1. Ke mohlala ofe woo Jesu a ilego a o beela balatedi ba gagwe, gona ba ile ba arabela bjang? (Bona seswantšho sa letlakala la ka ntle.)

GE Jesu a be a le mo lefaseng o ile a bolela ditaba tše dibotse ka mafolofolo gomme o be a nyaka gore barutiwa ba gagwe le bona ba se ke ba fela matla a go bolela ditaba tše dibotse. (Joh. 4:35, 36) Ge Jesu a be a na le barutiwa ba gagwe, ba be ba bolela ditaba tše dibotse ka mafolofolo. (Luka 10:1, 5-11, 17) Barutiwa ba Jesu ba ile ba fela matla a go bolela ditaba tše dibotse ka morago ga gore a swarwe le go bolawa. (Joh. 16:32) Ka morago ga gore Jesu a tsošwe bahung, o ile a kgothaletša barutiwa ba gagwe gore ba boele ba bolele ditaba tše dibotse. Le gona ka morago ga gore Jesu a boele legodimong, barutiwa ba gagwe ba ile ba tšwela pele ba bolela ditaba tše dibotse ka mafolofolo moo manaba a bona a ilego a ba galefela gomme a re: “Bonang kamoo le tladitšego Jerusalema ka thuto ya lena.”—Dit. 5:28.

2. Jehofa o re thušitše bjang gore re atlege ge re bolela ditaba tše dibotse?

² Jesu o be a dutše a hlahla modiro wa go bolela ditaba tše dibotse woo o bego o dirwa ke Bakriste ba pele, gomme Jehofa o ile a o šegofatša ka gore barutiwa ba oketšege. Ka mohlala, ka Pentekoste ya 33 C.E., go ile gwa kolobetšwa batho ba e ka bago ba 3 000. (Dit. 2:41) Le gona palo ya barutiwa e ile ya tšwela pele e oketšega kudu. (Dit. 6:7) Jesu o boletše e sa le pele gore mehleng ya bofelo batho ba bantši ba be ba tlo amogela ditaba tše dibotse.—Joh. 14:12; Dit. 1:8.

3-4. Ke ka baka la’ng go ka ba thata go bolela ditaba tše dibotse mafelong a mangwe, gona re tlo ithuta’ng sehlogong se?

³ Ka moka ga rena re nyaka go dula re na le mafolofolo a go bolela ditaba tše dibotse. Mafelong a mangwe go bonolo go dira bjalo. Ka baka la’ng? Ka gobane batho ba bantši ba nyaka go ithuta Beibele moo ba bangwe ba swanelwago ke go leta go fihlela go e ba le motho yoo a tlago go ithuta Beibele le bona. Eupša mafelong  a mangwe ga go bonolo go bolela ditaba tše dibotse ka gobane batho ga ba hwetšagale magaeng a bona, gomme bao ba hwetšagalago ga ba thabele go theetša molaetša wa rena.

⁴ Ge e ba o dula lefelong leo go lego thata go bolela ditaba tše dibotse, ditšhišinyo tšeo re tlago go ithuta ka tšona sehlogong se di ka go thuša. Re tlo ithuta gore ba bangwe ba dirile eng gore ba kgone go bolela le batho ba bantši tšhemong ya gabo bona. Re tlo ithuta le gore re ka dira eng gore re se ke ra fela matla, go sa šetšwe gore batho ba theetša molaetša wa rena goba ga ba o theetše.

5. Ke mathata afe ao Bakriste ba bantši ba kopanago le ona ge ba bolela ditaba tše dibotse?

⁵ Bakriste ba bantši ba hwetša go le thata go hwetša batho ka magaeng a bona. Bagoeledi ba bangwe ba dula mafelong ao go nago le meago e mentši yeo go lego thata go tsena go yona yeo e šireleditšwego ke masekhurithi. Masekhurithi ao a ka gana ge batho ba tsena ge e ba ba se ba bitšwa ke motho yo a dulago kamoo. Bagoeledi ba bangwe ba ka tsena ka ntlo le ntlo ba sa šitišwe ke selo eupša ba hwetša batho ba sego kae ka gae. Le gona bagoeledi ba bangwe ba bolela ditaba tše dibotse magaeng le mafelong a kgole moo go dulago batho ba sego kae. Bagoeledi ba ka sepela nako e telele ba eya go bona motho o tee feela yoo go ka diregago gore ba ka se mo hwetše ka gae. Ge e ba re kopana le mathata a mohuta wo, ga se ra swanela go fela matla. Re ka fenya bjang mathata a e le gore re tle re kgone go bolela le batho ba bantši ge re le tšhemong?

