1. Ke ka baka la’ng ka dinako tše dingwe batho ba bangwe ba sa kgone go ithuta?

LEHONO batho ba bantši ba swanelwa ke go šoma ka thata gore ba hwetše tšhelete. Bana babo rena ba bantši ba šoma diiri tše dintši gore ba kgone go hlokomela malapa a bona. Ba bangwe ba bantši ba swanelwa ke go sepela maeto a matelele go ya le go boa mošomong. Ba bantši ba iphediša ka go dira mošomo o thata wa matsogo. Ge letšatši le sobela, bana babo rena ba ba ba lapile wa go hwa gomme ba se sa na matla a go ithuta.

2. Wena o ipha neng nako ya go ithuta?

² Le ge go se bonolo go hwetša nako ya go ithuta, re swanetše go ipha nako ya go ithuta Lentšu la Modimo le dikgatišo tša mokgatlo ka mo go tseneletšego. Ge e ba re nyaka go ba le tswalano ya kgauswi le Jehofa le go hwetša bophelo bjo bo sa felego, re swanetše go ithuta. (1 Tim. 4:15) Batho ba bangwe ba tsoga ka masa letšatši le letšatši gore ba ithute, ka ge ka nako yeo go tla be go homotše e bile menagano ya bona e khuditše gabotse bošegong bja go feta. Ba bangwe bona ba ithuta bošego, ka nako yeo go se nago ditšhitišo gore ba kgone go naganišiša.

3-4. Go dirilwe diphetogo dife tabeng ya palo ya dilo tše di gatišwago le tšeo di lego Inthaneteng, gona ka baka la’ng?

³ Re kgodišegile gore o tla dumela gore go bohlokwa go ipha nako ya go ithuta. Eupša o ka ba o ipotšiša gore o swanetše go ithuta kgatišo efe, ka gobane go na le dikgatišo tše dintši tšeo o ka ithutago tšona. E bile o ka ba o se na nako ya go ithuta tšona ka moka. Bana babo rena ba bangwe le dikgaetšedi ba kgona go hwetša nako ya go bala le go bogela dilo ka moka tšeo mokgatlo o re neago tšona. Eupša ba bangwe ba bantši ba thatafalelwa ke go hwetša nako ya go dira seo. Sehlopha se Bušago se lemogile taba ye. Ka baka leo, se phethile ka gore se fokotše dilo tše dintši tšeo di gatišwago le tšeo di lego Inthaneteng.

 ⁴ Ka mohlala, Puku ya Ngwaga ya Dihlatse tša Jehofa ga e sa tšweletšwa, ka gobane diphihlelo tše dintši tše di kgothatšago di hwetšagala wepesaeteng ya jw.org^® le mananeong a kgwedi le kgwedi go Kgašo ya JW. Ga bjale Morokami wa batho bohle le makasine wa Phafoga! di tšweletšwa gararo feela ka ngwaga. Diphetogo tše ga se tša direlwa gore re be le nako e oketšegilego ya go phetha mabaka a rena. Di diretšwe go re thuša gore re be le nako ya go swarega ka “dilo tše bohlokwa kudu.” (Bafil. 1:10) A re boneng gore o ka tseba bjang dilo tše bohlokwa le kamoo o ka holwago ka mo go feletšego ke thuto ya gago ya motho ka noši.

5-6. Ke dikgatišo dife tšeo re swanetšego go ithuta tšona ka šedi?

⁵ Selo sa pele seo re swanetšego go ithuta sona ke sefe? Re swanetše go beela ka thoko nako ya go ithuta Lentšu la Modimo letšatši le lengwe le le lengwe. Mmalo wa Beibele wa beke le beke o fokoditšwe e le gore re kgone go ba le nako e oketšegilego ya go naganišiša ka seo re se balago le go dira nyakišišo. Ga se ra swanela go no bala ditemana tšeo, eupša re swanetše go dumelela seo re se balago se kgoma dipelo tša rena le go matlafatša tswalano ya rena le Jehofa.—Ps. 19:14.

