1. Ke’ng seo se ka bago se ile sa go makatša ge o be o nyaka go botša batho molaetša wa Beibele la mathomo?

NA O sa gopola letšatši la ge o be o lemoga gore o hweditše therešo? O be o sa belaele gore dilo tšeo o bego o ithuta tšona ka Beibeleng ke therešo. O be o nagana gore motho yo mongwe le yo mongwe o tla amogela dilo tšeo gona bjale o di dumelago. E bile o be o kgodišegile gore seo Beibele e se rutago se tla ba thuša gore ba phele gakaone gona bjale le go ba le kholofelo ya go tlo phela bophelo bjo bo kgahlišago nakong e tlago. (Ps. 119:105) Ka gona o ile wa botša bagwera ba gago le ba geno ka mafolofolo ka ditherešo tšeo o ithutilego tšona. Eupša go ile gwa direga’ng? O ile wa makatšwa ke ge ba bantši ba bona ba sa dumelelane le seo o ba botšago sona.

2-3. Batho ba bantši ba mehleng ya Jesu ba ile ba arabela bjang go seo a bego a ba ruta sona?

² Ga se ra swanela go makala ge batho ba sa nyake go amogela molaetša woo re ba botšago wona. Mehleng ya Jesu batho ba bantši ba ile ba gana go mo latela le ge a ile a dira mehlolo yeo e bego e bontšha gore o romilwe ke Modimo. Ka mohlala, Jesu o ile a tsoša Latsaro bahung, e lego mohlolo woo batho ba bantši bao ba bego ba sa dumelelane le dithuto tša gagwe ba ilego ba se kgone go o ganetša. Le ge Jesu a ile a dira mohlolo woo, baetapele ba bodumedi ba Bajuda ga se ba ka ba dumela gore Jesu ke Mesia. Ba ile ba nyaka le go bolaya Jesu le Latsaro.—Joh. 11:47, 48, 53; 12:9-11.

³ Jesu o be a tseba gore batho ba bantši ba be ba ka se dumele gore ke yena Mesia. (Joh. 5:39-44) O ile a botša barutiwa ba Johane Mokolobetši gore: “Go thaba yo a sa hwetšego lebaka la go kgopša ka baka la ka.” (Mat. 11:2, 3, 6) Ke ka baka la’ng batho ba bantši ba ile ba gana go latela Jesu?

4. Re tlo ithuta’ng sehlogong se?

⁴ Sehlogong se le seo se latelago re tlo ithuta ka mabaka ao a dirilego gore batho ba bantši ba mehleng ya Jesu ba se ke ba ba le tumelo go yena. Le gona re tlo bona gore ke ka baka la eng batho ba bantši lehono ba sa nyake go theetša molaetša wa rena. Sa bohlokwa le go feta, re tlo ithuta gore ke ka baka la eng re swanetše go ba le tumelo e tiilego go Jesu e le gore go se ke gwa ba le selo seo se re šitišago go mo latela.

5. Ke ka baka la’ng batho ba bangwe ba ka ba ba ile ba nagana gore Jesu e ka se be Mesia?

⁵ Batho ba bantši ba ile ba gana go latela Jesu ka baka la moo a goletšego gona. Ba be ba dumela gore Jesu o be a kgona go ruta e bile a dira le mehlolo. Eupša ba be ba no mo tšea e le morwa wa mmetli yo a diilago. Le gona o be a etšwa Natsaretha, e lego motse woo batho ba bantši ba ka bego ba be ba nagana gore ga o bohlokwa. Gaešita le Nathaniele yoo ka morago a ilego a ba morutiwa wa Jesu, mathomong o ile a re: “Na go na le selo se sebotse se se ka tšwago Natsaretha?” (Joh. 1:46) Go ka direga gore Nathaniele o be a sa rate motse woo Jesu a bego a dula go wona. Goba go ka direga gore ge a bolela mantšu ao o be a naganne ka boporofeta bjo bo lego go Mika 5:2, bjoo bo ilego bja bolela e sa le pele gore Mesia o be a tla belegelwa Betlelehema, e sego Natsaretha.