6. Batho bao ba bolelago ditaba tše dibotse ba swana bjang le barei ba dihlapi?

⁶ Jesu o ile a swantšha mošomo wa go bolela ditaba tše dibotse le mošomo wa go rea dihlapi. (Mar. 1:17) Barei ba bangwe ba dihlapi ba ka šoma matšatši a mantši ba sa hwetše selo. Eupša ga ba fele matla, ba fetoša tsela yeo ba reago dihlapi ka yona. Ba fetoša nako le lefelo leo ba reago dihlapi go lona. Re ka dira diphetogo tša go swana le tšeo modirong wa go bolela ditaba tše dibotse. Ga bjale re tlo boledišana ka tše dingwe tša dilo tšeo re ka di lekago.

7. Go ka ba le mafelelo afe ge e ba re fetofetoša nako yeo re yago ka yona tšhemong?

⁷ Leka go fetofetoša nako yeo o yago ka yona tšhemong. Re ka kgona go boledišana le batho ba bantši ge e ba re eya go bona ka nako yeo ba hwetšagalago ka yona. Seo re se tsebago ke gore mafelelong batho ba swanetše gore ba boe ka gae. Bana babo rena ba bantši le dikgaetšedi ba hwetša go le bonolo go bolela ditaba tše dibotse thapama goba bošego ka gobane ke nako yeo batho ba bantši ba hwetšagalago. Go oketša moo, re ka hwetša mong wa ntlo a iketlile gomme a ka re fa nako ya gore re boledišane le yena. Goba mohlomongwe re ka thušwa ke go latela tšhišinyo yeo ngwanabo rena wa mogolo e lego David a e boletšego. O re ka morago ga gore yena le motho yo a sepelago le yena ba šome tšhemo ka nakonyana, ba boela malapeng ao ba sego ba hwetša batho. O re: “Ke makatšwa ke kamoo re bego re hwetša batho ba bantši magaeng a bona ge re boela la bobedi.” *

8. Re ka diriša bjang lengwalo la Mmoledi 11:6 modirong wa rena wa go bolela ditaba tše dibotse?

⁸ Ga se ra swanela go fela matla. Se ke seo re ithutago sona lengwalong la rena la sehlogo. (Bala Mmoledi 11:6.) David yo re boletšego ka yena pejana ga se a ka a fela matla. Lapeng le lengwe o ile a hwetša mong wa ntlo ka morago ga gore a boele ka makga a mantši a sa hwetše batho. Mong wa ntlo o be a thabela go ithuta Beibele gomme o ile a re: “Ke dutše mo mengwaga e ka bago e seswai gomme ga se gwa ka gwa tla Hlatse ya Jehofa mo lapeng la ka.” David o re: “Ke bone gore ge mafelelong re hwetša batho ka  magaeng a bona, gantši ba thabela go theetša molaetša wa rena.”

9. Ke’ng seo bagoeledi ba se dirilego gore ba bolele le batho bao go sego bonolo go ba hwetša magaeng a bona?

⁹ Leka go bolela ditaba tše dibotse lefelong le lengwe. Bagoeledi ba bangwe ba ile ba fetoša lefelo leo ba bolelago ditaba tše dibotse go lona e le gore ba bolele le batho bao go sego bonolo go ba hwetša ka gae. Ka mohlala, go bolela ditaba tše dibotse seterateng le go diriša diteroli go re thuša gore re kgone go bolela le batho bao go lego thata go ba hwetša ka gae goba bao ba dulago moo go nago le masekhurithi ao a sa re dumelelego go tsena. Se se thuša gore bagoeledi ba boledišane le batho bao ba sa hwetšagalego gabonolo. Le gona, bagoeledi ba bantši ba bone gore batho ga ba na bothata bja go boledišana le rena le go amogela dikgatišo tša rena ge re le diphakeng, mebarakeng le mafelong a kgwebo. Floiran yo e lego molebeledi wa tikologo kua Bolivia o re: “Re ya mafelong a kgwebo magareng ga iri ya pele le ya boraro mosegare ge batho bao ba rekišago ba tla be ba se ba swarega kudu. Gantši re ipshina ka go boledišana le bona e bile re thoma dithuto tša Beibele.”

