1. Ka morago ga gore Adama le Efa ba dire sebe, Jehofa o ile a utolla’ng ka lenaba la rena?

GA GO pelaelo gore Adama o be a tseba gore dinoga ga di kgone go bolela. Ka gona a ka ba a ile a no inaganela gore sebopiwa sa moya se boletše le Efa se diriša noga. (Gen. 3:1-6) Adama le Efa ba be ba sa tsebe gore sebopiwa seo ke mang. Lega go le bjalo, Adama o ile a kgetha go kwa sebopiwa se, seo a bego a sa se tsebe gomme a hlanogela Tatagwe yo lerato wa legodimong. (1 Tim. 2:14) Ka pelapela, Jehofa o ile a thoma go utolla mo gontši ka lenaba leo gomme a tshepiša gore mafelelong o tlo le fediša. Le gona Jehofa o ile a lemoša gore ka nakwana, sebopiwa seo sa moya se be se tlo ganetša batho bao ba ratago Modimo.​—Gen. 3:15.

2, 3. Ke’ng seo se ka bago se dirile gore Jehofa a se bolele kudu ka Sathane pele Mesia a etla lefaseng?

² Ka ge Jehofa a le bohlale, ga se a ka a re utollela leina la kgonthe la morongwa yoo a ilego a mo hlanogela. * Lega go le bjalo, Jehofa o ile a kgetha go re utollela leina leo le bego le hlalosa lenaba leo ka  morago ga mengwaga e ka bago e 2 500 Adama le Efa ba se ba mo kwa. (Jobo 1:6) Ge e le gabotse, ke dipuku tše tharo feela tša Mangwalo a Seheberu tšeo di tšweletšago leina Sathane leo le bolelago gore “Moganetši.” Dipuku tšeo ke Dikoronika tša Pele, Jobo le Sakaria. Ke ka baka la’ng go boletšwe ganyenyane ka lenaba la rena pele Mesia a etla lefaseng?

³ Go ka direga gore Jehofa ga se a nyaka gore Mangwalo a Seheberu a bolele kudu ka Sathane le mediro ya gagwe ka gobane seo se be se tla dira gore Sathane a ipone a le bohlokwa. Morero o mogolo wa Jehofa wa go dira gore Mangwalo a Seheberu a ngwalwe e be e le go thuša batho gore ba tsebe Mesia le go mo latela. (Luka 24:44; Bagal. 3:24) Ka morago ga gore Mesia a tle mo lefaseng, Jehofa o ile a diriša yena le barutiwa ba gagwe go utolla tše dintši tša dilo tšeo re di tsebago mabapi le Sathane le barongwa bao ba ilego ba mo latela. * Seo se a kwagala ka gobane Jehofa o tlo diriša Jesu le batlotšwa go fediša Sathane le balatedi ba gagwe.​—Baroma 16:20; Kut. 17:14; 20:10.

4. Ke ka baka la’ng re sa swanela go tšhošwa ke Diabolo?

⁴ Moapostola Petro o hlalosa Sathane Diabolo e le “tau e rorago,” gomme Johane o mmitša “noga” le “drakone.” (1 Pet. 5:8; Kut. 12:9) Eupša ga se ra swanela go tšhaba Diabolo ka gobane matla a gagwe a lekanyeditšwe. (Bala Jakobo 4:7.) Jehofa, Jesu le barongwa bao ba botegago ba a re thekga. Ba re thuša go lwa lenaba la rena. Lega go le bjalo, re swanetše go tseba dikarabo tša dipotšišo tše tše tharo tše bohlokwa: (1) Sathane o laola batho go fihla bokgoleng bofe? (2) Sathane o šušumetša batho ba bangwe go dira’ng? (3) Na go na le dilo tšeo di mo palelago? Ga bjale anke re arabeng dipotšišo tše gomme re bone dilo tšeo re ka ithutago tšona.

5, 6. Ke ka baka la’ng mebušo ya batho e ka se kgone go tlišetša batho dilo tšeo ba tlogago ba di hloka?

⁵ Pele ga Meetsefula, Sathane o ile a goketša barongwa ba bangwe gore ba robale le basadi ba mo lefaseng. Barongwa ba bantši ba ile ba kgetha go latela Sathane ge a be a hlanogela Jehofa. Beibele e hlalosa se ka tsela ya seswantšhetšo ge e re drakone yeo e welego legodimong e gogile le karolo ya boraro ya dinaledi tša legodimong. (Gen. 6:1-4; Juda 6; Kut. 12:3, 4) Ge barongwa bao ba be ba etšwa ka lapeng la Modimo, ba ile ba kgetha gore ba laolwe ke Sathane. Lega go le bjalo, ga se ra swanela go nagana gore barongwa bao ba babe ga ba tsebe seo ba se dirago. Sathane o itiretše mmušo wa gagwe e le ge a ekiša Mmušo wa Modimo. O itirile kgoši ya mmušo woo, e bile o beakantše batemona ba gagwe, o ba neile matla le go ba dira babuši ba lefase.​—Baef. 6:12.

