1-2. Dihlatse tša Jehofa tše dintši di welwa ke mathata afe?

MOAPOSTOLA PAULO o ile a kgothaletša Timotheo le Bakriste ka moka go dira sohle seo ba ka se kgonago go hlankela Jehofa. (2 Tim. 4:5) Ka moka ga rena lehono re diriša keletšo yeo ya Paulo. Eupša ka dinako tše dingwe re welwa ke mathata. Bana babo rena ba bantši le dikgaetšedi ba hwetša go le thata go dira modiro wa go bolela ditaba tše dibotse. (2 Tim. 4:2) Ka mohlala, nagana ka bana babo rena bao ba dulago dinageng tšeo modiro wa rena o thibetšwego. Ba tšwela pele ba bolela ditaba tše dibotse le ge ba tseba gore ba ka no golegwa.

² Bahlanka ba Jehofa lehono ba welwa ke mathata a mantši ao a ka ba nyamišago. Ka mohlala, ba bantši ba swanelwa ke go šoma ka thata gore ba kgone go hlokomela malapa a bona. Ba ka rata go fetša nako e ntšinyana ba le tšhemong, eupša ge beke e fela ba ikwa ba lapile. Ba bangwe ga ba sa kgona go fetša nako e ntši ba hlankela Jehofa ka gobane ba a babja goba ba tšofetše goba ga ba kgone go tšwa ka magaeng a bona. E bile ba bangwe ba ikwa eka ga ba bohlokwa go Jehofa. Mary * o re: “Ke fetša nako ya ka e ntši ke lwantšhana le maikwelo a gore ga ke bohlokwa go Jehofa moo ke feleletšago ke lapile kudu. Ke moka ke ikwa ke le molato ka gobane ga ke be le matla le nako ya go ya tšhemong.”

3. Re tlo ithuta’ng sehlogong se?

³ Jehofa o tla re nea matla a gore re dire sohle seo re ka se kgonago go mo hlankela, go sa šetšwe mathata ao re nago le ona. Pele re ka ithuta gore Jehofa a ka re thuša bjang, a re boneng kamoo a ilego a thuša Paulo le Timotheo gore ba tšwele pele ba mo hlankela le ge ba be ba na le mathata.

4. Paulo o be a na le mathata afe?

⁴ Paulo o be a na le mathata a mantši. O be a hloka thušo ya Jehofa kudukudu nakong ya ge manaba a gagwe a be a mo itia, a mo kgatla ka maswika le go mo golega. (2 Bakor. 11:23-25) Paulo o ile a dumela gore ka dinako tše dingwe o be a swanetše go šoma ka thata gore a lwantšhane le go nyama. (Baroma 7:18, 19, 24) Le gona o be a na le bolwetši bjo bo bego bo swana le “mootlwa nameng” bjoo a bego a nyaka gore Modimo a bo fodiše.—2 Bakor. 12:7, 8.

5. Ke dilo dife tšeo Paulo a ilego a kgona go di dira le ge a be a na le mathata?

⁵ Jehofa o ile a nea Paulo matla a gore a kgone go tšwela pele a mo hlankela le ge a be a na le mathata. Nagana ka dilo tšeo Paulo a ilego a kgona go di dira. Ka mohlala, ge a be a golegilwe ka ntlong kua Roma o ile a botša batho ba bantši ditaba tše dibotse, mohlomongwe go akaretša le batho ba maemo a godimo mmušong. (Dit. 28:17; Bafil. 4:21, 22) O ile a botša le batho ba bantši ba ka bogošing ditaba tše dibotse le batho ka moka bao ba bego ba mo etela. (Dit. 28:30, 31; Bafil. 1:13) Ka nako yeo, Paulo o ile a ngwala mangwalo ao a ilego a thuša Bakriste ba nakong yeo e bile a sa re thuša le lehono. Mohlala wa Paulo o ile wa tiiša phuthego ya kua Roma. Seo se ile sa dira gore bana babo “ba [bontšhe] sebete kudu go boleleng lentšu la Modimo ba sa boife.” (Bafil. 1:14) Le ge ka dinako tše dingwe Paulo a be a sa kgone go dira dilo ka moka tšeo a bego a nyaka go di dira, o ile a dira sohle seo a ka se kgonago gomme seo se ile sa dira gore Bakriste ‘ba tšwele pele ba bolela ditaba tše dibotse.’—Bafil. 1:12.

