SEHLOGO SE ITHUTWAGO 19
Go Bontšha Lerato le Toka ge go na le Motho yo a Dirilego Sebe se Segolo
“Ga o Modimo yo a kgahlwago ke bokgopo; ga go le o tee yo mobe yo a ka dulago le wena le ge e le ka lebakanyana.”—PS. 5:4.
KOPELO 142 Go Kgomarela Kholofelo ya Rena
SEO RE TLAGO GO ITHUTA SONA *
1-3. (a) Go ya ka Psalme 5:4-6, Jehofa o ikwa bjang ka batho bao ba dirago dilo tše mpe? (b) Ke ka baka la’ng re ka re go tlaiša bana ka tša thobalano ga go dumelelane le “molao wa Kriste”?
JEHOFA MODIMO o hloile bokgopo goba mehuta ka moka ya bobe. (Bala Psalme 5:4-6.) O hloile kudu go bona bana ba tlaišwa ka tša thobalano, e lego sebe se segolo kudu le seo se šišimišago. Ka ge re le Dihlatse tša Jehofa, re ekiša Jehofa ka go hloya go tlaišwa ga bana ka tša thobalano gomme ga re homole ge e ba setho le ge e le sefe sa phuthego se dirile sebe sa mohuta woo. Re gata mogato gateetee ge re se na go kwa ka taba yeo.—Baroma 12:9; Baheb. 12:15, 16.
2 Go tlaiša bana ka tša thobalano ga go dumelelane le “molao wa Kriste.” (Bagal. 6:2) Ke ka baka la’ng re ka re’alo? Go etša ge re ithutile sehlogong se se fetilego, molao wa Kriste, e lego dilo ka moka tšeo Jesu a re rutilego tšona ka mantšu le ka mohlala, o theilwe leratong e bile o kgothaletša batho go bontšhana toka. Ka ge Bakriste ba therešo ba ekwa molao wo, ba swara bana ka tsela yeo e dirago gore ba ikwe ba šireletšegile e bile ba ratwa. Eupša go tlaiša ngwana ka tša thobalano ke go bontšha boithati, ke tiro yeo e se nago toka yeo e dirago gore ngwana a ikwe a se a šireletšega e bile a sa ratwe.
3 Sa go kweša bohloko kudu ke gore go tlaiša bana ka tša thobalano ke bothata bja lefase ka moka bjoo bo kgomago le Bakriste ba therešo. Ke ka baka la’ng bo kgoma le Bakriste? Ka gobane “batho ba kgopo le baikgakanyi” ba atile, gomme ba bangwe ba ka leka go tsena ka phuthegong. (2 Tim. 3:13) Go oketša moo, ba bangwe bao ba ipolelago gore ke ditho tša phuthego ba ineetše dikganyogong tša nama gomme ba tlaiša bana ka tša thobalano. A re hlaloseng gore ke ka baka la eng re re go tlaiša bana ka tša thobalano ke sebe se segolo. Ke moka re tlo boledišana ka seo bagolo ba se dirago ge go na le motho yo a dirilego sebe se segolo ka phuthegong, go akaretša sebe sa go tlaiša ngwana ka tša thobalano. Le gona re tlo boledišana ka gore ke eng seo batswadi ba swanetšego go se dira gore ba šireletše bana ba bona. *
SEBE SE SEGOLO
4-5. Ke ka baka la’ng re ka re motho yo a tlaišago ngwana ka tša thobalano o senyetša ngwana yoo?
4 Go tlaiša bana ka tša thobalano go kgoma batho ka nako e telele. Mokgwa wo o kweša bohloko bana bao ba tlaišitšwego gotee le batho bao ba ba ratago, ba bjalo ka ditho tša lapa le bana babo bona le dikgaetšedi ka phuthegong. Go tlaiša bana ka tša thobalano ke sebe se segolo.
