Tiragalo yeo ya go ntšhoša e ile ya fetoša bophelo bja ka ka gobane ka yona nako yeo ke ile ka thoma go leka go nyaka go tseba Modimo. Eupša pele ke le botša ka seo se ilego sa direga bošegong bjoo, ke nyaka go le botša ka tše dingwe tša dilo tšeo di ilego tša ntiragalela ke sa le ngwana tšeo di ilego tša dira gore ke nyake go tseba ka Modimo.

Ke belegwe ka 1937 toropong ya go ba le dimmaene yeo e lego ka leboa la France e lego Guesnain. Tate yo a bego a šoma mmaeneng wa malahle o ile a nthuta bohlokwa bja go šoma ka thata. Ka ge tate a be a rata gore dilo di dirwe ka toka o ile a nthuta gore ke swane le yena. O ile a bona gore batho ba bantši bao ba bego ba šoma mmaeneng ba be ba sa swarwe gabotse, ba šoma maemong a kotsi ka baka leo o ile a nyaka go ba thuša. Ka ge a be a nyaka goba thuša, o ile a tsenela mekgatlo yeo e bego e lwela ditokelo tša batho bao ba bego ba šoma mmaeneng. Le gona o be a galefišwa ke boikaketši bja baruti ba mo ga gabo rena. Ba bantši ba bona ba be ba na le sa bona, eupša ba be ba kgopela batho bao ba šomago mmaeneng bao ba bego ba se na selo gore ba ba fe dijo le tšhelete. Tate o be a šišimišwa kudu ke mekgwa yeo ya baruti moo a ilego a se nthute selo ka bodumedi.  Ge e le gabotse re be re sa ke re bolela ka Modimo.

Ge ke dutše ke gola le nna ke ile ka thoma go nyaka gore dilo di dirwe ka toka. Se sengwe sa dilo tšeo ke bego ke bona e le go hloka toka e be e le gore batho ba bantši ba be ba tloga ba hloile batho bao ba tšwago dinageng tše dingwe bao ba bego ba dula mo France. Ke be ke bapala ball le bana bao batswadi ba bona ba tšwago dinageng tše dingwe gomme ke ipshina le bona. Le gona mma e be e le Mopolishi e sego Mofora, ke be ke nyaka gore batho ba merafo e fapafapanego ba šome gotee ka khutšo e bile ba swarwe ka go swana.

Ka 1957 mmušo o ile wa laela gore ke tsenele bošole. Ke ka baka leo ke ilego ka feleletša ke le dithabeng tša Algeria bošegong bja leswiswi bjo ke boletšego ka bjona mathomong. Bošegong bjoo ka morago ga gore ke rapele Modimo gore a nthuše, ke ile ka lemoga gore lešatanyana leo ke bego ke le kwa e be e se la yo mongwe wa mašole ao re bego re elwa le ona eupša e be e le la tonki ya naga. Ke ile ka ikwa ke imologile! Eupša tiragalo yeo le ntwa ka boyona di ile tša dira gore ke thome go nagana ka mo go tseneletšego ka bophelo. Ke ile ka ipotšiša gore re phelela eng? Na Modimo o na le taba le rena? Na go tla ka gwa ba le khutšo?

Ka moragonyana ge ke be ke le llifing gomme ke etetše batswadi ba ka, ke ile ka kopana le yo mongwe wa Dihlatse tša Jehofa. O ile a mpha Beibele ya phetolelo ya Sefora ya La Sainte Bible, yeo ke ilego ka thoma go e bala ka morago ga gore ke boele Algeria. Lengwalo leo le ilego la nkgahla kudu e be e le la Kutollo 21:3, 4. Le re: “Tente ya Modimo e bathong . . . O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” * Mantšu ao a ile a mmakatša kudu. Ke ile ka ipotšiša gore: ‘Na ruri se ke nnete?’ Ka nako yeo ke be ke sa tsebe selo ka Modimo le ka Beibele.