6. Go ya ka Bakorinthe ba Bobedi 12:9, 10, ke’ng seo se thušitšego Paulo gore a tšwele pele a bolela ditaba tše dibotse?

⁶ Paulo o ile a bona gore dilo ka moka tšeo a bego a di dira go hlankela Jehofa o be a sa di dire ka matla a gagwe, eupša o be a thušwa ke Modimo. O ile a bolela gore matla a Modimo “a phethagatšwa bofokoding.” (Bala 2 Bakorinthe 12:9, 10.) Jehofa o ile a nea Paulo moya wa gagwe o mokgethwa gore a kgone go dira sohle seo a ka se kgonago go mo hlankela, le ge a be a tlaišwa, a le kgolegong goba a na le mathata a mangwe.

7. Timotheo o be a na le mathata afe ao a ka bago a ile a dira gore a se ke a kgona go hlankela Jehofa gabotse?

⁷ Timotheo yo a bego a šoma le Paulo, le yena o be a ithekgile ka Modimo gore a mo thuše gore a kgone go mo hlankela. Ka ge  Paulo e be e le moromiwa, Timotheo o be a fela a sepela le yena ge a tšea maeto a gagwe a matelele. Le gona Paulo o be a fela a roma Timotheo go etela diphuthego tše dingwe le go di kgothatša. (1 Bakor. 4:17) Ka dinako tše dingwe Timotheo a ka ba a be a ikwa a sa swanelege. Mohlomongwe ke ka baka leo Paulo a ilego a mmotša gore: “Anke go se be le motho yo a nyatšago bofsa bja gago.” (1 Tim. 4:12) Go ka direga gore ka nako yeo Timotheo o be a na le mootlwa nameng, e lego ‘bolwetši bjo bo bego bo fela bo mo tshwenya.’ (1 Tim. 5:23) Eupša Timotheo o be a tseba gore Jehofa o tla mo nea matla ao a a hlokago gore a botše ba bangwe ditaba tše dibotse le go thuša bana babo.—2 Tim. 1:7.

8. Lehono Jehofa o matlafatša batho ba gagwe bjang?

⁸ Lehono Jehofa o nea batho ba gagwe “matla a fetago a tlwaelegilego” gore ba tšwele pele ba mo hlankela ka go botega. (2 Bakor. 4:7) A re ithuteng ka dilo tše nne tšeo Jehofa a re neago tšona go re matlafatša le go re thuša go dula re mo hlankela ka go botega. Dilo tšeo ke thapelo, Beibele, go fetša nako le bana babo rena le dikgaetšedi le modiro wa rena wa go bolela ditaba tše dibotse.

9. Go rapela go ka re thuša bjang?

⁹ Go rapela go ka re matlafatša. Go Baefeso 6:18, Paulo o re kgothaletša gore re rapele ka dinako ka moka. Modimo o tla araba dithapelo tša rena ka go re nea matla. Jonnie yo a dulago kua Bolivia o ile a bona Jehofa a mo thuša ge a be a na le mathata a mantšinyana. Batswadi ba Jonnie le mosadi wa gagwe ba ile ba babja kudu ka nako e tee. Go ile gwa ba thata kudu gore Jonnie a kgone go ba hlokomela boraro bja bjona. Mmagwe o ile a hlokofala gomme go ile gwa tšea nako e teletšana gore mosadi wa gagwe le tatagwe ba fole. Ge Jonnie a bolela ka nako yeo ya ge a be a na le mathata o re: “Ge ke be ke tshwenyega kudu, ke be ke thušwa ke go rapela Jehofa gomme ka mmotša ka tsela yeo ke ikwago ka yona.” Jehofa o ile a nea Jonnie matla ao a bego a a hloka go mo thuša gore a kgotlelele. Ronald e lego mogolo wa kua Bolivia o ile a kwa gore mmagwe o be a na le bolwetši bja kankere. Ke moka ka morago ga kgwedi o ile a hlokofala. Ronald o ile a thušwa ke’ng go kgotlelela? O re: “Ge ke rapela ke botša Jehofa dilo ka moka tšeo di ntshwenyago. Ke a tseba gore o nkwešiša go feta batho ka moka, e bile o nkwešiša go feta ka tsela yeo nna ke ikwešišago ka yona.” Ka dinako tše dingwe re ka ikwa re imelwa ke mathata a rena kudu moo re sa tsebego gore re botše Jehofa eng ge re mo rapela. Eupša Jehofa o nyaka re mo rapela le ge ka nako e nngwe re hloka mantšu.—Baroma 8:26, 27.