6. Ke’ng seo se bego se swanetše go thuša batho ba mehleng ya Jesu go tseba gore ke yena Mesia?

⁶ Mangwalo a re’ng? Moporofeta Jesaya o ile a bolela e sa le pele gore manaba a Jesu a be a ka se itshwenye ka go nyaka go tseba “ditaba ka botlalo tša moloko wa [Mesia].” (Jes. 53:8) Boporofeta bo ile bja bolela e sa le pele ka tše dintši tša ditaba tšeo. Ge nkabe batho bao ba ile ba ipha nako ya go tseba ditaba ka botlalo, ba be ba tla tseba gore Jesu o belegetšwe Betlelehema le gore e be e le setlogolwana sa Kgoši Dafida. (Luka 2:4-7) Ka gona lefelo leo Jesu a belegetšwego go lona le dumelelana le leo go boletšwego ka lona boporofeteng bja Mika 5:2. Ke ka baka la’ng batho bao ba be ba na le bothata? Ka gobane ba ile ba no kitimela go dira phetho. Ba be ba sa tsebe ditaba ka botlalo. Ka baka leo, ba ile ba palelwa ke go latela Jesu.

7. Ke ka baka la’ng batho ba bantši lehono ba sa nyake go ba Dihlatse tša Jehofa?

⁷ Na bothata bjo bo swanago bo gona lehono? Ee. Batho ba bantši ba Modimo lehono ga se ba huma e bile ga se batho ba maemo, ka baka leo batho ba bantši ba nagana gore ke “batho ba sa rutegago le ba tlwaelegilego.” (Dit. 4:13) Batho ba bangwe ba nagana gore Dihlatse tša Jehofa di ka se kgone go ba ruta Beibele ka gobane ga se tša ya dikolong tša bodumedi tšeo bona ba bonago e le tša bohlokwa. E bile batho ba bangwe ba re Dihlatse tša Jehofa ke bodumedi bja Amerika, eupša nnete ke gore Dihlatse tša Jehofa tše dintši kudu ga di dule Amerika. Le gona ba bangwe ba boditšwe maaka a gore Dihlatse tša Jehofa ga di dumele go Jesu. Batho ba bangwe ba feditše mengwaga e mentši ba bolela gore Dihlatse tša Jehofa ke batho bao ba nyakelago mmušo wa Amerika ditaba le gore ba dira mediro e kotsi. Ka baka leo, batho ba bantši ge ba ekwa ditaba tše ga ba nyake go ba Dihlatse tša Jehofa ka ge ba sa tsebe nnete ka rena.

8. Go ya ka Ditiro 17:11, lehono batho ba swanetše go dira’ng ge ba nyaka go tseba gore batho ba Modimo ke bomang?

⁸ Batho ba ka dira’ng gore ba se ke ba šitišwa go latela Jesu? Ba swanetše go nyaka go tseba ditaba ka botlalo. Se ke seo mongwadi wa Ebangedi e lego Luka a ilego a ikemišetša go se dira. O ile a dira sohle seo a ka se kgonago gore a tsebe “dilo ka moka go tloga mathomong ka mo go nepagetšego.” O be a nyaka gore batho bao ba tlago go bala Ebangedi ya gagwe ba “tsebe ka botlalo therešo ya dilo” tšeo ba bego ba di kwele ka Jesu. (Luka 1:1-4) Bajuda ba kgale ba kua Berea ba be ba swana le Luka. Ge ba be ba thoma go kwa ditaba tše dibotse ka Jesu, ba ile ba bala Mangwalo a Seheberu go kgonthišetša gore seo ba bego ba se kwa ka Jesu ke therešo. (Bala Ditiro 17:11.) Le batho lehono ba swanetše go  kgonthišetša ge e ba ditaba tšeo ba di kwago ke nnete. Ba swanetše go bapetša seo Dihlatse tša Jehofa di se rutago le seo Beibele e se rutago. Le gona ba swanetše go ithuta ka histori ya Dihlatse tša Jehofa ya mehleng yeno. Ge e ba ba ka tseba ditaba ka botlalo, ba ka se dumelele mabarebare a ba šitiša go latela Jesu.