⁶ Sathane o diriša mokgatlo woo wa gagwe go laola mebušo ka moka ya batho. Seo se ile sa bonagala ge a be a bontšha Jesu “mebušo ka moka ya lefase” gomme a mmotša gore: “Ke tla go nea bolaodi bjo ka moka le letago la mebušo ye, gobane bo gafetšwe nna gomme ke bo nea mang goba mang yo ke nyakago go mo nea bjona.” (Luka 4:5, 6) Gaešita le ge Sathane a laola lefase, mebušo e mentši e leka go direla batho dilo tše dibotse. Le gona, babuši ba bangwe ba tloga ba nyaka go thuša batho. Lega go le bjalo, ga go na mebušo le ge e le efe ya batho yeo e ka kgonago go tlišetša batho dilo tšeo ba tlogago ba di hloka.​—Ps. 146:3, 4; Kut. 12:12.

7. Sathane o diriša bjang bodumedi bja maaka le dikgwebo go timetša lefase ka moka? (Bona seswantšho seo se lego mathomong a sehlogo.)

⁷ Sathane le batemona ba gagwe ga ba diriše feela mebušo go timetša “lefase ka moka,” eupša ba diriša le bodumedi bja maaka le dikgwebo. (Kut. 12:9) Sathane o phatlalatša maaka  ka Jehofa a diriša bodumedi bja maaka, e bile o leka go uta leina la Modimo gore batho ba bantši ba se le tsebe. (Jer. 23:26, 27) Se se feleletša ka gore batho bao ba tlogago ba nyaka go hlankela Modimo ba rapele batemona ba nagana gore ba rapela Modimo. (1 Bakor. 10:20; 2 Bakor. 11:13-15) Le gona, Sathane o phatlalatša maaka a diriša dikgwebo. Ka mohlala, lefase le le ruta batho gore lethabo la kgonthe le tlišwa ke tšhelete le go ba le dilo tše dintši. (Die. 18:11) Bao ba dumelago maaka a, ba tšea nako e telele ba hlankela “Mahumo” go e na le go hlankela Modimo. (Mat. 6:24) Mafelelong, se se dira gore ba se sa rata Modimo gomme ba rate mahumo.​—Mat. 13:22; 1 Joh. 2:15, 16.

8, 9. (a) Ke dithuto dife tše pedi tšeo re ithutago tšona dipegong tša Adama, Efa le barongwa bao ba kgethilego go se kwe Modimo? (b) Re holega bjang ge re tseba gore Sathane o laola lefase?

⁸ Seo se diragaletšego Adama, Efa le barongwa bao ba ilego ba se kwe Modimo se re ruta dithuto tše pedi tše bohlokwa. Sa mathomo, se re ruta gore go na le mahlakore a mabedi, gomme re swanetše go kgetha le tee. Re ka kgetha go ba ka lehlakoreng la Jehofa goba la Sathane. (Mat. 7:13) Sa bobedi, se re ruta gore bao ba latelago Sathane ba holega feela ka nakwana. Adama le Efa ba ile ba ba le sebaka sa go itirela phetho ya se se lokilego le se sebe. Le gona batemona ba ile ba hwetša matla a go laola mebušo ya batho. (Gen. 3:22) Eupša ge motho a kgetha lehlakore la Sathane ka mehla o ba le mafelelo a mabe. Ga a holege e le ka kgonthe!​—Jobo 21:7-17; Bagal. 6:7, 8.

⁹ Re holega bjang ge re tseba gore Sathane o laola lefase? Se se re thuša gore re lebelele babuši ka tsela e swanetšego e bile se re dira gore re nyake go bolela ditaba tše dibotse. Re a kwešiša gore Jehofa o nyaka gore re hlomphe baemedi ba mmušo. (1 Pet. 2:17) Le gona o letetše gore re kwe melao ya mebušo ya batho ge feela melao yeo e sa thulane le melao ya gagwe. (Baroma 13:1-4) Eupša re a tseba gore ga se ra swanela go thekga mokgatlo le ge e le ofe wa dipolotiki goba go thekga moetapele yo a itšego. (Joh. 17:15, 16; 18:36) Ka ge re bona gore Sathane o leka go uta leina la Jehofa le go senya botumo bja gagwe, re ikwa re tutueletšega go ruta batho therešo ka Modimo. Re ikgantšha ka go bitšwa ka leina la gagwe le go le diriša. Le gona re a tseba gore ge re mo rata re tlo hwetša meputso e mentši go feta ge re rata tšhelete goba dilo tša lefase le.​—Jes. 43:10; 1 Tim. 6:6-10.