5 Go tlaiša ngwana ka tša thobalano ke go senyetša ngwana yoo. Go kweša ba bangwe bohloko le go dira gore ba tlaišege, ke sebe. Go etša ge re tla bona sehlogong se se latelago, motho yo a tlaišago ngwana o mo kweša bohloko ka tsela e tseneletšego kudu. O dira gore ngwana yoo a se sa mo tshepa, e bile a se sa ikwa a šireletšegile. Re swanetše go šireletša bana gore ba se tlaišwe ka tsela ye, gomme re swanetše go kgothatša le go thuša bao ba tlaišitšwego.—1 Bathes. 5:14.
6-7. Ke ka baka la’ng go tlaiša bana ka tša thobalano e le go senyetša phuthego le mmušo?
6 Go tlaiša bana ka tša thobalano ke go senyetša phuthego. Setho sa phuthego seo se ka hwetšwago se na le molato wa go tlaiša bana ka tša thobalano, se senya phuthego leina. (Mat. 5:16; 1 Pet. 2:12) Ga se nnete gore phuthego ga e na bothata le batho bao ba tlaišago bana ka tša thobalano ka gobane Bakriste ba dimilione bao ba botegago ba leka ka thata go ‘lwela tumelo ya bona’ gotee le go itshwara ka tsela yeo e dirago gore Jehofa a retwe. (Juda 3) Ga re dumelele batho bao ba dirago dilo tše mpe gomme ba sa itshole, le bao ba senyago phuthego leina gore ba tšwele pele e le ditho tša phuthego.
7 Go tlaiša bana ka tša thobalano ke go senyetša mmušo. Bakriste ba swanetše ‘go ikokobeletša balaodi ba bagolo.’ (Baroma 13:1) Re bontšha gore re ikokobeletša balaodi ba bagolo ka go hlompha le go kwa melao ya naga. Ka mohlala ge e ba motho yo e lego setho sa phuthego a ka tshela molao ka go tlaiša bana ka tša thobalano, motho yoo o senyetša mmušo. (Bapiša le Ditiro 25:8.) Gaešita le ge bagolo ba se ba newa matla a go kgonthišetša gore batho ga ba tshele molao wa naga, ga ba šireletše motho le ge e le ofe yo a tlaišago bana ka tša thobalano gore a se otlwe ke mmušo. (Baroma 13:4) Motho yoo a dirilego sebe o tla buna seo a se bjetšego.—Bagal. 6:7.
8. Jehofa o lebelela bjang motho yo a senyetšago batho ba bangwe?
8 Selo se sebe le go feta ke gore go tlaiša bana ka tša thobalano ke go direla Modimo sebe. (Ps. 51:4) Ge motho a senyetša motho yo a itšego, o direla Jehofa sebe. A re lebeleleng mohlala go tšwa Molaong wa Moshe wo Modimo a bego a o neile Baisiraele. Molao woo o be o re motho yo a ka radiago moagišani wa gagwe ga a “botegele Jehofa.” (Lef. 6:2-4) Ka baka leo, motho yo e lego setho sa phuthego yo a tlaišago ngwana, yo a dirago gore ngwana yoo a se sa ikwa a šireletšegile, ga a botegele Modimo. Motho yoo o senya leina la Jehofa kudu. Ke ka baka leo re sa swanelago go tšhabela taba ya gore go tlaiša bana ka tša thobalano ke sebe se se šišimišago go Modimo gomme le rena re swanetše go se lebelela ka tsela yeo.
9. Mokgatlo wa Jehofa o gatišitše ditaba dife tšeo di theilwego Mangwalong tša mabapi le go tlaišwa ga bana ka tša thobalano, gona ka baka la’ng?
9 Ke go tloga kgale mokgatlo wa Jehofa o gatiša dihlogo tše di theilwego Mangwalong tša mabapi le taba ya go tlaišwa ga bana. Ka mohlala, dihlogo tše di tšwelelago ka go Morokami le Phafoga! di hlalositše seo bao ba tlaišitšwego ka tša thobalano ba ka se dirago go lebeletšana le kgateletšego yeo e bakwago ke seo se ba diragaletšego. Le gona di hlalositše kamoo ba bangwe ba ka ba thušago ka gona le go ba kgothatša, le kamoo batswadi ba ka šireletšago bana ba bona. Mokgatlo o neile bagolo ditaelo tšeo di theilwego Mangwalong tša mabapi le seo ba swanetšego go se dira ge go na le motho yo a tlaišitšego ngwana ka tša thobalano, gomme ka dinako tše dingwe o fela o fetoša ditaelo tšeo. Ke ka baka la’ng mokgatlo o fela o fetoša ditaelo tše? O dira se go kgonthišetša gore ka mehla bagolo ba diriša molao wa Kriste e bile ba bontšha lerato le toka ge go na le motho yo a dirilego sebe sa go tlaiša ngwana ka tša thobalano.