10. Ke mekgwa efe e mengwe yeo re ka e dirišago go botša batho ditaba tše dibotse?

¹⁰ Leka mokgwa o mongwe. Ka mohlala, a re re o lekile go boledišana le motho ka makga a mmalwa ka gae. O lekile go mo etela ka dinako tša go se swane eupša wa se mo hwetše. Na go na le ditsela tše dingwe tšeo o ka hwetšago motho yoo ka tšona? Katarína o re: “Ke ngwalela bao ke sa ba hwetšego ka gae mangwalo gomme ka ba hlalosetša gore ke eng seo ke bego ke tlo boledišana le bona ka sona.” Ke’ng seo re ithutago sona mohlaleng wa gagwe? Re ithuta gore re swanetše go leka go diriša ditsela tše di fapafapanego gore re kgone go bolela le motho yo  mongwe le yo mongwe ka ditaba tše dibotse tšhemong ya gabo rena.

11. Ke ka baka la’ng batho ba bangwe ba sa nyake go theetša molaetša wa rena?

¹¹ Batho ba bangwe ga ba nyake go theetša molaetša wa rena. Ga ba bone bohlokwa bja go ithuta ka Modimo goba ka Beibele. Ga ba dumele gore Modimo o gona ka gobane ba bona mathata a mantši ao batho ba nago le ona mo lefaseng. Ga ba nyake go theetša molaetša wa Beibele ka gobane ba bona baruti ba bantši bao ba rego ba phela ka melao ya Beibele ba dira dilo tše dintši tše mpe. Ba bangwe ba dula ba tshwenyegile ka mešomo ya bona, malapa a bona le mathata a bona gomme ga ba nagane gore Beibele e ka ba thuša. Re ka dira’ng gore re dule re thabile ge batho bao re bolelago le bona ka ditaba tše dibotse ba sa bone bohlokwa bja seo re ba botšago sona?

12. Go diriša mantšu ao a lego go Bafilipi 2:4 go ka re thuša bjang ge re bolela le batho ditaba tše dibotse?

¹² Bontšha gore o tshwenyegile ka batho ba bangwe. Batho ba bantši bao ba bego ba sa nyake go kwa molaetša wa rena, ka morago ba ile ba nyaka go o kwa ka ge ba be ba bona gore re tloga re tshwenyegile ka bona. (Bala Bafilipi 2:4.) Ka mohlala, David yoo re boletšego ka yena pejana o re: “Ge motho a re ga ke nyake go theetša molaetša wa lena, ke tšea Beibele le dikgatišo ka di bea gomme ka re, ‘nka thabela go kwa gore ke ka baka la eng o ikwa ka tsela yeo.’” Batho ba kgona go bona ge e ba motho a tloga a tshwenyegile ka bona. Ba ka lebala seo re boletšego le bona ka sona, eupša ba ka se lebale ka tsela yeo re ilego ra ba bontšha gore re tloga re na le taba le bona. Le ge motho a sa nyake go re theetša ge re boledišana le yena ka ditaba tše dibotse, re swanetše go mmontšha gore re tloga re tshwenyegile ka yena. Re ka dira seo ka tsela yeo re itshwarago ka yona le ka go ba botho.

