1, 2. (a) Mathomong mantšu a Jesu ao a lego go Mateo 24:12 a be a bolela ka bomang? (b) Puku ya Ditiro e bontšha bjang gore Bakriste ba bantši ba lekgolong la pele la mengwaga ba ile ba tšwela pele ba bontšha gore ba na le lerato? (Bona seswantšho se se lego ka mo godimo.)

SE SENGWE sa dilo tšeo Jesu a boletšego gore re tla bona ka tšona gore re phela “[bofelong] bja tshepedišo ya dilo” ke gore “lerato la ba bantši le [be le] tla fola.” (Mat. 24:3, 12) Lekgolong la pele la mengwaga, Bajuda bao ba bego ba ipitša gore ke batho ba Modimo, ba ile ba dumelela lerato la bona le fola.

² Lega go le bjalo, Bakriste ba bantši ka nako yeo ba be ba swaregile ka go “tsebatša ditaba tše dibotse ka Kriste” e bile ba bontšha gore ba rata Modimo, Bakristegotee le bona le batho bao e bego e se Bakriste. (Dit. 2:44-47; 5:42) Eupša ba bangwe ba balatedi ba Jesu ba lekgolong la pele la mengwaga ba ile ba dumelela lerato la bona le fola.

3. Ke’ng seo se ka bago se dirile gore lerato la Bakriste ba bangwe le fole?

³ Ge Jesu Kriste yo a tsošitšwego bahung a be a bolela le Bakriste ba lekgolong la pele la mengwaga ba kua Efeso, o itše: “Ke go solela se, gore o tlogetše lerato le o bego o na le lona pele.” (Kut. 2:4) Ke’ng seo se ka bago se dirile gore Bakriste bao ba tlogele lerato leo? Go ka direga gore barutiwa ba ba Kriste ba lekgolong la pele la mengwaga ba be ba ekiša batho ba lefase bao ba sa kwego Modimo. (Baef. 2:2, 3) Go no swana le metse e mentši lehono, motse wa Efeso ya lekgolong la pele la mengwaga o be o tletše ka boitshwaro bjo bo gobogilego. E be e le motse wo o humilego kudu woo badudi ba wona ba bego ba rata dilo tše di bonagalago, boithabišo le go phela bophelo bja maemo. Go bonagala batho ba motseng woo ba be ba rata maipshino kudu go feta go rata Modimo le batho. Go oketša moo, ba be ba na le mereba e bile ba itshwere ka tsela e gobogilego.

4. (a) Go diragetše’ng ka lerato la batho ba bantši lehono? (b) Lerato la rena le ka lekwa dikarolong dife tše tharo?

⁴ Boporofeta bja Jesu bja gore lerato la batho ba bantši le be le tla fola bo sa šoma le lehono. Lehono batho ga ba sa rata Modimo. Batho ba bantši ba hlanogetše Modimo gomme ba lebeletše gore mekgatlo ya batho e be yona e ba rarollelago mathata. Ke ka baka leo lerato la batho bao ba sa hlankelego Jehofa Modimo le tšwelago pele le fola. Eupša go no swana le Bakriste ba phuthegong ya Efeso, lehono Bakriste ba therešo ba ka iketla gomme ba dumelela lerato la bona le fola. Ga bjale re tlo ahlaahla dikarolo tše tharo tšeo go tšona lerato la rena le ka lekwago: (1) Tsela yeo re ratago Jehofa ka yona, (2) tsela yeo re ratago therešo ya Beibele le (3) tsela yeo re ratago bana babo rena le dikgaetšedi.

5. Ke ka baka la’ng re swanetše go rata Modimo?

⁵ Pejana letšatšing leo Jesu a boletšego gore lerato la ba bantši le tla fola, o ile a bolela ka yo re swanetšego go mo rata go feta dilo ka moka. O itše: “‘O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.’ Ye ke taelo e kgolokgolo le ya pele.” (Mat. 22:37, 38) Ruri go rata Modimo ka mo go tseneletšego go re thuša go kwa ditaelo tša gagwe, go kgotlelela mathata le go hloya se sebe. (Bala Psalme 97:10.) Lega go le bjalo, Sathane le batho bao ba mo latelago ba leka ka gohle go fokodiša tsela yeo re ratago Modimo ka yona.

