1-2. Ke’ng seo mongwadi yo mongwe wa dipuku a ilego a se bolela, gona re tlo ithuta’ng sehlogong se?

LEHONO batho ba dimilione ba bolela gore ba dumela go Jesu eupša ga ba latele seo a se rutilego. (2 Tim. 4:3, 4) Ge e le gabotse, mongwadi yo mongwe wa dipuku o itše: “Ge go be go ka ba le monna yo mongwe yo a swanago le Jesu, yo a bolelago le go dira dilo go swana le Jesu . . . , na re be re tla mo ganetša go swana le batho bao ba ilego ba mo ganetša mengwageng e 2 000 e fetilego? . . . Tsela yeo batho ba dirago dilo ka yona e bontšha gore re be re tlo mo ganetša.”

² Batho ba bantši ba mehleng ya Jesu ba ile ba mo kwa a ruta le go mmona a dira mehlolo, eupša ba ile ba gana go dumela go yena. Ka baka la’ng? Sehlogong se se fetilego re ithutile ka mabaka a mane a gore ke ka baka la eng batho ba ile ba gana go latela Jesu ka baka la dilo tšeo a di boletšego le tšeo a di dirilego. A re ithuteng ka mabaka a mangwe gape a mane. Le gona re tlo kwa gore ke ka baka la eng batho ba gana go amogela molaetša wa rena le gore re ka dira eng gore re se ke ra dumelela selo se re šitiša go hlankela Jehofa.

3. Ke’ng seo se ilego sa dira gore batho ba bangwe ba gane go latela Jesu?

³ Ge Jesu a be a le mo lefaseng, o ile a fetša nako a na le batho ba mehuta ka moka. O ile a ja le bahumi le batho bao ba nago le maemo, eupša gape o ile a fetša nako a na le badiidi le batho bao ba gateletšwego. Go tlaleletša moo, o ile a kwela bohloko batho bao ba bego ba lebelelwa e le “badiradibe.” Batho bao ba bego ba ikgantšha ba ile ba gana go latela Jesu ka baka la dilo tšeo a ilego a di dira. Ba ile ba botšiša barutiwa ba Jesu gore: “Ke ka baka la’ng le eja e bile le enwa le balekgetho le badiradibe?” Jesu o ile a ba fetola a re: “Batho ba ba phetšego gabotse ga ba nyake ngaka,  eupša ba babjago ba a e nyaka. Ke tletše go biletša badiradibe boitsholong, e sego go bitša baloki.”—Luka 5:29-32.

4. Go ya ka moporofeta Jesaya, Bajuda ba be ba swanetše go letela gore Mesia a tle a swarwe bjang?

⁴ Mangwalo a re’ng? Nako e telele pele Mesia a ka tla mo lefaseng, moporofeta Jesaya o ile a hlalosa gore batho ba be ba ka se mo amogele. Jesaya o ile a bolela e sa le pele gore: “O ile a nyatšwa le go phengwa ke batho . . . Yo re mo furaletšego e le gore re se ke ra lebelela sefahlego sa gagwe. O ile a nyatšwa gomme re mo tšere e le yo e sego wa bohlokwa.” (Jes. 53:3) Ka ge moporofeta Jesaya o ile a bolela gore Mesia o be a tlo phengwa “ke batho,” Bajuda ba be ba swanetše go letela gore batho ba gane go latela Jesu.

5. Batho ba bantši lehono ba nagana’ng ka balatedi ba Jesu?

⁵ Na go na le bothata bjo bo swanago lehono? Ee. Baruti ba bantši ba a thaba ge batho bao ba tsenago dikereke tša bona e le bahumi, batho ba maemo setšhabeng e bile lefase le ba lebelela e le ba bohlale. Ba dumelela batho bao ba tsena dikereke tša bona le ge ba dira dilo tšeo Jehofa a di hloilego. Bona baruti bao ba tšeela fase batho bao ba hlankelago Jehofa le bao ba itshwerego gabotse ka gobane lefase ga le ba lebelele ba le bohlokwa. Paulo o boletše gore Modimo o kgethile batho bao ba “tšeelwago fase.” (1 Bakor. 1:26-29) Eupša re a tseba gore go Jehofa batho ka moka bao ba mo hlankelago ka go botega ba bohlokwa go yena.