⁶ Ke dilo dife tše dingwe tšeo re swanetšego go ithuta tšona ka šedi? Re swanetše go lokišetša Thuto ya Morokami le Thuto ya Beibele ya Phuthego gotee le dikarolo tše dingwe tša seboka sa gare ga beke. Le gona re swanetše go bala tokollo e nngwe le e nngwe ya Morokami le Phafoga!

7. Na re swanetše go nyama ge e ba re sa kgone go bala le go bogela dilo ka moka tšeo di lego wepesaeteng ya rena le go Kgašo ya JW?

⁷ Eupša o ka ipotšiša gore: ‘Go thwe’ng ka dihlogo tše dingwe le dibidio tšeo di tšwelelago wepesaeteng ya rena ya jw.org, gotee le dilo tše dingwe tšeo di tšwelelago go Kgašo ya JW? Go na le dilo tše dintši kudu!’ Go araba potšišo yeo, a re lebeleleng mohlala wo: A re re mmarakeng go na le dijo tše dintši tše bose tšeo di rekišwago. Batho bao ba rekago ba ka se kgone go reka selo se sengwe le se sengwe seo se rekišwago moo. Ka gona ba kgetha dilo tše sego kae feela. Ka mo go swanago, ge e ba le wena o sa kgone go bala le go bogela dilo ka moka tšeo di lego wepesaeteng ya rena, o se ke wa nyama. Bala goba o bogele tšeo o ka kgonago go di bogela. Bjale a re boleleng gore go ithuta go akaretša eng le gore o ka dira eng gore o holege ka mo go feletšego.

8. Re ka latela megato efe ge re lokišetša Morokami, gona go dira seo go tla re hola bjang?

⁸ Go ithuta ke go lebiša tlhokomelo go seo o se balago e le gore o ithute selo se itšego sa bohlokwa. Ga se feela go no kga ka godimo le go thalela dikarabo. Ka mohlala, ge o lokišetša Thuto ya Morokami, thoma pele ka go bala karolo yeo e rego seo re tlago go ithuta sona, yeo e tšwelelago mathomong a sehlogo seo. Ka morago ga moo, bala le go naganišiša ka sehlogo, dihlogwana le dipotšišo tšeo di tšwelelago mafelelong a sehlogo. Ke moka bala sehlogo seo o iketlile le ka šedi. Hlokomela lefoko leo le go botšago gore serapa se itšego se bolela ka eng, leo gantši le tšwelelago mathomong a serapa se sengwe le se sengwe. Gantši lefoko leo le go thuša go tseba gore serapa seo se hlalosa ntlha efe. Ge o dutše o bala sehlogo seo, nagana kamoo serapa se sengwe le se sengwe se thekgago sehlogwana le sehlogo se segolo seo se ithutwago. Ngwala mantšu goba dithuto tšeo o bego o sa di tsebe tšeo o nyakago go dira nyakišišo ka tšona.

9. (a) Ke ka baka la’ng re swanetše go ela hloko mangwalo a Thutong ya Morokami, gona re ka dira seo bjang? (b) Go ya ka Joshua 1:8, ke’ng se sengwe gape seo re swanetšego go se dira ka morago ga go bala lengwalo?

⁹ Thuto ya Morokami e re thuša go kwešiša Beibele. Ka gona, ela hloko mangwalo, kudukudu  ao a tlago go balwa nakong ya Thuto ya Morokami. Hlokomela kamoo mantšu goba dipolelwana tše itšego ditemaneng tšeo di balwago di thekgago seo se bolelwago serapeng. Sa bohlokwa kudu ke gore o iphe nako ya go naganišiša ka mangwalo ao o a balago, le go bona kamoo o ka a dirišago ka gona bophelong bja gago.—Bala Joshua 1:8.

10. Go ya ka Baheberu 5:14, ke ka baka la’ng nakong ya borapedi bja lapa batswadi ba swanetše go ruta bana ba bona go ithuta le go dira nyakišišo?

