1. Ke dilo dife tše pedi tšeo re ka kgodišegago ka tšona?

JEHOFA MODIMO o rata bahlanka ba gagwe. Ke go tloga kgale a re rata e bile o tla dula a re rata. Le gona o rata toka. (Ps. 33:5) Ka gona re ka kgodišega ka dilo tše di latelago tše pedi. Sa pele, Jehofa o kwa bohloko kudu ge bahlanka ba gagwe ba swarwa ka go hloka toka. Sa bobedi, o holofetša gore bahlanka ba gagwe ba ka se tlaišege ka mo go sa felego, le gore o tla otla bao ba ba tlaišago. Sehlogong sa mathomo sa dihlogo tše, * re ithutile gore Molao wo Modimo a ilego a o nea Baisiraele a diriša Moshe o be o theilwe leratong. Molao woo o be o kgothaletša gore batho ka moka ba swarwe ka toka, go akaretša le bao ba bego ba sa kgone go itšhireletša. (Doit. 10:18) Molao woo o bontšha gore Jehofa o rata bahlanka ba gagwe kudu.

2. Re tlo araba dipotšišo dife sehlogong se?

² Molao wa Moshe o ile wa kgaotša go šoma ge phuthego ya Bokriste e be e thewa ka 33 C.E. Na seo se ra gore Bakriste ba be ba ka se be le molao wo o ba šireletšago woo o theilwego leratong le wo o kgothaletšago batho go swarana ka toka? Aowa! Bakriste ba be ba neilwe molao o mofsa. Sehlogong se, re tlo thoma pele ka go hlalosa gore molao woo ke ofe. Ke moka re tlo araba dipotšišo tše: Ke ka baka la’ng re ka re molao wo o theilwe leratong? Ke ka baka la’ng re ka re o kgothaletša batho go swarana ka toka? Go ya ka molao wo, bao ba neilwego matla a go okamela ba bangwe ba swanetše go ba swara bjang?

3. Go etša ge Bagalatia 6:2 e bontšha, “molao wa Kriste” o akaretša’ng?

³ Bala Bagalatia 6:2. Bakriste ba ka tlase ga “molao wa Kriste.”  Jesu ga se a ka a ngwala melao yeo balatedi ba gagwe ba swanetšego go phela ka yona, eupša o ile a ba nea ditaelo, melao le melao ya motheo yeo ba swanetšego go phela ka yona. “Molao wa Kriste” o akaretša dilo ka moka tšeo Jesu a di rutilego. E le gore re kwešiše molao wo gakaone, re tlo ithuta ka wona ka mo go oketšegilego dirapeng tše di latelago.

4-5. Jesu o ile a diriša mekgwa efe go ruta batho, gona o ile a ba ruta neng?

⁴ Jesu o ile a diriša mekgwa efe go ruta batho? Sa pele, o ile a ruta batho ka go bolela le bona. Seo a bego a se bolela se be se na le matla ka gobane o be a bolela therešo ka Modimo, a ruta batho ka morero wa kgonthe ka bophelo le go ba ruta gore Mmušo wa Modimo ke wona o tlago go rarolla mathata ka moka a batho. (Luka 24:19) Le gona Jesu o ile a ruta batho ka mohlala wa gagwe. Tsela yeo a bego a phela ka yona e ile ya bontšha balatedi ba gagwe gore ba swanetše go phela bjang.—Joh. 13:15.

⁵ Jesu o rutile batho neng? O ile a ruta batho nakong ya bodiredi bja gagwe mo lefaseng. (Mat. 4:23) Le gona o ile a ruta balatedi ba gagwe ka moragonyana ga gore a tsošwe bahung. Ka mohlala, o ile a iponagatša go sehlopha sa barutiwa ba ka godimo ga ba 500, gomme a ba laela gore ‘ba dire barutiwa.’ (Mat. 28:19, 20; 1 Bakor. 15:6) Ka ge Jesu e le hlogo ya phuthego, o ile a tšwela pele a ruta barutiwa ba gagwe le ka morago ga ge a rotogetše legodimong. Ka mohlala, mo e ka bago ka 96 C.E., Kriste o ile a laela moapostola Johane go kgothatša Bakriste ba tloditšwego le go ba nea tayo.—Bakol. 1:18; Kut. 1:1.