10. Go ya ka Baheberu 4:12, ke ka baka la’ng go bala Beibele le go naganišiša ka seo re se badilego go le bohlokwa?

¹⁰ Go bala Beibele go ka re matlafatša. Paulo o be a bala Mangwalo gore a kgone go mo matlafatša le go mo homotša, le rena re ka dira seo. (Baroma 15:4) Ge re bala Beibele le go naganišiša ka seo re se badilego, Jehofa a ka diriša moya wa gagwe go re thuša go kwešiša le go bona gore re ka diriša bjang seo re se badilego. (Bala Baheberu 4:12.) Ronald yo go boletšwego ka yena pejana o re: “Ke thabišwa ke gore ke dirile maiteko a go bala Beibele bošego bjo bongwe le bjo bongwe. Ke naganišiša kudu ka dika tša Jehofa le ka tsela yeo a dirišanago le bahlanka ba gagwe ka yona. Go dira seo go mmatlafatša kudu.”

11. Go bala Beibele go ile gwa matlafatša bjang kgaetšedi yo a bego a hlokofaletšwe?

¹¹ Go naganišiša ka seo re se balago ka Beibeleng go re thuša gore re kgone go lebeletšana le mathata a rena. Nagana kamoo go bala  Beibele go ilego gwa thuša kgaetšedi yo a bego a hlokofaletšwe ke monna wa gagwe. Mogolo yo mongwe o ile a šišinya gore a ka holega kudu ge a ka bala puku ya Jobo. Ge a be a bala puku yeo o ile a kitimela go ahlola Jobo. Ka monaganong wa gagwe o ile a kgala Jobo ka gore: “Jobo! O se ke wa dulela go nagana ka mathata a gago!” Eupša o ile a lemoga gore le yena o be a nagana go swana le Jobo. Se se ile sa mo thuša gore a kgone go fetoša tsela yeo a bego a nagana ka yona le go mo nea matla a gore a kgone go kgotlelela bohloko bja go hlokofalelwa ke monna wa gagwe.

12. Jehofa o diriša bjang bana babo rena le dikgaetšedi go re nea matla?

¹² Go fetša nako le bana babo rena le dikgaetšedi go ka re matlafatša. Tsela e nngwe yeo Jehofa a re matlafatšago ka yona ke ka go diriša bana babo rena le dikgaetšedi. Paulo o ile a ngwala gore o be a hlologetše ‘go kgothatšana’ le Bakristegotee le yena. (Baroma 1:11, 12) Mary yo re boletšego ka yena pejana o rata go fetša nako le bana babo le dikgaetšedi. O re: “Jehofa o ile a diriša bana bešo le dikgaetšedi go nthuša le ge bona ba be ba sa tsebe gore ke na le mathata. Ba be ba nkgothatša goba ba nthomela karata gomme seo e be e le sona seo ke tlogago ke se hloka. Ke ile ka thušwa ke go boledišana le dikgaetšedi tšeo di bego di na le mathata a go swana le a ka le go tseba gore tšona di ile tša lebeletša le ona bjang. Bagolo ka mehla ba be ba dira gore ke ikwe gore bana babo rena le dikgaetšedi ka phuthegong ba a nthata.”

13. Re ka matlafatšana bjang ge re le dibokeng?

¹³ Ge re le dibokeng re hwetša sebaka se sebotse kudu sa go kgothatšana. Re ka kgothatša ba bangwe ka go ba botša gore re a ba rata e bile re leboga dilo ka moka tšeo ba di dirago. Ka mohlala, pele ga diboka Peter o ile a botša kgaetšedi yo mongwe yoo monna wa gagwe e sego Mokriste gore: “Ruri go a kgothatša go go bona. Ka mehla o dula o etla le bana ba gago ba tshela ba lokišeditše dikarabo tša bona gabotse.” Mahlo a kgaetšedi yoo a ile a tlala megokgo ke moka a re: “Ruri ke be ke tloga ke hloka go kwa mantšu ao lehono.”

14. Modiro wa go bolela ditaba tše dibotse o ka re thuša bjang?

¹⁴ Go bolela ditaba tše dibotse go ka re nea matla. Ge re botša batho ditaba tše dibotse re a thaba, go sa šetšwe gore ba a re theetša goba ga ba re theetše. (Die. 11:25) Kgaetšedi Stacy o ile a bona kamoo go bolela ditaba tše dibotse go ka go matlafatšago ka gona. Ge yo mongwe wa gabo a be a kgaotšwe o ile a nyama kudu ke moka a dulela go ipotšiša gore: ‘Na go na le seo nkabego ke se dirile go mo thuša?’ Stacy o be a no dulela go nagana ka bothata bjoo. O thušitšwe ke’ng gore mafelelong a ikwe a le kaone? Ke go botša ba bangwe ditaba tše dibotse. Ge a be a dira seo, o be a fetša nako a nagana ka batho bao a bego a ka ba thuša. O re: “Ka nako yeo Jehofa o ile a nthuša go hwetša motho yoo a ilego a dira tšwelopele kapejana ke moka a thoma go diriša seo a ithutago sona. Seo se ile sa nkgothatša kudu. Selo seo se ilego sa nthuša kudu ke go botša ba bangwe ditaba tše dibotse.”

