gore: “Pakane ya tšona ke go bolela molaetša wa Modimo le go ruta batho.” O boletše gape gore Dihlatse tša Jehofa ga di na baruti bao ba lefšago. Ka gona ge e ba re sa ikhumiše ka modiro wo, maikemišetšo a rena ke afe? Re dira modiro wo ka boithatelo ka gobane re rata Jehofa le batho. Moya woo o phethagatša boporofeta bjo bo lego go Psalme 110:3. (Bala.)

10. Jesu le barutiwa ba gagwe ba ile ba diriša mekgwa efe go dira boboledi?

¹⁰ Jesu le barutiwa ba gagwe ba ile ba diriša mekgwa efe go dira boboledi? Ba ile ba ya gohle mo ba bego ba ka hwetša batho. Ka mohlala, ba be ba bolela ditaba tše dibotse diterateng le mebarakeng. Le gona ba be ba eya magaeng a batho. (Mateo 10:11; Luka 8:1; Ditiro 5:42; 20:20) Go ya ka ntlo le ntlo e be e le tsela e rulagantšwego ya go botša batho ba mehuta ka moka ditaba tše dibotse.

11, 12. Phapano ke efe magareng ga Bojakane le Dihlatse tša Jehofa ge go tliwa tabeng ya go bolela ditaba tše dibotse?

 ¹¹ Na dikereke tša Bojakane di bolela ditaba tše dibotse go swana le kamoo Jesu a dirilego ka gona? Ka tlwaelo, baruti bao ba lefšago ba ruta ditho tša bona feela. Ga ba dire barutiwa ba bafsa, go e na le moo ba lwela gore balatedi ba bona ba se ke ba tlogela kereke. Ka dinako tše dingwe ba ile ba leka go kgothaletša ditho tša bona go ya tšhemong. Ka mohlala, ka 2001, Mopapa John Paul wa Bobedi o ile a ngwala ka lengwalong gore ditho tša kereke ya gagwe di swanetše go bolela Ebangedi gomme di fišege go swana le moapostola Paulo, yo a itšego: “Go madimabe nna ge nka se bolele Ebangedi.” Ke moka mopapa yo o ile a bolela gore modiro wo wa boboledi ga se wa swanela go dirwa feela ke bao ba rutilwego go o dira, eupša o dirwe ke ditho ka moka tša kereke. Eupša ke ba sego kae feela bao ba ilego ba leka go dira seo a se boletšego.

¹² Go thwe’ng ka Dihlatse tša Jehofa? Ke tšona feela di rutago gore Jesu o thomile go buša ga e sa le go tloga ka 1914. Di kwa Jesu gomme di etiša modiro wa boboledi pele. (Mareka 13:10) Puku ya Pillars of Faith—American Congregations and Their Partners e boletše gore modiro wa boboledi o bohlokwa kudu go Dihlatse tša Jehofa. Le gona e boletše gore ge Dihlatse di hwetša batho bao ba swerwego ke tlala, ba go lewa ke bodutu, le ba go babja, di leka go ba thuša, eupša ga di lebale gore morero wa tšona o mogolo ke go ruta batho gore lefase le le a fela le gore Jehofa a ka ba phološa. Dihlatse tša Jehofa di tšwela pele di bolela wona molaetša woo le go ekiša mekgwa yeo Jesu le barutiwa ba gagwe ba bego ba e diriša.

13. Modiro wa boboledi o swanetše go dirwa go fihla kae?

¹³ Jesu o itše balatedi ba gagwe ba be ba tla bolela ditaba tše dibotse le go ruta batho “lefaseng ka moka.” O ba laetše gore ba dire batho ba “ditšhaba ka moka” barutiwa. (Mateo 24:14; 28:19, 20) Se se bolela gore ditaba tše dibotse di be di tla swanelwa ke go bolelwa lefaseng ka moka.

14, 15. Ke’ng seo se bontšhago gore Dihlatse tša Jehofa di phethagaditše boporofeta bja Jesu bja gore ditaba tše dibotse di be di tla bolelwa lefaseng ka moka? (Bona diswantšho tšeo di lego mathomong a sehlogo.)