¹⁰ Ke mo go kwagalago gore batswadi ba nyaka gore beke e nngwe le e nngwe bana ba bona ba thabele Borapedi bja Lapa. Gaešita le ge batswadi ba swanetše gore ka mehla ba rulaganye e sa le pele seo ba tlago go boledišana le bana ba bona ka sona borapeding bja lapa, ga go hlokagale gore ba ikwe ba gapeletšega go rulaganya mešongwana e kgahlišago beke e nngwe le e nngwe. Gaešita le ge nakong ya Borapedi bja Lapa le ka bogela lenaneo la kgwedi yeo go Kgašo ya JW goba ka dinako tše dingwe la dira mošongwana o itšego o kgahlišago, bjalo ka go aga areka ya Noa, go bohlokwa gore batswadi ba rute bana ba bona go ithuta. Ka mohlala, bana ba swanetše go ithuta go lokišetša diboka, goba ba tsebe go dira nyakišišo ya mabapi le mathata ao a tšweletšego sekolong. (Bala Baheberu 5:14.) Ge e ba bana ba fetša nako e itšego ba ithuta Beibele ge ba le ka gae, go tlo ba bonolo kudu gore ba theetše ge ba le dibokeng, dikopanong tše dikgolo le tše dinyenyane, ka gobane ge re le moo ga re bogele dibidio mosegare ka moka. Ke therešo gore batswadi ba tla dira phetho ya gore ba fetša nako e kae ba ithuta le bana ba bona, go ithekgile ka mengwaga ya bona le kwešišo ya bona.

11. Ke ka baka la’ng re swanetše go ruta batho bao re ithutago Beibele le bona gore ba tsebe go itirela nyakišišo?

¹¹ Batho bao re ithutago Beibele le bona, le bona ba swanetše go tseba go ithuta. Ge ba sa tšwa go thoma go bala, ga re na bothata ge ba no thalela dikarabo ge ba lokišetša thuto ya bona goba diboka tša phuthego. Eupša re swanetše go ba ruta go dira nyakišišo le go ithuta ka mo go tseneletšego ge ba le noši. Ge re ka dira seo, ge mathata a tšwelela ba ka se ye go batho ba bangwe ka phuthegong, eupša ba tla itirela nyakišišo yeo e tlago go ba thuša ka dikgatišong tša rena.

12. Re ka ipeela dipakane dife ge re ithuta?

¹² Ge e ba ka tlhago o sa rate go bala, o ka no nagana gore ga go kgonege gore o thabele go ithuta. Eupša go a kgonega. O ka thoma pele ka go fetša nako e kopana o ithuta, gomme ganyenyane-ganyenyane wa oketša nako yeo. Ipeele pakane ya seo o nyakago go ithuta sona. Ke  therešo gore pakane ya rena e kgolo ke go nyaka go ba le tswalano e tiilego le Jehofa. Pakane e nngwe yeo re ka e fihlelelago kapejana ke go araba potšišo yeo motho yo a itšego a e botšišitšego, goba go dira nyakišišo ka bothata bjo re nago le bjona.

13. (a) Hlalosa megato yeo mofsa a ka e latelago go hlalosetša ba bangwe seo a se dumelago sekolong. (b) O ka diriša bjang keletšo yeo e lego go Bakolose 4:6?

¹³ Ka mohlala, na o tsena sekolo? Go ka direga gore bao o tsenago le bona ka klaseng ba dumela gore dilo di itirile. A re re o nyaka go ba hlalosetša gore ke ka baka la eng wena o dumela seo Beibele e se rutago ge e re go na le yo a di bopilego, eupša o kwa o ka se kgone go ba hlalosetša. Seo se ra gore o swanetše go dira nyakišišo! O ka ba le mabaka a mabedi a go dira seo. La pele, go matlafatša tumelo ya gago tabeng ya gore Modimo o bopile dilo ka moka. La bobedi, go kaonefatša bokgoni bja gago bja go hlalosa therešo yeo e lego ka Lentšung la Modimo. (Baroma 1:20; 1 Pet. 3:15) O ka thoma ka go ipotšiša gore: ‘Ke ka baka la’ng bao ke tsenago le bona ka klaseng ba dumela gore dilo di itirile?’ Ka morago ga moo, dira nyakišišo ka dikgatišong tša rena. Go hlalosa seo o se dumelago go ka ba bonolo kudu go feta kamoo o naganago. Batho ba bantši ba dumela gore dilo di itirile feela ka gobane motho yo a itšego yo ba mo hlomphago o ba boditše gore go bjalo. Ge e ba o ka hwetša ntlha e tee goba tše pedi tšeo o ka ba botšago tšona, o ka thuša motho yo a itšego yo a tlogago a nyaka go ithuta therešo.—Bala Bakolose 4:6.