SEO BAGOLO BA SE DIRAGO GE GO NA LE MOTHO YO A DIRILEGO SEBE SE SEGOLO
10-12. (a) Bagolo ba swanetše go gopola’ng ge ba ekwa gore go na le motho yo a dirilego sebe se segolo, gona ke dilo dife tšeo ba tshwenyegilego ka tšona? (b) Go ya ka Jakobo 5:14, 15, bagolo ba leka go dira’ng?
10 Ge bagolo ba swaragana le ditaba le ge e le dife tšeo di akaretšago sebe se segolo, ba dula ba gopola gore molao wa Kriste o nyaka gore ba sware mohlape ka lerato le go dira seo Modimo a rego se lokile e bile ke sa toka. Ka baka leo, ba swanetše go naganišiša ka dilo tše mmalwa ge ba begelwa gore go na le motho yo a dirilego sebe se segolo. Selo se segolo seo bagolo ba tshwenyegilego ka sona ke go hlompha Jehofa le go šireletša leina la gagwe gore le se senywe. (Lef. 22:31, 32; Mat. 6:9) Selo se sengwe sa bohlokwa seo bagolo ba tshwenyegilego ka sona, ke go thuša bana babo bona le dikgaetšedi ka phuthegong gore ba tiiše tswalano ya bona le Jehofa. Le gona bagolo ba kgothatša le go thekga bao ba senyeditšwego.
11 Go oketša moo, ge e ba motho yo a dirilego sebe e le setho sa phuthego, bagolo ba leka go mo thuša gore ge e ba a itshola, a kgone go lokiša tswalano ya gagwe le Jehofa. (Bala Jakobo 5:14, 15.) Mokriste yo a dirago sebe se segolo e le go kgotsofatša kganyogo ya gagwe e fošagetšego, o swana le motho yo a babjago. Se se ra gore ga a sa na tswalano e botse le Jehofa. * Re ka swantšha bagolo le dingaka. Ba leka go “fodiša yo a babjago [e lego motho yo a dirilego sebe].” Ba ka nea motho yoo keletšo yeo e theilwego Beibeleng go mo thuša go lokiša tswalano ya gagwe le Modimo, eupša se se ka kgonega ge feela motho yoo a itshola e le ka kgonthe.—Dit. 3:19; 2 Bakor. 2:5-10.
12 Go molaleng gore bagolo ba na le boikarabelo bjo bogolo kudu. Ba tshwenyega kudu ka mohlape wo Modimo a ba neilego wona gore ba o hlokomele. (1 Pet. 5:1-3) Ba nyaka gore bana babo bona le dikgaetšedi ka phuthegong ba ikwe ba šireletšegile. Ka baka leo, ba gata mogato kapejana ge ba ekwa gore go na le motho yo a dirilego sebe se segolo, go akaretša le sebe sa go tlaiša ngwana ka tša thobalano. Ba rarolla bothata bjo bjang? Ela hloko dipotšišo tše di tšwelelago mathomong a serapa 13, 15 le 17.
13-14. Na bagolo ba latela molao wa naga tabeng ya go bega molato wa motho yo a gobošitšego ngwana ka tša thobalano? Hlalosa.
13 Na bagolo ba latela molao wa naga tabeng ya go begela ba mmušo ge go na le motho yo go thwego o tlaišitše ngwana ka tša thobalano? Ee. Dinageng tšeo go nago le melao e bjalo, bagolo ba latela molao wa naga ka go begela ba mmušo ka taba yeo. (Baroma 13:1) Melao e bjalo ga e lwantšhane le molao wa Modimo. (Dit. 5:28, 29) Ka gona ge motho yo a itšego a boditše bagolo gore go na le motho yo a tlaišitšego ngwana ka tša thobalano, gateetee bagolo ba kgopela tlhahlo ofising ya lekala mabapi le gore ke melao efe ya naga yeo ba swanetšego go e latela.
