KA GE re phela lefaseng leo le tletšego mathata, re swanetše go šoma ka thata gore re be le khutšo. Eupša le ge re ka ba re na le khutšo, gantši go ba thata gore re dule re na le yona. Ke’ng seo Lentšu la Modimo le se bolelago seo se ka re thušago gore re hwetše khutšo ya kgonthe? Gona re ka thuša ba bangwe bjang gore ba be le yona?

Re ka ba le khutšo ya kgonthe ge feela re ikwa re šireletšegile e bile re theošitše maswafo. Le gona re swanetše go ba le bagwera ba babotse, sa bohlokwa le go feta, re swanetše go ba le segwera se sebotse le Modimo e le gore re be le khutšo ya kgonthe. Re ka dira seo bjang?

Ge re ekwa ditaelo tša Jehofa tše di lokilego le melao ya gagwe ya motheo, re bontšha gore re a mmota le gore re nyaka go ba le segwera se sebotse le yena. (Jer. 17:7, 8; Jak. 2:22, 23) Le yena o tlo batamela kgauswi le rena e bile a re nea khutšo ya kgonthe. Jesaya 32:17 e re: “Modiro wa toko e tlo ba khutšo; tirelo ya toko e tlo ba khutšo le polokego go iša mehleng ya neng le neng.” Re ka ba le khutšo ya kgonthe ge e ba re ekwa Jehofa ka dipelo tša rena ka moka.​—Jes. 48:18, 19.

Le gona Tatago rena wa legodimong o re nea mpho ya gagwe e bohlokwahlokwa e lego moya o mokgethwa, woo o re thušago go ba le khutšo ya kgonthe.​—Dit. 9:31.

Moapostola Paulo o bolela ka khutšo e lego se sengwe sa “dika tšeo di enywago ke moya.” (Bagal. 5:22, 23) Ka ge khutšo ya kgonthe e tšweletšwa ke moya o mokgethwa wa Modimo, re swanetše go o dumelela gore o re o šome ka gare ga rena e le gore re be le khutšo. A re kweng ka ditsela tše pedi tšeo moya wa Modimo o ka re thušago gore re be le khutšo.

Sa pele, ge re bala Lentšu la Modimo ka mehla, re kgona go ba le khutšo. (Ps. 1:2, 3) Ge re  naganišiša ka molaetša wa Beibele, moya wa Modimo o re thuša go kwešiša tsela yeo Modimo a naganago ka yona ditabeng tša go fapafapana. Ka mohlala, re kgona go bona kamoo a dulago a na le khutšo e bile re kgona go bona gore ke ka baka la eng khutšo e le bohlokwa go yena. Ge re diriša dithuto tše bjalo tše di tšwago Lentšung la Modimo, re ba le khutšo e kgolo maphelong a rena.​—Die. 3:1, 2.

Sa bobedi, re swanetše go rapela Modimo gore a re nee moya wa gagwe o mokgethwa. (Luka 11:13) Jehofa o holofetša gore ge e ba re tsoma thušo ya gagwe, “khutšo ya [gagwe] yeo e fetago kwešišo yohle ya batho e tla diša dipelo tša [rena] le matla a [rena] a monagano ka Kriste Jesu.” (Bafil. 4:6, 7) Ge re kgopela moya o mokgethwa ka mehla, Modimo wa rena o re nea khutšo ya kgonthe yeo e hwetšwago feela ke bao ba nago le segwera se sebotse le yena.​—Baroma 15:13.

Beibele e thušitše batho ba bantši gore ba dire diphetogo maphelong a bona, gomme ga bjale ba na le khutšo le Jehofa, khutšo ya monagano le khutšo le batho ba bangwe. Ba kgonne bjang go dira diphetogo tše?

Lehono ka phuthegong ya Bokriste, go na le batho ba bangwe bao ba kilego ba ba bogale, eupša ga bjale ba naganela batho ba bangwe, ba botho, ga ba fele pelo e bile ba dirišana le ba bangwe ka khutšo. * (Die. 29:22) Ela hloko kamoo se se ilego sa diragalela bagoeledi ba babedi bao ba ilego ba thušwa go fenya pefelo ya bona gomme ba phela ka khutšo le ba bangwe.

Pele David a ithuta Beibele, gantši o be a sa sware batho ba bangwe gabotse gomme a bolela le ditho tša lapa la gagwe gampe. Eupša ka morago o ile a lemoga gore o swanetše go fetoga. O thušitšwe ke’ng gore a be le khutšo? O re: “Ke ile ka thoma go diriša melao ya motheo ya Beibele gomme seo se ile sa dira gore lapa la ka le ntlhomphe le nna ke le hlomphe.”

Tikologo yeo Rachel a godišeditšwego go yona e ile ya dira gore a be le mekgwa e mebe. O re: “Gaešita le gona bjale, ke fela ke galefa ka gobane ke godišeditšwe lapeng leo batho ba  gona ba bego ba le bogale.” O thušitšwe ke’ng gore a be le khutšo? O re: “Ke thušitšwe ke go rapela Jehofa ka mehla gore a nthuše.”

