Batho ba bantši ba a tseba gore kgale Baegipita ba be ba ngwalela godimo ga pampiri yeo e dirilwego ka mahlaka a papirase. Bagerika le Baroma le bona ba be ba ngwalela godimo ga pampiri yeo e dirilwego ka papirase. * Eupša batho ba bantši ga ba tsebe gore mahlaka a papirase a be a dirišwa le go dira dikepe.

Mengwageng ya ka godimo ga e 2 500 e fetilego, moporofeta Jesaya o ile a ngwala gore batho ba “seleteng sa dinoka tša Ethiopia” ba be ba roma “batseta ka dikepe tšeo di lego lewatleng tšeo di dirilwego ka mahlaka a papirase.” Ka morago, moporofeta Jeremia le yena o ile a bolela e sa le pele gore ge Bamede le Baperesia ba be ba tlo hlasela naga ya Babilona, ba be ba tla tšhuma “dikepe tša Bababilona tšeo di dirilwego ka mahlaka a papirase” go ba thibela gore ba se ke ba kgona go tšhaba.—Jes. 18:1, 2; Jer. 51:32.

Ka ge Beibele e le Lentšu la Modimo, barutwana ba Beibele ga ba makatšwe ke taba ya gore baepi ba mašope ba ile ba hwetša dilo tšeo di bego di bontšha gore mehleng ya Beibele mahlaka a papirase a be a dirišwa go dira dikepe. (2 Tim. 3:16) Baepi ba mašope ba hweditše eng? Ba hweditše bohlatse bjo bo feletšego kua Egipita bjo bo bontšhago gore mahlaka a papirase a be a dirišwa go dira dikepe.

Ka gare ga mabitla a kua Egipita go be go na le diswantšho tšeo di bego di bontšha gore batho ba be ba hwetša bjang mahlaka a papirase ke moka ba a diriša go dira dikepe. Banna ba be ba rema mahlaka ao, ba a kgoboketša ke moka ba a tlema ba a tiiša ya ba ngata e tee. Lehlaka la papirase le na le mahlakore a mararo. Ge mahlaka ao a tlemilwe e ba ngata e tiilego. Puku e nngwe yeo e bolelago ka histori ya kua Egipita e re dikepe tša go dirwa ka mahlaka a papirase di be di ka ba botelele bja dimithara tše 17, ke moka ka mahlakoreng ka bobedi go be go ka ba le mahuduo a 10 goba a 12.

Kua Egipita mahlaka a papirase a be a hwetšagala ka bontši kgauswi le Noka ya Nile. E bile go be go le bonolo kudu go dira dikepe ka mahlaka ao. Le ge batho ba ile ba thoma go diriša dikota go dira dikepe tše dikgolo, barei ba dihlapi le batsomi ba be ba sa diriša dikepe tša go dirwa ka mahlaka ao.

Batho ba ile ba diriša dikepe tša go dirwa ka papirase nako e telele kudu. Plutarch e lego mongwadi yo mongwe wa Mogerika, yo a phetšego mehleng ya baapostola o boletše gore mehleng ya gagwe batho ba be ba sa diriša dikepe tša mahlaka a papirase.