6-7. (a) Re ka hwetša kae dilo tšeo Jesu a di rutilego? (b) Re bontšha bjang gore re kwa molao wa Kriste?

⁶ Re ka hwetša kae dilo tšeo Jesu a di rutilego? Ka Diebangeding tše nne go na le dilo tše dintši tšeo Jesu a ilego a di bolela le go di dira ge a be a le mo lefaseng. Mangwalo a mangwe ka moka a Bakriste a Segerika le ona a re thuša go kwešiša kamoo Jesu a naganago ka gona, ka gobane a ngwadilwe ke banna bao ba bego ba thušwa ke moya o mokgethwa le bao ba bego ba na le “monagano wa Kriste.”—1 Bakor. 2:16.

⁷ Seo re ithutago sona: Molao wa Kriste o kgoma selo se sengwe le se sengwe seo re se dirago ka gae, mošomong goba sekolong le ka phuthegong. Re ithuta molao wo ka go bala Mangwalo a Bakriste a Segerika le ka go naganišiša ka ona. Re kwa molao wo ge re latela ditaelo, melao le  melao ya motheo yeo e lego ka Mangwalong ao. Ge re ekwa molao wa Kriste, go ra gore re kwa Jehofa Modimo wa rena yo a re ratago, ka gobane dilo ka moka tšeo Jesu a di rutilego di tšwa go Jehofa.—Joh. 8:28.

8. Molao wa Kriste o theilwe go eng?

⁸ Batho bao ba dulago ka ntlong yeo e agilwego gabotse le yeo e nago le motheo o tiilego, ba ikwa ba šireletšegile. Ka mo go swanago, molao o mobotse wo o theilwego motheong o tiilego o dira gore bao ba o latelago ba ikwe ba šireletšegile. Molao wa Kriste o theilwe motheong o mokaonekaone, e lego lerato. Ke ka baka la’ng re ka re’alo?

9-10. Ke mehlala efe yeo e bontšhago gore Jesu o be a tutuetšwa ke lerato, gona re ka mo ekiša bjang?

⁹ Sa pele, Jesu o be a tutuetšwa ke lerato go dira selo se sengwe le se sengwe seo a bego a se dira. Go šokela batho goba go ba kwela bohloko, ke go bontšha lerato. Ka ge Jesu a be a šokela batho, o ile a ba ruta, a fodiša balwetši, a fepa bao ba bego ba swerwe ke tlala le go tsoša bahu. (Mat. 14:14; 15:32-38; Mar. 6:34; Luka 7:11-15) Gaešita le ge Jesu a ile a swanelwa ke go diriša nako ya gagwe le matla go dira dilo tšeo, o ile a etiša pele dinyakwa tša ba bangwe go e na le tša gagwe. Tsela e kgolokgolo yeo Jesu a ilego a bontšha lerato, e bile ka go re hwela.—Joh. 15:13.

¹⁰ Seo re ithutago sona: Re ka ekiša Jesu ka go etiša pele dinyakwa tša ba bangwe go e na le tša rena. Le gona re ka mo ekiša ka go ithuta go šokela batho ba tšhemong ya gabo rena. Ge lešoko leo le dira gore re ba botše ditaba tše dibotse le go ba ruta, gona go ra gore re kwa molao wa Kriste.

11-12. (a) Ke’ng seo se bontšhago gore Jehofa o tloga a na le taba le rena? (b) Re ka ekiša lerato la Jehofa bjang?

¹¹ Sa bobedi, Jesu o ile a bontšha kamoo Tatagwe a re ratago ka gona. Nakong ya bodiredi bja gagwe mo lefaseng, Jesu o ile a bontšha kamoo Jehofa a tlogago a na le taba le bahlanka ba gagwe ka gona. Gare ga dilo tše dingwe tšeo Jesu a ilego a di ruta, ke gore: Yo mongwe le yo mongwe wa rena o bohlokwa go Tatago rena wa legodimong. (Mat. 10:31) Jehofa o fela pelo ya go amogela nku yeo e itsholago gomme ya boela ka phuthegong. (Luka 15:7, 10) Jehofa o bontšhitše gore o a re rata ka go romela Morwa wa gagwe mo lefaseng gore a tlo re hwela.—Joh. 3:16.

