1, 2. (a) Ke ka baka la’ng re kgothatšwa ke bana babo rena bao ba šomago ka go botega mafelong ao batho ba sa thabelego molaetša wa Modimo? (Bona seswantšho se se lego ka mo godimo.) (b) Jesu o boletše’ng mabapi le go bolela ditaba tše dibotse “seleteng sa gabo”? (Bona mongwalo wa ka tlase.)

SERGIO LE OLINDA ke banyalani ba babulamadibogo bao ba lego mengwageng ya bo-80, bao ba dulago United States. Matšatši a ba opelwa ke maoto gomme se se ba dira gore ba thatafalelwe ke go sepela. Lega go le bjalo, mesong e mengwe le e mengwe ba sepela ka maoto go ya lefelong leo go fetago batho ba bantši toropong, gomme ba fihla moo ka iri ya bošupa mesong. Ba na le mengwaga e mentši ba dira se. Ba ema kgauswi le moo dipese di nametšago batho gona, gomme ba nea batho bao ba fetago ka tsela dikgatišo tša rena tša Beibele. Gaešita le ge batho ba bantši ba sa tšee dikgatišo tšeo, banyalani ba ba dula ba le gona lefelong leo, ba myemyelela batho bao ba ba lebelelago. Ge e eba mosegare, ba ikela gae ba tšama ba sepela ka go iketla. Mesong e latelago, ka iri ya bošupa, ba boela gape lefelong leo. Ge e le gabotse, banyalani ba bao ba botegago, ba bolela molaetša wa Mmušo wa Modimo matšatši a  tshela mo bekeng, ba dira se ngwaga ka moka.

² Go swana le Sergio le Olinda, bana babo rena le dikgaetšedi bao ba botegago lefaseng ka moka ba na le mengwaga e mentši ba bolela ditaba tše dibotse mafelong a gabo bona ao batho ba gona ba sa thabelego molaetša wa Modimo. Ge e ba le wena o lebane le boemo bjoo, re go reta kudu ka ge o bontšha kgotlelelo. * Ge o kgotlelela maemong a bjalo o kgothatša ba bantši—gaešita le bana babo rena bao ba godilego moyeng. Ka mohlala, ekwa seo se boletšwego ke balebeledi ba bangwe ba tikologo. Molebeledi yo mongwe o itše: “Ge ke šoma tšhemo le bana babo rena le dikgaetšedi ba bjalo bao ba botegago, ke ikwa ke matlafatšwa ke mohlala wa bona.” Yo mongwe o itše: “Go botega ga bona go ntira gore ke kgotlelele gomme ke bontšhe sebete ge ke le tšhemong.” Yo mongwe a re: “Mohlala wa bona o a nthabiša.”

3. Re tlo araba dipotšišo dife tše tharo sehlogong se, gona ka baka la’ng?

³ Sehlogong se re tlo araba dipotšišo tše tše tharo: (1) Ke ka baka la’ng ka dinako tše dingwe re ka ikwa re nyamile? (2) Re ka enywa dienywa bjang? (3) Ke’ng seo se ka re thušago go tšwela pele re enywa dienywa ka kgotlelelo? Go tseba dikarabo tša dipotšišo tše go tla re thuša gore re tšwele pele re bolela ditaba tše dibotse tšeo Jesu a re laetšego gore re di botše batho.

4. (a) Paulo o ile a ikwa bjang ge Bajuda ba bantši ba be ba gana go kwa molaetša wa Modimo? (b) Ke ka baka la’ng Paulo a ile a ikwa ka tsela yeo?