Ka morago ga gore ke tlogele bošole ka 1959, ke ile ka kopana le François, yo e lego yo mongwe wa Dihlatse tša Jehofa yo a ilego a nthuta ditherešo tše dintši tša ka Beibeleng. Ka mohlala, o ile a diriša Beibele go mpontšha gore leina la Modimo ke Jehofa. (Ps. 83:18) Le gona François o ile a ntlhalosetša gore Jehofa o tla dira gore go be le toka mo lefaseng, a dira gore lefase e be paradeise, gomme a phethagatša tshepišo yeo e lego go Kutollo 21:3, 4.

Ke ile ka kwa dithuto tšeo di kwagala, gomme di ile tša nkgoma pelo. Ke be ke kwatetše baruti kudu e bile ke nyaka go ba botša gore ba ruta batho dithuto tšeo di sego ka Beibeleng! Go be go bonagala ke sa nagana ka tsela yeo tate a bego a nagana ka yona, e bile ke sa fela pelo. Ke be ke nyaka gore dilo di loke ka yona nako yeo.

François le bagwera ba bangwe bao ke bego ke ba hweditše ba Dihlatse tša Jehofa ba ile ba nthuša gore ke theoše maswafo. Ba ile ba ntlhalosetša gore modiro wa rena ga se go ahlola batho, eupša ke go ba thuša ka go ba botša ditaba tše dibotse tša Mmušo wa Modimo. Wo ke modiro wo Jesu a bego a o dira ge a be a le mo lefaseng le wo a laetšego balatedi ba gagwe gore ba o dire. (Mat. 24:14; Luka 4:43) Le gona ke ile ka swanelwa ke go ithuta go boledišana le batho ka botho le ka šedi le ge ke sa dumelelane ke ditumelo tša bona. Beibele e re botša gore: “Mohlanka wa Morena ga se a swanela go lwa eupša o swanetše go ba bonolo go bohle.”—2 Tim. 2:24.

 Ke ile ka dira diphetogo ke moka ka kolobetšwa gore ke be yo mongwe wa Dihlatse tša Jehofa kopanong ya tikologo ka 1959. Ge ke le kopanong yeo ke ile ka kopana le kgaetšedi Angèle, yo a ilego a nkgahla kudu. Ke ile ka thoma go etela phuthegong yeo Angèle a bego a kopanela go yona, ke moka ra nyalana ka 1960. Ke mosadisadi, mpho e bohlokwa yeo ke e neilego ke Jehofa.—Die. 19:14.

Mengwageng ye ka moka, ke ithutile dilo tše dintši tša bohlokwa go bana babo rena ba bohlale le bao ba nago le phihlelo. Se sengwe sa dilo tša bohlokwa tšeo ke ilego ka ithuta tšona ke gore: E le gore re kgone go atlega kabelong le ge e le efe, re swanetše go ba le boikokobetšo gomme re diriše mantšu ao a lego go Diema 15:22, ao a rego: “Taba e a atlega mo go nago le baeletši ba bantši.”

Ka 1964, ke ile ka thoma go bona gore mantšu ao a ka Beibeleng e tloga e le nnete. Ngwageng woo ke ile ka thoma go ba molebeledi wa tikologo, ke etela diphuthego ke kgothatša bana babo rena le go ba thuša gore ba be le segwera se sebotse le Jehofa. Eupša ka nako yeo ke be ke na le mengwaga e 27, gomme ke se na phihlelo. Ka gona ke ile ka dira diphošo. Eupša ke ile ka ithuta diphošong tšeo tša ka. Sa bohlokwa le go feta ke ile ka ithuta dilo tše dintši go “baeletši” bao ba nago le bokgoni le bao ba nago le phihlelo.

Ke gopola selo se sengwe seo se ilego sa direga ge ke be ke sa tšwa go thoma go ba molebeledi wa tikologo. Ka morago ga gore ke etele phuthego e nngwe ya kua Paris, ngwanabo rena yo a nago le phihlelo o ile a nkgopela gore re itshebe. Ke ile ka re: “Ga go na bothata.”