¹² Seo re ithutago sona: Re ka ekiša lerato la Jehofa bjang? (Baef. 5:1, 2) Re ka dira seo ka go lebelela yo mongwe le yo mongwe wa bana babo rena le dikgaetšedi a le bohlokwa, le ka go amogela “nku e timetšego” yeo e boelago go Jehofa. (Ps. 119:176) Re bontšha gore re rata bana babo rena le dikgaetšedi ka go diriša nako ya rena le matla a rena go ba thuša, kudukudu ge ba hloka thušo. (1 Joh. 3:17) Ge re bontšha ba bangwe lerato, go ra gore re kwa molao wa Kriste.

13-14. (a) Go ya ka Johane 13:34, 35, Jesu o ile a laela balatedi ba gagwe gore ba bontšhe eng, gona ke ka baka la’ng ye e le taelo e mpsha? (b) Re bontšha bjang gore re kwa taelo e mpsha?

¹³ Sa boraro, Jesu o laetše balatedi ba gagwe gore ba bontšhe lerato leo le se nago boithati. (Bala Johane 13:34, 35.) Taelo ye ya Jesu ke e mpsha ka gobane e re laela gore re bontšhe lerato ka tsela yeo Molao wa Moshe wo Modimo a bego a o neile Baisiraele o bego o se wa laela gore le bontšhwe ka yona. Go ya ka taelo ye e mpsha, re swanetše go rata bana babo rena ka tsela yeo Jesu a re ratilego ka yona. Se se ra gore re swanetše go ba le lerato leo le se nago boithati. * Re swanetše go rata bana babo rena le dikgaetšedi go feta kamoo re ithatago ka gona. Re swanetše go ba rata go fihla bokgoleng bja gore re ka ba hwela, go etša ge Jesu a re hwetše.

¹⁴ Seo re ithutago sona: Re bontšha bjang gore  re kwa taelo ye e mpsha? Ge re bea taba ye pha re ka re, re bontšha seo ka go ikemišetša go dira sohle seo re ka se kgonago go direla bana babo rena le dikgaetšedi dilo tše itšego. Ga se ra ikemišetša feela go ba direla selo se segolo kudu e lego go ba hwela, eupša re ikemišeditše le go ba direla dilo tše dinyenyane. Ka mohlala, ge re dira boiteko bja go yo tšea ngwanabo rena goba kgaetšedi yo a tšofetšego re mo iša dibokeng, goba ge re ikemišetša go se dire dilo tšeo re di ratago e le gore re thabiše motho yo re mo ratago, goba ge re diriša matšatši a rena a maikhutšo go thuša ka modiro wa tlhakodišo, go ra gore re kwa molao wa Kriste. E bile ge re dira bjalo, re thuša go dira gore motho yo mongwe le yo mongwe ka phuthegong a ikwe a šireletšegile.

15-17. (a) Ditiro tša Jesu di ile tša bontšha bjang gore o rata toka? (b) Re ka ekiša Jesu bjang?

¹⁵ Lentšu “toka” ge le dirišwa ka Beibeleng, le bolela go dira selo seo Modimo a bonago se lokile le go dira seo ka go se kgetholle. Ke ka baka la’ng re ka re molao wa Kriste o re kgothaletša go bontšha toka?