6. Go se sa rata ga batho Modimo go feleleditše ka’ng?

⁶ Batho bao re phelago le bona mo lefaseng ba na le pono e fošagetšego ka lerato. Go e na le gore ba rate Mmopi, ke “baithati.” (2 Tim. 3:2) Batho ba lefase le bao ba bušwago ke Sathane ba gakatša “kganyogo ya nama le kganyogo ya mahlo le pontšho ya bomponeng ya dilo tša motho tša boiphedišo.” (1 Joh. 2:16) Moapostola Paulo o ile a lemoša Bakristegotee le yena ka kotsi ya go kgotsofatša dikganyogo tša nama ge a be a re: “Go bea monagano go tša nama go bolela lehu . . . gobane go bea monagano go tša nama go bolela bonaba go Modimo.” (Baroma 8:6, 7) Ruri batho bao ba feditšego maphelo a bona ba kitimiša dilo tše di bonagalago goba ba kgotsofatša dikganyogo tša bona tša thobalano ba feleleditše ba gobetše o šoro le go nyama.—1 Bakor. 6:18; 1 Tim. 6:9, 10.

7. Balatedi ba Kriste ba lebeletšane le dikotsi dife lehono?

⁷ Dinageng tše dingwe, batho bao ba bolelago gore Modimo ga a gona le bao ba rego re ka se tsebe ge e ba Modimo a le gona gotee le bao ba dumelago gore dilo di itirile ba kgothaletša batho gore ba se ke ba rata Modimo le go dumela go yena. Ba kgodiša batho ba bantši gore go dumela go Mmopi ke botlaela. Ka baka leo, batho bantši ba feleletša ba tšeela godimo borathutamahlale go e na le go hlompha Mmopi wa rena. (Baroma 1:25) Ge e ba le rena re ka theetša dithuto tše bjalo, re ka katologela kgole le Jehofa gomme ra se sa mo rata.—Baheb. 3:12.

8. (a) Ke maemo afe ao a nyamišago ao ba bantši ba batho ba Jehofa ba lebeletšanago le ona? (b) Ke khomotšo efe yeo re e hwetšago go Psalme 136?

⁸ Selo se sengwe seo se ka fokodišago tumelo ya rena ke go nyama. Go nyama go ka dira gore re se sa rata Modimo. Tshepedišong ye e kgopo ya Sathane, ka moka ga rena re fela re nyama. (1 Joh. 5:19) Mohlomongwe gona bjale re tshwenywa ke botšofadi, bolwetši goba maemo a gateletšago a ikonomi. Goba re ka ba re tshwenywa ke go ikwa re se na mohola, go se phethagale ga dilo tšeo re bego re di letetše goba mafokodi a rena. Lega go le bjalo, ga se ra swanela go dumelela dilo tše di dira gore re bone eka Jehofa o re tlogetše. Go e na le moo, re swanetše go naganišiša ka mantšu a kgothatšago ao a bontšhago gore Jehofa o dula a re rata. Mantšu ao re a hwetša go Psalme 136:23, yeo e rego: “[Jehofa o ile] a re gopola mohlang re be re le bobotlaneng, gobane botho bja gagwe ke bja go iša mehleng ya neng le neng.” Ruri Jehofa o rata bahlanka ba gagwe e bile o tla dula a ba rata. Ka baka leo, re ka kgodišega gore o a re kwa “ge [re] mo lopa” gore a re thuše.—Ps. 116:1; 136:24-26.

9. Ke’ng seo se thušitšego Paulo gore a dule a rata Modimo?

⁹ Go swana le mopsalme, Paulo o ile a matlafatšwa ke go naganišiša ka taba ya gore Jehofa o dula a re thekga. O ngwadile gore: “Jehofa ke mothuši wa ka; nka se boife. Motho a ka ntira’ng?” (Baheb. 13:6) Paulo o ile a kgona go lebeletšana le mathata a bophelo ka gobane o be a kgodišegile gore Jehofa o be a tla mo hlokomela. Ga se a ka a dumelela maemo a nyamišago a mo fetša matla. Ge e le gabotse, ge e be e sa le mogolegwa, o ile a ngwala mangwalo a mmalwa ao a kgothatšago. (Baef. 4:1; Bafil. 1:7; Fil. 1) Ee, gaešita le ka dinako tša ge a be a lekwa o šoro, o ile a dula a rata Modimo. O thušitšwe ke’ng go dira bjalo? O thušitšwe ke go dula a ithekga ka “Modimo wa khomotšo yohle, yo a re homotšago ditlaišegong tša rena tšohle.” (2 Bakor. 1:3, 4) Re ka ekiša mohlala wa Paulo bjang gomme ra dula re rata Jehofa kudu?