14 Ge bagolo ba boledišana le ngwana yoo le batswadi ba gagwe, goba le motho yo mongwe yo a tsebago ka taba yeo, ba ba gopotša gore ba ka ya go bega taba yeo maphodiseng goba lefelong le lengwe la maleba. Eupša go thwe’ng ge e ba motho yo a dirilego sebe sa go tlaiša ngwana ka tša thobalano e le setho sa phuthego gomme taba yeo e thoma go tsebja mo motseng? Na Mokriste yo a begilego taba yeo maphodiseng o swanetše go ikwa eka o sentše leina la Modimo? Aowa. Motho yo a tlaišitšego ngwana ka tša thobalano ke yena a sentšego leina la Modimo.
15-16. (a) Go ya ka Timotheo wa Pele 5:19, ke ka baka la’ng go nyakega bonyenyane dihlatse tše pedi pele bagolo ba ka hloma komiti ya boahlodi? (b) Bagolo ba dira’ng ge ba ekwa gore motho yo e lego setho sa phuthego o latofatšwa ka gore o tlaišitše ngwana ka tša thobalano?
15 Ke ka baka la’ng bagolo ka phuthegong ba nyaka bonyenyane dihlatse tše pedi go hlatsela gore motho yo a itšego o dirile sebe se segolo? Ka gobane Beibele e re bagolo ba swanetše go dira bjalo e le gore ba bontšhe toka. Ge e ba go na le motho yo a latofatšwago ka gore o dirile sebe se segolo, eupša motho yoo a sa dumele gore o dirile sebe seo, go swanetše go ba le dihlatse tše pedi tšeo di tsebago ka taba yeo pele bagolo ba ka hloma komiti ya boahlodi. (Doit. 19:15; Mat. 18:16; bala 1 Timotheo 5:19.) Na se se ra gore go nyakega dihlatse tše pedi pele motho a ka begela ba mmušo gore go na le motho yo a latofatšwago ka gore o tlaišitše ngwana ka tša thobalano? Aowa. Taba ye ga e šome ge bagolo goba batho ba bangwe ba nyaka go bega molato wa bosenyi mmušong.
16 Ge bagolo ba ekwa gore ka phuthegong go na le motho yo a latofatšwago ka gore o tlaišitše ngwana ka tša thobalano, ba leka go latela melao le ge e le efe ya naga ya mabapi le go bega taba yeo, ke moka ka morago ga moo, ba lebeledišiša Mangwalo go bona ge e ba go nyakega komiti ya boahlodi. Ge e ba motho yoo a re ga se a dira molato woo, bagolo ba tla theetša bohlatse bja ba bangwe bao ba ka bago ba tseba seo se diragetšego. Ge e ba batho ba babedi (e lego motho yo a begilego taba yeo le yo a ka kgonthišetšago molato wo) ba kgonthišetša gore taba yeo ke nnete goba gore motho yoo o kile a tlaiša le bana ba bangwe, gona bagolo ba ka hloma komiti ya boahlodi. * Ge go se na hlatse ya bobedi, seo ga se re gore motho yo a begilego taba yeo o bolela maaka. Gaešita le ge go ka no se hwetšagale dihlatse tše pedi go hlatsela gore motho yoo o tlaišitše ngwana ka tša thobalano, bagolo ba ka lemoga gore o dirile sebe se segolo seo se ka kwešago batho ba bangwe bohloko kudu. Bagolo ba tla tšwela pele go kgothatša le go thekga batho bao ba ka bago ba kwele bohloko. Go oketša moo, bagolo ba tla dula ba ntšhitše mahlo dinameng go šireletša phuthego e le gore motho yo a ka bago a tlaišitše ngwana yo a itšego ka tša thobalano a se tlaiše le ba bangwe.—Dit. 20:28.