¹⁶ Sa pele, nagana kamoo ditiro tša Jesu di ilego tša bontšha gore o rata toka. Mehleng ya Jesu, baetapele ba bodumedi ba Bajuda ba be ba hloile batho bao e sego Bajuda, ba tšeela fase batho bao ba bego ba se ba tsena dikolo tša bodumedi bja Sejuda, e bile ba be ba sa hlomphe basadi. Eupša ka mehla Jesu o be a swara batho ka moka ka go swana. O ile a amogela batho bao e sego Bajuda bao ba bego ba na le tumelo go yena. (Mat. 8:5-10, 13) O be a ruta batho ka moka ka Modimo, go sa šetšwe gore ke bahumi goba ke badiidi. (Mat. 11:5; Luka 19:2, 9) O be a sa sware basadi gampe goba go ba tlaiša. Go e na le moo, o be a hlompha basadi e bile a ba swara ka botho, go akaretša le basadi bao ba bego ba nyatšwa ke batho.—Luka 7:37-39, 44-50.

¹⁷ Seo re ithutago sona: Re ka ekiša Jesu ka go se kgetholle batho le ka go ruta batho ka moka bao ba nyakago go re theetša, go sa šetšwe gore ke bahumi goba ke badiidi, goba gore ba tsena kereke efe. Banna ba Bakriste ba latela mohlala wa gagwe ka go hlompha basadi. Ge re dira dilo tšeo, re kwa molao wa Kriste.

18-19. Jesu o rutile’ng ka toka, gona re ithuta’ng go seo?

¹⁸ Sa bobedi, nagana ka seo Jesu a ilego a se ruta ka toka. O ile a ruta balatedi ba gagwe melao ya motheo yeo e bego e tla ba thuša go swara ba bangwe ka toka. Ka mohlala, nagana ka molao wo o lego go Mateo 7:12. Ka moka ga rena re nyaka go swarwa ka toka. Ka baka leo re swanetše go swara ba bangwe ka toka. Ge re ka dira bjalo, mohlomongwe le bona ba tla nyaka go re swara gabotse. Eupša re swanetše go dira’ng ge batho ba bangwe ba sa re sware gabotse? Jesu o ile a ruta barutiwa ba gagwe gore ba swanetše go tshepa gore Jehofa o tla “dira gore toka e direlwe bakgethwa ba gagwe bao ba mo goeletšago mosegare le bošego.” (Luka 18:6, 7) Ge e le gabotse mantšu a temana ye ke kholofetšo ya gore Modimo wa rena yo a nago le toka o bona diteko tšeo di re welago mehleng ye ya bofelo, gomme o tla kgonthišetša gore ka nako ya maleba toka e a dirwa.—2 Bathes. 1:6.

¹⁹ Seo re ithutago sona: Ge re latela melao ya motheo yeo Jesu a re rutilego yona, re tla swara ba bangwe ka toka. Le gona, ge e ba re kile ra swarwa ka go hloka toka lefaseng le la Sathane, re ka kgothatšwa ke go tseba gore Jehofa o tla kgonthišetša gore toka e a dirwa.

20-21. (a) Bao ba neilwego matla a go okamela ba bangwe ba swanetše go ba swara bjang? (b) Monna o swanetše go bontšha bjang lerato leo le se nago boithati, gona tate o swanetše go swara bana ba gagwe bjang?

²⁰ Molao wa Kriste o laetše gore bao ba nago le  matla a go okamela ba bangwe ba ba sware bjang? Ka ge molao woo o theilwe leratong, bao ba nago le matla a go okamela ba bangwe ba swanetše go ba bontšha lerato le go ba hlompha. Ba swanetše go gopola gore Kriste o nyaka gore re bontšhe lerato dilong ka moka tšeo re di dirago.

²¹ Ka lapeng. Monna o swanetše go rata mosadi wa gagwe “go etša ge Kriste le yena a dira phuthego bjalo.” (Baef. 5:25, 28, 29) Monna o swanetše go ekiša lerato la Kriste la go hloka boithati ka go etiša pele dinyakwa tša mosadi wa gagwe. Banna ba bangwe ba ka hwetša go le thata go bontšha basadi ba bona lerato le bjalo, ka gobane mohlomongwe moo ba goletšego gona batho ba be ba sa bontšhane toka le lerato. Ba ka hwetša go le thata go lokiša mekgwa yeo, eupša ba swanetše go e lokiša e le gore ba kwe molao wa Kriste. Monna yo a bontšhago lerato la go hloka boithati o dira gore mosadi wa gagwe a mo hlomphe. Tate yo a tlogago a rata bana ba gagwe a ka se tsoge a ba kwešitše bohloko ka seo a se bolelago goba seo a se dirago. (Baef. 4:31) Go e na le moo, o bontšha bana ba gagwe gore o a ba rata e le gore ba ikwe ba šireletšegile. Ge a dira bjalo, bana ba gagwe ba a mo rata le go mmota.