⁴ Na o kile wa nyamišwa ke gore batho ba tšhemong ya geno ga ba nyake go theetša molaetša wa Mmušo wa Modimo? Ge e ba go le bjalo, gona o tla kwešiša kamoo moapostola Paulo a ilego a ikwa ka gona. O ile a fetša mo e ka bago mengwaga e 30 a botša batho ditaba tše dibotse, le gona o ile a thuša batho ba bantši gore e be Bakriste. (Dit. 14:21; 2 Bakor. 3:2, 3) Lega go le bjalo, ga se a ka a kgona go thuša Bajuda ba bantši gore e be Bakriste. Go e na le moo, ba bantši ba bona ba ile ba gana go mo theetša, e bile ba bangwe ba ile ba mo tlaiša. (Dit. 14:19; 17:1, 4, 5, 13) Seo se ile sa dira gore Paulo a ikwe bjang? Paulo o itše: “Ke bolela therešo mabapi le Kriste; . . . ke na le manyami a magolo le bohloko bjo bo sa kgaotšego pelong ya ka.” (Baroma 9:1-3) Ke ka baka la’ng Paulo a ile a ikwa ka tsela yeo? Ke ka gobane o be a rata go bolela ditaba tše dibotse. Ge a be a botša Bajuda ditaba tše dibotse o be nyaka gore Modimo a ba amogele. Ka gona o ile a kwa bohloko kudu ge ba be ba gana kgaugelo ya Jehofa.

5. (a) Ke’ng seo se re tutueletšago go botša baagišani ba rena ditaba tše dibotse? (b) Ke ka baka la’ng e se phošo ge ka dinako tše dingwe re ikwa re nyamile ge batho ba sa amogele molaetša wa Modimo?

⁵ Go swana le Paulo, le rena re botša batho ditaba tše dibotse ka gobane re ba rata e bile re nyaka gore Jehofa a ba amogele. (Mat. 22:39; 1 Bakor. 11:1) Re iponetše ka a rena mahlo gore ge motho a kgetha go hlankela Jehofa, o ipshina ka bophelo. Ge re nagana ka batho bao ba lego tšhemong ya gabo rena, ka pelong re re: ‘Okare le bona ba ka kwa gore go hlankela Jehofa go bose bjang!’ Ka gona, re tšwela pele re ba kgothaletša gore ba ithute therešo ka Jehofa le morero wa gagwe ka batho. Ge e le gabotse, re re go bona: ‘Re go tlišeditše mpho e botse. Hle e amogele.’ Ka gona ge batho ba gana go amogela mpho ye e botse re kwa bohloko go swana le Paulo. Ga se gore ge re nyama ga re na tumelo, eupša re bontšha gore re rata batho. Ka gona le ge re fela re nyama, re a kgotlelela. Re ka dumelelana le Elena yo a nago le mengwaga e 25 a bula madibogo ge a re: “Go bolela ditaba tše dibotse ga go bonolo. Lega go le bjalo, ga go na mošomo wo nka thabelago go o dira go feta wo.”

6. Re tlo araba potšišo efe, gona re tlo hwetša karabo bjang?

⁶ Ke ka baka la’ng re ka kgodišega gore re ka atlega ge re bolela ditaba tše dibotse go sa šetšwe gore  re šoma tšhemo efe? E le gore re arabe potšišo ye e bohlokwa, anke re ahlaahleng tše pedi tša diswantšho tša Jesu, tšeo di bolelago ka bohlokwa bja go “enywa dienywa.” (Mat. 13:23) Seswantšho sa mathomo se bolela ka morara.

7. (a) Seswantšhong sa Jesu, ke mang yo a emelwago ke “molemi,” “morara” le “makala”? (b) Ke potšišo efe yeo re nyakago go hwetša karabo ya yona?

⁷ Bala Johane 15:1-5, 8. Hlokomela gore Jesu o boditše baapostola ba gagwe gore: “Tate o tagafatšwa ka se, gore le tšwele pele le enywa dienywa tše dintši gomme le itlhatsele le le barutiwa ba ka.” Jesu o hlalositše Jehofa e le “molemi,” yena a itlhalosa e le “morara wa kgonthe,” gomme barutiwa ba gagwe a ba hlalosa e le “makala.” * Bjale, dienywa tšeo balatedi ba Kriste ba swanetšego go di enywa ke’ng? Seswantšhong se, Jesu ga se a bolela ka go lebanya gore dienywa tšeo ke eng, eupša o boletše ka dilo tšeo di tlago go re thuša gore re hwetše karabo.