6. Jesu o ile a re’ng go Mateo 11:25, 26, gona re ka mo ekiša bjang?

⁶ Re swanetše go dira’ng gore re se ke ra šitišwa go dula re hlankela Jehofa? (Bala Mateo 11:25, 26.) Ga se ra swanela go lebelela batho ba Modimo ka tsela yeo lefase le ba lebelelago ka yona. Re swanetše go dumela gore Jehofa o diriša feela batho bao ba ikokobeditšego go dira thato ya gagwe. (Ps. 138:6) Le gona nagana ka dilo tše dintši tšeo Jehofa a di dirilego a diriša batho bao lefase le ba bonago ba se bohlale.

7. Ke ka baka la’ng Jesu a ile a bitša Bafarisei baikaketši, gona ba ile ba arabela bjang?

⁷ Jesu o ile a ganetša dithuto tšeo baetapele ba bodumedi ba bego ba di ruta ka gobane ba be ba sa rute batho go hlankela Jehofa ka tsela yeo a e amogelago. Ka mohlala, o ile a utolla boikaketši bja Bafarisei bao ba bego ba tshwenyegile ka go hlapa diatla eupša ba sa tshwenyege ka go hlokomela batswadi. (Mat. 15:1-11) Barutiwa ba Jesu ba ka ba ba ile ba makatšwa ke mantšu ao a ilego a a bolela. Ge e le gabotse, ba ile ba mmotšiša gore: “Na o a tseba gore Bafarisei ba kgopišegile ge ba ekwa seo o se boletšego?” Jesu o ile a fetola a re: “Semela se sengwe le se sengwe seo se sa bjalwago ke Tate wa legodimong, se tla tumolwa ka medu. A ba kgopišege. Ke bahlahli ba foufetšego. Ka gona, ge e ba sefofu se hlahla sefofu, di tla wela moleteng ka bobedi.” (Mat. 15:12-14) Le ge baetapele ba bodumedi ba be ba kgopišitšwe ke seo Jesu a se boletšego, ga se a ka a tlogela go bolela nnete.

8. Jesu o ile a bontšha bjang gore Modimo ga a amogele madumedi ka moka?

⁸ Jesu o ile a bontšha gape gore dithuto tše dingwe tša bodumedi ke maaka. Ga se a ka a re Modimo o amogela dithuto ka moka tša bodumedi. Go e na le moo, o ile a hlalosa gore batho ba bantši ba be ba tlo sepela tseleng e phatlaletšego yeo e išago tshenyegong, mola e le gore ke ba sego kae feela bao ba bego ba tla sepela tseleng e pitlaganego yeo e išago bophelong. (Mat. 7:13, 14) O ile a bolela le gore ba bangwe ba be ba tlo bonagala eka ba hlankela Modimo, mola e le gore ge e le gabotse ga ba mo hlankele. O re lemoša ka gore: “Phafogelang baporofeta ba maaka bao ba tlago go lena ba apere matlalo a dinku eupša ka gare e le diphiri tše di gagolago. Le tla ba tseba ka dienywa tša bona.”—Mat. 7:15-20.

9. Tše dingwe tša dithuto tša bodumedi tšeo Jesu a ilego a bontšha gore ke maaka ke dife?

 ⁹ Mangwalo a re’ng? Boporofeta bja Beibele bo ile bja bolela e sa le pele gore Mesia o be a tla fišegela ntlo ya Jehofa. (Ps. 69:9; Joh. 2:14-17) Phišego yeo e ile ya dira gore Jesu a se ke a tšhaba go utolla dithuto tša bodumedi tša maaka. Ka mohlala, Bafarisei ba be ba dumela gore moya ga o hwe, eupša Jesu o ile a ruta gore bahu ba robetše. (Joh. 11:11) Basadutsei ba be ba sa dumele gore bahu ba tla tsošwa, eupša Jesu o ile a tsoša Latsaro. (Joh. 11:43, 44; Dit. 23:8) Bafarisei ba be ba ruta gore Modimo ke yena a re kgethelago dilo ka moka tšeo di tlago go re diragalela goba tšeo re tlago go di dira nakong e tlago, eupša Jesu o ile a ruta gore batho ke bona ba ikgethelago go hlankela Jehofa goba go se mo hlankele.—Mat. 11:28.