¹⁰ Selo se sengwe se bohlokwa seo se ka re thušago go dula re rata Jehofa kudu se boletšwe ke Paulo ka boyena. O ile a ngwalela badumedigotee le yena gore: “Le rapeleng ka mehla.” Ka morago o ile a ba ngwalela gore: “Phegelelang thapelong.” (1 Bathes. 5:17; Baroma 12:12) Go boledišana le Modimo ka thapelo ke tsela ya bohlokwa ya gore re be le tswalano ya kgauswi kudu le Yena. (Ps. 86:3) Ge re fetša nako e ntši re botša Jehofa seo se lego menaganong ya rena le go mo tšhollela sa mafahleng, re tla batamela kgauswi kudu le Tatago rena wa legodimong, yena “Mokwi wa thapelo.” (Ps. 65:2) Go oketša moo, ge re lemoga gore Jehofa o araba dithapelo tša rena, seo se dira gore re mo rate le go feta. Le gona re thoma go lemoga le go feta gore “Jehofa o kgauswi le bohle bao ba mmitšago.” (Ps. 145:18) Go dumela gore Jehofa o tla dula a re thekga go tla re thuša go ema re tiile ge tumelo ya rena e lekwa.

11, 12. Re ka dira’ng gore re rate therešo ya Beibele kudu?

¹¹ Ka ge re le Bakriste, re rata therešo e bile re e tšeela godimo. Lentšu la Modimo ke lona feela le swerego therešo. Ge Jesu a be a rapela Tatagwe, o itše: “Lentšu la gago ke therešo.” (Joh. 17:17) Ka gona, e le gore re rate therešo, sa pele re swanetše go ba le tsebo e nepagetšego ya Lentšu la Modimo. (Bakol. 1:10) Lega go le bjalo, go fo tseba therešo ga se gwa lekana. Ela hloko kamoo mongwadi wa Psalme 119 a re thušago go kwešiša seo se bolelwago ke go rata therešo ya Beibele. (Bala Psalme 119:97-100.) Na letšatši le lengwe le le lengwe re ipha nako ya go naganišiša ka ditemana tša Beibele? Ge re naganišiša ka ditsela tšeo re holegago ka tšona ge re diriša therešo ya Beibele maphelong a rena, re tlo e rata le go feta.

¹² Mopsalme o tšwetše pele ka gore: “Dipolelo tša gago di boreledi gakaakang magalagapeng a ka, di tloga di le boreledi go feta dinose molomong wa ka!” (Ps. 119:103) Ka mo go swanago, le rena re ka iphepa ka dijo tše dibose tša moya tše di theilwego Beibeleng tšeo re di newago ke mokgatlo wa Modimo. Re ka fetša nako ya rena e ntši re naganišiša ka seo re se balago e le gore re tle re kgone go gopola “mantšu a thabišago” a therešo le go a diriša go thuša ba bangwe.—Mmo. 12:10.

13. Ke’ng seo se thušitšego Jeremia go rata therešo ya Mangwalo, gona therešo yeo e ile ya mo hola bjang?

¹³ Moporofeta Jeremia o be a rata therešo ya Mangwalo. Ela hloko kamoo mantšu a Modimo a kgomilego pelo ya gagwe. O itše: “Ge ke hwetša mantšu a gago ke ile ka a dira dijo tša ka; lentšu la gago le ntlišetša tlhalalo le lethabo pelong ya ka; gobane ke bitšwa ka leina la gago, wena Jehofa Modimo wa madira.” (Jer. 15:16) Jeremia o ile a ithuta mantšu a bohlokwa a Modimo gomme a naganišiša ka ona. Seo se ile sa mo thuša gore a tšeele godimo kudu tokelo ya go bitšwa ka leina la Modimo. Na go rata therešo ya Beibele go dirile gore re lemoge tokelo ya moswananoši yeo re nago le yona ya go bitšwa ka leina la Modimo le go botša batho ka Mmušo wa gagwe mehleng ye ya bofelo?