8. (a) Seswantšhong sa Jesu, ke ka baka la’ng go “enywa dienywa” go sa bolele go thuša batho gore ba tle ka phuthegong? (b) Ke’ng seo re ka kgodišegago ka sona mabapi le dilo tšeo Jehofa a re kgopelago go di dira?

⁸ Ge Jesu a be a bolela ka Tatagwe, o itše: “Lekala le lengwe le le lengwe le le lego go nna leo le sa enywego dienywa o a le tloša.” Ka mantšu a mangwe, Jehofa o re lebelela re le bahlanka ba gagwe ge feela re enywa dienywa. (Mat. 13:23; 21:43) Ka go re’alo, seswantšhong se, ge go bolelwa ka dienywa tšeo Mokriste yo mongwe le yo mongwe a swanetšego go di enywa, ga go bolelwe ka go tliša batho ka phuthegong. (Mat. 28:19) Ke ka baka la’ng re re’alo? Ka gobane ge nkabe go le bjalo, bana babo rena le dikgaetšedi ba bantši bao ba botegago bao ba sa kago ba kgona go thuša motho yo a itšego gore e be Hlatse ya Jehofa ba be ba tla swana le makala ao a sa enywego dienywa. Eupša seo ga se nnete! Ka baka la’ng? Ka gobane re ka se gapeletše batho gore e be barutiwa ba Jesu. Le gona Jehofa o a re rata, a ka se tsoge a re kgopetše gore re dire selo seo re ka se kgonego go se dira. Jehofa o re kgopela feela dilo tšeo re ka kgonago go di dira.​—Doit. 30:11-14.

9. (a) Re enywa dienywa ka go tšea karolo mošomong ofe? (b) Re tlo bolela ka seswantšho sefe, gona ka baka la’ng?

⁹ Bjale dienywa tšeo re swanetšego go di enywa ke’ng? Go molaleng gore ke mošomo woo ka moka ga rena re ka kgonago go o dira. Ke mošomo ofe wo Jehofa a o neilego bahlanka ba gagwe ka moka? Ke wa go bolela ditaba tše dibotse tša Mmušo wa Modimo. * (Mat. 24:14) Seswantšho sa Jesu sa mobjadi se dira gore re kwešiše mošomo wo gabotse. Anke ga bjale re boleleng ka seswantšho se sa bobedi.

10. (a) Seswantšhong sa mobjadi, ke’ng seo se emelwago ke peu le mmu? (b) Ke’ng seo se tšweletšwago ke korong?

¹⁰ Bala Luka 8:5-8, 11-15. Seswantšhong sa mobjadi, peu e emela “lentšu la Modimo,” goba molaetša wa Mmušo wa Modimo. Mmu o emela pelo ya seswantšhetšo, e lego seo motho a lego sona ka gare. Peu yeo e wetšego mmung o mobotse e ile ya mela, ya gola ke moka ya ba semela. Ke moka semela seo sa “tšweletša dienywa ga lekgolo.” Ge e ba semela seo e be e le korong, se be se tlo tšweletša dienywa tša mohuta mang? Na se be se tlo tšweletša dimela tše dinyenyane tša korong? Aowa, se be se tlo tšweletša peu e mpsha yeo e ka feleletšago e le dimela tša korong. Seswantšhong se, thoro e tee ya peu ya korong e tšweletša dithoro tše lekgolo tša peu ya korong. Seswantšho se se re ruta’ng ka bodiredi bja rena?

11. (a) Seswantšho sa mobjadi se re ruta’ng ka bodiredi bja rena? (b) Re tšweletša bjang peu e mpsha ya Mmušo wa Modimo?