22. Go ya ka Petro wa Pele 5:1-3 “dinku” ke tša mang, gona bagolo ba swanetše go di swara bjang?

²² Ka phuthegong. Bagolo ba swanetše go gopola gore “dinku” ga se tša bona. (Joh. 10:16; bala 1 Petro 5:1-3.) Polelwana yeo e rego “mohlape wa Modimo” le yeo e rego “bohwa bja Modimo,” di swanetše go gopotša bagolo gore dinku ke tša Jehofa. O nyaka gore dinku tša gagwe di swarwe ka lerato le ka botho. (1 Bathes. 2:7, 8) Jehofa o rata bagolo bao ba bontšhago mohlape lerato. Le gona bana babo rena le dikgaetšedi ba rata bagolo ba bjalo le go ba hlompha.

23-24. (a) Bagolo ba na le boikarabelo bofe ge motho yo a itšego ka phuthegong a dirile sebe se segolo? (b) Bagolo ba swanetše go gopola’ng ge ba rarolla melato e bjalo?

²³ Bagolo ba na le boikarabelo bofe ge go tliwa  tabeng ya go rarolla mathata ge motho a dirile sebe se segolo? Boikarabelo bja bona ga bo swane le bjo Modimo a bego a bo neile baahlodi le banna ba bagolo ka tlase ga Molao wa Moshe kua Isiraele. Go ya ka Molao woo, banna ba bagolo ba be ba rarolla mathata ao a bego a le mabapi le borapedi bja Jehofa gotee le mathata a bosenyi ao a bego a tšwelela setšhabeng. Eupša go ya ka molao wa Kriste, bagolo ba neilwe boikarabelo bja go rarolla feela mathata ao a tšwelelago ka phuthegong. Ba a tseba gore Modimo o neile balaodi ba bagolo ba mmušo boikarabelo bja go rarolla mathata ao a tšwelelago setšhabeng le a bosenyi, gotee le tshwanelo ya go nea batho difaene le go ba iša kgolegong.—Baroma 13:1-4.

²⁴ Bagolo ba na le boikarabelo bofe ge motho yo a itšego ka phuthegong a dirile sebe se segolo? Ba swanetše go diriša Mangwalo go lebeledišiša taba gomme ba dire phetho. Le gona ba swanetše go dula ba gopola gore molao wa Kriste o theilwe leratong. Lerato le dira gore bagolo ba ipotšiše gore: Re swanetše go dira’ng go thuša motho le ge e le ofe ka phuthegong yo a dirilwego selo se sebe? Lerato le swanetše go tutuetša bagolo go ipotšiša mabapi le motho yo a dirilego sebe gore: Na motho yo o a itshola? Na re ka mo thuša go lokiša tswalano ya gagwe le Jehofa?

25. Re tlo araba potšišo efe sehlogong se se latelago?

²⁵ Ruri re thaba kudu gore re phela ka molao wa Kriste! Ge ka moka ga rena re šoma ka thata go kwa molao wo, seo se dira gore ka moka ga rena ka phuthegong re ikwe re ratwa, re le bohlokwa e bile re šireletšegile. Eupša ga se ra swanela go lebala gore re phela lefaseng leo “batho ba kgopo” ba ‘feteletšego ka bobe.’ (2 Tim. 3:13) Re swanetše go dula re ntšhitše mahlong dinameng. Bagolo ba swanetše go bontšha bjang gore ba ekiša toka ya Modimo ge ba rarolla mathata a go swana le a ge ngwana a tlaišitšwe ka tša thobalano? Re tlo araba potšišo ye sehlogong se se latelago.