17-18. Mošomo wa komiti ya boahlodi ke eng?
17 Mošomo wa komiti ya boahlodi ke eng? Lentšu “boahlodi” ga le re gore bagolo ba dira kahlolo goba phetho ya ge e ba motho yo a latofatšwago a swanetše go otlwa ke ba mmušo ka ge a tshetše molao. Bagolo ga ba tsenatsenane le ditaba tša molao wa naga, ba tlogelela balaodi ba bagolo ba mmušo go ahlola melato ya bosenyi. (Baroma 13:2-4; Tito 3:1) Mošomo wa bagolo ke go ahlola goba go bona ge e ba motho yo a dirilego sebe se segolo a ka tšwela pele e le setho sa phuthego.
18 Ge bagolo ba le komiting ya boahlodi, ba ahlola feela ditaba tše di lego mabapi le tswalano ya motho yoo le Modimo. Ba diriša Beibele go bona ge e ba motho yo a tlaišitšego ngwana ka tša thobalano a itshola goba a sa itshole. Ge e ba a sa itshole, bagolo ba mmotša gore o tlo kgaolwa, ke moka ka morago ga moo, ka phuthegong go dirwa tsebišo ya gore motho yoo ga e sa le yo mongwe wa Dihlatse tša Jehofa. (1 Bakor. 5:11-13) Ge e ba a itshola, a ka no se kgaolwe. Lega go le bjalo, bagolo ba tla mmotša gore go tla tšea mengwaga e mentši kudu pele a ka newa ditokelo le ge e le dife ka phuthegong, goba gore mohlomongwe a ka se tsoge a neilwe ditokelo ka phuthegong. Ka ge bagolo ba tloga ba nyaka gore bana ba ikwe ba šireletšegile, ba ka boledišana ka thoko le batswadi ba ka phuthegong go ba lemoša gore ba swanetše go hlokomela bana ba bona ge motho yoo a le gona mo kgauswi. Ge bagolo ba lemoša batswadi ka motho yoo, ba swanetše go ba šedi gore ba se bolele maina a batho bao motho yo a šetšego a ba kwešitše bohloko.
KAMOO O KA ŠIRELETŠAGO BANA BA GAGO
Batswadi ba šireletša bana ba bona gore ba se ke ba tlaišwa ka tša thobalono ka go ba ruta ditaba tša mabapi le thobalano tšeo di ba lekanego go ya ka mengwaga ya bona. Batswadi ba diriša dihlogo le dibidio tšeo mokgatlo wa Modimo o di tšweleditšego. (Bona dirapa 19-22)
19-22. Batswadi ba ka dira’ng go šireletša bana ba bona? (Bona seswantšho sa letlakala la ka ntle.)
19 Ke mang yo a swanetšego go šireletša bana? Ke batswadi ba bona. * Bana ba gago ke mpho yeo o e neilwego ke Modimo, “ke bohwa bjo bo tšwago go Jehofa.” (Ps. 127:3) Jehofa o go neile boikarabelo bja go hlokomela bana ba gago. O ka dira’ng go šireletša bana ba gago gore ba se tlaišwe ka tša thobalano?
20 Sa pele, ithute ka taba ya go tlaišwa ga bana ka tša thobalano. Tseba gore ke batho ba mohuta ofe bao ba tlaišago bana le gore ba diriša mekgwa efe go goketša bana bao. Lemoga e sa le pele maemo goba batho bao ba ka bago kotsi. (Die. 22:3; 24:3) Gopola gore mabakeng a mantši, ngwana o tlaišwa ka tša thobalano ke motho yo a mo tsebago le go mo tshepa.
21 Sa bobedi, bolela le bana ba gago ka bolokologi, gomme o ba kgothaletše gore le bona ba se ke ba go fihlela selo. (Doit. 6:6, 7) Seo se ra gore o swanetše go theetša ka kelohloko ge bana ba gago ba bolela. (Jak. 1:19) Gopola gore bana bao ba tlaišitšwego ka tša thobalano gantši ba tšhaba go botša motho yo mongwe ka taba ye. Ba ka ba ba tšhaba gore ga go na yo a tlago go ba dumela, goba motho yo a ba tlaišitšego a ka ba a ba tšhošeditše gore o tla ba dira selo se itšego se sebe ge ba ka bolela. Ge e ba o belaela gore go ka ba go na le selo se itšego se sebe seo se diragaletšego ngwana wa gago, mmotšiše dipotšišo ka tsela e botho ke moka o mo theetše o sa mo felele pelo.