¹¹ A re re Dihlatse tša Jehofa goba batswadi ba rena ba Bakriste ba ile ba re ruta ka molaetša wa Mmušo wa Modimo. Seo se be se le bjalo ka ge eka ba bjala peu mmung o mobotse. Ba ile ba thaba  kudu ge ba bona gore re rata molaetša wo. Go no swana le ge mmu o mobotse o ile wa boloka peu, le rena re ile ra amogela molaetša woo gomme ra o boloka. Ka go re’alo, peu yeo e swanago le molaetša wa Mmušo wa Modimo e ile ya mela, ya gola gomme ge nako e dutše e eya ya lokela go enywa dienywa. Go no swana le ge semela se sa tšweletše semela e le seenywa eupša se tšweletša peu e le seenywa, ka mo go swanago le rena ga re tšweletše barutiwa ba bafsa e le dienywa eupša re tšweletša peu e mpsha ya Mmušo wa Modimo. * Peu yeo e mpsha re e tšweletša bjang? Nako le nako ge re botša batho ka molaetša wa Mmušo wa Modimo, go ba bjalo ka ge eka re gaša peu yeo e ilego ya bjalwa ka dipelong tša rena. (Luka 6:45; 8:1) Ka gona, seswantšho se se re ruta gore ge feela re tšwela pele re bolela molaetša wa Mmušo wa Modimo, re “enywa dienywa ka kgotlelelo.”

12. (a) Re ithuta’ng seswantšhong sa Jesu sa morara le sa mobjadi? (b) O ikwa bjang ka seo o ithutilego sona?

¹² Re ithuta’ng seswantšhong sa Jesu sa morara le sa mobjadi? Re ithuta gore go “enywa dienywa” ga se gwa ithekga ka tsela yeo batho ba arabelago ka yona molaetšeng wa Mmušo wa Modimo. Go e na le moo, go “enywa dienywa” ke go phetha ka potego mošomo woo Jehofa a re neilego wona. Paulo o boletše taba e swanago le yeo ge a be a re: “Yo mongwe le yo mongwe o tla amogela moputso wa gagwe go ya ka boitapišo bja gagwe,” goba seo a se dirago tšhemong. (1 Bakor. 3:8) Moputso wo re tlago go o hwetša o ithekgile ka seo re se dirago tšhemong, e sego mafelelo a seo re se dirago. Matilda yo a nago le mengwaga e 20 a bula madibogo o re: “Ke thabišwa ke go tseba gore Jehofa o putsa maiteko ao re a dirago.”

13, 14. Go ya ka Baroma 10:1, 2, ke mabaka afe ao a dirilego gore Paulo a se tlogele go botša Bajuda molaetša wa Mmušo wa Modimo le ge ba be ba sa nyake go o kwa?

¹³ Ke’ng seo se tlago go re thuša go tšwela pele re enywa dienywa ka kgotlelelo? Bjalo ka ge re kwele, Paulo o ile a nyamišwa ke ge Bajuda ba be ba sa theetše molaetša wa Mmušo wa Modimo. Lega go le bjalo, ga se a ka ba ngala. Hlokomela seo a ilego a se bolela ka Bajuda bao ge a be a ngwalela Bakriste ba kua Roma lengwalo. O itše: “Seo ke se kganyogago go tšwa pelong le seo ke lopelago Baisiraele ka sona go Modimo ke gore ruri  ba phološwe. Gobane ke ba hlatsela gore ba fišegela Modimo; eupša e sego go ya ka tsebo e nepagetšego.” (Baroma 10:1, 2) Bjale ke ka baka la’ng Paulo a ile a no tšwela pele a botša Bajuda ditaba tše dibotse?

¹⁴ Sa pele, Paulo o ile a bolela gore o be a tutueletšega go botša Bajuda ditaba tše dibotse ka baka la “seo [a] se kganyogago go tšwa pelong.” O be a tloga a nyaka gore Bajuda ba phološwe. (Baroma 11:13, 14) Sa bobedi, Paulo o boletše gore o ba ‘lopela go Modimo.’ O ile a kgopela Modimo ka thapelo gore a thuše Mojuda yo mongwe le yo mongwe gore a amogele molaetša wa Mmušo wa Gagwe. Sa boraro, Paulo o boletše gore: “Ba fišegela Modimo.” O be a holofela gore Bajuda ba ka fetoga. O be a tseba gore Bajuda ba, bao ba bego ba fišega, ba be ba ka fetoga go swana le yena, ya ba barutiwa ba Kriste bao ba fišegago.