10. Ke ka baka la’ng batho ba bantši lehono ba sa nyake go theetša molaetša wa rena?

¹⁰ Na go na le bothata bjo bo swanago lehono? Ee. Batho ba bantši lehono ga ba nyake go theetša molaetša wa rena ka gobane re diriša Beibele go ba bontšha gore dithuto tše dingwe tša bodumedi ke tša maaka. Baruti ba ruta batho bao ba tsenago dikereke tša bona gore Modimo o otla badiradibe diheleng. Ba diriša thuto yeo ya maaka go tšhošetša batho gore ba ba latele. Ka ge re le bahlanka ba Jehofa bao ba rapelago Modimo yo a nago le lerato, re thuša batho go kwešiša gore dithuto tšeo ke tša maaka. Le gona baruti ba ruta gore moya ga o hwe. Ge e ba thuto ye e be e le nnete, go be go ka se hlokagale gore bahu ba tle ba tsošwe. Re bontšha batho gore thuto ye ga e gona ka Beibeleng. Le ge madumedi a mantši a ruta batho gore dilo ka moka tšeo di re diragalelago di kgethwa ke Modimo, rena re ruta gore motho o na le tokologo ya go ikgethela. Ka baka leo motho a ka ikgethela ge e ba a nyaka go hlankela Modimo. Ke’ng seo baruti ba se dirago ge ba ekwa gore re botša batho gore ba ba ruta maaka? Gantši ba a galefa!

11. Go ya ka mantšu a Jesu ao a lego go Johane 8:45-47, Modimo o nyaka gore batho ba gagwe ba dire’ng?

¹¹ Re swanetše go dira’ng gore re se ke ra šitišwa go dula re hlankela Jehofa? Ge e ba re rata therešo, re swanetše go dumela le go latela seo Modimo a rego re se dire. (Bala Johane 8:45-47.) Ka ge re sa swane le Sathane, re dula re emela therešo. Ga re dire selo seo se sa sepedišanego  le seo re se dumelago. (Joh. 8:44) Modimo o nyaka gore re ekiše Jesu ka gore re ‘hlaswe se sebe’ re “kgomarele go se sebotse.”—Baroma 12:9; Baheb. 1:9.

12. Ke ka baka la’ng tsela yeo Jesu a hwilego ka yona e ile ya dira gore Bajuda ba bantši ba gane go mo latela?

¹² Lebaka le lengwe leo le ilego la dira gore Bajuda ba bangwe ba gane go latela Jesu ke lefe? Paulo o ile a re: “Re bolela ka Kriste yo a kokotetšwego koteng gomme seo go Bajuda ke kgopišo.” (1 Bakor. 1:23) Ke ka baka la’ng Bajuda ba bantši ba ile ba gana go latela Jesu ka ge a ile a kokotelwa koteng? Ka gobane lehu la Jesu go bona le ile la bonagala e le la sesenyi le modiradibe, e sego la Mesia.—Doit. 21:22, 23.

13. Ke’ng seo batho bao ba bego ba gana go latela Jesu ba bego ba sa nyake go se dumela?

¹³ Ba bangwe ba Bajuda bao ba ilego ba gana go latela Jesu ba ile ba palelwa ke go lemoga gore o be a se na molato, o be a latofatšwa ka maaka le gore o be a swarwa ka go hloka toka. Batho bao ba bego ba ahlola Jesu ge a be a sekišwa ba be ba se na toka. Baahlodi ba lekgotleng le legolo la Bajuda ba ile ba dira phetho ka pelapela ntle le go latela melao ya ge motho a sekišwa. (Luka 22:54; Joh. 18:24) Batho bao ba bego ba ahlola Jesu ga se ba ka ba theetša gabotse seo a bego a latofatšwa ka sona, godimo ga moo ba ile “ba nyaka bohlatse bja maaka bja go latofatša Jesu e le gore ba mmolaye.” Ge ba be ba palelwa, moperisita yo a phagamego o ile a leka go dira gore Jesu a bolele selo seo se bego se tla mo dira gore a be le molato. Se se be se thulana le molao. (Mat. 26:59; Mar. 14:55-64) Baahlodi ba sa lokago ba ile ba nea mašole a Baroma ao a bego a letile lebitla “palo e lekanego ya ditsekana tša silifera” gore ba bolela maaka a gore ke ka baka la eng lebitla le be le se na motho.—Mat. 28:11-15.