10-12. (a) Sathane a ka ba a dirišitše molaba ofe go tanya barongwa ba bangwe? (b) Re ithuta’ng go seo barongwa ba bangwe ba ilego ba se dira?

¹⁰ Sathane o diriša mekgwa yeo e mo šomelago go laola batho. Ka mohlala, e le gore a hwetše seo a se nyakago go batho, o diriša molaba go ba leka, e bile o ba hlasela ka go lebanya.

¹¹ Sathane o ile a diriša molaba go tanya barongwa ba bantši. O swanetše go ba a tšere nako e telele a ithuta ka bona e le gore a tsebe seo se ka ba goketšago. O ile a diriša molaba wa thobalano go tanya barongwa ba bangwe gore ba robale le basadi. Bana ba bona e ile ya ba ditšitširipa tša go rata ntwa. (Gen. 6:1-4) Go tlaleletša tabeng ya gore Sathane o ile a goketša barongwa gore ba be le thobalano le basadi, mohlomongwe o ile a ba a ba tshepiša le gore o tla ba nea matla a go laola batho ge e ba ba ka mo latela. Mohlomongwe Sathane o be a leka go šitiša boporofeta bja Jehofa bja mabapi le ‘peu ya mosadi’ gore bo se phethagale. (Gen. 3:15) Go sa šetšwe gore lebaka la Sathane e be e le lefe, Jehofa o ile a tliša Meetsefula go fediša maano ka moka a gagwe gotee le barongwa ba babe.

¹² Re ithuta’ng go seo barongwa ba bangwe ba ilego ba se dira? Re ithuta gore ga se ra swanela go nyatša molaba wa thobalano le wa boikgogomošo. Barongwa bao ba ilego ba latela Sathane ke kgale ba phela legodimong le Modimo. Gaešita le ge ba be ba phela le Modimo, ba bantši ba ile ba dumelela dikganyogo tša bona tše mpe di gola. Ka mo go swanago, go sa šetšwe gore re na le mengwaga e mentši re hlankela Jehofa ka mokgatlong wa gagwe o hlwekilego, dikganyogo tše di sa hlwekago goba tše mpe di ka gola menaganong ya rena. (1 Bakor. 10:12) Ke ka baka leo go lego bohlokwa gore re dule re itlhahloba, gomme re gane dikgopolo tše di sa hlwekago le go phema boikgogomošo!​—Bagal. 5:26; bala Bakolose 3:5.

13. Molaba o mongwe woo Sathane a o dirišago ke ofe, gona re ka o phema bjang?

¹³ Molaba o mongwe woo Sathane a o dirišago ke go dira gore batho ba nyake go tseba ka boloi le dilo tšeo di nago le botemona. Lehono, o dira gore batho ba kgahlwe ke boloi le botemona a diriša bodumedi bja maaka le boithabišo. Dimubi, dipapadi tša elektroniki le dilo tše dingwe tša boithabišo di dira gore dilo tšeo di nago le boloi le botemona di bonagale di kgahliša. Re ka dira’ng gore re se wele molabeng wo? Ga se ra swanela go letela gore mokgatlo wa Modimo o re botše dilo tšeo re ka ithabišago ka tšona goba tšeo re sa swanelago go ithabiša ka tšona. Yo mongwe le yo mongwe wa rena o swanetše go tlwaetša letswalo la gagwe gore le dumelelane le melao ya Modimo. (Baheb. 5:14) Lega go le bjalo, ge re diriša keletšo ya moapostola Paulo yeo e rego lerato la rena “e be le le se nago boikaketši,” re tlo dira diphetho tše dibotse. (Baroma 12:9) Re swanetše go ipotšiša gore: ‘Na dilo tšeo ke kgethago go ithabiša ka tšona di dira gore ke bonagale ke le moikaketši? Ge dipoelo tša ka goba  barutwana ba ka ba Beibele ba ka bona dilo tšeo ke kgethago go ithabiša ka tšona, na ba ka nagana gore ke diriša seo ke ba rutago sona?’ Ge e ba re ka dira dilo tšeo re botšago batho ba bangwe gore ba di dire, gona re ka kgona go phema go tanywa ke melaba ya Sathane.​—1 Joh. 3:18.