9. Go ile gwa direga’ng ge Jesu a be a gana go dira mohlolo wo o tšwago legodimong?

⁹ Batho ba bangwe ba mehleng ya Jesu, ba be ba sa kgotsofatšwe ke go no kwa dithuto tša gagwe tše di kgahlišago. Ba be ba nyaka gore a dire se sengwe. Ba ile ba mo kgopela gore a hlatsele gore ke yena Mesia ka gore a ba direle mohlolo goba a ba bontšhe “pontšho e tšwago legodimong.” (Mat. 16:1) Mohlomongwe ba ile ba dira kgopelo yeo ka baka la boporofeta bjo bo lego go Daniele 7:13, 14. Eupša e be e se ya tšwa e eba nako ya Jehofa ya gore boporofeta bjoo bo phethagale. Seo Jesu a bego a se ruta se be se swanetše go kgodiša batho bao gore e be e le Mesia. Eupša ka morago ga gore a gane go ba bontšha mohlolo wo ba bego ba kgopetše gore a ba bontšhe wona, ba ile ba gana go mo latela.—Mat. 16:4.

10. Jesu o ile a phethagatša bjang seo Jesaya a bego a se boletše e sa le pele ka Mesia?

¹⁰ Mangwalo a re’ng? Moporofeta Jesaya o ile a bolela e sa le pele ka Mesia gore: “A ka se goeletše goba a hlaboša lentšu la gagwe, a ka se kwatše lentšu la gagwe mokgotheng.” (Jes. 42:1, 2) Ge Jesu a be a ruta, o be a sa ipiletše mahlo a batho. Ga se a ka a aga ditempele, o be a sa apare diaparo tšeo di mo hlaolago e le moetapele wa bodumedi le gona o be a sa nyake gore batho ba mmitše ka maina a bohlokwa. Ge Jesu a be a sekišwa o ile a gana go kgahliša Kgoši Heroda ka go mo direla mohlolo, le ge bophelo bja gagwe bo be bo le kotsing. (Luka 23:8-11) Le ge Jesu a ile a dira mehlolo, selo sa bohlokwa kudu go yena e be e le go ruta batho ditaba tše dibotse. O ile a botša barutiwa ba gagwe gore: “Gobane ke tletše wona morero wo.”—Mar. 1:38.

11. Ke dikgopolo dife tše di fošagetšego tšeo batho ba bangwe ba nago le tšona lehono?

¹¹ Na bothata bjo bo swanago bo gona lehono?  Ee. Lehono batho ba bantši ba kgahlwa ke meago e megolo ya dikereke tšeo di kgabišitšwego ka diswantšho tša go tura, baruti bao ba bitšwago ka maina a kwagalago a le bohlokwa le ditirelo tšeo batho bantši ba lebetšego gore ge e le gabotse ga se tša Bokriste. Batho bao ba yago ditirelong tšeo tša bodumedi ga ba ithute selo ka Modimo le seo a se nyakago. Bao ba bago gona dibokeng tša rena tša Bokriste ba ithuta ka seo Jehofa a nyakago gore ba se dire. Diholo tša rena tša Mmušo di hlwekile, re kgona go di diriša gabonolo e bile ga se tša kgabišwa ka dilo tša go tura. Bao ba re etelelago pele ga ba apare diaparo tšeo di ba hlaolago goba ba bitšwa ka maina ao a kwagalago a le bohlokwa. Seo re se rutago le seo re se dumelago se tšwa ka Beibeleng. Eupša batho ba bantši lehono ga ba nyake go theetša molaetša wa rena ka gobane ba nagana gore tsela yeo re hlankelago Modimo ka yona e a tšwafiša. Le gona seo re se rutago ga se dumelelane le seo ba nyakago go se kwa.

12. Go ya ka Baheberu 11:1, 6, tumelo ya rena e swanetše go thewa go eng?

¹² Re ka dira’ng gore re se ke ra šitišwa go latela Jesu? Moapostola Paulo o ile a botša Bakriste bao ba bego ba dula kua Roma gore: “Tumelo e latela seo se kwelwego. Selo se se kwelwego le sona se tla ka lentšu le le lego mabapi le Kriste.” (Baroma 10:17) Re tiiša tumelo ya rena ka go ithuta Beibele, e sego ka go ya ditirelong tša bodumedi tšeo di sa dumelelanego le Mangwalo, le ge ditirelo tšeo di ka bonagala eka di a kgahliša. Re swanetše go ba le tumelo e tiilego yeo e theilwego therešong e nepagetšego ka gobane “ka ntle le tumelo go kgahliša Modimo gabotse ga go kgonege.” (Bala Baheberu 11:1, 6.) Ka baka leo, ga go hlokagale gore re bone mohlolo wo o tšwago legodimong go re kgonthišetša gore re hweditše therešo. Go ithuta dithuto tša ka Beibeleng tšeo di tiišago tumelo go tla re kgonthišetša gore re hweditše therešo e bile gwa tloša dipelaelo le ge e le dife tšeo re ka bago re na le tšona.