14-16. (a) O ka dira’ng gore o ithute ka mo go oketšegilego ka puku ya Beibele yeo o sa e tsebego gabotse? (b) Hlalosa gore mangwalo ao a bontšhitšwego mo serapeng a ka go thuša bjang go kwešiša puku ya Amose gakaone? (Bona le lepokisi leo le rego, “ Dira Gore Beibele e Phele!”)

¹⁴ A re re sebokeng se se latelago sa phuthego re tlo bolela ka e nngwe ya dipuku tša Beibele tše kopana tša boporofeta, mohlomongwe puku yeo o sa e tsebego gabotse. Selo sa pele seo o ka se dirago e ka ba go kganyoga go tseba ka mo go oketšegilego ka seo moporofeta yoo a se ngwadilego. O ka dira seo bjang?

¹⁵ Sa pele, ipotšiše gore: ‘Ke tseba eng ka mongwadi wa puku ye? E be e le mang, o be a dula kae, gona o be a šoma go dira’ng?’ Ge re tseba dikarabo tša dipotšišo tše, re tla kwešiša gore ke ka baka la eng a dirišitše mantšu goba dipapišo tše itšego. Ge o dutše o bala puku yeo ya Beibele, nyaka mantšu ao a tlago go go thuša go kwešiša gore mongwadi wa yona e be e le motho wa mohuta mang.

¹⁶ Ka morago ga moo, tseba gore puku yeo e ngwadilwe neng. O ka dira seo ka go lebelela karolo yeo e rego, “Tatelano ya Dipuku tša Beibele” yeo e tšwelelago matlakaleng a ka mafelelong a Phetolelo ya Lefase le Lefsa ya Mangwalo a Makgethwa. Go oketša moo, o ka lebelela tšhate yeo e bolelago ka baporofeta le dikgoši yeo e tšwelelago ka pukwaneng ya Tlhahlo ya go Ithuta Lentšu la Modimo, go matlakala 14-17. Ge e ba puku yeo o ithutago yona e le ya boporofeta, e tla ba mo gobotse go tseba gore batho ba be ba phela bjang nakong ya ge puku yeo e be e ngwalwa. Moporofeta yo a e ngwadilego o be a nyaka go thuša batho go tlogela mekgwa efe e mebe? Moporofeta yoo o phetše ka nako e tee le bomang? Gore o kwešiše boemo gakaone, o ka swanelwa ke go lebelela ka dipukung tše dingwe tša Beibele. Ka mohlala, e le gore o kwešiše gabotse gore go be go direga eng mehleng ya moporofeta Amose, o ka holwa ke go bala Dikgoši tša Bobedi le Dikoronika tša Bobedi, tšeo di tšwelelago karolong ya mangwalo ao a sepedišanago le Amose 1:1. Go oketša moo, o ka lebelela puku ya Hosea, yoo go ka diregago gore o phetše nakong e tee le Amose. Dipuku tše tše dingwe tša Beibele di tla go thuša go kwešiša gakaone gore bophelo bo be bo  le bjang mehleng ya Amose.—2 Dikg. 14:25-28; 2 Dikor. 26:1-15; Hos. 1:1-11; Amose 1:1.

17-18. Diriša mehlala yeo e lego mo serapeng goba mehlala ya gago go bontšha kamoo ditaba tšeo di ka bonagalago di se bohlokwa temaneng e itšego di ka go thušago go thabela go ithuta Beibele.