14. Sathane a ka re hlasela bjang, gona re ka lebeletšana le yena bjang?

¹⁴ Molaba o mongwe wo Sathane a o dirišago ke go leka go re hlasela le go re tšhošetša gore re se sa botegela Jehofa. Ka mohlala, a ka šušumetša mebušo gore e thibele modiro wa rena wa go bolela ditaba tše dibotse. Goba a ka šušumetša bašomigotee le rena goba bao re tsenago le bona sekolo gore ba re kwere ka ge re phela ka melao ya Beibele ya boitshwaro. (1 Pet. 4:4) Le gona a ka tutuetša ditho tša malapa a rena tšeo e sego Dihlatse tša Jehofa gore di re fetše matla gomme re se sa ya dibokeng. (Mat. 10:36) Re ka thušwa ke’ng go kgotlelela? Sa mathomo, re swanetše go letela gore dilo tša mohuta wo di direge, ka gobane Sathane o lwa le rena. (Kut. 2:10; 12:17) Le gona, re swanetše go gopola taba ye ya bohlokwa: Sathane o re re hlankela Jehofa ge feela dilo di re sepelela gabotse. O re ge re ka ba le mathata, re tlo hlanogela Modimo. (Jobo 1:9-11; 2:4, 5) Sa mafelelo, re swanetše go ithekga ka Jehofa gore a re fe matla a go lebeletšana le taba yeo ya bohlokwa. Gopola gore Jehofa a ka se tsoge a re lahlile.​—Baheb. 13:5.

15. Na Sathane a ka re gapeletša go dira dilo tšeo re sa nyakego go di dira? Hlalosa.

¹⁵ Sathane a ka se re gapeletše go dira dilo tšeo re sa nyakego go di dira. (Jak. 1:14) Batho ba bantši ga ba lemoge gore ba dira dilo tšeo Sathane a di ratago. Eupša ka morago ga gore motho a ithute therešo, o swanetše go itirela phetho ya gore o nyaka go hlankela mang. (Dit. 3:17; 17:30) Ge e ba re ikemišeditše go dira thato ya Modimo, ga go na selo seo Sathane a ka se dirago seo se ka dirago gore re se sa botegela Modimo.​—Jobo 2:3; 27:5.

16, 17. (a) Ke dilo dife tše dingwe tšeo Sathane le batemona ba gagwe ba sa kgonego go di dira? (b) Ke ka baka la’ng re sa swanela go tšhaba go rapela Jehofa ka go hlaboša?

¹⁶ Go na le dilo tše dingwe tšeo Sathane le batemona ba gagwe ba sa kgonego go di di dira. Ka mohlala, ga gona moo Mangwalo a bontšhago gore ba kgona go bona seo motho a se naganago goba seo se lego ka pelong ya gagwe. Jehofa le Jesu ke bona feela ba na lego bokgoni bjoo. (1 Sam. 16:7; Mar. 2:8) Eupša go thwe’ng ge e ba o bolela taba e itšego goba o rapela ka go hlaboša? Na re swanetše go tšhoga gore Diabolo le batemona ba gagwe ba ka kwa dithapelo tša rena gomme ba di diriša bakeng sa go re hlasela? Aowa ga se ra swanela go tšhoga le gatee. Ke ka baka la’ng re re’alo? Nagana ka taba ye: Re dira dilo tše dibotse tirelong ya Jehofa re sa boife gore Diabolo a ka re bona. Ka mo go swanago, ga se ra swanela go boifa go rapela ka go hlaboša feela ka gobane re tšhaba gore Diabolo a ka re kwa. Ge e le gabotse, Beibele e na le mehlala e mentši ya bahlanka ba Modimo bao ba ilego ba rapela ka go hlaboša, le gona ga go na mo Beibele e bolelago gore ba be ba tšhaba gore Diabolo o be a tla ba kwa. (1 Dikg. 8:22, 23; Joh. 11:41, 42; Dit. 4:23, 24) Ge e ba re leka ka thata go phela ka melao ya Jehofa, re ka kgodišega gore Jehofa a ka se dumelele Diabolo go re dira selo le ge e le sefe seo se ka re thibelago gore re tle re hwetše bophelo bjo bo sa felego.​—Bala Psalme 34:7.

¹⁷ Re swanetše go tseba lenaba la rena eupša ga se ra swanela go le boifa. Gaešita le ge re se ra phethagala, re ka kgona go fenya Sathane ka thušo ya Jehofa. (1 Joh. 2:14) Ge e ba re ka mo ganetša, o tlo re tšhaba. (Jak. 4:7; 1 Pet. 5:9) Lehono, go bonagala Sathane a rata go hlasela bafsa kudu. Ke’ng seo ba ka se dirago gore ba lwe le Diabolo ba tiile? Sehlogo se se latelago se tlo araba potšišo yeo.