13. Ke’ng seo se ilego sa dira gore batho ba bantši ba se ke ba latela Jesu?

¹³ Mehleng ya Jesu, barutiwa ba Johane Mokolobetši ba be ba gakanegile ka gobane barutiwa ba Jesu ba be ba sa ikone dijo. Jesu o ile a  hlalosa gore go be go se na lebaka la gore barutiwa ba gagwe ba ikone dijo ge yena a sa phela. (Mat. 9:14-17) Eupša Bafarisei le batho ba bangwe bao ba bego ba ganetša Jesu ba ile ba mo sola ka gobane o be a sa latele setšo sa bona. Ba ile ba galefa kudu ge a be a alafa balwetši ka Sabatha. (Mar. 3:1-6; Joh. 9:16) Ba be ba ikgantšha ka gore ba boloka Sabatha mola ba be ba se na bothata bja go rekiša dilo ka tempeleng. Ba be ba galefile kudu ge Jesu a be a ba kgalema. (Mat. 21:12, 13, 15) Le gona batho bao Jesu a bego a ba ruta sinagogeng ya kua Natsaretha ba ile ba galefa kudu ge Jesu a be a ba swantšha le Baisiraele go ba bontšha gore ba be ba sa naganele batho ba bangwe e bile ba se na tumelo. (Luka 4:16, 25-30) Batho ba bantši ba ile ba gana go latela Jesu ka gobane o be a sa dire dilo tšeo ba bego ba nagana gore o tla di dira.—Mat. 11:16-19.

14. Ke ka baka la’ng Jesu a ile a sola ditšo tša batho tšeo di bego di sa dumelelane le Mangwalo?

¹⁴ Mangwalo a re’ng? Jehofa o ile a diriša moporofeta Jesaya go ngwala gore: “Batho ba ba mpatamela ka molomo e bile ba ntagafatša ka melomo feela mola dipelo tša bona di le kgole le nna gomme go ithuta ga bona ditaelo tša batho ba go tšea e le go mpoifa.” (Jes. 29:13) Jesu o be a dira gabotse ge a be a sola ditšo tša batho tšeo di bego di sa dumelelane le Mangwalo. Batho bao ba bego ba nagana gore melao yeo ba e ipeetšego yona le ditšo tša bona di bohlokwa go feta seo Beibele e se bolelago, ba ile ba gana go kwa Jehofa le Jesu e lego Mesia yo a bego a mo romile.

15. Ke ka baka la’ng batho ba bantši lehono ba sa rate Dihlatse tša Jehofa?

¹⁵ Na bothata bjo bo swanago bo gona lehono? Ee. Batho ba bantši ba galefa kudu ge Dihlatse tša Jehofa di sa nyake go ba le bona ge ba keteka meletlo yeo e sa dumelelanego le Mangwalo ya go swana le matšatši a matswalo le Keresemose. Batho ba bangwe ba galefa kudu ge Dihlatse tša Jehofa di sa be gona meletlong ya setšhaba goba di sa latele mekgwa ya go boloka bahu yeo e sa dumelelanego le Mangwalo. Batho bao ba galefišwago ke Dihlatse tša Jehofa ka baka la mabaka ao re sa tšwago go bolela ka ona, ba ka ba ba tloga ba nagana gore bona ba hlankela Modimo ka tsela yeo a e amogelago. Eupša ba ka se kgone go kgahliša Modimo ge e ba ba kgetha go latela ditšo tša batho go e na le go latela dithuto tše di kwagalago tšeo di lego ka Beibeleng.—Mar. 7:7-9.

16. Go ya ka Psalme 119:97, 113, 163-165, re swanetše go rata eng gomme re hloye eng?

¹⁶ Re ka dira’ng gore re se ke ra šitišwa go latela Jesu? Re swanetše go rata melao ya Jehofa le melao ya gagwe ya motheo ka pelo ka moka. (Bala Psalme 119:97, 113, 163-165.) Ge re rata Jehofa, re ka se dumele go latela ditšo tšeo di sa mo kgahlišego. Le gona re ka se dumelele selo se re šitiša go dula re rata Jehofa.