14. Ke’ng se sengwe gape seo se ka re thušago go rata therešo ya Beibele kudu?

¹⁴ Ka ntle le go bala Beibele le dikgatišo tša rena tšeo di theilwego Beibeleng, ke’ng gape seo se ka re thušago go rata therešo ya Beibele? Re ka rata therešo ya Beibele kudu ka go ba gona dibokeng tša phuthego ka mehla. Thuto ya Morokami ke tsela e kgolo yeo Jehofa a e dirišago go re ruta Beibele beke le beke. E le gore re holege thutong e nngwe le e nngwe ya Morokami, re swanetše go lokišetša gabotse. Tsela e nngwe ya go lokišetša gabotse ke ka go bala mangwalo ka moka ao a lego sehlogong seo se ithutwago. Se se kgahlišago ke gore lehono re kgona go taonelouta Morokami wepesaeteng ya rena ya jw.org goba lenaneong la JW Library ka maleme a mantši. Ge motho a lokišetša sehlogo se ithutwago sa Morokami sedirišweng sa elektroniki, o kgona go bula Mangwalo kapejana gona moo. Eupša go sa šetšwe gore re diriša mekgwa efe ge re lokišetša diboka, go bala ka kelohloko mangwalo ka moka ao a tšwelelago dirapeng le go naganišiša ka ona go tla dira gore re rate therešo ya Beibele kudu.—Bala Psalme 1:2.

15, 16. (a) Go ya ka Johane 13:34, 35, ke’ng seo re tlamegilego go se dira? (b) Go rata bana babo rena go sepedišana bjang le go rata Modimo le Beibele?

¹⁵ Bošegong bja gagwe bja mafelelo mo lefaseng, Jesu o ile a re go barutiwa ba gagwe: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba ka, ge e ba le ratana.”—Joh. 13:34, 35.

¹⁶ Go rata bana babo rena le dikgaetšedi go sepedišana le go rata Jehofa. Re ka se bolele gore re rata Modimo mola re sa rate bana babo rena. Moapostola Johane o ngwadile gore: “Yo a sa ratego ngwanabo yo a mmonago, a ka se rate Modimo yo a sa kago a mmona.” (1 Joh. 4:20) Go oketša moo, go rata bana babo rena le dikgaetšedi le go rata Jehofa go sepedišana le go rata Beibele. Ke ka baka la’ng re re’alo? Ke ka gobane go rata therešo ya Beibele go dira gore re phethe ditaelo tša Mangwalo tša gore re rate Modimo le bana babo rena.—1 Pet. 1:22; 1 Joh. 4:21.

17. Re ka bontšha bjang gore re rata bana babo rena le dikgaetšedi ka phuthegong?

¹⁷ Bala 1 Bathesalonika 4:9, 10. Re ka bontšha bjang gore re rata bana babo rena le dikgaetšedi ka phuthegong? Re ka bontšha seo ka go tliša batšofadi ba rena dibokeng ka koloi. Re ka lokišetša bahlologadi dilo tšeo di senyegilego. (Jak. 1:27) Re swanetše go thuša bana babo rena le dikgaetšedi bao ba nyamilego, bao ba gateletšegilego le bao ba lebeletšanego le diteko tše dingwe ka go ba kgothatša le go ba homotša, go sa šetšwe gore ke ba bagolo goba ba banyenyane.(Die. 12:25; Bakol. 4:11) Re bontšha bana babo rena gore re ba rata kudu ge re ba botša mantšu a kgothatšago le go ba direla dilo tšeo di bontšhago gore re tshwenyega ka “bao ba tswalanego le rena tumelong.”—Bagal. 6:10.

18. Ke’ng seo se tlago go re thuša go rarolla diphapano tše dinyenyane tšeo re ka bago le tšona le badumedigotee le rena?

¹⁸ Beibele e boletše e sa le pele gore ‘mehleng ya bofelo’ bja tshepedišo ye e mpe batho ba tlo ba le boithati le megabaru. (2 Tim. 3:1, 2) Ka gona ka ge re le Bakriste, re swanetše go šoma ka thata gore re rate Modimo kudu, re rate therešo ya Beibele kudu le go ratana kudu. Ke therešo gore re tlo fela re eba le diphapano tše dinyenyane le badumedigotee le rena. Lega go le bjalo, re thabišwa kudu ke gore lerato le re tutueletša go rarolla diphapano tšeo ka tsela e lerato. (Baef. 4:32; Bakol. 3:14) Ka gona, anke le ka mohla re se ka ra dumelela lerato la rena le fola! Go e na le moo, anke re tšweleng pele re rata Jehofa ka pelo ka moka, Lentšu la gagwe gotee le bana babo rena le dikgaetšedi.