14. Mangwalo a boletše gore go be go tlo direga’ng ka Mesia?

¹⁴ Mangwalo a re’ng? Le ge Bajuda ba bantši ba mehleng ya Jesu ba be ba se ba letela gore Mesia o tlo hwa, bona gore ke eng seo go boletšwego ka sona e sa le pele ka Mangwalong. Jesaya o ngwadile gore: “O tšholotše moya wa gagwe go fihla lehung, le gona o badilwe le batshedi ba molao; yena o ile a rwala sebe sa ba bantši, a  phophothela batshedi ba molao.” (Jes. 53:12) Ge Jesu a be a latofatšwa ka go dira selo se sebe e bile a ahlolelwa go bolawa, le e be e se lebaka le le kwagalago la gore Bajuda ba gane go mo latela.

15. Dihlatse tša Jehofa di ile tša latofatšwa ka dilo dife tšeo di ilego tša dira gore batho ba gane go theetša molaetša wa tšona?

¹⁵ Na go na le bothata bjo bo swanago lehono? Ee! Jesu o ile a bonwa molato ka selo seo a bego a se a se dira, gomme Dihlatse tša Jehofa lehono di swarwa ka tsela e swanago. A re boneng mehlala ya seo. Magareng ga 1930 le 1950 kua United States, bahlanka ba Modimo ba be ba na le melato yeo ba bego ba swanetše go e seka e le gore ba tle ba hlankele Modimo ba lokologile. Go be go le molaleng gore baahlodi ba bangwe ga ba rate Dihlatse tša Jehofa. Kua Quebec, Canada, Kereke ya Katholika le Mmušo di ile tša šomišana e le gore di thibele modiro wa rena wa go bolela ditaba tše dibotse. Bagoeledi ba bantši ba ile ba golegwa feela ka gobane ba be ba bolela le baagišani ba bona ka Mmušo wa Modimo. Kua Jeremane, mmušo wa Manazi o ile wa bolaya bana babo rena ba bantši bao ba botegago ba bafsa. Go thoma mengwageng e sego kae e fetilego, bana babo rena kua Russia ba ile ba bonwa molato le go golegwa ka baka la go bolela ka Beibele, e lego selo seo ba mmušo ba se bonago e le modiro o kotsi.” Le Phetolelo ya Lefase le Lefsa ya Mangwalo a Makgethwa ka Serussia e thibetšwe ka ge e bonwa e le Beibele e kotsi ka gobane e diriša leina la Jehofa.

16. Ka ge go bontšhitšwe go Johane wa Pele 4:1, ke ka baka la’ng re sa swanela go theetša ditaba tša maaka ka bahlanka ba Jehofa?

¹⁶ Re swanetše go dira’ng gore re se ke ra šitišwa go dula re hlankela Jehofa? Tseba ditaba ka botlalo. Thutong ya gagwe ya Thabeng, Jesu o ile a lemoša batheetši ba gagwe gore ba bangwe ba be ba tla “aketša ka go bolela mohuta o mongwe le o mongwe wa selo se sebe” ka bona. (Mat. 5:11) Maaka ao a tšwa go Sathane. O dira gore bao ba re ganetšago ba phatlalatše maaka ka rena. (Kut. 12:9, 10) Ga se ra swanela go theetša maaka ao re a kwago ka rena. Le gona ga se ra swanela go dumelela maaka ao a dira gore tumelo ya rena e fokole.—Bala 1 Johane 4:1.

17. Ke ka baka la’ng batho ba bangwe ba ile ba gana go latela Jesu ka baka la dilo tšeo di ilego tša direga pele a ka hwa?