13. Re ka dira’ng gore motho yo mongwe le yo mongwe yoo re boledišanago le yena a thabele go kwa molaetša wa rena?

¹³ Re bontšha gore re tshwenyegile ka mong wa ntlo ge e ba re fetoša seo re bego re tlo bolela le yena ka sona gore re dumelelane le maemo a gagwe. Ka mohlala, na go na le seo se bontšhago gore go na le bana ka lapeng leo? Batswadi ba ka thabela go kwa keletšo ya Beibele ya gore ba ka godiša bana ba bona bjang le gore ba ka dira eng gore lapa la bona le dule le thabile. Na go na le dinotlelo tše dintši mojakong wa bona? Re ka kgetha go boledišana le mong wa ntlo ka bokebekwa bjo bo tletšego mo lefaseng bjoo bo dirago gore batho ba dule ba tšhogile, gomme mong wa ntlo a ka thabela go tseba gore nakong e tlago bokebekwa bo tlo fela. Nako e nngwe le e nngwe ge o hwetša batho bao ba thabelago go go theetša, ba thuše go bona gore ke bjang  keletšo ya Beibele e ka ba thušago. Katarína yoo re boletšego ka yena pejana o re: “Ke ikgopotša ka tsela yeo Beibele e ilego ya nthuša.” Ka baka leo, Katarína o kgodišegile ka seo a se bolelago gomme batho ba kgona go bona seo.

14. Go ya ka Diema 27:17, batho bao ba sepelago gotee tšhemong ba ka thušana bjang?

¹⁴ Hwetša thušo go ba bangwe. Paulo o rutile Timotheo go bolela ditaba tše dibotse le go ruta, a ba a mo kgothaletša gore le yena a rute ba bangwe. (1 Bakor. 4:17) Go swana le Timotheo, re ka ithuta go bao ba nago le phihlelo ka phuthegong. (Bala Diema 27:17.) Nagana ka mohlala wa ngwanabo rena Shawn. O ile a bula madibogo ka nakwana magaeng moo batho ba bantši ba bego ba sa nyake go fetoša madumedi a bona. Ke’ng seo se mo thušitšego gore a dule a thabile? O re: “Neng le neng ge go be go kgonega, ke be ke sepela le motho yo mongwe tšhemong. Ge re be re se ka legaeng la motho, re be re fetša nako re thušana kamoo re ka kaonefatšago tsela ya rena ya go ruta. Ka mohlala, re be re boledišana ka seo mong wa ntlo a se boletšego le ka tsela yeo re arabetšego ka gona. Ke moka ra boledišana ka seo re tlago go se dira nakong e tlago ge mong wa ntlo a ka bolela le rena ka tsela yeo.”

15. Ke ka baka la’ng go rapela go le bohlokwa ge re eya tšhemong?

¹⁵ Rapela Jehofa gore a go thuše. Mo kgopele gore a go thuše nako e nngwe le e nngwe ge o bolela ditaba tše dibotse. Ge nkabe Jehofa a be a sa re thuše ka moya wa gagwe o mokgethwa, ga go le o tee wa rena yo a bego a ka kgona go bolela ditaba tše dibotse. (Ps. 127:1; Luka 11:13) Bolela ka go lebanya gore ke eng seo o se kgopelago ge o rapela Jehofa gore a go thuše. Ka mohlala, mo kgopele gore a go thuše go hwetša batho bao ba nyakago go re theetša le go ithuta ka yena. Ke moka o swanetše go dira sohle seo o ka se kgonago gore o bolele le motho yo mongwe le yo mongwe yoo o kopanago le yena.

16. Ke ka baka la’ng yo mongwe le yo mongwe wa rena a swanetše go ithuta Beibele gore a tle a kgone go atlega modirong wa go bolela ditaba tše dibotse?

¹⁶ Iphe nako ya go ithuta Beibele. Beibele e re: “Le itlhatselele thato e botse le e amogelegago le e phethegilego ya Modimo.” (Baroma 12:2) Ge re ithuta Beibele, re tlo tseba Modimo gakaone gomme ge re bolela le ba bangwe ka yena ba tlo bona gore re kgodišegile ka seo re ba botšago sona. Katarína yoo re boletšego ka yena pejana o re: “Ke ile ka lemoga gore ke swanetše go ithuta Beibele e le gore ke tiiše tumelo ya ka. Ka gona ke ile ka ithuta ka mo go tseneletšego ka bohlatse bjo bo bontšhago gore go na le Mmopi, gore Beibele ke Lentšu la Modimo le gore Modimo o na le mokgatlo wo o mo emelago lehono.” Katarína o re go ithuta Beibele go ile gwa tiiša tumelo ya gagwe le go dira gore a dule a thabile ge a botša ba bangwe ditaba tše dibotse.