¹⁷ Ke mo gobotse gore re nyake go ithuta ka mo go oketšegilego ge re bala Beibele. Ka mohlala, a re re o bala kgaolo 12 ya boporofeta bja Sakaria yeo e bolelago e sa le pele ka go tlo bolawa ga Mesia. (Sak. 12:10) Ge o fihla go temana 12, o bala gore “moloko wa Nathane” o be o tlo lla kudu ge Mesia a ehwa. Go e na le gore o no bala mantšu ao o fete, emanyana gomme o ipotšiše gore: ‘Moloko wa Nathane o tswalana bjang le Mesia? Na go na le seo o ka se dirago gore o hwetše ditaba tše di oketšegilego?’ O ka dira nyakišišo ka taba ye. Lengwalo leo le sepedišanago le Sakaria 12:12 ke Samuele wa Bobedi 5:13, 14, moo o tlago go ithuta gore Nathane e be e le yo mongwe wa barwa ba Kgoši Dafida. Lengwalo la bobedi leo le sepedišanago le temana yeo, e lego Luka 3:23, 31, le bontšha gore Jesu ke wa moloko wa Nathane ka Maria. (Bala wp16.3 9 dir. 1-3.) Gateetee, o thoma go ipshina ka seo o ithutago sona! O be o dutše o tseba gore go be go boletšwe e sa le pele gore Jesu o be a tla tšwelela molokong wa Dafida. (Mat. 22:42) Eupša Dafida o be a na le barwa ba ka godimo ga ba 20. Na ga go makatše gore Sakaria o boletše ka go lebanya gore moloko wa Nathane o be o tla lla ge Jesu a bolawa?

¹⁸ Lebelela mohlala o mongwe. Kgaolong ya mathomo ya Luka, re bala gore morongwa Gabariele o ile a etela Maria gomme a mmotša selo se itšego se se makatšago ka ngwana yo a bego a tlo mmelega. O itše: “Yena yoo e tla ba yo mogolo gomme o tla bitšwa Morwa wa Yo Godimodimo; Jehofa Modimo o tla mo nea sedulo sa bogoši sa Dafida tatagwe, o tla buša e le Kgoši ntlong ya Jakobo ka mo go sa felego.”  (Luka 1:32, 33) Gantši re no lebiša tlhokomelo karolong ya mathomo feela ya molaetša wa Gabariele, moo a rego Jesu o be a tla bitšwa “Morwa wa Yo Godimodimo.” Eupša Gabariele o ile a porofeta le gore Jesu o be a tla “buša e le Kgoši.” Ka gona re ka ipotšiša gore Maria a ka ba a ile a nagana gore mantšu ao a morongwa a ra go reng. Na a ka ba a ile a nagana gore Gabariele o be e ra gore Jesu o tla buša legatong la Kgoši Heroda, goba a buša legatong la yo mongwe wa bao ba bego ba tla buša ka morago ga Kgoši Heroda kua Isiraele? Ge e ba Jesu e be e ka ba kgoši, gona Maria e be e tla ba mmago kgoši, gomme lapa la gagwe le be le tla dula ka mošate. Eupša ga go na moo Beibele e re botšago gore Maria o ile a botša Gabariele selo sa go swana le se. Le gona ga go na mo re kwago go thwe Maria o ile a kgopela go bewa maemong a itšego Mmušong, go etša ge barutiwa ba bangwe ba babedi ba Jesu ba ile ba kgopela. (Mat. 20:20-23) Taba ye e bontšha gabotse gore Maria o be a ikokobeditše kudu!

19-20. Go ya ka Jakobo 1:22-25 le 4:8, morero wa rena wa go ithuta ke ofe?

¹⁹ Re swanetše go gopola gore morero wa rena o mogolo ge re ithuta Lentšu la Modimo le dikgatišo tša rena ke go ba le tswalano e tiilego le Jehofa. Le gona re nyaka go bona gabotse “mohuta wa motho” yo re lego yena gomme re dire diphetogo tše di nyakegago e le gore re kgahliše Modimo. (Bala Jakobo 1:22-25; 4:8.) Ka gona, nako e nngwe le e nngwe ge re thoma go ithuta, re swanetše go kgopela Jehofa gore a re thuše ka moya wa gagwe o mokgethwa. Le gona re swanetše go mo kgopela gore a re thuše go holwa ke seo re ithutago sona le gore re itebelele ka tsela yeo a re lebelelago ka yona.

²⁰ Anke ka moka ga rena re beng bjalo ka mohlanka wa Modimo yo a botegago yoo mopsalme a mo hlalositšego ka gore: “O kgahlwa ke molao wa Jehofa, gomme o bala molao wa gagwe ka lentšu la tlasana mosegare le bošego. . . . Se sengwe le se sengwe seo a se dirago se tla atlega.”—Ps. 1:2, 3.