¹⁷ Pele ga ge Jesu a ka bolawa, yo mongwe wa baapostola ba gagwe ba 12 o ile a mo eka. Yo mongwe wa baapostola ba gagwe o ile a mo latola gararo gomme baapostola ba gagwe ka moka ba ile ba mo tlogela bošegong bja pele ga ge a ka bolawa. (Mat. 26:14-16, 47, 56, 75) Seo ga se sa ka sa makatša Jesu. O be a ile a bolela e sa le pele gore se se tla direga. (Joh. 6:64; 13:21, 26, 38; 16:32) Ge ba bangwe ba be ba bona se ba ka ba ba ile ba se nyake go ba balatedi ba Jesu ka gobane ba ka ba ba ile ba re: ‘Ge e ba baapostola ba Jesu ba itshwara ka tsela ye, ga ke nyake go ba yo mongwe wa bona!’

18. Ke boporofeta bofe bjo bo ilego bja phethagala nakonyana pele ga ge Jesu a ka bolawa?

¹⁸ Mangwalo a re’ng? Mengwaga e mentši pele ga ge Jesu a ka tla mo lefaseng, Jehofa o ile a bolela gore Mesia o be a tlo ekwa ka ditsekana tše 30 tša tšhelete ya silifera. (Sak. 11:12, 13) Jesu o be a tlo ekwa ke yo mongwe wa bagwera ba gagwe ba bagolo. (Ps. 41:9) Moporofeta Sakaria o ngwadile gape gore: “Hlaba modiši gore mohlape o gašane.” (Sak. 13:7) Batho bao ba ratago Jehofa ba be ba ka se gane go latela Jesu ge ba bona dilo tšeo di direga, ge e le gabotse tumelo ya bona e be e tlo tia ge ba bona boporofeta bjo bo boletšwego ka Jesu bo phethagala.

19. Ke’ng seo batho bao ba ratago Jehofa ba se tsebago?

¹⁹ Na go na le bothata bjo bo swanago lehono? Ee. Mehleng ya rena, bahlanka ba Jehofa ba sego kae bao ba tsebegago kudu ba ile ba tlogela go hlankela Jehofa gomme ya ba bahlanogi,  ke moka ba leka go ntšha ba bangwe ka phuthegong. Ba ile ba bolela dilo tšeo di sa kgahlišego ka Dihlatse tša Jehofa, nnete e sa felelago, le go di latofatša ka maaka dikuranteng, radiong, thelebišeneng le Inthaneteng. Eupša bao ba tlogago ba nyaka go hlankela Jehofa ba ka se tlogele go latela Jesu. Go e na le moo, ba a tseba gore Beibele e boletše e sa le pele gore dilo tša mohuta wo di be di tla direga.—Mat. 24:24; 2 Pet. 2:18-22.

20. Ke’ng seo re swanetšego go se dira e le gore re se ke ra arošwa ke bao ba tlogetšego go hlankela Jehofa? (2 Timotheo 4:4, 5)

²⁰ Re swanetše go dira’ng gore re se ke ra šitišwa go dula re hlankela Jehofa? Re swanetše go tiiša tumelo ya rena ka go ithuta Lentšu la Modimo le go rapela ka mehla le go dula re swaregile ka modiro woo Jehofa a re laetšego gore re o dire. (Bala 2 Timotheo 4:4, 5.) Ge e ba re na le tumelo, re ka se tšhoge ge re ekwa ditaba tše mpe ka Dihlatse tša Jehofa. (Jes. 28:16) Tsela yeo re ratago Jehofa, Lentšu la gagwe le bana babo rena e tlo re thuša gore re se ke ra dumelela batho bao ba tlogetšego therešo ba re šitiša go hlankela Jehofa.

21. Le ge batho ba bantši lehono ba gana go theetša molaetša wa rena, ke eng seo re swanetšego go kgodišega ka sona?

²¹ Mehleng ya Jesu, batho ba bantši ba ile ba gana go mo latela. Eupša go na le ba bangwe ba bantši bao ba ilego ba mo latela. Batho bao ba akaretša yo mongwe wa lekgotla la Bajuda la Sanhedrine le “lešaba le legolo la baperisita.” (Dit. 6:7; Mat. 27:57-60; Mar. 15:43) Le lehono batho ba dimilione ba latela Jesu. Ka baka la’ng? Ka gobane ba tseba ditherešo tšeo di lego ka Lentšung la Modimo e bile ba a di rata. Lentšu la Modimo le re: “Bao ba ratago molao wa gago ba atetšwe ke khutšo, ga ba na tšhitišo.”—Ps. 119:165.