17. Ke ka baka la’ng Jesu a ile a se fele matla ge a be a bolela ditaba tše dibotse?

¹⁷ Jesu ga se a ka a fela matla a go bolela ditaba tše dibotse le ge ba bangwe ba be ba sa nyake go theetša molaetša wa gagwe. Ka baka la’ng? Ka gobane o be a tseba gore go na le batho ba bantši bao ba nyakago go ithuta therešo gomme o be a nyaka go thuša ba bantši kamoo go ka kgonegago. E bile o be a tseba gore go be go na le batho bao ba bego ba ka se mo theetše mathomong, eupša ka morago ba be ba tla mo theetša. Nagana ka seo se ilego sa direga ka lapeng la gabo. Mengwageng e meraro le seripa yeo Jesu a ilego a e fetša a bolela ditaba tše dibotse, ga go le o tee wa bana babo yoo e ilego ya morutiwa wa gagwe. (Joh. 7:5) Eupša ka morago ga gore a tsošwe bahung, bana babo e ile ya ba Bakriste.—Dit. 1:14.

18. Ke ka baka la’ng re tšwela pele re botša batho ditaba tše dibotse?

¹⁸ Ga re tsebe gore ke bomang bao mafelelong  ba tlago go amogela seo re ba rutago sona. Batho ba bangwe ba tšea nako e telele gore ba amogele therešo. Ge batho bao ba sa nyakego go theetša molaetša wa rena ba bona tsela e botse yeo re itshwerego ka yona, seo se ka dira gore mafelelong ‘ba tagafatše Modimo.’—1 Pet. 2:12.

19. Go ya ka Bakorinthe ba Pele 3:6, 7, ke’ng seo re swanetšego go se tseba?

¹⁹ Le ge re bjala e bile re nošetša, re swanetše go gopola gore Modimo ke yena yo a godišago. (Bala 1 Bakorinthe 3:6, 7.) Ngwanabo rena Getahun yoo a hlankelago kua Ethiopia o re: “Ke feditše mengwaga ya ka godimo ga e 20 ke le Hlatse ke nnoši moo ke dulago. Eupša ga bjale go na le bagoeledi ba 14. Ba 13 ba kolobeditšwe, go akaretša mosadi wa ka le bana ba ka ba bararo. Gantši dibokeng re ba ba 32.” Getahun o thabišwa ke gore o ile a tšwela pele a bolela ditaba tše dibotse a sa fele pelo ge a be a letile gore Jehofa a gogele bao ba nyakago go mo tseba ka mokgatlong wa gagwe.—Joh. 6:44.

20. Re swana bjang le batho bao ba hlakodišago batho ge go na le kotsi?

²⁰ Jehofa o bona motho yo mongwe le yo mongwe a le bohlokwa go yena. O re file tokelo ya go šoma le Morwa wa gagwe gore re kgoboketše batho ba ditšhaba ka moka pele bofelo bja tshepedišo ye bo ka tla. (Hag. 2:7) Re ka swantšha mošomo wa rena wa go bolela ditaba tše dibotse le mošomo wa go hlakodiša batho. Re swana le bašomi bao ba hlakodišago batho bao ba kgakgetšwego ka mmaeneng. Le ge bao ba šomago go hlakodiša batho ba ka hwetša batho ba sego kae ba sa phela, eupša mošomo wa bona o bohlokwa kudu. Re ka swantšha se le seo re se dirago ge re bolela ditaba tše dibotse. Ga re tsebe gore ke batho ba bakae bao ba sa tlago go hlakodišwa lefaseng le la Sathane. Eupša Jehofa a ka diriša yo mongwe le yo mongwe wa rena go ba thuša. Andreas yoo a dulago Bolivia o re: “Ke a tseba gore ge motho a ithuta ditherešo gomme a kolobetšwa, ke ka gobane batho ba bantši ba ile ba šoma gotee go mo thuša.” Eka re ka lebelela modiro wa go bolela ditaba tše dibotse go swana le Andreas. Ge e ba re ka dira bjalo, Jehofa o tlo re šegofatša gomme re tlo thabela go botša batho ditaba tše dibotse.