O ile a mpotšiša gore: “Louis, ngaka e thuša motho yo a babjago goba yo a phetšego gabotse?”

Ke ile ka re: “E thuša motho yo a babjago.”

Ke moka o ile a re: “O a rereša. Eupša ke lemogile gore o fetša nako e ntši o na le batho bao ba nago le segwera se sebotse le Jehofa ka mo phuthegong, go swana le molebeledi wa phuthego. Ka mo phuthegong go na le bana babo rena ba bantši le dikgaetšedi bao ba nyamilego, bao ba sa tšwago go thoma go kopanela, goba bao ba nago le dihlong. Ba tla kgothatšega kudu ge o ka fetša nako le bona, e bile wa yo ja magaeng a bona.”

Keletšo ya ngwanabo rena yoo e be e le ya maleba e bile e le e bohlokwa. Tsela yeo a bego a rata batho ba Modimo ka yona e ile ya nkgoma pelo. Ka gona le ge go be go se bonolo go amogela gore ke be ke dirile phošo, kapejana ke ile ka thoma go diriša keletšo yeo a bego a nneile yona. Ke leboga Jehofa gore re na le bana babo rena ba go swana le yo.

 Ka 1969 le ka 1973, ke ile ka kgethwa go hlokomela lefapha la dijo dikopanong tše pedi tša ditšhabatšhaba kua Colombes, Paris. Kopanong ya ka 1973, re ile ra swanelwa ke go fepa batho ba e ka bago ba 60 000 ka matšatši a mahlano! Ke be ke sa tsebe gore re tlo kgona bjang go fepa batho bao ka moka. Eupša le gona moo ke ile ka thušwa ke go diriša keletšo ya Diema 15:22 ya gore ke nyake keletšo go batho ba bangwe. Ke ile ka kgopela bana babo rena bao ba bego ba na le phihlelo ya go šoma ka dijo gore ba nthuše. Ba bangwe ba bona ba be ba rekiša dinama, ba bangwe ba bjala merogo, ba bangwe e le baapei, gomme ba bangwe ba reka le go rekiša. Ka moka ga rena re ile ra thušana ke moka ra dira modiro wo o bego o bonagala o le thata.

Ka 1973, nna le mosadi wa ka re ile ra laletšwa go yo hlankela Bethele ya France. Kabelo ya ka ya pele moo le yona e be e le e thata kudu. Ke be ke swanetše go romela bana babo rena dikgatišo nageng ya Afrika ya Cameroon, moo modiro wa rena o bego o thibetšwe magareng ga 1970 le 1993. Le gona moo ke be ke sa tsebe ge e ba ke tla kgona go phetha kabelo yeo. Go ka direga gore ngwanabo rena yo a bego a hlokometše modiro kua France ka nako yeo o ile a lemoga kamoo ke bego ke ikwa ka gona. O ile a nkgothatša ka gore: “Bana babo rena ba kua Cameroon ba tloga ba hloka dikgatišo tše. A re ba romele tšona!” Se ke sona seo re ilego ra se dira.

Ke ile ka etela gantšinyana naga ya Cameroon gore ke yo kopana le bagolo ba Cameroon. Bana babo rena bao ba be ba na le sebete e bile ba le bohlale. Ba ile ba nthuša go hwetša ditsela tša go romela dikgatišo Cameroon, e le gore bana babo rena ba di hwetše ka mehla. Jehofa o ile a šegofatša maiteko a rena. Ge e le gabotse bana babo rena ba moo ba ile ba fetša mengwaga e 20 ba sa hloke Morokami goba kgatišo yeo e bego e ithutwa dibokeng tša gare ga beke yeo e bego e bitšwa Our Kingdom Service.

Go tloga ge re be re thoma go tsebana, ke ile ka lemoga gore Angèle o na le segwera se sebotse le Jehofa. Ka morago ga gore re nyalane ke ile ka bona  seo gabotse kudu. Ka mohlala bošego bja letšatši leo re nyalanego ka lona o ile a kgopela gore ke rapele Jehofa ke mmotše gore re nyaka go dira sohle seo re ka se kgonago go mo hlankela re le banyalani. Jehofa o ile a araba thapelo yeo.