17. Batho ba bantši mehleng ya Jesu ba be ba letetše gore Mesia a dire’ng?

¹⁷ Batho ba bantši ba mehleng ya Jesu ba be ba nyaka gore mmušo o fetošwe ka yona nako yeo. Ba be ba letetše gore Mesia a ba lokolle mmušong wo o bego o ba gateletše wa Baroma. Eupša Jesu o ile a gana ge ba be ba leka go mo dira kgoši ya bona. (Joh. 6:14, 15) Baperisita le batho ba bangwe ba be ba tšhaba gore Jesu o be a tlo leka go fetoša mmušo. Ge go be go ka ba bjalo, Baroma ba be ba tlo galefa gomme ba amoga baperisita matla ao ba bego ba ba neile ona. Ka baka la ge Bajuda ba bantši ba be ba tshwenyegile ka ditaba tša dipolotiki goba tša mmušo, ba ile ba se latele Jesu.

18. Ke diporofeto dife tša ka Beibeleng tša mabapi le Mesia tšeo batho ba bantši ba ilego ba se di ele hloko?

¹⁸ Mangwalo a re’ng? Le ge diporofeto tše dintši di ile tša bolela e sa le pele gore mafelelong Mesia o be a tla fenya, diporofeto tše dingwe di bontšha gore o be a tla swanelwa ke go hwela  dibe tša rena pele. (Jes. 53:9, 12) Ka gona, ke ka baka la’ng Bajuda ba be ba na le dikgopolo tše di fošagetšego ka Mesia? Ka gobane batho ba bantši ba mehleng ya Jesu ba be ba se na taba le diporofeto tšeo di bego di sa tshepiše go ba rarollela mathata a bona ka yona nako yeo.—Joh. 6:26, 27.

19. Ke dikgopolo dife tše di fošagetšego tšeo di dirilego gore batho ba bantši lehono ba se ke ba amogela molaetša wa rena?

¹⁹ Na bothata bjo bo swanago bo gona lehono? Ee. Batho ba bantši lehono ba gana go amogela molaetša wa rena ka ge re sa tsenatsene ditabeng tša dipolotiki. Ba nyaka gore re boute ge go na le dikgetho. Eupša re a tseba gore ge re ka kgetha motho gore a re buše, re tla be re gana go bušwa ke Jehofa. (1 Sam. 8:4-7) Le gona batho ba ka ba ba nagana gore re swanetše go aga dikolo, dipetlele le go dira mediro e mengwe ya go thuša setšhaba. Ga ba nyake go theetša molaetša wa rena ka gobane re šoma ka thata go ba botša ditaba tše dibotse go e na le go leka go rarolla mathata ao a lego gona mo lefaseng.

20. Go ya ka seo Jesu a se boletšego go Mateo 7:21-23, ke’ng seo e swanetšego go ba sa bohlokwa kudu go rena?

²⁰ Re ka dira’ng gore re se ke ra šitišwa go latela Jesu? (Bala Mateo 7:21-23.) Selo sa bohlokwa kudu go rena ke go dira modiro woo Jesu a re laetšego gore re o dire. (Mat. 28:19, 20) Ga se ra swanelwa go šitišwa ke go leka go rarolla mathata a lefase le. Re rata baagišani ba rena e bile re tshwenyegile ka mathata a bona, eupša re a tseba gore tsela e kaonekaone ya go ba thuša ke ka go ba ruta ka Mmušo wa Modimo le go ba thuša go ba le segwera se sebotse le Jehofa.

21. Re swanetše go ikemišetša go dira’ng?

²¹ Sehlogong se re ithutile ka dilo tše nne tšeo di ilego tša dira gore batho ba bantši ba mehleng ya Jesu ba se ke ba mo latela. Dilo tšeo di ka dira gore batho ba bangwe lehono ba gane molaetša wa rena. Eupša na tše ke tšona feela dilo tšeo di ka re šitišago go latela Jesu? Aowa. Sehlogong se se latelago re tlo ithuta ka dilo tše dingwe tše nne tšeo di ka šitišago motho go latela Jesu. Eka re ka ikemišetša go se dumelele selo se re šitiša go latela Jesu le go ikemišetša go tiiša tumelo ya rena!