15. O ithuta’ng go seo Mary a se boletšego?

¹⁵ Ba bangwe ba ka ikwa okare ga ba fetše nako e ntši ba bolela ditaba tše dibotse. Ge e ba o ikwa ka tsela ye, gopola gore Jehofa o a thaba ge a bona o dira sohle seo o ka se kgonago ka gobane o tseba maemo a gago. Nagana gape ka mohlala wa Mary. Ge a be a hudugetše moo go bolelwago leleme le lengwe, o ile a thoma go ikwa a se sa na mohola. O re: “Ke tšere nako ke kgona feela go no fa karabo e kopana, go no bala temana goba go no nea motho pampišana ge ke le tšhemong.” O be a ikwa eka ga a dire selo ge a ipapetša le batho bao ba kgonago  go bolela leleme leo gabotse. Eupša o ile a thoma go fetoša tsela yeo a naganago ka yona. O ile a lemoga gore Jehofa a ka kgona go mo diriša le ge a sa kgone go bolela leleme leo gabotse. O re: “Seo Beibele e se bolelago se bonolo kudu e bile se kgona go fetoša maphelo a batho.”

16. Ke’ng seo se ka thušago bao ba nyakago go botša ba bangwe ditaba tše dibotse eupša ba sa kgone go tšwa ka magaeng a bona?

¹⁶ Jehofa o a tseba gore ba bangwe ba rena re nyaka go botša batho ditaba tše dibotse eupša ga re kgone go tšwa ka magaeng a rena. A ka re thuša gore re kgone go boledišana le bao ba tlago ka magaeng a rena go tlo go re hlokomela goba dingaka le baoki. Re tlo nyama ge e ba re bapiša seo re bego re kgona go se dira nakong e fetilego le seo re se dirago gona bjale. Eupša ge re bona kamoo Jehofa a re thušago gona bjale, re tlo kgona go kgotlelela mathata ao a re welago re thabile.

17. Go ya ka Mmoledi 11:6, ke ka baka la’ng re se ra swanela go fela matla ge e ba batho ba sa theetše molaetša wa rena?

¹⁷ Ga re tsebe gore ke dipeu dife tša therešo tšeo re di bjetšego tšeo di tlago go mela. (Bala Mmoledi 11:6.) Ka mohlala, kgaetšedi Barbara yo a nago le mengwaga ya ka godimo ga e 80, gantši o bolela ditaba tše dibotse a diriša founo le go ngwala mangwalo. Lengwalong le lengwe leo a le ngwadilego o ile a tsenya Morokami wa March 1, 2014, wo o nago le sehlogo seo se rego “Seo Modimo a go Diretšego Sona.” O be a sa tsebe gore o be a rometše lengwalo leo go banyalani bao ba bego ba kgaotšwe gomme e se sa le Dihlatse tša Jehofa. Banyalani bao ba ile ba bala Morokami woo gantšintši. Monna yoo o ile a kwa eka Jehofa o bolela le yena ka go lebanya. Banyalani bao ba ile ba thoma go ya dibokeng, ke moka mafelelong ba ile ba boela ya ba Dihlatse tša Jehofa ka morago ga mengwaga ya ka godimo ga e 27. Barbara o ile a kgothatšega kudu le go matlafala ka morago ga go bona seo lengwalo letee feela leo a ilego a le ngwala le ilego la kgona go se dira.

18. Re swanetše go dira’ng gore Modimo a re nee matla?

¹⁸ Jehofa o re nea dilo tše dintši tšeo di ka re matlafatšago. Tše dingwe tša dilo tšeo ke thapelo, Beibele, bana babo rena le dikgaetšedi le go bolela ditaba tše dibotse. Ge re diriša dilo tšeo re tla be re bontšha gore re a tshepa gore Jehofa a ka re thuša le gore o tloga a nyaka go re thuša. Anke re duleng re ithekgile ka Tatago rena wa legodimong yoo a thabelago ‘go bontšha matla a gagwe go bao ba mmotegelago ka dipelo ka moka.’—2 Dikor. 16:9.