¹⁴ Ke Dihlatse tša Jehofa feela tšeo di phethagaditšego boporofeta bja Jesu bja gore ditaba tše dibotse di be di tla bolelwa lefaseng ka moka. Ke ka baka la’ng re re’alo? Kua United States, go na le baruti ba Bojakane bao e ka bago ba 600 000, gomme Dihlatse tša Jehofa tšeo di bolelago ditaba tše dibotse nageng yeo ke tše e ka bago tše 1 200 000. Lefaseng ka moka, go na le baruti ba kereke ya Katholika bao e ka bago ba 400 000, eupša go na le Dihlatse tša Jehofa tša ka godimo ga tše 8 milione tšeo di bolelago ditaba tše dibotse dinageng tše 240. Go molaleng gore Dihlatse tša Jehofa di bolela ditaba tše dibotse lefaseng ka moka, e lego selo seo se tlišetšago Jehofa kgodišo le tumišo!​—Psalme 34:1; 51:15.

¹⁵ Ka ge re le Dihlatse tša Jehofa, pakane ya rena ke go bolela ditaba tše dibotse go batho ba bantši kamoo re ka kgonago pele bofelo bo fihla. E le gore re kgone go dira modiro wo, re fetoletše le go tšweletša dipuku tše dimilione, dimakasine, dipampišana gotee le ditaletšo tša dikopano  le tša Segopotšo ka maleme a fetago a 700. Re nea batho dilo tše mahala. Ngwagola feela, re tšweleditše dikgatišo tše di theilwego Beibeleng tše e ka bago tše 4,5 bilione. Re tšweleditše le dikopi tša ka godimo ga tše 200 milione tša Phetolelo ya Lefase le Lefsa ya Mangwalo a Makgethwa ka maleme a ka godimo ga a 130. Le gona wepesaeteng ya rena ya semmušo go na le dikgatišo ka maleme a ka godimo ga a 750. Ke Dihlatse tša Jehofa feela tšeo di dirago modiro wo o makatšago.

16. Re tseba bjang gore Dihlatse tša Jehofa di na le moya wa gagwe o mokgethwa?

¹⁶ Modiro wa boboledi o tlo dirwa go fihla neng? Jesu o boletše gore ditaba tše dibotse di tla bolelwa go fihla bofelo bo etla. Re le Dihlatse tša Jehofa, re kgonne go kgotlelela modirong wo wa boboledi mehleng ye ya bofelo ka gobane re na le moya o mokgethwa wa Jehofa. (Ditiro 1:8; 1 Petro 4:14) Badumedi ba bangwe ba ka bolela gore ba na le moya o mokgethwa. Eupša na ba dira modiro wo Dihlatse tša Jehofa di o dirago mehleng ye ya bofelo? Dikereke tše dingwe di lekile go re ekiša, eupša di paletšwe. Ba bangwe ba nyaka go ruta batho ka Modimo, eupša ba nyaka go dira seo ka nakwana feela. Ba bangwe ba ka ya ka ntlo le ntlo, eupša ga ba bolele ditaba tše dibotse tša Mmušo wa Modimo. Ka gona ga ba dire modiro wo Jesu a o thomilego.

17, 18. (a) Ke ka baka la’ng re ka kgodišega gore Dihlatse tša Jehofa ke tšona feela di bolelago ditaba tše dibotse tša Mmušo wa Modimo lehono? (b) Ke’ng seo se re thušago go tšwela pele ka modiro wo?

¹⁷ Ka gona ke bomang bao ba bolelago ditaba tše dibotse lehono? Ke Dihlatse tša Jehofa feela! Re tseba seo bjang? Ka gobane re bolela molaetša wa maleba, e lego ditaba tše dibotse tša Mmušo wa Modimo. Re tsoma batho bodireding bja rena, ka gona re diriša mekgwa ya maleba. Re dira modiro wo ka maikemišetšo a mabotse, e lego go rata Jehofa le batho. Modiro wa rena o phatlaletše lefaseng ka moka ka gobane re bolela le batho ba ditšhaba ka moka le maleme ka moka. Le gona re tla tšwela pele re bolela ditaba tše dibotse tša Mmušo go fihla bofelo bo etla!

¹⁸ Go thabiša kudu go bona batho ba Jehofa ba dira modiro o mobotse wa go bolela ditaba tše dibotse mehleng ye ya bofelo. Eupša re kgona bjang go dira modiro wo? Moapostola Paulo o itše: “Modimo ke yena yo a le fago mafolofolo, a le neago kganyogo le matla a gore le dire dilo tšohle tšeo a di ratago.” (Bafilipi 2:13) Eka Jehofa a ka tšwela pele a re fa matla ao re a hlokago gore re tšwele pele re dira sohle se re ka se kgonago go bolela ditaba tše dibotse!​—2 Timotheo 4:5.