22 Sa boraro, ruta bana ba gago ka taba ya go tlaišwa ga bana ka tša thobalano. Ba rute ditaba tša mabapi le thobalano tšeo di ba lekanego go ya ka mengwaga ya bona. Ba rute gore ba reng le gore ba dire eng ge motho yo a itšego a ba swaraswara ka tsela yeo e sa swanelago. Diriša dihlogo le dibidio tšeo mokgatlo wa Modimo o di tšweleditšego tšeo di bolelago kamoo o ka šireletšago bana ba gago.—Bona lepokisi leo le rego “ Ithute o be o Rute le Bana ba Gago.”
23. Re lebelela bjang go tlaišwa ga bana ka tša thobalano, gona re tlo araba potšišo efe sehlogong se se latelago?
23 Ka ge re le Dihlatse tša Jehofa, re lebelela go tlaišwa ga bana ka tša thobalano e le sebe se segolo le taba e sehlogo kudu. Ka ge re ekwa molao wa Kriste, ga re šireletše batho bao ba tlaišago bana ka tša thobalano gore ba se otlwe. Eupša re ka dira’ng go thuša bao ba ilego ba tlaišwa ka tša thobalano? Potšišo ye e tla arabja sehlogong se se latelago.
KOPELO 103 Badiši—Dimpho Tšeo e Lego Banna
^ ser. 5 Sehlogong se re tlo bolela kamoo re ka šireletšago bana gore ba se tlaišwe ka tša thobalano. Le gona re tlo ithuta ka dilo tšeo bagolo ba di dirago go šireletša phuthego le kamoo batswadi ba ka šireletšago bana ba bona.
^ ser. 3 TLHALOSO YA MANTŠU A ITŠEGO: Go tlaiša ngwana ka tša thobalano ke ge motho yo mogolo a diriša ngwana go kgotsofatša dikganyogo tša gagwe tša thobalano. Seo se ka akaretša go robala le yena, go hupa setho sa gagwe sa pelego goba go se tsenya ka morago, go phophola setho sa gagwe sa pelego, matswele goba marago goba go mo dira dilo tše dingwe tšeo di gobogilego. Go bohlokwa go tseba gore ge ngwana a tlaišitšwe ka tša thobalano, o dirilwe selo se sehlogo kudu seo se sa mo swanelago e bile ga se molato wa gagwe gore o tlaišitšwe. Gaešita le ge bontši bja bana bao ba tlaišwago e le banenyana, go na le bašemane ba bantši bao le bona ba tlaišwago ka tša thobalano. Le gona, gaešita le ge batho ba bantši bao ba tlaišago bana ka tsela ye e le banna, basadi ba bangwe le bona ba tlaiša bana ka tša thobalano.
^ ser. 11 Ge e ba motho yo a itšego a dirile sebe se segolo ka baka la ge tswalano ya gagwe le Jehofa e fokola, seo ga se re gore ga a na molato. Motho yo a dirilego sebe o ikarabela ka mo go feletšego go Jehofa ka diphetho tša gagwe le ditiro tša gagwe.—Baroma 14:12.
^ ser. 16 Bagolo ba ka se nyake gore ngwana a be gona ge ba bolela le motho yo a latofatšwago ka gore o tlaišitše ngwana yoo ka tša thobalano. Motswadi goba motho yo mongwe yoo ngwana yoo a mo tshepago a ka boledišana le bagolo ka taba yeo, e le go thibela gore ngwana yoo a se gobale maikwelong le go feta.
^ ser. 19 Taba ye go bolelwago ka yona mo mabapi le boikarabelo bja batswadi e šoma le go motho yo a godišago ngwana yo e sego wa gagwe goba yo a mo hlokomelago.