15. Re ka ekiša Paulo bjang? Nea mehlala.

¹⁵ Re ka ekiša Paulo bjang? Sa pele, re swanetše go šoma ka thata gore re nyake batho bao ba nago “le tshekamelo e swanetšego ka bophelo bjo bo sa felego.” Sa bobedi, re lopa Jehofa ka thapelo gore a thuše batho ba dipelo tše dibotse gore ba theetše ge re ba botša ka molaetša wa Mmušo wa Gagwe. (Dit. 13:48; 16:14) Silvana yo a nago le mengwaga e ka bago e 30 a bula madibogo, o re: “Pele nka tsena ka ntlong e itšego ge ke le tšhemong, ke rapela Jehofa gore a nthuše go ba le pono e botse ka batho ba lapeng leo ke tsenago go lona.” Le gona, re kgopela Modimo gore a re thuše gore barongwa ba re hlahle go hwetša batho bao ba nyakago go kwa molaetša. (Mat. 10:11-13; Kut. 14:6) Robert, yo a nago mengwaga e fetago e 30 a bula madibogo o re: “Go a thabiša go šoma le barongwa bao ba tsebago seo se diregago maphelong a batho bao re ba botšago molaetša wa Beibele.” Sa boraro, re leka go tshepa gore batho bao re ba botšago molaetša ba ka fetoga. Carl, e lego mogolo yo a nago le mengwaga e fetago e 50 a kolobeditšwe, o re: “Ke lebelela selo se senyenyane seo se ka bontšhago gore motho o thabela molaetša wo re mo swaretšego wona. E ka ba go myemyela, go re lebelela ka botho, goba go re botšiša potšišo yeo e bontšhago gore o nyaka go tseba.” Ee, go swana le Paulo, re ka kgotlelela ge re enywa dienywa.

16, 17. (a) Ke’ng seo re ithutago sona go Mmoledi 11:6? (b) Hlalosa kamoo mošomo wa rena wa go bjala peu o ka kgomago ba bangwe ka gona.

¹⁶ Gaešita le ge go ka bonagala eka molaetša wo re o botšago batho ga o ba fihlelele dipelo, ga se ra swanela go nyatša mošomo wo re o dirago wa go bjala peu. (Bala Mmoledi 11:6.) Ke therešo gore batho ba bantši ga ba re theetše ge re ba botša molaetša wa Beibele, eupša ba bona seo re se dirago. Ba a bona gore re apara gabotse, re itshwara gabotse e bile re batho ba go thaba. Ge nako e dutše e eya, boitshwaro bja rena bo ka dira gore batho bao mathomong ba bego ba sa re rate ba thome go re rata. Sergio le Olinda, bao re boletšego ka bona mathomong, ba ile ba bona nnete ya taba ye.

¹⁷ Sergio o re: “Ka ge re be re babja, re ile ra fetša nako e telele re sa ye lefelong lela re bego re ema go lona bakeng sa go botša batho ka molaetša wa Modimo. Ka morago ga gore re boele, batho bao ba bego ba ehlwa ba re bona ba ile ba re botšiša gore, ‘Le be le le kae? Ke kgale re sa le bone.’” Olinda, a bolela ka go myemyela o re: “Baotledi ba dipese ba be ba re emišetša matsogo gomme ba bangwe ba goeletša ba le ka moo peseng ba re, ‘Le dira mošomo o mobotse!’ Ba be ba bile ba kgopela dimakasine tša rena.” Le gona banyalani ba ba ile ba makala ge monna yo mongwe a etla mo ba lego gona, a ba nea matšoba gomme a ba leboga ka mošomo o mobotse wo ba o dirago.

18. Ke ka baka la’ng o nyaka go “enywa dienywa ka kgotlelelo”?

¹⁸ Ge feela re sa ‘khutšiše diatla tša rena’ go bjaleng peu ya Mmušo wa Modimo, re kgatha karolo e bohlokwa kudu ya go nea “bohlatse go ditšhaba tšohle.” (Mat. 24:14) Go feta tšohle, re hwetša lethabo la kgonthe leo le tlišwago ke go tseba gore re amogelwa ke Jehofa, ka ge a rata bohle bao ba ‘enywago dienywa ka kgotlelelo’!