Le gona Angèle o nthušitše gore ke tshepe Jehofa kudu. Ka mohlala ka 1973 ge re be re laletšwa go yo hlankela Bethele, ke ile ka dikadika go amogela kabelo yeo ka ge ke be ke rata modiro wa tikologo. Eupša Angèle o ile a nkgopotša gore re ineetše go Jehofa. Ka baka leo, na ga se ra swanela go dira kabelo le ge e le efe yeo mokgatlo wa gagwe o re neago yona? (Baheb. 13:17) Ke ile ka dumelelana le yena. Ka gona re ile ra ya kabelong ya rena ya Bethele. Nako e telele yeo re e feditšego re le gotee, ke ile ka bona gore temogo ya mosadi wa ka, tsela yeo a bonago dilo ka yona, le segwera sa gagwe le Jehofa se matlafaditše lenyalo la rena le go re thuša gore re dire diphetho tše dibotse.

Gona bjale le ge re tšofetše, Angèle o tšwela pele a nthekga. Ka mohlala e le gore re kgone go ya dikolong tša mokgatlo, tšeo tše dintši tša tšona di swarwago ka Seisemane, nna le Angèle re ile ra thoma go šoma ka thata gore re tsebe leleme leo gabotse. Le ge ka nako yeo re be re na le mengwaga ya ka godimo ga e 70 re ile ra ya phuthegong yeo e bego e diriša leleme la Seisemane. Ka ge ke na le maikarabelo a mantši ka ge ke šoma Komiting ya Lekala ya France, go be go se bonolo go hwetša nako ya go ithuta leleme le lengwe. Eupša nna le Angèle re ile ra thušana. Gona bjale le ge re na le mengwaga ya ka godimo ga e 80, re tšwela pele re lokišeletša diboka ka Seisemane le ka Sefora. Le gona re leka gore re be le phuthego gantši kamoo re ka kgonago dibokeng le modirong wa go ruta batho Beibele. Jehofa o ile a šegofatša maiteko a rena a go ithuta Seisemane.

Jehofa o ile a re šegofatša ka tsela e nngwe e kgolo kudu ka 2017. Nna le Angèle re ile ra ba le tokelo ya go ya Sekolong sa Ditho tša Komiti ya Lekala le Basadi ba Tšona, seo se swarelwago Lefelong la tša Thuto la Watchtower kua Patterson, New York.

Ruri Jehofa ke Mohlahli yo Mogolo. (Jes. 30:20) Ka baka leo ga go makatše gore batho ba gagwe ka moka ba bagolo le ba banyenyane ba hwetša thuto ya maemo a godimo kudu! (Doit. 4:5-8) Ke bone gore bafsa bao ba theetšago Jehofa le bana babo rena le dikgaetšedi bao ba beago mohlala o mobotse ka phuthegong, ba kgona go dira diphetho tše dibotse gomme le bona ba hlankela Jehofa ka potego. Diema 9:9 e re gopotša gore: “Ruta motho yo bohlale gomme o tla hlalefa le go feta. Nea moloki tsebo gomme o tla oketša thuto ya gagwe.”

Ke fela ke nagana ka seo se ilego sa direga bošegong bja leswiswiswiswi dithabeng tša Algeria mengwageng e ka bago e 60 e fetilego. Bošegong bjoo ke be ke sa tsebe gore nakong e tlago ke tlo ipshina ka bophelo ka tsela ye. Ke ithutile dilo tše dintši kudu go ba bangwe! Jehofa o šegofaditše nna le Angèle, ka bophelo bjo bo kgahlišago le bjo kgotsofatšago kudu. Le gona re ikemišeditše go tšwela pele re ithuta go Tatago rena wa legodimong, go bana babo rena le dikgaetšedi ba bohlale le bao ba nago le phihlelo le bao ba ratago Jehofa.