David le Rachel ba re beetše mehlala yeo e bontšhago gore ge re diriša melao ya motheo ya Beibele gomme re kgopela Modimo gore a re nee moya wa gagwe o mokgethwa gore o re thuše, re tlo ba le khutšo. Go molaleng gore go sa šetšwe gore re phela lefaseng le lebe, re ka kgona go ba le khutšo ya kgonthe yeo e dirago gore re phele ka khutšo le ditho tša malapa gotee le Bakristegotee le rena. Le gona, Jehofa o re kgothaletša gore “[re be] le khutšo le batho bohle.” (Baroma 12:18) Na seo se a kgonega, le gona ge re dira khutšo re tlo hwetša mehola efe?

Ge re bolela ditaba tše dibotse tšhemong, re botša batho ka molaetša wa khutšo wa Mmušo wa Modimo. (Jes. 9:6, 7; Mat. 24:14) Se se kgahlišago ke gore batho ba bantši ba theetša molaetša wa rena e bile ba a o amogela. Seo se dira gore ba se sa boifa goba go befelwa ge ba bona dilo tšeo di diregago mo lefaseng. Go e na le moo, ga bjale ba na le kholofelo ya kgonthe ka bokamoso le gona ba tutueletšega go ‘tsoma khutšo le go e phegelela.’​—Ps. 34:14.

Ga se batho ka moka bao ba arabelago gabotse molaetšeng wa rena di tloga fase. (Joh. 3:19) Lega go le bjalo, moya o mokgethwa o re thuša gore re ba botše ditaba tše dibotse ka moya wa khutšo le wa tlhompho. Ge re dira bjalo re latela ditaelo tša Jesu tšeo a di boletšego mabapi le bodiredi tšeo di begilwego go Mateo 10:11-13. Jesu o itše: “Ge le tsena ka ntlong le dumediše ba ntlo yeo. Ge e ba ntlo e swanela, a khutšo yeo le e kganyogelago yona e e tlele, eupša ge e ba e sa swanele, a khutšo ya lena e boele go lena.” Ge re ekwa keletšo ya Jesu, re tla kgona go tlogela motho yoo ka khutšo gomme ra holofela gore nakong e tlago o tla theetša.

Le gona re dira gore go be le khutšo ge re boledišana le baemedi ba mmušo ka tlhompho, go akaretša le bao ba ka bago ba ganetša modiro wa rena. Ka mohlala, nageng e nngwe Afrika, batho ba bantši ba be ba hloile Dihlatse tša Jehofa, ka gore’alo, mmušo o be o sa dumelele bana babo rena ba moo go aga Diholo tša Mmušo. Bana babo rena ba be ba nyaka go rarolla taba ye ka khutšo. Ka gona ba ile ba romela ngwanabo rena yoo a bego a kile a hlankela e le moromiwa nageng yeo. Ba ile ba mo romela gore a ye go Mokomišinare yo Mogolo kua London, Engelane gomme a mmotše gore mošomo woo o dirwago ke Dihlatse tša Jehofa ke wa khutšo. Mafelelo e bile afe?

O re: “Eitše ge ke fihla mo go amogelwago baeng gomme ke bona tsela yeo moamogela baeng a bego a apere ka yona, ka lemoga gore o bolela leleme leo ke bego ke ithutile lona. Ka gona ke ile ka mo dumediša ka segagabo. A maketše, o ile a mpotšiša gore: ‘Nka go thuša ka’ng?’ Ke ile ka mmotša ka botho gore ke be ke kgopela go bona Mokomišinare yo Mogolo. O ile a founela Mokomišinare yoo gomme ge a fihla go nna a ntumediša ka leleme la lefelong leo. Ka morago ga moo, o ile a ntheetša ka kelohloko ge ke mo hlalosetša kamoo mediro ya Dihlatse tša Jehofa e lego ya khutšo ka gona.”

Tsela yeo ngwanabo rena a ilego a hlalosetša Mokomišinare ka tlhompho e ile ya dira gore mokomišinare a kwešiše modiro wa rena gakaone e bile a se sa re hloya. Ka morago ga nako e itšego, mmušo wa naga yeo o ile wa se sa thibela go agwa ga mafelo a rena a borapedi. Ruri bana babo rena ba ile ba thabela seo! Ke therešo gore go dirišana le batho ba bangwe ka tlhompho go tliša mehola e mentši, go akaretša le khutšo.

Lehono, ge bahlanka ba Jehofa ba dutše ba mo hlankela, ba thabela paradeise ya moya yeo e nago le khutšo. Yo mongwe le yo mongwe wa rena a ka dira gore go be le khutšo ye ge a dutše a šoma ka thata gore a be le yona bophelong bja gagwe. Sa bohlokwa le go feta, Jehofa o tlo go amogela gomme wa hwetša khutšo e kgolo le yeo e sa felego lefaseng le lefsa la Modimo.​—2 Pet. 3:13, 14.